རྒྱ་ནག་རྒྱལ་ཡོངས་ཀྱི་ལུས་རྩལ་འགྲན་སྡུར་ནང་བོད་མི་མཉམ་ཞུགས་མཁན་ལོ་རེ་ནས་ཇེ་མང་དུ་འགྲོ་ཡི་ཡོད་ཅིང་། འདི་ལོའི་རྒྱལ་ཡོངས་འགྲན་སྡུར་ཁྲོད་བོད་མདོ་དབུས་ཁམས་གསུམ་གྱི་མི་བཅུ་ནས་གསེར་དངུལ་ཟངས་གསུམ་བཅས་ཀྱི་གཟེངས་རྟགས་བླངས་ཡོད་འདུག
སྐབས་བཅུ་བཞི་པའི་རྒྱ་ནག་རྒྱལ་ཡོངས་ཀྱི་རྒྱུག་མཆོང་འཕེན་གསུམ་གྱི་ལུས་རྩེད་འགྲན་ཚོགས་ཚོགས་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༦ ཉིན་སྐྱེས་པའི་རྒྱང་རྒྱུག་འགྲན་སྡུར་གྱི་ཁྲོད་བོད་ཀྱི་ལུས་རྩལ་བ་རིན་ཆེན་དོན་གྲུབ་ཀྱིས་ཆུ་ཚོད་ ༢ དང་སྐར་མ་ ༡༤ ཡི་གྲུབ་འབྲས་བླངས་ཏེ་གསེར་གྱི་རྟགས་མ་ཐོབ་ཡོད་པ་དང་། བོད་ཀྱི་ལུས་རྩལ་བ་བཀྲ་ཤིས་ཚེ་རིང་གིས་སྐྱེས་པའི་སྨི་ ༣༠༠༠ ཅན་གྱི་བཀག་ལྡན་རྒྱང་རྒྱུག་ཁྲོད་སྐར་མ་ ༨ དང་སྐད་ཆ་ ༤༩ ལྷག་གི་གྲུབ་འབྲས་བླངས་ཏེ་ཨང་གཉིས་པའི་དངུལ་གྱི་རྟགས་མ་ཐོབ་ཡོད་པ་རེད།
ཡང་ཟླ་འདི་ཚེས་ ༢༡ ཉིན་གྱི་ཕྱི་དྲོར་རྟ་རྩལ་གྱི་མཉམ་སྡེབ་འགྲན་སྡུར་གྱི་ཁྲོད་བོད་ཀྱི་ལུས་རྩལ་བ་སྤེན་པ་ཚེ་རིང་དང་། སྐལ་བཟང་ཕུན་ཚོགས། བཀྲ་ཤིས། བསྟན་འཛིན་བློ་བརྟན་བཅས་ཀྱིས་ཨང་དང་པོའི་གསེར་གྱི་རྟགས་མ་བླངས་ཡོད་པ་དང་། མི་སྒེར་གྱི་རྟ་རྩལ་འགྲན་སྡུར་གྱི་ཁྲོད་བོད་ལྗོངས་རུ་ཁག་ཟེར་བ་དེའི་བོད་རིགས་ལུས་རྩལ་བ་སྐལ་བཟང་ཕུན་ཚོགས་ཀྱིས་ཀྱང་མཉམ་ཞུགས་བྱས་ཏེ། ཨང་གསུམ་པ་བླངས་ནས་ཟངས་ཀྱི་རྟགས་མ་ཐོབ་ཡོད་པ་རེད།
དེ་བཞིན་ཟླ་འདིའི་ཚེས་ ༢༤ ཉིན་བོད་ཀྱི་ལུས་རྩལ་བ་ཆོས་དབྱིངས་སྐྱིད་ཀྱིས། བུད་མེད་ཀྱི་སྤྱི་ལེ་ ༢༠ ཅན་གྱི་འདུར་རྒྱུག་ཁྲོད་དུ་ཆུ་ཚོད་ ༡ དང་སྐར་མ་ ༢༧ ལྷག་ཙམ་ནང་ཨང་གཉིས་པའི་གྲུབ་འབྲས་བླངས་ཏེ་དངུལ་གྱི་རྟགས་མ་ཐོབ་ཡོད་པ་དང་། ཕྱི་ཚེས་ ༢༥ ཉིན་རྐང་ཚ་ནས་ཡིན་པའི་བོད་ཀྱི་ལུས་རྩལ་བ་བཀྲ་ཤིས་གཡང་འབུམ་གྱིས། སྐྱེས་པའི་སྤྱི་ལེ་ ༥༠ ཅན་གྱི་འདུར་རྒྱུག་ཁྲོད་ཚུ་ཚོད་ ༣ དང་སྐར་མ་ ༤༨ རིང་གི་གྲུབ་འབྲས་བླངས་ཏེ། ཨང་རིམ་གསུམ་པའི་ཟངས་ཀྱི་རྟགས་མ་ཐོབ་ཡོད་པ་རེད་འདུག
ཉེ་སྔོན་བོད་ཀྱི་རྒྱང་རྒྱུག་པ་སྟོབས་རྒྱལ་ལགས་ཀྱིས་སྐྱེས་པའི་སྨི་ ༡༠༠༠༠ དང་སྨི་ ༥༠༠༠ ཅན་གྱི་རྟིང་རྩོད་འགྲན་སྡུར་ཁྲོད་ཨང་དང་པོ་བླངས་ཡོད་ལ། ཁོང་གིས་རྒྱ་ནག་རྒྱལ་ཡོངས་ནས་ལོ་གཉིས་བསྟུན་མར་ཨང་རིམ་དང་པོའི་གསེར་གྱི་རྟགས་མ་བླངས་ཡོད་འདུག གཞན་ཡང་བོད་རང་སྐྱོང་ལྗོངས་ཀྱི་བུད་མེད་རུ་ཁག་གི་ལུས་རྩལ་བ་པདྨ་མ་གཡུ་སྒྲོན་ལགས་ཀྱིས། རྒྱ་ནག་རྒྱལ་ཡོངས་ཀྱི་ལུས་རྩལ་འགྲན་ཆོགས་སྟེང་བྲག་འཛེགས་འགྲན་སྡུར་ཁྲོད་ཨང་གསུམ་པ་ཐོབ་སྟེ། ཁོང་མོར་ཟངས་ཀྱི་རྟགས་མ་ཐོབ་ཡོད་པ་རེད་འདུག
རྒྱ་ནག་གི་རྒྱལ་ཡོངས་ལུས་རྩལ་འགྲན་སྡུར་ཁྲོད་བོད་མི་ལུས་རྩལ་བ་མཉམ་ཞུགས་གནང་མཁན་ལོ་རེ་བཞིན་ཇེ་མང་དུ་འགྲོ་ཡི་ཡོད་པ་ལྟར། འདི་ལོའི་རྒྱ་ནག་རྒྱལ་ཡོངས་ཀྱི་མཆོང་རྒྱུག་འཕེན་གསུམ་གྱི་ལུས་རྩལ་འགྲན་སྡུར་ཁྲོད། ད་བར་བོད་ཀྱི་ལུས་རྩལ་པ་རྣམས་ལ་གསེར་གྱི་རྟགས་མ་ ༣ དང་། དངུལ་གྱི་རྟགས་མ་ ༢། ཟངས་ཀྱི་རྟགས་མ་ ༣ བཅས་ཐོབ་ཡོད་པ་རེད།
དཔལ་ལྡན།
