བློ་བཟང་ལུང་རྟོགས་ཀྱིས་སྒྱུར་། ཨོ་གླིང་།
ད་ལྟ་གནས་ཚུལ་དེ་གཞུང་འབྲེལ་ལྟ་བུར་གྱུར་ཡོད། རྒྱ་ནག་གིས་རང་ཉིད་ཀྱི་མངོན་འདོད་འགྲུབ་ཆེད་མི་གཏའ་བཙན་ཉར་བྱེད་ངེས་ཡིན་པ་དང་། འཛམ་གླིང་གིས་དེ་ལྟར་ཡིན་པ་ཤེས་དགོས་པའི་བརྡ་ལན་སྤྲད་ཡོད། པེ་ཅིང་ཕྱོགས་ནས་ཕྱི་རྒྱལ་གྱི་མི་སྣ་མུ་མཐུད་འཛིན་བཟུང་བྱེད་རྒྱུ་ཡིན་པ་ང་ཚོས་ཚོད་དཔག་བྱེད་ཐུབ། རྒྱ་ནག་ཏུ་ཡོད་པའི་ཨོ་སི་ཊོ་ལི་ཡའི་སྤྱི་གཉེར་ཁང་གི་ལས་དོན་སྒྲུབ་མཁན་ཚོས་རང་ཉིད་ཀྱི་ལས་བྱེད་ཚོར་ཉེན་ཁ་དེ་ཡོད་པར་ཆ་འཇོག་དགོས། ལྷག་པར་ད་ལྟ་རྒྱ་ནག་ཏུ་གནས་སྡོད་ཨོ་སི་ཊོ་ལི་ཡའི་མི་སེར་རྣམས་ཀྱིས་རང་ཉིད་མུ་མཐུད་ཡུལ་དེར་སྡོད་དགོས་མིན་ཡང་བསམ་བློ་བསྐྱར་ཏུ་གཏོང་དགོས་པ་ནི་སྨོས་ཅི། རྒྱ་ནག་ནང་རྒྱུན་རིང་པོར་བཅའ་སྡོད་བྱེད་མཁན་ཞིག་ཡིན་ན་ཐག་གཅོད་དེ་ལས་སླ་བོ་ཞིག་གཏན་ནས་མིན། ངས་ཁོང་ཚོར་གདུང་སེམས་མཉམ་སྐྱེད་ཞུ་བཞིན་ཡོད།
བདུན་ཕྲག་གཅིག་གི་སྔོན་དུ་ཧཱ་ཝེ་((Huawei) བརྡ་འཕྲིན་འཕྲུལ་ལས་བཟོ་ཚོང་ཁང་གི་དངུལ་རྩིས་སྤྱི་གཉེར་བ་མེན་ཝན་ཀྲའོ་(Meng Wanzhou) ཁོང་མོ་ཨ་མེ་རི་ཁའི་ཁྲིམས་ཞིབ་ཁང་ནས་ཉེས་ཅན་རྩིས་སྤྲོད་དགོས་པའི་འབོད་སྐུལ་ཞུ་བཞིན་པའི་སྐབས་འདིར། ཁོང་ཚོའི་དབར་གྲོས་མཐུན་ནམ་སྤྲོད་ལེན་གྱི་ཁ་འཆམ་པ་ལྟར་ཁོ་མོ་ཁེ་ན་ཌ་ནས་ཕྱིར་བསྐྱོད་ཆོག་པ་དང་། སྤྲོད་ལེན་གྱི་གྲོས་མཐུན་ནང་དུ་དངུལ་ཁང་ལ་མགོ་སྐོར་བཏང་བའི་ནག་ཉེས་ཡོད་པའི་ཁས་ལེན་ཀྱང་ཚུད་འདུག། ཕྱི་ལོ་༢༠༡༨ ལོར་ཁོ་མོ་བཀག་ཉར་བྱས་རྗེས་རྒྱ་གཞུང་གིས་འཛིན་བཟུང་བྱས་ཡོད་པའི་ཁེ་ན་ཌའི་མི་སེར་གཉིས་ཀྱང་ད་ཐེངས་དུས་གཅིག་ལ་གློད་བཀྲོལ་བཏང་བར་མ་ཟད། རྒྱ་ནག་ནས་ཕྱི་ལོག་ཏུ་འགྲོ་རྒྱུར་བཀག་འགོག་བྱས་ཡོད་པའི་ཨ་རིའི་མི་སེར་གཉིས་ཀྱང་གློ་བུར་དུ་ཕྱིར་བསྐྱོད་བྱེད་བཅུག་པ་རེད།
མི་ཁ་ཤས་ནས་བློ་དོགས་བྱས་པ་ལྟར། ཁོང་མོར་ནག་ཉེས་ཡོད་མེད་ལ་མ་བལྟས་པར་རྒྱ་གཞུང་གིས་ཁེ་ན་ཌའི་མི་སེར་གཉིས་བཙོན་འཇུག་བྱས་པ་དང་ཨ་རིའི་མི་སེར་གཉིས་ཀྱི་འགྲོ་བསྐྱོད་ལ་བཀག་འགོག་བྱས་ནས་སྐུ་ལྕམ་མེན་ཝེ་གློད་བཀྲོལ་ཡོང་ཐབས་བྱས་ཡོད་པ་དེ་ད་ཐེངས་དུས་ཚོད་ཀྱིས་བདེན་དཔང་བྱས་པ་རེད། ཁོ་ཚོས་མི་གཏའ་བཙན་ཉར་བྱེད་པའི་གནས་བབ་འདི་ནི་ཐེ་ཚོམ་མི་དགོས་པ་ཞིག་ཡིན་མོད། གནས་ཚུལ་གསར་པ་ཞིག་ནི་རྒྱ་གཞུང་གི་བྱ་སྤྱོད་ཀྱིས་གནས་ཚུལ་དེ་ཧ་ཅང་གསལ་པོར་བཟོས་ནས་རྒྱལ་ཁབ་གཞན་ལ་ཉེན་བརྡ་བཏང་བ་དང། ཧ་ཅང་གསལ་ཤོས་ནི། རྒྱ་ནག་ལ་གལ་འགངས་ཆེ་བའི་མི་སེར་རྣམས་རྒྱལ་སྤྱིའི་ཁྲིམས་ལུགས་ཀྱི་སྒང་ལ་ཡོད་པའི་བརྡ་ལན་བཏང་བ་དེ་རེད། ད་དུང་སྤྱིར་བཏང་གི་མཇུག་འབྲས་གཞན་ཞིག་ནི། གལ་སྲིད་རྒྱལ་ཁབ་གཞན་གྱིས་ཁོ་ཚོའི་བཀའ་བརྩི་དང་ལེན་མ་ཞུས་པ་ཡིན་ན་མི་གཏེ་བཙན་ཉར་བྱེད་རྒྱུར་ཨང་གསར་ཡིན་པའི་བརྡ་ལན་ཀྱང་སྤྲད་ཡོད།
ཕྱི་ལོ་༢༠༡༨ ལོ་ནས་བཟུང་ཨོ་སི་ཊོ་ལི་ཡའི་བཟོ་ཚོང་ཁང་གི་སྤྱི་ཁྱབ་པ་ཚོ་ཚོང་དོན་ཆེད་རྒྱ་ནག་ལ་འགྲོ་རྒྱུ་ལས་གཡོལ་ཏེ་རང་ཉིད་ཀྱི་གཤམ་འོག་གི་ལས་བྱེད་རྣམས་གཏོང་གི་ཡོད་པའི་གནས་ཚུལ་ཐོན་ཡོད། ངའི་ཤེས་འདོད་པ་ཞིག་ལ་གཤམ་འོག་གི་ལས་བྱེད་པ་རྣམས་ཀྱིས་དེའི་སྐོར་ལ་བསམ་བློ་གང་འདྲ་ཞིག་འཁོར་གྱི་ཡོད་དམ། ཚོང་དོན་ཆེད་རྒྱ་ནག་ལ་འགན་འཛིན་མི་སྣ་གཏོང་རྒྱུ་ནི་དགེ་མཚན་ཧ་ཅང་ཆེན་པོ་ལྡན་པ་སྟེ། ཨོ་སི་ཊོ་ལི་ཡའི་བཟོ་ཚོང་ཁང་རྣམས་ཀྱི་ལས་དོན་ཡོངས་རྫོགས་ས་གནས་ཀྱི་ཚོང་གྲོགས་རྣམས་ལ་བརྟེན་རྒྱུ་ཧ་ཅང་ཁག་པོ་ཡིན། ས་གནས་ཀྱི་མི་རྣམས་ནས་རང་ཉིད་ཀྱི་ཁེ་ཕན་གཙོ་བཟུང་བྱེད་པ་དང་ཚོང་ལས་ཀྱི་རྒྱུད་རིམ་ནང་དྲང་པོ་མི་བྱེད་པ་དེ་འདྲ་ཡོང་སྲིད། ཐ་ན་ཨོ་སི་ཊོ་ལི་ཡའི་བཟོ་ཚོང་ཁང་རྣམས་ལ་དབང་བའི་ལས་ཁུངས་ཡིན་ན་ཡང་། ལྟ་རྟོག་ཞིབ་མོར་བྱེད་དགོས་པ་སྟེ། རྒྱ་ནག་གི་རིག་གཞུང་དུ་གྱུར་བའི་འབྲེལ་ལམ་གྱི་(ཀོན་ཞིས) དྲ་རྒྱའི་ནང་ལས་བྱེད་པ་ཚོས་སྦྱིན་བདག་གི་ཁེ་ཕན་དང་པོར་འཇོག་པའི་སྒྲིག་ལམ་སྣང་མེད་དུ་གཏོང་བའི་ཉེན་ཁ་སླེབས་ཀྱི་ཡོད།
ཕྱི་འབྲེལ་སྲིད་བྱུས་ལ་དཀའ་རྙོག་འཕྲད་སྐབས་སུ་ཨོ་སི་ཊོ་ལི་ཡའི་འགན་འཛིན་ལྷན་ཚོགས་དང་འགོ་ཁྲིད་རྣམས་ཀྱིས་རྒྱ་ནག་ནང་ཡོད་པའི་རང་ཉིད་ཀྱི་ལས་བྱེད་པ་གཅིག་གམ་གཉིས་སམ། ཡང་ན་ཉི་ཤུ་བཅས་སྲིད་གཞུང་དེས་ཁྲིམས་མཐུན་མིན་པའི་སྒོ་ནས་འཛིན་བཟུང་བྱེད་མིན་ལ་བསམ་བློ་གཏོང་དགོས་པ་དང། སྦྱིན་བདག་རྣམས་ཀྱིས་གནས་སྟངས་དེ་འདྲ་བྱུང་སྐབས་འགན་འཁྲི་གང་ཞིག་ཡོད་མེད་རང་ཉིད་ཀྱི་ཁྲིམས་རྩོད་པར་བློ་འདྲི་བྱེད་དགོས་པར་གྱུར་ཡོད། ཨོ་སི་ཊོ་ལི་ཡའི་མི་སེར་རྣམས་རྒྱ་ནག་ལ་མུ་མཐུད་བཅའ་སྡོད་བྱེད་རྒྱུ་གལ་ཆེན་པོ་ཡིན་མིན་ཐད་བསམ་བློ་གཏོང་དགོས་པར་གྱུར་བ་དེའི་ནང་ཧོང་ཀོང་ཀྱང་ཚུད་ཡོད་པ་སྟེ། ཁོ་ཚོས་རང་ཉིད་ནི་རྒྱ་ནག་དམར་པོའི་སྲིད་གཞུང་གི་སྡེར་མོའི་འོག་ནས་ཐར་མེད་པའི་གནས་སྟངས་དེ་ངེས་པར་དུ་ཤེས་དགོས།
རྡོག་ཐོན་བྱེད་རྒྱུའི་ཐག་གཅོད་དེ་ནི་ལས་སླ་བོ་ཞིག་གཏན་ནས་མིན། ལྷག་པར་ས་གནས་དེར་རྒྱུན་རིང་པོ་བཅའ་སྡོད་དང་ཉམས་མྱོང་བསགས་ཡོད་མཁན་ཚོར་སླ་བོ་མིན། ན་ནིང་ང་རང་ལམ་ཁ་དེར་དངོས་སུ་བརྒྱུད་མྱོང་བས་དེའི་སྐོར་ངས་ཧ་ཅང་གསལ་བོར་ཤེས་ཀྱི་ཡོད། བདག་ལ་མཚོན་ན་པེ་ཅིང་ནི་རང་ཁྱིམ་ལྟ་བུ་ཡིན་པ་དང་གནས་དེར་ལོ་བཅུ་དྲུག་རིང་བཅའ་སྡོད་བྱས་པ་ཡིན། རང་ཉིད་རྒྱ་ནག་གི་སྤྱི་ཚོགས་དང་། དེའི་ངོ་མཚར་བའི་གཏམ་རྒྱུད་རིང་མོ། དེའི་ལེགས་པའི་དགེ་མཚན་དང་། མཚམས་རེར་ཁོང་ཁྲོ་སློང་པའི་སྤྱོད་པ་བཅས་ལ་གོམས་ཚར་ཡོད། ཨོ་སི་ཊོ་ལི་ཡ་དང་བསྡུར་ན་ང་ལ་རྒྱ་ནག་ནང་གྲོགས་པོ་གྲོགས་མོ་མང་བ་ཡོད། ཁོང་ཚོ་ཚང་མ་རྒྱ་རིགས་ཡིན་པ་དང་། ང་རང་ལུང་པ་འདི་ལ་ཁ་བྲལ་ནས་གཏན་དུ་མ་ལོག་པའི་ཚེ་ཁོ་ཚོའི་ཁྲོད་ཀྱི་ཁ་ཤས་ལ་ད་དུང་ཡང་བསྐྱར་ཐུག་རྒྱུའི་རེ་བ་ཡོད་པར་བརྟེན་ངས་འདི་ལ་བསམ་ཞིབ་བྱེད་དགོས་པར་གྱུར།
ངའི་ལས་ཀ་སྟེ་ཨ་རིའི་བདེ་སྲུང་དང་བར་སྣང་སྟོང་བའི་འཕྲུལ་རིགས་དང་འབྲེལ་བའི་པར་སྐྲུན་ཐོག་རྒྱ་ནག་ནང་ལས་དོན་སྒྲུབ་རྒྱུ་གལ་ཆེན་པོར་གྱུར་ཡོད། རང་ཉིད་རྒྱ་ནག་སྐོར་གྱི་ཆེད་ལས་མི་སྣ་ཞིག་དང་རྒྱ་སྐད་ཤེས་མཁན་ཞིག་ཡིན་པའི་ཆ་ནས་པེ་ཅིང་ནི་རང་ཉིད་གང་དུ་སྡོད་དགོས་པའི་གནས་ངོ་མ་དེ་ཡིན། རྒྱ་ནག་ཏུ་གནས་སྡོད་ཨོ་སི་ཊོ་ལི་ཡའི་ཡུལ་མི་མང་པོ་ཞིག་གནས་སྟངས་འདིའི་ནང་ལྷུང་ཡོད། ང་རང་ལ་མཚོན་ན་གནས་སྟངས་དེ་ཧ་ཅང་གསལ་པོ་ཆགས་སོང་། རྒྱ་གཞུང་གིས་ཨ་མེ་རི་ཀའི་བརྒྱུད་ལམ་ཁག་ལ་ལས་ཀ་བྱེད་མཁན་གྱི་གསར་འགོད་པ་རྣམས་ཕྱིར་འབུད་བྱེད་ཚད་ཇེ་མང་དུ་ཕྱིན་པ་དང་བསྟུན། རང་ཉིད་ཀྱང་གནས་འདིར་ཁ་བྲལ་དགོས་པའི་བསམ་བློའི་ཁ་ཕྱོགས་བསྒྱུར་སོང་། ང་ལ་དོ་སྣང་བྱུང་བ་ནི་རྒྱ་གཞུང་གིས་འདས་པའི་ལོ་ཤས་རིང་ཕྱི་རྒྱལ་མི་སྣ་བཙན་བཟུང་བྱེད་བཞིན་པ་དེ་རེད། ཁོང་ཚོའི་ཁྲོད་དུ་ཨོ་སི་ཊོ་ལི་ཡའི་མི་སེར་ཡང་ཚུད་ཡོད། འོན་ཀྱང་། ངས་ཉེན་ཁ་དེ་ཙམ་ཆེན་པོ་མེད་པའི་ལྟ་ཚུལ་བཟུང་བ་དང་ཕྱིར་འབུད་གཏོང་རྒྱུ་ནི་ཡོང་སྲིད་པ་ཞིག་བསམ་གྱི་ཡོད།
ཕྱི་ལོ་༢༠༢༠ ཞོགས་པ་ཞིག་ལ་པེ་ཅིང་དུ་ཡོད་པའི་རང་ཁྱིམ་འདིར་ཉལ་ཐེངས་ཐ་མ་དེ་ཨེ་ཡིན་བསམ་བཞིན་ཡར་ལངས་དགོས་བྱུང་སོང་། ང་རང་བཅའ་སྡོད་བྱས་ཆོག་པའི་བཀའ་འཁྲོལ་གྱི་ཡིག་ཆ་ཉི་མ་དེ་ནས་རྫོགས་འགྲོ་བ་དང་། རྒྱ་ནག་ཕྱི་སྲིད་ལས་ཁུངས་ནས་ངའི་གསར་འགོད་པའི་ལག་ཁྱེར་བཀག་སྐྱིལ་བྱས་ཡོད་པར་བརྟེན་ངས་དུས་ཚོད་འཕར་མ་བསྐྱར་ཞུ་བྱེད་དགོས་ཀྱི་ཡོད། ང་ལ་མནར་གཅོད་འདང་ངེས་ཤིག་བཏང་བ་ལོས་ཡིན། ཉི་མ་དེ་ག་རང་ཕྱི་སྲིད་ལས་ཁུངས་ནས་ལག་ཁྱེར་དང་སྤྱི་བདེ་ལས་ཁུངས་ནས་མུ་མཐུད་བསྡད་ཆོག་པའི་བཀའ་འཁྲོལ་སྤྲད་སོང་།
ལོ་མང་པོའི་རིང་འཆར་གཞི་ཡོད་པ་ལྟར་ང་རང་ལམ་སེང་རྒྱ་ནག་གི་བྱང་ཤར་ས་ཁུལ་དུ་གུང་གསེང་དུ་ཕྱིན་པ་ཡིན། ངའི་སེམས་ནང་ད་ཐེངས་འགྲོ་མ་ཐུབ་ན་དུས་གཏན་དུ་འགྲོ་ཐུབ་ཀྱི་མ་རེད་བསམ་སོང་། གུང་གསེང་གི་དུས་སྐབས་ནང་རྒྱ་ནག་དབུས་བརྙན་འཕྲིན་ལས་ཁུངས་ལ་ལས་ཀ་བྱེད་བཞིན་པའི་ཨོ་སི་ཊོ་ལི་ཡའི་མི་སེར་ཆིན་ལིས་འཛིན་བཟུང་བྱས་པ་དང་། དམར་ཕྱོགས་གཞུང་གིས་ཁོ་མོ་ཕྱི་ལོག་ཏུ་ཐོན་ཆོག་གི་འདུག་བསམ་པའི་ཉིན་ཁོ་ནར་རང་ཉིད་མཐོང་སར་ཐོན་རྒྱུ་ཡོད་པའི་རྒྱ་ནག་གི་བཙོན་ཁང་གི་མ་ལག་ཁྲོད་གར་སོང་ཆ་མེད་དུ་གྱུར་བ་རེད། ངས་ད་དུང་མུ་མཐུད་བསྡད་ན་འགྲིག་འགྲོ་མི་ཡོང་ངམ་བསམ་མྱོང་། ང་རང་གུང་གསེང་ནས་ཕྱིར་ལོག་པའི་ཞོགས་པར་ཐོན་པའི་གནས་ཚུལ་ཞིག་ལ། རྒྱ་གཞུང་གིས་ཨོ་སི་ཊོ་ལི་ཡའི་གསར་འགོད་པ་གཉིས་འཛིན་བཟུང་བྱེད་ཐབས་བྱས་པ་དེ་རེད། ཁོང་གཉིས་ནི་ཨེ་སྦེ་སི་གསར་ཁང་གི་གསར་འགོད་པ་སྦིལ་སྦར་ཊིལ་སུ་ལགས་དང་། ཨོ་སི་ཊོ་ལི་ཡའི་དཔལ་འབྱོར་བསྐྱར་ཞིབ་གསར་ཁང་གི་གསར་འགོད་པ་མེ་ཁེལ་སུ་མེ་ཐི་ལགས་གཉིས་རེད།(ABC’s Bill Birtles and Australain Financial Review’s Michael Smith)
ངའི་སེམས་ནང་ད་ནི་ང་རང་འགྲོ་བའི་དུས་ལ་སླེབས་སོང་བསམ། འདི་ནི་ཐག་གཅོད་ཆེན་པོ་ཞིག་ཡིན་པས་ཐག་གཅོད་དེ་ཡང་དག་པ་ཞིག་དང་གང་མགྱོགས་བསམ་བློ་ངེས་པར་དུ་གཏོང་དགོས་པ་ཞིག་རེད། ཉིན་རྗེས་མར་ང་ལ་གནས་ཚུལ་དེ་ལས་མང་པ་འབྱོར་བས་ད་ནི་འགྲོ་བའི་དུས་ལ་སླེབས་སོང་ཅེས་སེམས་ཐག་བཅད་པ་ཡིན། ཨོ་སི་ཊོ་ལི་ཡའི་མཐོ་རིམ་ཕྱི་འབྲེལ་མི་སྣ་ཞིག་གིས་ཁ་སྔོན་གྱི་ཕྱི་འབྲེལ་རྩོད་རྙོག་དེ་འདས་ཚར་བ་ཅེས་བསམ་ཚུལ་བཏོན་སོང་། ངས་ཁོང་ལ་བརྗོད་དོན་ཐེངས་འདིའི་རྩོད་རྙོག་འདས་ཚར་ཡོད་སྲིད། འོན་ཀྱང་། རྗེས་མར་རྩོད་རྙོག་དེ་ལས་མང་པ་དང་དེ་ལས་ཉེན་ཚབས་ཆེ་རུ་འགྲོ་ངེས་རེད་ཅེས་བཤད་པ་ཡིན། ཁོང་གིས་བཤད་རྒྱུ་ཁྱེད་ཀྱི་ལྟ་ཚུལ་དེ་ནོར་འཁྲུལ་ཅན་ཡིན་པའི་རེ་བ་ཡོད་ཟེར། དོ་སྣང་བྱེད་འོས་པ་ཞིག་ལ་ཁོང་གིས་ངའི་བསམ་ཚུལ་དེར་དགག་པ་རྒྱབ་མ་སོང་། འདི་ནི་རྒྱ་ནག་ནང་གནས་སྡོད་ཨོ་སི་ཊོ་ལི་ཡའི་ཡུལ་མི་རྣམས་ཀྱིས་བསམ་བློ་གཏོང་དགོས་པ་གནད་དོན་དེ་རེད།
རྗེས་མར་རྩོད་རྙོག་གང་འདྲ་ཞིག་འབྱུང་ངམ། ཅི་འདྲའི་གནོད་སྐྱོན་ཅན་ཞིག་ཡོང་ངམ། རྒྱ་ནག་གཞུང་གིས་ཅི་ཞིག་བྱེད་སྲིད་དམ་སོགས་རེད། ངས་འདས་པའི་ཉེན་འཚབ་རྣམས་ལ་ཞིབ་བརྟག་བྱས་ཀྱང་དྲི་བ་དེ་དག་ལ་ལན་འདེབས་ཐུབ་ཀྱི་མི་འདུག འོན་ཀྱང་ངས་རྟག་པར་རང་ཉིད་ཀྱི་ཚོད་རྩིས་ལ་ཚད་ལས་བརྒལ་ཀྱི་རྩིས་རྒྱག་གི་ཡོད། ལོ་གཅིག་གི་རྗེས་སུ་ངས་རང་ཉིད་ཀྱི་ཐག་གཅོད་དེ་ཡང་དག་པ་ཞིག་ཡིན་པའི་ངེས་ཤེས་རྙེད་སོང་། འོན་ཀྱང་། རང་ཉིད་རྒྱ་ནག་ལ་གཏན་དུ་ལོག་མི་ཐུབ་པར་བསམ་ན་སེམས་ནང་དཀའ་ངལ་ཆེན་པོ་ཞིག་འཕྲད་ཀྱི་འདུག་ལ་ངས་ཡུལ་དེ་ཤིན་ཏུ་དྲན་བཞིན་ཡོད།
[རྩོམ་པ་པོ་སྦེར་ཌི་ལེ་ ཕེ་རེ་ཊི(Bradley Perrett) ལགས་ནི་ཕྱི་ལོ་༢༠༠༤ ནས་༢༠༢༠ བར་པེ་ཅིང་དུ་རྟེན་གཞི་བྱས་པའི་གསར་འགོད་པ་ཞིག་རེད།]
