འདེམས་ཐོན་སྤྱི་འཐུས་ཚང་མས་བསྐྱར་དུ་བཅའ་ཁྲིམས་དོན་ཚན་ ༤༧ པའི་འོག་དམ་བཅའ་འབུལ་རྒྱུ་ཡིན་འདུག

དེ་རིང་ཉིན་རྒྱབ་ཆུ་ཚོད་ ༡༢།༣༠ སྟེང་བོད་མི་མང་སྐབས་བཅུ་བདུན་པའི་འདེམས་ཐོན་སྤྱི་འཐུས་ཀྱི་ནང་མོལ་ཚོགས་འདུའི་གཙོ་སྐྱོང་བ་མཁན་པོ་བསོད་ནམས་བསྟན་འཕེལ་ལགས་དང་སྒྲོལ་མ་ཚེ་རིང་ལགས་རྣམ་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ཉེ་ཆར་སྐབས་བཅུ་བདུན་པའི་བོད་མི་མང་སྤྱི་འཐུས་རྣམས་ཀྱི་དམ་འབུལ་ཞུ་ཕྱོགས་ཀྱི་དཀའ་རྙོག་དང་འབྲེལ་བའི་ཐད་འདེམས་ཐོན་སྤྱི་འཐུས་རྣམ་པས་ནང་མོས་ཚོགས་འདུ་འཚོགས་ཏེ། བཅའ་ཁྲིམས་དོན་ཚན་དང་པོའི་ནང་གསེས་ ༢ པའི་དགོངས་དོན་ལྟར་༧གོང་ས་རྒྱལ་བ་རིན་པོ་ཆེ་མཆོག་ལ་ལམ་སྟོན་བསྩལ་གནང་ཡོང་བའི་གསོལ་འདེབས་ཞུས་ཏེ། ཁ་སང་ཕྱི་ཚེས་ ༦ ཉིན་༧མགོན་པོ་མཆོག་ནས་སྩལ་གནང་མཛད་པའི་བཀའ་ཡིག་རིན་པོ་ཆེའི་ལམ་སྟོན་དོན་ཚན་དང་པོ། སྐབས་བཅུ་བདུན་པའི་གྲོས་ཚོགས་ཆེད་དབུས་འོས་བསྡུ་ལས་ཁུངས་ཀྱིས་ཁྲིམས་མཐུན་འོས་བསྡུ་བྱས་ཏེ། ཁུངས་སོ་སོའི་སྤྱི་འཐུས་འོས་ཐོན་པར་གསལ་བསྒྲགས་ཟིན་པ་ཚང་མས་བཅའ་ཁྲིམས་ཀྱི་འབྲི་དོན་གཞིར་བཟུང་དམ་འབུལ་ཞུ་རྒྱུ། ཞེས་པའི་དགོངས་དོན་ཤར་བསྐྱོད་བྱ་རྒྱུའི་སྤྱི་མོས་བྱུང་སྟེ། སང་ཉིན་བོད་མི་མང་སྤྱི་འཐུས་སྐབས་ ༡༧ པའི་བདམས་ཐོན་སྤྱི་འཐུས་ ༤༥ རྣམ་པས་བཅའ་ཁྲིམས་དོན་ཚན་ ༤༧ གཞིར་བཟུང་བསྐྱར་དུ་དམ་བཅའ་འབུལ་གཏན་འཁེལ་འདུག

༧གོང་ས་རྒྱལ་བ་རིན་པོ་མཆོག་ནས་སྩལ་གནང་མཛད་པའི་བཀའ་ཡིག་རིན་པོ་ཆེའི་ནང་། ཕྱི་ལོ་ ༡༩༩༡ ཟླ་ ༦ ཚེས་ ༢༨ ནས་བཟུང་བོད་མིའི་སྒྲིག་འཛུགས་ངེས་དོན་ཁྲིམས་ཀྱི་དབང་བསྒྱུར་འོག་ཤར་བསྐྱོད་ཀྱིས་མང་གཙོའི་ཀ་བ་གསུམ་ལྗིད་མཉམ་སྟངས་འཛིན་གྱི་ལམ་ནས་སྲིད་དབང་བསྐྱང་རྒྱུའི་ཉམས་གསོག་མགོ་འཛུགས་ཀྱིས་ལོ་ངོ་བཅུ་ལྷག་སོང་སྟེ། ཁྲིམས་ཀྱི་དབང་བསྒྱུར་སྲ་བརྟན་ཡིད་ཆེས་འཕེར་བ་བྱུང་མཚམས་ཕྱི་ལོ་ ༢༠༡༡ ཟླ་ ༥ ཙེས་ ༢༩ ནས་བཟུང་ངོས་ནས་སྔར་ལམ་བོད་རྒྱལ་ཁབ་དང་གཞུང་གི་གཙོ་འཛིན་གྱི་འགན་དབང་རྒྱུན་སྐྱོང་མ་དགོས་པར་ལོ་ངོ་བརྒྱ་ཕྲག་དུ་མའི་རིང་༧རྒྱལ་དབང་སྐུ་ཕྲེང་ན་རིམ་གྱིས་བསྐྱངས་པའི་བོད་ཀྱི་སྲིད་དབང་ཁྲིམས་བཟོ་ལྷན་ཚོགས་ཀྱིས་གཏན་ལ་ཕབ་པའི་བཅའ་ཁྲིམས་ཀྱིས་བསྐྱང་རྒྱུའི་གོ་སྐབས་སུ་སོན་པར་དགའ་སྤོབས་དང་འབྲེལ། མང་གཙོའི་ཀ་བ་གསུམ་གའི་སྣེ་མོ་བ་ཡོངས་ཀྱིས་ལས་ཁུར་བླང་སྐབས་ “བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་བློ་གཏད་ཀྱི་ཐོག་ནས་”ཞེས་དམ་འབུལ་བྱ་སྲོལ་ལ་བརྟེན་ཚང་མས་བཅའ་ཁྲིམས་ཀྱི་ཚངས་ཐིག་ལས་མི་བརྒལ་བར་འདྲ་མཉམ་དྲང་བདེན་གྱིས་ཆབ་སྲིད་བསྐྱངས་ཏེ། ༧རྒྱལ་དབང་ན་རིམ་གྱི་དབུ་ཁྲིད་མེད་པའི་སྟོང་ཆ་ནམ་ཡང་མི་མངོན་པའི་གདེང་སྤོབས་བྱས་པ་ཡིན། ཞེས་བཀོད་ཡོད་འདུག

དེ་ནས་མུ་མཐུད། འོན་ཀྱང་འདི་ལོའི་བྱུང་རིམ་དུ་དེ་ལས་ལྡོག་སྟེ་གནད་དོན་རེ་ཟུང་ལ་དོན་མེད་མཁྲེགས་བཟུང་གིས་སྐབས་བཅུ་བདུན་པའི་གྲོས་ཚོགས་ཁྲིམས་མཐུན་སྐོང་ཚོགས་མ་ཐུབ་པར་ངོས་རང་བློ་ཕམ་བྱུང་བར་མ་ཟད། བོད་མི་སྤྱི་དང་། ལྷག་པར་གཞིས་བཞུགས་བོད་མི་ལྷག་བསམ་ཅན་རྣམས་ལ་བློ་ཕམ་དང་ཡིད་ཆད་འབྱུང་གཞིར་གྱུར་མོད་བྱ་ཐབས་བྲལ། ད་ཡོད་དཀའ་རྙོག་འདི་དག་སེལ་ཐབས་ཀྱང་བཅའ་ཁྲིམས་སུ་གསལ་ཡོད་པ་ལྟར་ཁྲིམས་ཀྱི་དབང་བསྒྱུར་ངོས་ལེན་བྱས་ན་དཀའ་རྙོག་ཡོང་གཞི་མ་མཆིས། བཅའ་ཁྲིམས་ཀྱི་འབྲུ་དོན་ལག་བསྟར་དཀའ་རིགས་ཡོད་ཚེ་ཁྲིམས་ལུགས་གཞིར་བཟུང་བཅའ་ཁྲིམས་བསྐྱར་བཅོས་ཀྱི་ཐབས་ལམ་ཡོད་བཞིན་པ་དང་། འབྲུ་དོན་འགྲེལ་བརྗོད་བྱེད་སྟངས་ལ་ཐེ་ཚོམ་བྱུང་ན་ཁྲིམས་ལུགས་ལྟར་ཆེས་མཐོའི་ཁྲིམས་ཞིབ་ཁང་ལ་ཞུ་གཏུགས་ཀྱི་ལམ་ནས་བསལ་དགོས། བཅའ་ཁྲིམས་འགྲེལ་བརྗོད་ཀྱི་མཐའ་མའི་འགན་དབང་ཆེས་མཐོའི་ཁྲིམས་ཞིབ་ཁང་ཁོ་ནར་ཡོད།

གནད་དོན་འདི་དག་གཞི་རྩར་བཟུང་སྐབས་ད་ལམ་གྱི་རྙོག་འཛིན་འདིའི་སྐོར་ངོས་ལ་རེ་སྐུལ་བྱ་རྒྱུ་བཅའ་ཁྲིམས་དོན་ཚན་དང་པོའི་ཁྱབ་ཁོངས་སུ་ཡོད་མིན་ཐེ་ཚོམ་དང་། གལ་ཏེ་ངོས་ནས་ལམ་སྟོན་བྱེད་དབང་དུ་བཏང་རུང་བཅའ་ཁྲིམས་ཀྱི་རྒྱ་ལས་བརྒལ་བ་ཞིག་བྱེད་ཐབས་མེད་པ་དངོས་དོན་རེད། ངོས་ཀྱི་བསམ་ཚུལ་འདི་དག་བར་སྐབས་མང་ཚོགས་སུ་ལན་མང་བརྗོད་ཟིན་པས་མ་ཤེས་པ་མེད་རེ་ཡིན་མོད། ད་དུང་ངོས་ལ་ལམ་སྟོན་ཁ་གསལ་དགོས་པའི་རེ་འདུན་ཡོད་ན་གཤམ་གསལ།

༡། སྐབས་བཅུ་བདུན་པའི་གྲོས་ཚོགས་ཆེད་དབུས་འོས་བསྡུ་ལས་ཁང་གིས་ཁྲིམས་མཐུན་འོས་བསྡུ་བྱས་ཏེ་ཁུངས་སོ་སོའི་སྤྱི་འཐུས་ཐོན་པར་གསལ་བསྒྲགས་ཟིན་པ་ཚང་མས་བཅའ་ཁྲིམས་ཀྱི་འབྲུ་དོན་གཞིར་བཟུང་དམ་འབུལ་བྱ་རྒྱུ། ༢། དེ་ལྟར་མ་བྱུང་ཚེ་སྤྱི་འཐུས་ལྷན་ཚོགས་ཀྱི་གྲུབ་ཆ་གང་མྱུར་ལོངས་ཆེད་འོས་བསྡུ་ལས་ཁང་ནས་བཅའ་ཁྲིམས་གཞིར་བཟུང་བྱེད་སྒོ་གང་ཡོད་ལག་བསྟར་བྱ་རྒྱུ་བཅས་ཡིད་འཇགས་གྱིས། ཞེས་བཀའ་སྩལ་གནང་མཛད་ཡོད་འདུག

དེ་ཡང་འདི་ལོའི་ཕྱི་ཟླ་ ༦ ཚེས་ ༨ ཉིན་བོད་མི་མང་སྤྱི་འཐུས་སྐབས་བཅུ་བདུན་པའི་དམ་འབུལ་ཞུ་ཕྱོགས་མི་འདྲ་བ་གཉིས་ཆགས་པའི་རྐྱེན་གྱིས། ཚོགས་གཙོ་ཚོགས་གཞོན་འོས་འདེམས་ཀྱིས་མཚོན་པའི་གྲོས་ཚོགས་ཀྱི་ལས་རིམ་རྣམས་འགྲོ་མ་ཐུབ་པར་ཟླ་བ་ ༣ དང་ཕྱེད་ཀ་ལྷག་ཕྱིན་པ་དང་། དུས་ཡུན་འདིའི་རིང་སྤྱི་སྒེར་ཁག་དང་སྤྱི་འཐུས་ནང་ཁུལ་བཅས་ནས་དཀའ་རྙོག་སེལ་ཐབས་བྱས་ཀྱང་གྲུབ་འབྲས་མ་སོན་པར་བརྟེན། ཕྱི་རྒྱལ་གྱི་བདམས་ཐོན་སྤྱི་འཐུས་རྣམ་པ་ལྔས་འབྲེལ་མཐུད་དང་གོ་སྒྲིག་འོག ཕྱི་ཟླ་ ༩ ཚེས་ ༢༧ ནས་ ༢༩ བར་ཉིན་གྲངས་གཉིས་དང་ཕྱེད་ཀ་རིང་གངས་སྐྱིད་སྲིད་སྐྱོང་ཚོགས་ཁང་དུ་ནང་མོལ་ཚོགས་འདུ་ཞིག་བསྐོངས་ཏེ། ཚོགས་འདུའི་སྟེང་དཀའ་རྙོག་སེལ་བའི་ཐབས་ལམ་གྲོས་གཞི་ ༨ གཏན་འབེབ་བྱུང་ཡོད་ཅིང་། གྲོས་གཞི་ཁག་ལ་བྱུང་ན་སྤྱི་མོས་དང་། དེ་ལྟར་མ་བྱུང་ཚེ་གསང་བའི་འོས་བསྡུ་བརྒྱུད་ངོ་ཡོད་གསུམ་ཆ་གཉིས་ཡན་གྱིས་མོས་མཐུན་ཐག་གཅོད་དགོས་པའི་གྲོས་འཆར་བྱུང་བ་ལྟར། གྲོས་གཞི་དོན་ཚན་ ༧ ༧གོང་ས་རྒྱལ་བ་རིན་པོ་ཆེ་མཆོག་ལ་མཚན་འཁོད་སྙན་ཞུ་འབུལ་རྒྱུར་སྤྱི་མོས་བྱུང་ཡོད་འདུག

དེ་ཡང་འདེམས་ཐོན་སྤྱི་འཐུས་རྣམ་པའི་གྲོས་གཞི་ཁག་ ༨ ཁྲོད་ནས། དང་པོ་བལ་བརྒལ་ཚོགས་གཙོའི་མདུན་ཚང་མས་བསྐྱར་དུ་དམ་འབུལ་ཞུ་རྒྱུ་ཞེས་པར་མོས་མཐུན་ཡོད་པ་གྲངས་ ༢༠ དང་མོས་མཐུན་མེད་པ་གྲངས་ ༢༤། གྲོས་གཞི་གཉིས་པ་དམ་བཅའ་འབུལ་སྟངས་མི་འདྲ་བ་གཉིས་བྱུང་ཟིན་པ་ཕྱོགས་གཉིས་ཀས་ཕན་ཚུན་ཁས་ལེན་ཞུ་རྒྱུ་ཞེས་པར་མོས་མཐུན་ཡོད་པ་གྲངས་ ༢༣ དང་མོས་མཐུན་མེད་པ་ ༢༤ བྱུང་འདུག གསུམ་པ་བར་བརྒལ་ཚོགས་གཙོས་༧གོང་ས་མཆོག་གི་སྐུ་པར་དང་བཅའ་ཁྲིམས་མདུན་དམ་འབུལ་ཞུ་རྒྱུ་དང་། བར་བརྒལ་ཚོགས་གཙོའི་མདུན་སྤྱི་འཐུས་ཚང་མས་བསྐྱར་དུ་དམ་འབུལ་ཞུ་རྒྱུ་ཞེས་པར་མོས་མཐུན་བྱེད་མཁན་ ༡༦་དང་མོས་མཐུན་མེད་པ་༢༧། རྩིས་མེད་ཕྱིན་པ་ ༡ བཅས་བྱུང་བ་དང་། གྲོས་གཞི་བཞི་པ་༧གོང་ས་མཆོག་གི་སྐུ་པར་དང་བར་བརྒལ་ཚོགས་གཙོ་ཐུན་མོང་གི་མདུན་ཚང་མས་དམ་འབུལ་ཞུ་རྒྱུ་ཞེས་པར་མོས་མཐུན་ཡོད་པ་ ༡༥ དང་མེད་པ་ ༢༩། ཚང་མས་བར་བརྒལ་ཚོགས་གཙོའི་སར་དམ་བཅའ་ཕུལ། གྲོས་ཚོགས་ནང་ཁྲིམས་ཞིབ་པ་རྣམས་འཕོ་འགྱུར་བཏང་བའི་གྲོས་ཆོད་དེ་ཕྱིར་འཐེན་བྱ་རྒྱུ། དུས་ཚོད་རྒྱབ་བཤིག་རྒྱག་རྒྱུ་ཞེས་པར་མོས་མཐུན་བྱེད་མཁན་ ༡༦ དང་མོས་མཐུན་མེད་པ་ ༢༨ བྱུང་འདུག དེ་བཞིན་ཐེག་ཆེན་ཆོས་གླིང་གཙུག་ལག་ཁང་གི་མགོན་ཁང་གི་རྟེན་གཙོ་དཔལ་ལྡན་ལྷ་མོའི་མདུན་རྣམ་གྲྭ་མཁན་རིན་པོ་ཆེ་དབུ་གཞུགས་ཐོག་འཕྲིན་བཅོལ་དང་འབྲེལ་ཟན་རྟགས་བསྒྲིལ་ནས་ཐག་གཅོད་གནང་རྒྱུ་ཞེས་པར་མོས་མཐུན་ཡོད་མཁན་གྲངས་ ༡༢ དང་མེད་མཁན་ ༣༡ རྩིས་མེད་ ༡ བཅས་དང་། གྲོས་གཞི་བདུན་པ་བཅའ་ཁྲིམས་དོན་ཚན་དང་པོའི་དགོངས་དོན་བཞིན་༧གོང་ས་མཆོག་མཚན་འཁོད་སྙན་ཞུ་འབུལ་རྒྱུར་སྤྱི་མོས་བྱུང་བར་བརྟེན། གྲོས་གཞི་ ༨ པ་ཚང་མས་མོས་མཐུན་ཐུབ་པའི་ཐབས་ལམ་ཞིག་གཏན་ནས་མ་རག་ན། སྐབས་བཅུ་བདུན་པའི་སྤྱི་འཐུས་ཡོངས་རྫོགས་དགོངས་པ་ཞུ་རྒྱུ་ཞེས་པར་ཐག་གཅོད་བྱ་དགོས་བྱུང་མེད་པ་རེད་འདུག

འདེམས་ཐོན་སྤྱི་འཐུས་རྣམ་པའི་མཚན་འཁོད་སྙན་ཞུ་དེའི་ནང་། གཞིས་བྱེས་བོད་འབངས་ཡོངས་ཀྱི་མགོན་དཔུང་། ཚེ་འདི་ཕྱི་གཉིས་ཀྱི་རེ་ལྟོས་ཉག་གཅིག་ཏུ་གྱུར་བ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བཅའ་ཁྲིམས་དོན་ཚན་དང་པོའི་ནང་གསེས་ ༢ པའི་དགོངས་དོན་ལྟར་གསོལ་འདེབས་སྐྱབས་འཇུག་ཞུ་རྒྱུ་སྤྱི་མོས་གཏན་འབེབས་བྱུང་བ་བཞིན། བོད་མིའི་སྒྲིག་འཛུགས་དང་བཙན་བྱོལ་བོད་མིའི་སྤྱི་ཚོགས་ལ་འཕྲད་པའི་དཀའ་རྙོག་འདི་སེལ་བའི་ཐབས་གཞན་གཏན་ནས་མ་མཆིས་པས་མགོན་པོ་གང་ཉིད་ཀྱིས་ཇི་དགེའི་བཀའ་སློབ་རིན་པོ་ཆེ་སྤྱི་བོའི་གཙུག་རྒྱན་དུ་ཅི་ནས་ཀྱང་སྩོལ་གནང་ཡོང་བའི་སྐྱབས་འཇུག་ཞུ་རྒྱུ་དང་། མགུས་འབངས་སྤྱི་འཐུས་མིང་ཁུར་བ་རྣམ་པས་མགོན་པོ་གང་ཉིད་ཀྱི་ཐུགས་རེ་དང་། རྒྱ་ཆེའི་མི་མང་གི་ཡིད་ཆེས་དང་རེ་བ་ཇི་བཞིན་མ་འགྲུབ་པར་སྙིང་ནས་མཐོལ་བཤགས་དང་འབྲེལ། གུས་འབངས་སྐབས་ ༡༧ པའི་སྤྱི་འཐུས་མིང་ཁུར་བ་ཐུན་མོང་ལ་མགོན་པོ་གང་ཉིད་ནས་བརྙན་ལམ་བརྒྱུད་གསེར་ཞལ་དངོས་སུ་མཇལ་རྒྱུའི་གོ་སྐབས་བཟང་པོ་དང་འབྲེལ་བླང་དོར་བཀའ་སློབ་ཅི་ནས་ཀྱང་ཆེད་སྩོལ་གནང་སྐྱོང་ཡོང་བའི་གསོལ་འདེབས་ཞུ་བཞིན་ལགས་ན། མ་ཤེས་རྨོངས་པས་བཅིངས་པའི་གུས་འབངས་རྣམས་དང་། བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་ཀྱི་འཆམ་མཐུན་དང་། རྩ་དོན་འཐབ་རྩོད་ལ་ཕན་རླབས་རྒྱ་ཆེ་ཡོང་སླད་གསོལ་འདེབས་སྐྱབས་འཇུག་ཞུ་རྒྱུ་དང་། བླང་དོན་བཀའ་སློབ་གང་གནང་ལ་ཡིད་གཉིས་ཐེ་ཚོམ་གང་ཡང་མེད་པར་ཤར་བསྐྱོད་ཞུ་རྒྱུའི་དམ་འཅའ་བརྟན་པོ་སྙིང་བཅངས་ཞུ་བཞིན་ཡོད། ཅེས་འཁོད་ཡོད་འདུག

གསར་འགོད་པ། པ་སངས་ཚེ་རིང་།