རྒྱ་ནག་གཞུང་གིས་རྨ་སྟོད་རྫོང་ལ་ས་ཡོམ་གྱི་གནོད་སྐྱོན་ཐེབས་པར་འཛུགས་སྐྲུན་ལས་གཞི་ལ་ཁ་གཡར་ནས་གྲྭ་བཙུན་ཚོར་འདོད་པ་ཡོད་མེད་ལ་མ་ལྟོས་པར་མགོ་ལོག་ལུང་སྐྱ་དགོན་དང་བཙུན་དགོན་གྱི་གྲྭ་ཤག་གཏོར་བཤིག་གིས་ཤུལ་དུ་ལྕགས་ཤོག་གི་སྡོད་ཁང་རེ་གསར་བཟོ་བྱེད་བཞིན་ཡོད་འདུག
དེ་རིང་འདི་ག་གསར་ཁང་ལ་བོད་ནས་ཁུངས་ལྡན་གནས་ཚུལ་འབྱོར་གསལ་ལྟར་ན། རྒྱ་ནག་གཞུང་གིས་འདི་ལོའི་རྨ་སྟོད་རྫོང་གི་ས་ཡོམ་གནོད་ཐེབས་ལས་གཞི་འཛུགས་སྐྲུན་བྱེད་ཀྱི་ཡིན་སྐོར་བརྗོད་དེ། གྲྭ་བཙུན་ཚོར་འདོད་པ་ཡོད་མེད་ལ་མ་ལྟོས་པར་མགོ་ལོག་ལུང་སྐྱ་དགོན་དང་བཙུན་མའི་དགོན་པ་ཞིག་གི་གྲྭ་བཙུན་ཚོའི་གྲྭ་ཤག་གཏོར་བཤིག་བཏང་བ་དང་། ཤུལ་དུ་ལྕགས་ཤོག་གི་སྡོད་ཁང་རེ་གསར་བཟོ་བྱས་ཡོད་པ་མ་ཟད། འཛུགས་སྐྲུན་ལས་གཞི་དེ་ཉིད་ལོ་གཉིས་ནས་གསུམ་བར་འགྲོ་དགོས་སྟབས། གྲྭ་བཙུན་ཚོ་དེའི་རིང་ལྕགས་ཤོག་ཁང་པའི་ནང་སྡོད་དགོས་ལུགས་རྗོད་བཞིན་ཡོད་ཀྱང་། གྲྭ་བཙུན་ཚོས་ལས་གཞི་དེ་ཡོངས་སུ་བསྒྲུབས་རྗེས་དགོན་པ་དེ་དག་བསྐྱར་གསོ་འདོད་པ་ཁེངས་པ་ཞིག་བྱེད་ཀྱི་ཡོད་མེད་ཐད་བློ་ཚབས་ཡོད་འདུག
འབྲེལ་ཡོད་གནས་ཚུལ་མཁོ་སྤྲོད་པས། ད་ལྟའི་ཆར་གྲྭ་ཤག་ཁག་བཤིག་ནས་ཟླ་བ་གཅིག་ཙམ་སོང་ཡོད་པ་དང་། རྒྱ་ནག་གཞུང་གིས་སླར་ཡང་དགོན་པ་གྲྭ་ཤག་དང་འདུ་ཁང་སོགས་སྲ་ཚུགས་ཐུབ་པ་ཞིག་འཛུགས་སྐྲུན་བྱ་རྒྱུ་ཡིན་སྐོར་བརྗོད་ཡོད་ན་ཡང་། འཛུགས་སྐྲུན་ཡོངས་སུ་ལེགས་འགྲུབ་ནམ་འབྱུང་མིན་སོགས་གསལ་ཁ་གང་ཡང་མེད་སྟབས། ལྕགས་ཤོག་ཁང་པའི་ནང་དགུན་ཟླ་ཧྲིལ་པོར་བསྡད་དགོས་ཚེ་དཀའ་ངལ་ཆེན་པོ་འཕྲད་རྒྱུ་ཡིན་པ་མ་ཟད། གྲྭ་བ་མང་པོ་ཞིག་གི་བློའི་ནང་རྗེས་སུ་དགོན་པའི་འཛུགས་སྐྲུན་སོགས་དེ་སྔ་ལྟ་བུ་ཡོང་མིན་ཐད་རང་བཞིན་གྱིས་དོགས་གཞི་ཆེན་པོ་ཞིག་ཏུ་ཆགས་བསྡད་ཡོད་སྐོར་བརྗོད་བྱུང་།
ཡང་ཁོས་གིས། སྤྱིར་འཛུགས་སྐྲུན་གྱི་ལས་གཞི་དེ་ཉིད་དགོན་པ་ཁག་ཁོ་ན་ལ་མ་ཡིན་པར། གྲོང་སྡེ་ཁག་གི་སྡོད་ཁང་རྣམས་ལའང་དེ་བཞིན་ས་ཡོམ་གྱི་གནོད་འཚེ་ཕོགས་ཡོད་མེད་ལ་མ་ལྟོས་པར་གཏོར་བཤིག་བྱེད་བཞིན་འདུག ས་འགུལ་གྱི་གནོད་འཚེ་མ་ཕོགས་ཀྱང་ཁང་ཁྱིམ་གཏོར་བཤིག་བྱེད་པར་ཡུལ་མི་མང་པོ་ཞིག་ལ་འདོད་མོས་མེད་ཀྱང་། རྒྱ་གཞུང་གིས་སྤྱི་ཡོངས་ནས་ས་ཡོམ་གནོད་པ་བསྐྱར་གསོ་ཞེས་པའི་མིང་བྱང་གི་འོག་ནས་ཁང་ཁྱིམ་གཏོར་བཤིག་གི་ལས་འགུལ་མུ་མཐུད་མཇུག་སྐྱོང་བྱེད་བཞིན་ཡོད་པ་མ་ཟད། ས་ཡོམ་གྱི་བསྐྱར་གསོའི་ལས་འགུལ་དེ་ལམ་ལྷོངས་ཡོང་ཆེད། སྤྱི་ཚོགས་དྲ་ལམ་ཁག་ཏུ་པར་རིས་དང་བརྙན་རིགས་གང་བྱུང་སྤེལ་མི་ཆོག་བརྗོད་དེ་ཡུལ་མི་ཚོར་དམ་དྲགས་ཤུགས་ཆེན་བྱེད་བཞིན་ཡོད་ལུགས་བརྗོད་བྱུང་།
འདི་ལོའི་ཕྱི་ཟླ་ ༥ ཚེས་ ༢༢ ཉིན་མགོ་ལོག་ཁུལ་རྨ་སྟོད་རྫོང་ཁོངས་སུ་ཚད་རིམ་ ༧་༤ ཅན་གྱི་ས་ཡོམ་བརྒྱབས་རྗེས། འདི་གའི་གསར་ཁང་ལ་ས་ཡོམ་དང་འབྲེལ་བའི་གནས་ཚུལ་རིམ་པ་འབྱོར་བ་དང་། མགོ་ལོག་ཁུལ་གྱི་ས་འགུལ་དེ་མགོ་ལོག་རྨ་སྟོད་རྫོང་དང་རྨ་ཆེན་རྫོང་། པདྨ་རྫོང་། དགའ་བདེ་རྫོང་། དར་ལག་རྫོང་། ཆུ་དམར་ལེབ་རྫོང་། ཁྲི་འདུ་རྫོང་བཅས་རྫོང་བདུན་དང་ཡུལ་འཚོ་བཞི་བཅུ་བཅས་ཀྱི་ནང་བྱུང་སྟེ། ཁྱོན་མི་གྲངས་ཁྲི་བདུན་དང་ལྔ་སྟོང་ལྷག་ལ་གནོད་སྐྱོན་ཐེབས་ཡོད་པ་རེད་ལ། སྐབས་དེར་རྒྱ་ནག་གཞུང་གིས་ས་ཡོམ་གྱི་གནས་ཚུལ་སྐོར་ལ་དམ་དྲག་དང་སྦས་གསང་སོགས་ཤུགས་ཆེར་བྱས་ཡོད་པ་རེད།
རྒྱ་གར་ལྷོ་ཕྱོགས་གསར་འགོད་པ་དོན་འགྲུབ་བཀྲ་ཤིས།
