རྒྱ་ནག་གཞུང་གིས་དགེ་འདུན་པ་ཐབས་མཁས་རྒྱ་མཚོ་ལགས་བཙོན་འཇུག་གི་དུས་ཡུན་མ་ཚང་གོང་ནས་ཀློད་གྲོལ་བཏང་ཡོད་ཀྱང་། ཁོང་གི་གཟུགས་གཞིའི་གནས་སྟངས་སོགས་གསལ་ཁ་གང་ཡང་ཤེས་རྟོགས་ཐུབ་ཀྱི་མི་འདུག
འདི་གའི་གསར་འགོད་པས་འབྲེལ་ཡོད་བོད་མི་ཁག་ཅིག་ལ་བཀའ་འདྲི་ཞུས་ཏེ་རྒྱུས་ལོན་བྱུང་བའི་གནས་ཚུལ་ལྟར་ན། ཕྱི་ལོ་ ༢༠༠༨ ལོར་རྒྱ་ནག་གཞུང་གིས་བླ་བྲང་ས་བྱི་ཞི་རྒོལ་ཆེན་མོའི་ནང་མཉམ་ཞུགས་བྱས་པའི་ཉེས་མིང་འོག་འཛིན་བཟུང་བཀག་ཉར་བྱས་ཏེ། ལོ་བཅོ་ལྔ་ཡི་བཙོན་འཇུག་ཁྲིམས་ཐག་བཅད་པ་དང་ལོ་ ༥ ཡི་ཆབ་སྲིད་ཀྱི་ཁེ་དབང་ཕྲོག་ཡོད་པའི་དགེ་འདུན་པ་ཐབས་མཁས་རྒྱ་མཚོ་ལགས་ཟླ་འདིའི་ཟླ་དཀྱིལ་ཙམ་ལ་བཙོན་གྲོལ་ཐོབ་ཡོད་ཀྱང་། བཙོན་འཇུག་དུས་ཡུན་ལོ་གཉིས་ཀྱི་ཚང་མེད་པར་ཁོང་བཙོན་གྲོལ་བཏང་དགོས་དོན་དང་ད་ལྟ་ཁོང་ལ་རང་དབང་ཆ་ཚང་ཐོབ་ཡོད་མེད་དང་གཟུགས་གཞིའི་གནས་སྟངས་སོགས་ག་འདྲ་ཡོད་མེད་ཤེས་རྟོགས་ཐུབ་ཀྱི་མི་འདུག་ལ། ཕྱི་ལོ་ ༢༠༡༩ ལོར་རྒྱ་ནག་གི་བཙོན་འོག་ནས་མནར་གཅོད་ཚད་མེད་མྱངས་ཡོད་སྟབས། སྐབས་དེ་དུས་ནས་གྲྭ་ཐབས་མཁས་ལགས་ཀྱི་མིག་གཉིས་དང་གཟུགས་གཞིའི་གནས་སྟངས་ཧ་ཅང་སྐྱོ་བོ་ཆགས་ཡོད་པ་འདི་གའི་གསར་འགོད་པས་ཤེས་རྟོགས་བྱུང་ཡོད།
ཡང་འདི་གའི་གསར་འགོད་པས་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ་དགེ་འདུན་པ་ཐབས་མཁས་རྒྱ་མཚོ་ལགས་ཀྱི་གཟུགས་གཞིའི་གནས་སྟངས་སོགས་ཀྱི་སྐོར་ལ་དྲིས་སྐབས། དགེ་འདུན་པ་ཐབས་མཁས་རྒྱ་མཚོ་ལགས་སུ་རྒྱ་ནག་གཞུང་གིས་བཙོན་འོག་ནས་དམ་དྲག་དང་མནར་གཅོད་ཚད་མེད་བཏང་རྐྱེན། ཁོང་གི་ལུས་ཕུང་ཕྱེད་ཀར་ཚོར་མེད་དུ་གྱུར་ཡོད་པ་དང་། མིག་གཉིས་ཀྱང་ནད་པ་ཆགས་ཡོད་སྟབས། རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་པ་ཚོའི་གཟུགས་གཞིའི་གནས་སྟངས་ཛ་དྲག་ཏུ་འགྱུར་དུས། བཙོན་འཇུག་གི་དུས་ཡུན་མ་ཚང་གོང་ནས་ཀློད་གྲོལ་བཏང་གི་ཡོད་པ་ལྟར། ཁོང་ཉིད་བཙོན་འཇུག་གི་དུས་ཡུན་མ་ཚང་གོང་ནས་ཀློད་གྲོལ་བཏང་ཡོད་ཀྱང་། རྒྱ་ནག་གཞུང་གིས་དགེ་འདུན་པ་ཐབས་མཁས་རྒྱ་མཚོ་ལགས་ཀྱི་ནང་མིར་དམ་དྲག་དང་ལྟ་རྟོག་ནན་མོ་བྱེད་བཞིན་ཡོད་པས། ཁོང་གི་གཟུགས་གཞི་གནས་སྟངས་སོགས་ཀྱི་སྐོར་ལ་གསལ་ཁ་གང་ཡང་མི་འདུག ཅེས་བརྗོད་བྱུང་།
ད་ལོ་དགུང་ལོ་ ༤༦ ཡིན་པའི་དགེ་འདུན་པ་ཐབས་མཁས་རྒྱ་མཚོ་ལགས་ནི་མདོ་སྨད་བླ་བྲང་བསང་ཆུ་རྫོང་བསང་ཁོག་ནས་ཡིན་པ་དང་། ཕྱི་ལོ་ ༢༠༠༨ ལོའི་བླ་བྲང་ཕྱོགས་ཀྱི་མི་མང་ཞི་རྒོལ་གྱི་སྣེ་འཁྲིད་བྱས་པའི་ཉེས་འཛུགས་འོག བླ་བྲང་དགོན་པའི་ནང་གི་རང་ཤག་ནས་འཛིན་བཟུང་བཙན་ཁྲིད་བྱས་རྗེས། ལོ་གཅིག་ཙམ་རིང་གནས་ཚུལ་ཅི་ཡང་ཤེས་རྟོགས་མ་ཐུབ་པར་ལྷག་ཡོད་པ་དང་། ཕྱི་ལོ་༢༠༠༩ ཟླ་ ༥ ཚེས་ ༢༡ ཉིན་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་ལ་ལོ་ ༡༥ ཡི་ཁྲིམས་ཐག་བཅད་ཡོད་འདུག ཕྱིས་སུ་ཤེས་རྟོགས་བྱུང་བ་ལྟར་ན། ཁོང་འཛིན་བཟུང་བྱེད་སྐབས་བོད་རིགས་ཉེན་རྟོག་པའི་གདོང་ལ་མཆིལ་ཞག་བཏབ་ནས་སྡིགས་མོད་བྱས་རྐྱེན། འདྲི་གཅོད་ཁང་དུ་ཁོང་ལ་གཅར་རྡུང་བཏང་སྟེ་གཟུགས་པོའི་ཕྱེད་ཀ་ནད་པར་གྱུར་ཡོད་པ་མ་ཟད། མིག་གཉིས་ཀྱང་ནད་པ་བཟོས་ཡོད་འདུག་ལ། ཕྱི་ལོ་༢༠༡༨ ལོར་ཁོང་ཌེན་ཞི་བཙོན་ཁང་གི་སྨན་ཁང་དུ་ཡུན་རིང་སྡོད་དགོས་བྱུང་ཡོད་འདུག
དགེ་འདུན་པ་ཐབས་མཁས་རྒྱ་མཚོ་ལགས་དུས་རྒྱུན་དུ་རྩོམ་རིག་གི་ལམ་ནས་རང་ཉིད་ཀྱི་དགའ་སྐྱོ་ཆགས་སྡང་གི་ཚོར་བ་དམར་རྗེན་དུ་འབྲི་མཁན་ཞིག་ཡིན་ཞིང་། བོད་ནང་གི་རྩོམ་རིག་དུས་དེབ་ཁག་ཅིག་ཏུ་སྙན་ངག་དང་ལྷུག་རྩོམ་མང་པོ་སྤེལ་མྱོང་། ཁོང་གི་སྨྱུག་མིང་ལ་དུས་འཁོར་ཐབས་མཁས་ཟེར་གྱི་ཡོད་པ་དང་། ཆུང་དུས་ནས་བླ་བྲང་དགོན་གྱི་ཆོས་སྒོར་ཞུགས་ཏེ་དུས་འཁོར་གྲྭ་ཚང་དུ་སློབ་གཉེར་གནང་། ཕྱི་ལོ་ ༢༠༠༦ ནས་ ༢༠༠༧ ཡས་མས་བར་ལྷ་སའི་འབྲས་སྤུངས་དགོན་དུ་མཚན་ཉིད་ཀྱི་ཕྱོགས་ལ་སློབ་གཉེར་གནང་།
དཔལ་ལྡན།
