ཉེ་ལམ་བཞུགས་སྒར་དྷ་སའི་དབུས་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་དང་། དྷ་སའི་ཉེ་འདབས་ནོར་གླིང་བོད་ཀྱི་རིག་གཞུང་ལྟེ་གནས་ཁང་ནང་ཏོག་བྱིབས་གཉན་རིམས་ཁྱབ་གདལ་ཤུགས་ཆེར་ཕྱིན་ཡོད་ནའང་། ད་ལྟའི་ཆར་ཚོགས་སྡེ་ཁག་སོ་སོས་རང་གི་ཁྱབ་ཁོངས་མི་མང་ཀུན་ལ་བརྟག་དཔྱད་བྱས་ཏེ། ད་བར་ནད་པའི་ཁྲོད་དུ་སྨན་ཁང་ནང་ཛ་དྲག་གིས་མྱུར་སྐྱོབ་བྱ་དགོས་པའི་གནས་སྟངས་བྱུང་མེད་པ་རེད་འདུག
ནོར་གླིང་བོད་ཀྱི་རིག་གཞུང་ལྟེ་གནས་ཁང་གི་འགན་འཛིན་བདེ་ཆེན་རྣམ་རྒྱལ་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། དེ་སྔོན་ཕྱི་ཚེས་ ༢༢ ཉིན་ནད་པ་གསར་པ་ ༣༣ ཐོན་པའི་ཐོག ཡང་བསྐྱར་ཕྱི་ཚེས་ ༢༥ ཉིན་ནོར་གླིང་གི་ལས་བྱེད་དང་འབྲེལ་ཡོད་ནང་མི་བཅས་ཁྱོན་མི་གྲངས་ ༥༨ ལ་གཉན་རིམས་ཕོག་ཡོད་ཅིང་། དེ་དག་ཁྲོད་ནས་ཕལ་ཆེ་བ་རང་ལོ་ ༡ ནས་ ༡༣ བར་གྱི་བྱིས་པ་ཚོ་ཡིན་ཞིང་། ད་ལྟའི་ཆར་ནོར་གླིང་གི་ལས་བྱེད་དང་འབྲེལ་ཡོད་ནང་མི། དེ་བཞིན་ནོར་གླིང་ཁུལ་གྱི་ཁ་འཐོར་བོད་མི་རྣམས་ནོར་གླིང་བོད་ཀྱི་རིག་གཞུང་ལྟེ་གནས་ཁང་ནང་ཟུར་བཀག་འོག་བཞག་ཡོད་ཅིང་། ནད་པའི་ཁྲོད་ནས་དུས་རྒྱུན་ནད་གཅོང་ཡིན་པ་དང་ལོ་རྒན་པ་བཅས་ཁྱོན་མི་གྲངས་ ༡༡ དབུས་བོད་མིའི་སྒྲིག་འཛུགས་ཀྱིས་བཀོད་སྒྲིག་ཞུས་པའི་སྣེ་ལེན་ཁང་གི་གསོ་བཅོས་ཁང་དུ་ཟུར་བཀག་བྱེད་མུས་ཡིན་པ་དང་། ནད་པའི་ཁྲོད་དུ་ཛ་དྲག་གིས་སྨན་ཁང་དུ་དབོར་འདྲེན་བྱེད་དགོས་པ་གཅིག་ཀྱང་བྱུང་མེད་སྐོར་འགྲེལ་བརྗོད་གནང་བྱུང་ལ། ད་ལྟའི་ཆར་ནོར་གླིང་དུ་ཁྱོན་ལས་བྱེད་རྐྱང་པ་ ༣༣༦ དང་འབྲེལ་ཡོད་ནང་མི་ཚུད་པའི་ཁྱབ་ཁོངས་མི་གྲངས་ ༥༠༠ ལྷག་ཡོད་ཅིང་། དེ་དག་ཡོངས་སུ་རྫོགས་པར་བརྟག་དཔྱད་བྱས་ཟིན་པའི་ཐོག ད་དུང་ནོར་གླིང་ཉེ་འཁོར་གྱི་ཁ་འཐོར་མི་མང་ ༩༠ ལྷག་ལའང་བརྟག་དཔྱད་བྱས་ཡོད་འདུག
དེ་ཡང་ཟླ་འདིའི་ཕྱི་ཚེས་ ༡༧ ཉིན་རྒྱ་གར་གྱི་སྲིད་བློན་མུ་དྷི་མཆོག་གི་འཁྲུངས་སྐར་དང་བསྟུན། ས་གནས་རྒྱ་གར་གྱི་ཚོགས་སྡེ་དང་བདེ་ལེགས་སྨན་ཁང་གི་གོ་སྒྲིག་འོག མེག་གྷན་དུ་ཆགས་པའི་བོད་ཁྱིམ་ཉིན་སློབ་ཀྱི་མདུན་ཐང་དུ་འགོག་ཁབ་བསྐྱོན་པ་དང་ནད་ཡམས་བརྟག་དཔྱད་ཀྱི་རིན་མེད་ལས་གཞི་ཞིག་སྤེལ་བའི་ཁྲོད། དྷ་སའི་ཉེ་འདབས་ཀྱི་ནོར་གླིང་བོད་ཀྱི་རིག་གཞུང་ལྟེ་གནས་ཁང་གི་ལས་བྱེད་ ༩ ལ་གཉན་རིམས་འགོས་པ་ཤེས་རྟོགས་བྱུང་ཡོད་ཅིང་། རིམ་པས་ཕྱི་ཚེས་ ༢༠ དང་ ༢༡ བཅས་ལ་བརྟག་དཔྱད་བྱས་པར་བརྟེན། ཟླ་འདིའི་ཕྱི་ཚེས་ ༢༢ བར་ནོར་གླིང་གི་ཁྱོན་ལས་བྱེད་ ༣༣ ལ་ཏོག་དབྱིབས་གཉན་རིམས་ཕོག་པ་ཤེས་རྟོགས་བྱུང་འཕྲལ། ཉིན་དེ་རང་ལ་ས་གནས་ཀངྒ་ར་གྲོང་སྡེ་ལས་ཁུངས་ངོས་ནས་ཀྱང་ཛ་དྲག་གནས་སྟངས་དང་བསྟུན། ནོར་གླིང་བོད་ཀྱི་རིག་གཞུང་ལྟེ་གནས་ཁང་དང་དེའི་ཉེ་འཁོར་གྱི་ས་ཁུལ་རྣམས་དོ་དམ་ས་ཁུལ་ (Containment Zone) དུ་གཏན་འབེབས་ཀྱིས་ལས་ཁུངས་ཁག་ཡོངས་སུ་སྒོ་བརྒྱབ་ཡོད་པ་རེད།
ཡང་བདུན་ཕྲག་གཉིས་ཙམ་གོང་ལ་བདེ་ལེགས་སྨན་ཁང་གི་སྨན་ཞབས་པ་དང་གངས་སྐྱིད་ཀྱི་སྲི་ཞུ་ལས་བྱེད་རེ་ཟུང་ལ་ཏོག་དབྱིབས་གཉན་རིམས་ཕོག་པར་བརྟེན། ཟླ་འདིའི་ཕྱི་ཚེས་ ༡༠ ཡས་མས་ལ་ནད་རྟགས་ཡོད་མཁན་གྱི་ལས་བྱེད་ལ་བརྟག་དཔྱད་བྱེད་སྐབས་ནད་པ་གསར་པ་འགའ་ཤས་ཐོན་པར་བརྟེན། འཕྲོད་བསྟེན་ལས་ཁུངས་ངོས་ནས་སྔ་ཕྱི་རིམ་པ་བྱས་ཏེ། ནད་པའི་འབྲེལ་ཡོད་ལས་ཁུངས་ཀྱི་ལས་བྱེད་ཡོངས་ལ་བརྟག་དཔྱད་བྱས་ཡོད་ཅིང་། གཉན་རིམས་ཀྱི་ཛ་དྲག་གནས་སྟངས་དང་བསྟུན་ཕྱི་ཚེས་ ༡༧ ཉིན་བཀའ་དྲུང་ཡིག་ཚང་ནས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་རྣམས་ཕྱི་ཟླ་ ༡༠ ཚེས་ ༧ བར་བརྒྱ་ཆ་ལྔ་བཅུ་རེས་མོས་བྱས་ཏེ་ལས་ཁུངས་ལ་ལས་བཅར་དགོས་པའི་ལམ་སྟོན་བཀོད་ཁྱབ་གནང་ཡོད་ནའང་། བོད་མིའི་སྒྲིག་འཛུགས་ཀྱི་ལས་བྱེད་ཡོངས་ལ་བརྟག་དཔྱད་བྱས་ཏེ་མཐར་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཁྲོད་ཁྱོན་ནད་པ་ ༡༧ ཐོན་ཏེ། ནད་པ་རྣམས་ཟུར་བཀག་འོག་བཞག་ཡོད་པ་དང་ལས་བྱེད་བྱིངས་རྣམས་མུ་མཐུད་བརྒྱ་ཆ་བརྒྱ་ལས་བཅར་དགོས་པའི་ལམ་སྟོན་གནང་ཡོད་པ་རེད་འདུག སྲི་ཞུའི་ལས་བྱེད་ཐོག་གངས་སྐྱིད་ཀྱི་བདེ་ལེགས་སྨན་ཁང་གི་ལས་བྱེད་ ༦ ལ་གཉན་རིམས་འགོས་ཡོད་པར་བརྟེན། ཐེངས་འདིར་གངས་སྐྱིད་ཁུལ་དུ་ནད་པ་གསར་པ་ཁྱོན་བསྡོམས་ ༢༣ ལྷག་ཐོན་ཡོད་ནའང་། ནད་པ་ཕལ་ཆེ་བར་ནད་རྟགས་གང་ཡང་མེད་པར་ད་ལྟའི་ཆར་ཟུར་བཀག་དུས་ཡུན་ཚང་གྲབས་ཡོད་འདུག
གཞན་ཡང་ཉེ་ལམ་དྷ་སར་རྟེན་གཞི་བྱས་པའི་དྷ་སྟེང་བོད་ཕྲུག་ཁྱིམ་སྡེའི་སློབ་གྲྭའི་ནང་དུའང་ལས་བྱེད་དང་སློབ་མ་སྐོར་ཞིག་ལ་ནད་ཡམས་འགོས་ཡོད་པའི་སྐོར་ལ་སློབ་གྲྭའི་འབྲེལ་ཡོད་ལས་བྱེད་ཅིག་གིས་འདི་གར་འགྲེལ་བརྗོད་གནང་དོན། ཟླ་འདིའི་ཕྱི་ཚེས་ ༡༩ ཉིན་སློབ་གྲྭའི་ལས་བྱེད་གཅིག་དང་བྱིས་པ་ཞིག་ལ་ནད་ཡམས་ཕོག་པ་ཤེས་རྟོགས་བྱུང་འཕྲལ། སློབ་གྲྭ་ཡོངས་རྫོགས་སྒོ་རྒྱ་བསྡམས་ཏེ་ལས་བྱེད་དང་སློབ་མའི་འགྲོ་སྐྱོད་ལ་བཀག་སྡོམ་བྱས་ཡོད་འདུག དེ་བཞིན་འཛིན་རིམ་བཅུ་པ་དང་བཅུ་གཉིས་ཀྱི་སློབ་མ་རྣམས་རྒྱ་གར་རྒྱལ་ཡོངས་ཀྱི་ཡིག་རྒྱུགས་ཆེན་མོའི་ནང་ཞུགས་དགོས་པར་བརྟེན། སློབ་གྲྭའི་ངོས་ནས་སློབ་མ་དེ་དག་སློབ་གྲྭར་སྐད་བཏང་ཡོད་ཅིང་། དེ་བཞིན་སུད་ཚོང་ལ་སྐྱོད་མཁན་གྱི་བོད་མི་རྣམས་ཀྱིས་རང་གི་ཕྲུ་གུ་རྣམས་སུད་ཚོང་གི་དུས་ཡུན་རིང་རང་ཁྱིམ་དུ་བདག་སྐྱོང་བྱེད་ཐབས་དཀའ་བར་བརྟེན། སློབ་གྲྭའི་ངོས་ནས་བདག་སྐྱོང་གནང་བའི་རེ་སྐུལ་ཞུས་པ་བཞིན། སློབ་གྲྭའི་ངོས་ནས་ཞལ་བཞེས་གནང་བ་དང་འབྲེལ། སློབ་གྲྭར་བསྐྱར་ཞུགས་བྱེད་མཁན་གྱི་སློབ་མ་རྣམས་ཀྱིས་གཉན་རིམས་ཡོད་མེད་བརྟག་འབྲས་མཉམ་འཁྱེར་དགོས་པ་དང་། སློབ་གྲྭར་བདུན་ཕྲག་གཉིས་རིང་ཟུར་བཀག་བྱ་དགོས་པའི་ལམ་སྟོན་བྱས་པ་ལྟར། ཟུར་བཀག་ལ་ཡོད་པའི་སློབ་མ་ ༢ ལ་གཉན་རིམས་འགོས་པ་ཤེས་རྟོགས་བྱུང་བ་དང་། དེའི་རྗེས་བསྐྱར་དུ་ལས་བྱེད་ཀྱི་བུ་ཕྲུག་གཉིས་ལའང་ནད་ཡམས་འགོས་པ་བཅས་ཁྱོན་བསྡོམས་མི་གྲངས་ ༦ ལ་གཉན་རིམས་ཕོག་ཡོད་འདུག
དབུས་ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདི་གའི་གསར་འགོད་པར། ད་ལྟའི་ཆར་དྷ་ས་ཁུལ་དུ་བོད་མི་ཏོག་དབྱིབས་ནད་པ་ཁྱོན་བསྡོམས་ ༡༤༩ ཡོད་ཅིང་། དེའི་ཁྲོད་ནས་རེ་ཟུང་ལ་མིད་པ་ཚ་བ་ལ་སོགས་པའི་ནད་རྟགས་ཐོན་པ་ལས་སྨན་ཁང་དུ་ཛ་དྲག་གིས་མྱུར་སྐྱོབ་བྱེད་དགོས་པའི་གནས་སྟངས་བྱུང་མེད་པ་དང་། ད་ལྟ་སྣེ་ལེན་ཁང་ནང་ཁྱོན་བསྡོམས་ནད་པ་ ༤༩ ཟུར་བཀག་འོག་ཡོད་མུས་ཡིན་སྐོར་དང་། བོད་མིའི་འདུས་སྡོད་ས་ཁུལ་སྦེལ་ཀོབ་ལྟ་བུར་མཚོན་ན། ད་ལྟའི་ཆར་ཏོག་དབྱིབས་ནད་པ་གསར་པ་ ༨༡ ལྷག་ཐོན་ཡོད་པ་དང་། མོན་གྷོ་ལའང་ནད་པ་འགའ་ཤས་ཐོན་ཡོད་པ། ཧུན་སུར་རབ་རྒྱས་གླིང་ལྟ་བུར་མཚོན་ན་འདས་པའི་ཟླ་ ༢ ལྷག་གི་རིང་ནད་པ་གསར་པ་མང་པོ་ཐོན་ཡོད་ནའང་། ད་ལྟའི་ཆར་ཚང་མ་དྲག་སྐྱེད་སོང་ཡོད་སྐོར་འགྲེལ་བརྗོད་གནང་བྱུང་། དེ་བཞིན་དྷ་ས་ཁུལ་དུ་རེས་གཟའ་མིག་དམར་དང་པ་སངས་ནམ་ཡིན་ལ་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་གཉིས་ཀྱིས་མཉམ་འབྲེལ་ཐོག་གཉན་རིམས་བརྟག་དཔྱད་བྱེད་ཀྱི་ཡོད་པར་བརྟེན། མང་ཚོགས་ངོས་ནས་ཉིན་གཉིས་ཙམ་གོང་ནས་ཐོ་འགོད་བྱས་ཏེ་བརྟག་དཔྱད་བྱ་རྒྱུ་ཡོད་སྐོར་འགྲེལ་བརྗོད་བྱས་བྱུང་།
གསར་འགོད་པ། པ་སངས་ཚེ་རིང་།
