པ་ཀི་སི་ཐན་ནང་ས་འགུལ་བྱུང་སྟེ་མི་རྒྱུ་གཉིས་ལ་གནོད་སྐྱོན་ཐེབས་ཡོད་པ་མ་ཟད། ད་ལྟ་ད་དུང་ཡང་གནོད་སྐྱོན་ཐེབས་པའི་མིའི་གྲངས་འབོར་ཇེ་མང་དུ་འགྲོ་ཡི་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་སྔ་དྲོའི་ཆུ་ཚོད་ ༥ ཡས་མས་ཤིག་ལ་པ་ཀི་སི་ཐན་རྒྱལ་ཁབ་ཀྱི་མངའ་སྡེ་བྷ་ལོ་ཆི་སི་ཐན་ (Balochistan) ཞེས་པའི་ཁུལ་གྱི་ (Quetta) རྫོང་དང་ (Harnai) རྫོང་གི་ཉེ་འགྲམ་དུ་ས་ཡོམ་བྱུང་སྟེ་ཡུལ་མི་ ༢༠ ཙམ་རྐྱེན་འདས་དང་མི་གྲངས་ ༡༥༠ ཙམ་ལ་རྨས་སྐྱོན་ཕོག་ཡོད་འདུག
ས་ཡོམ་གྱི་གོད་ཆག་དེ་སྔ་དྲོར་བྱུང་བར་བརྟེན་སྐབས་དེ་དུས་ཡུལ་མི་ཚང་མ་གཉིད་ཁུགས་པའི་དུས་ཚོད་ཡིན་འདུག་པ་དང་། གོད་ཆག་གིས་འདམ་བག་གི་ཁང་མིག་དང་གཞུང་གི་ཁང་པ་ ༡༠༠ ལྷག་གཏོར་སྐྱོན་བཏང་ཡོད་པ་མ་ཟད། ད་དུང་རྨས་སྐྱོན་ཕོག་པའི་མི་མང་དེ་དག་ལ་སྲང་ལམ་དུ་སྨན་བཅོས་བྱེད་དགོས་བྱུང་ཡོད་པ་དང་། གནོད་སྐྱོན་ཐེབས་པའི་མི་གྲངས་ཇེ་མང་དུ་འགྲོ་ཡི་ཡོད་པ་རེད།
མངའ་སྡེ་བྷ་ལོ་ཆི་སི་ཐན་གྱི་རང་བྱུང་རྐྱེན་ངན་ཚན་པའི་འཛིན་སྐྱོང་འགན་འཛིན་ནཱ་ཟིར་ནཱ་སར་ (Naseer Nasar) ལགས་ཀྱིས། མི་གྲངས་ ༡༥ དང་ ༢༠ ཙམ་རྐྱེན་འདས་སུ་ཕྱིན་ཡོད་པ་དང་རྐྱེན་འདས་ཀྱི་གྲངས་ཚད་ཇེ་མང་དུ་འགྲོ་སྲིད་པ་རེད། ཧར་ནའེ་(Harnai) རྫོང་ནི་རི་མང་པོ་ཡོད་སའི་ས་ཆ་ཁུག་ཀྱོག་ཞིག་ཡིན་པ་དང་། ། གློག་དང་ལག་ཐོགས་ཁ་པར། དེ་བཞིན་གཞུང་ལམ་སོགས་ཀྱི་མཐུན་རྐྱེན་ལེགས་པོ་མེད་པ་ལ་བརྟེན་ནས་ཉེན་སྐྱོབ་འགོག་རྐྱེན་བཟོས་ཤིང་ས་ཁུལ་དེར་གནོད་རྐྱེན་ཚབས་ཆེན་བྱུང་འདུག དེ་བཞིན་ (Quetta) རྫོང་དུའང་ས་ཡོམ་གྱིས་གནོད་སྐྱོན་ཐེབས་ཏེ། ད་ལྟའི་ཆར་ཡུལ་དེ་གཉིས་ནང་མྱུར་སྐྱོབ་ལས་དོན་བསྒྲུབས་དང་སྒྲུབ་མུས་ཡིན་འདུག
དེ་འབྲེལ་ཐད་པ་ཀི་སི་ཐན་གྱི་རྒྱལ་ཡོངས་ས་ཡོམ་བརྟག་དཔྱད་ཁང་ (National Center for Seismology) གིས་གནས་ཚུལ་སྤེལ་བ་ལྟར་ན། ད་ལན་གྱི་ས་ཡོམ་དེ་སྔ་དྲོའི་ཆུ་ཚོད་ ༣།༣༠ ཙམ་ལ་ཚད་རིམ་ ༦ དང་གཏིང་ཚད་སྨི་ ༡༠ ཅན་གྱི་ས་འགུལ་དང་པོ་བྱུང་བ་དང་། དེ་ནས་སྔ་དྲོའི་ཆུ་ཚོད་ ༥།༣༠ ཙམ་ལ་པ་ཀི་སི་ཐན་གྱི་བྷ་ལོ་ཆི་སི་ཐན་མངའ་སྡེའི་ཁུལ་དུ་ཚད་རིམ་ ༤།༢ ཅན་དང་གཏིང་ཚད་སྨི་ ༢༢ ཙམ་གྱི་ས་འགུལ་རིམ་པ་གཉིས་པ་དེ་བྱུང་ཡོད་སྐོར་བརྗོད་འདུག
ཧར་ནའེ་རྫོང་གི་རྫོང་དཔོན་སོ་ཧེལ་ཨན་ཝར་ (Sohail Anwar) ལགས་ཀྱིས། ཁུལ་དེར་ས་ཡོམ་བྱུང་སྟེ་ཁང་པའི་ཐོག་དང་རྩིག་པ་སོགས་རྡིབ་སྐྱོན་བྱུང་སྟེ་མི་མང་ཕལ་ཆེ་བ་ཉེན་ཁའི་གནས་ལ་ཡོད། བྷ་ལོ་ཆི་སི་ཐན་ཁུལ་གྱི་གཞུང་དང་སྒེར་གྱི་ཁང་པ་མང་པོ་ཞིག་གོད་ཆག་གིས་གཏོར་སྐྱོན་བཏང་འདུག་ལ། རྐྱེན་འདས་སུ་ཕྱིན་པའི་མིའི་གྲངས་འབོར་ཇེ་མང་དུ་འགྲོ་སྲིད་པས། ས་འགུལ་བྱུང་ཁུལ་དུ་མྱུར་སྐྱོབ་ཚན་པས་རོགས་སྐྱོར་བྱེད་མུས་ཡིན། ཞེས་བརྗོད་ཡོད་འདུག
ཕྱི་ལོ་ ༢༠༠༥ ཟླ་ ༡༠ ཚེས་ ༨ ཉིན་པ་ཀི་སི་ཐན་རྒྱལ་ཁབ་ཏུ་ཚད་རིམ་ ༧།༦ ཅན་གྱི་ས་ཡོམ་བྱུང་སྟེ་མི་གྲངས་སྟོང་ཕྲག་ ༨༠ ཙམ་རྐྱེན་འདས་སུ་ཕྱིན་ཡོད་པ་དང་གོད་ཆག་འདིའི་རྐྱེན་གྱིས་མི་མང་ས་ཡ་ ༣།༥ ཙམ་ཞིག་ཁྱིམ་མེད་ཅན་དུ་འགྱུར་འདུག གཞན་ཡང་ཕྱི་ལོ་ ༢༠༠༨ ལོར་པ་ཀི་སི་ཐན་རྒྱལ་ཁབ་ཀྱི་ལྷོ་ནུབ་ཁུལ་དུ་ཚད་རིམ་ ༦།༥ ཅན་གྱི་ས་ཡོམ་བྱུང་སྟེ་མི་གྲངས་ ༡༥༠ ཙམ་རྐྱེན་འདས་དང་མི་གྲངས་ ༡༠༠ ལྷག་ལ་རྨས་སྐྱོན་ཕོག་འདུག་ལ་། ཕྱི་ལོ་ ༢༠༡༣ ལོར་པ་ཀི་སི་ཐན་རྒྱལ་ཁབ་ཀྱི་ནུབ་ཕྱོགས་ཁུལ་དུ་ཚད་རིམ་ ༧།༧ ཅན་གྱི་ས་ཡོམ་བྱུང་སྟེ་མི་གྲངས་ ༨༠ ཙམ་རྐྱེན་འདས་སུ་ཕྱིན་འདུག ཕྱི་ལོ་ ༢༠༡༥ ཟླ་ ༡༠ ནང་པ་ཀི་སི་ཐན་དང་ཨབ་གྷ་ནི་སི་ཐན་གྱི་རྒྱལ་ཁབ་གཉིས་ལ་ཚད་རིམ་ ༧།༥ ཅན་གྱི་ས་ཡོམ་བྱུང་སྟེ་མི་གྲངས་ ༤༠༠ ཙམ་རྐྱེན་འདས་སུ་ཕྱིན་ཡོད་པ་དང་། ཕྱི་ལོ་ ༢༠༡༩ ལོར་པ་ཀི་སི་ཐན་རྒྱལ་ཁབ་ཀྱི་བྱང་ཕྱོགས་ཁུལ་དང་ (Kashmir) ས་ཁུལ་དུ་ཚད་རིམ་ ༥།༦ ཅན་གྱི་ས་ཡོམ་བྱུང་སྟེ་མི་གྲངས་ ༢༢ རྐྱེན་འདས་དང་མི་གྲངས་ ༧༠༠ ལྷག་ལ་རྨས་སྐྱོན་ཕོག་འདུག
གསར་འགོད་པ། བསྟན་འཛིན་ཕུར་བུ།
