༧གོང་ས་མཆོག་གིས་རྒྱ་གར་སྲིད་འཛིན་གྱི་འཁྲུངས་སྐར་ལ་འཚམས་འཕྲིན་སྩལ།

༧གོང་ས་མཆོག་གིས་རྒྱ་གར་གྱི་སྲིད་འཛིན་རམ་ན་ཐི་མཆོག་གི་འཁྲུངས་སྐར་ལ་འཚམས་འདྲིའི་ཐུགས་སྨོན་གནང་བ་དང་སྦྲགས། འདས་པའི་ལོ་ངོ་ ༦༢ རིང་རྒྱ་གར་གཞུང་གིས་བོད་མི་རྣམས་ལ་མཐུན་སྦྱོར་རྒྱབ་སྐྱོར་གནང་བར་བཀའ་དྲིན་ཆེ་ཞུས་གནང་།

དེ་རིང་རྒྱ་གར་གྱི་སྲིད་འཛིན་རམ་ན་ཐི་ Ram Nath Kovind མཆོག་དགུང་གྲངས་ ༧༦ ལ་ཕེབས་པའི་འཁྲུངས་སྐར་གྱི་ཉིན་མོ་ཡིན་སྟབས། ༧གོང་ས་རྒྱལ་བ་རིན་པོ་ཆེ་མཆོག་གིས་ཁོང་ལ་འཁྲུངས་སྐར་འཚམས་འཕྲིན་ཞིག་སྩལ་ཏེ། རྒྱ་གར་གྱིས་གནའ་དེང་གི་སློབ་གསོ་ཟུང་སྤྲེལ་གྱིས་འཛམ་གླིང་འདི་སྔར་ལྷག་གི་ཞི་བདེ་ཅན་ཞིག་ཏུ་བསྐྲུན་པའི་ནུས་པ་དམིགས་བསལ་ཡོད་སྐོར་གསུངས་ཡོད་པ་རེད།

༧མགོན་པོ་གང་ཉིད་མཆོག་གི་འཚམས་འཕྲིན་ནང་། ཁྱེད་རང་རྒྱལ་ཁབ་ཀྱི་སྲིད་འཛིན་ཡིན་པའི་ངོས་ནས་རྒྱལ་ཁབ་ཀྱི་འཕེལ་རྒྱ་སྲ་བརྟན་དང་། དམིགས་བསལ་ཉམ་ཐག་རྣམས་ཀྱི་བདེ་སྡུག་སྲུང་སྐྱོང་གི་འབད་བརྩོན་ལ་ངོས་ནས་ཡི་རངས་ཞུ་ཡི་ཡོད།

རྒྱ་གར་ནི་གཞི་རྒྱ་ཆེ་བའི་རིག་གཞུང་དང་བསམ་བློའི་སྲོལ་རྒྱུན་སྣ་ཚོགས་མཉམ་གནས་བྱ་སའི་དུས་ཡུན་རིང་བའི་ཁྱིམ་ཞིག་ཆགས་ཡོད་པ་མ་ཟད། འཛམ་གླིང་གི་ཆེས་གྲགས་ཆེ་བ་དང་འཕྲུག་ཉམས་ཆེ་བའི་མང་གཙོའི་རྒྱལ་ཁབ་ཅིག་ཀྱང་ཡིན་ལ། རྒྱལ་ཁབ་ཀྱི་ཆེ་མཐོང་ཀྱང་རྒྱལ་སྤྱིའི་སྟེང་ཁྱབ་བཞིན་ཡོད།

འཛམ་གླིང་ནང་གཅིག་བརྟེན་གྱི་འདུ་ཤེས་འཕེལ་བཞིན་པའི་སྐབས་འདིར། ངོས་ནས་རྒྱ་གར་གྱིས་དེང་སང་གི་སྐབས་འདིར་འོས་ཤིང་འཚམས་པའི་རྒྱ་གར་གྱི་གནའ་བོའི་རིག་གཞུང་སྙིང་རྗེ་དང་འཚེ་མེད་ཞི་སོགས་བགོས་འགྲེམས་ཀྱིས། འགྲོ་བ་མིའི་རིགས་ཞི་བདེའི་ཕྱོགས་སུ་བསྐྱོད་པར་ལམ་སྟོན་སྣེ་འཁྲིད་ཐུབ་པའི་རེ་བ་ཡོད། ངོས་ནས་བློ་རྩ་བརྟན་པོའི་ཐོག་ནས་རྒྱ་གར་ལ་གལ་གནད་ཆེ་བའི་གནའ་བོའི་རིག་གཞུང་དག་དེང་དུས་སློབ་གསོར་མཐུན་སྦྱོར་གྱིས་འཛམ་གླིང་འདི་སྔར་ལྷག་གི་ཞི་བདེ་ཅན་ཞིག་ཏུ་བསྒྱུར་ཐུབ་པའི་ནུས་པ་ཡོད་པར་ཡིད་ཆེས་བྱེད་ཀྱི་ཡོད།

ད་ལོ་ནི་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ ༦༢ འཁོར་གྱི་ཡོད་སྟབས། ངོས་ནས་བོད་མི་ཚང་མའི་ཚབ་བྱས་ཏེ་རྒྱ་གར་གཞུང་མང་གཉིས་ནས་ད་བར་བོད་མི་རྣམས་ལ་མཐུན་འགྱུར་དང་སེམས་བཟང་བཅིངས་པར་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས།

གསར་འགོད་པ། སྐལ་བཟང་སྦྱིན་པ།