གྲོས་ཚོགས་ཀྱི་ལས་ཉིན་གཉིས་པའི་སྟེང་༧གོང་ས་མཆོག་ལ་བཀའ་དྲིན་རྗེས་དྲན་གྱི་གཙོས་གཞིས་བྱེས་བོད་མི་ཡོངས་ལ་བཟོད་གསོལ་ཞུ་བའི་གྲོས་ཆོད་ཅིག་སྤྱི་མོས་གཏན་འབེབས་གནང་སོང་།
དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་གཉིས་པའི་སྟེང་། བར་ལམ་སྐབས་བཅུ་བདུན་པའི་འདེམས་ཐོན་སྤྱི་འཐུས་རྣམ་པའི་དམ་འབུལ་ཞུ་ཕྱོགས་དང་འབྲེལ་བའི་ཐད་ལ་ནང་མོལ་ཚོགས་འདུ་བརྒྱུད། ༧གོང་ས་རྒྱལ་བ་རིན་པོ་ཆེ་མཆོག་ལ་མཚན་འཁོད་སྙན་ཞུ་ཕུལ་ཏེ་མཛད་དཀའ་བཟོས་པ་དང་། ༧གོང་ས་མཆོག་ནས་བཀའ་ཡིག་རིན་པོ་ཆེ་སྩལ་གནང་མཛད་པའི་ནང་མགོན་པོ་གང་ཉིད་ཐུགས་ཕམ་བྱུང་ཡོད་སྐོར་གྱི་གསུང་འཕྲིན་ཕེབས་པ་དེར། སྤྱི་འཐུས་ ༤༥ ཐུན་མོང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་མཐོལ་བཤགས་བཟོད་གསོལ་དང་འབྲེལ། མགོན་པོ་གང་ཉིད་མཆོག་ནས་བཀའ་སློབ་ལམ་སྟོན་སྩལ་གནང་མཛད་པར་བཀའ་དྲིན་རྗེས་དྲན་གྱི་གྲོས་ཆོད་ཅིག་བཞག་ཡོད་པར་སྤྱི་མོས་གཏན་འབེབས་བྱུང་སོང་།
དོན་ཚན་ ༤ ཅན་གྱི་གཞུང་འབྲེལ་བཀའ་དྲིན་རྗེས་དྲན་གྱི་གྲོས་ཆོད་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་ད་ཐེངས་དཀའ་རྙོག་འཕྲད་སྐབས་བླང་དོར་གྱི་བཀའ་སློབ་ལམ་སྟོན་སྩལ་གནང་མཛད་པའི་རྐྱེན་གྱིས། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་སྐོང་ཚོགས་ཐུབ་པ་དང་བོད་མིའི་སྒྲིག་འཛུགས་ཀྱི་ལས་དོན་ལ་འགལ་རྐྱེན་འཕྲད་གཞི་མེད་པར་གནས་སྟངས་བཟང་པོ་ཆགས་པར་བཀའ་དྲིན་ཆེ་ཞུ་དང་། ད་ལམ་མ་རིག་རྨོངས་པའི་གཞན་དབང་དུ་ཤོར་ནས་གནད་དོན་རེ་ཟུང་ལ་ལས་ཀྱི་སྣེ་མོ་བའི་བསམ་ཚུལ་མི་མཐུན་པ་དང་འཁྲུན་ཐག་གཅོད་དཀའ་བའི་གནས་ཚུལ་བྱུང་ནས་སྐབས་ ༡༧ པའི་གྲོས་ཚོགས་ཀྱང་ཁྲིམས་མཐུན་སྐོང་ཚོགས་མ་ཐུབ་པས་ཐུགས་ཕམ་གྱི་གཞིར་གྱུར་པར་ལྷ་ཕྱག་གྲངས་མེད་དང་བཅས་གདུང་ཤུགས་དྲག་པོས་མཐོལ་བཤགས་ཞུ་རྒྱུ་དང་བཅས་ལྷ་དགོངས་གསལ་དྭངས་ཡོང་བའི་སྙིང་ནས་གསོལ་འདེབས་དང་། དཀའ་རྙོག་དེའི་དབང་གིས་གཞིས་བྱེས་བོད་མི་རྣམས་ཀྱང་ཐུགས་ཕམ་བྱུང་བར་བརྟེན་བཟོད་གསོལ་ཞུ་རྒྱུ་དང་། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་བདག་ཅག་བོད་འབངས་སྤྱི་དང་འཇིག་རྟེན་བསྟན་འགྲོའི་སླད་དུ་༧སྐུ་ཚེ་ཞབས་པད་ཚེ་མཐའ་ཡས་པའི་ངོ་བོར་བརྟན་པར་བཞུགས་རྒྱུའི་གསོལ་འདེབས་ཞུས་གནང་ཡོད་འདུག
ད་དུང་གྲོས་ཆོད་ཀྱི་དོན་ཚན་བཞི་པའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གསང་བ་གསུམ་ལ་སྐུ་གེགས་ཀྱི་མཚན་མ་ཕྲ་མོས་ཀྱང་མ་རེག་པར་རྡོ་རྗེའི་ཁམས་སུ་བརྟན་ཞིང་བཞུགས་པ་ནི། གང་ཉིད་ཀྱི་ཐུགས་བསྐྱེད་སྨོན་ལམ་གྱིས་བྱིན་མཐུ་དང་། ལྷ་སྲུང་དམ་ཅན་རྒྱ་མཚོའི་སྡོང་གྲོགས་བཅས་ཡིན་མོད། གཙོ་བོ་བོད་མིའི་སྤྱི་མཐུན་གྱི་བསོད་ནམས་ལ་རག་ལས་པས་བསོད་ནམས་ཀྱི་མཆོག་བླ་མ་དམ་པའི་བཀའ་བཞིན་བསྒྲུབས་ཏེ་མཆོད་པས་མཉེས་པ་ཞུ་རྒྱུ་དེ་ཡིན་པས། མགོན་པོ་མཆོག་གི་དགོངས་གཞི་དང་། གཞིས་བྱེས་རྒྱ་ཆེའི་མི་མང་གི་རེ་བ་ལྟར་བོད་ཀྱི་རྩ་དོན་སྒྲུབ་སླད་ལས་ཀྱི་སྣེ་མོ་བ་རྣམས་དང་རྒྱ་ཆེའི་མང་ཚོགས་བཅས་ནས་སྤྱི་དོན་ཁོ་ནར་དམིགས་ཏེ་ནུས་ཤུགས་དམ་ཚིག་གཟོང་ཁ་གཅིག་ཏུ་བསྒྲིལ་ཏེ་ཆོལ་གསུམ་བོད་མི་ཡོངས་རྫོགས་རྡོག་རྩ་གཅིག་སྒྲིལ་ཡོང་བར་འབད་འབུངས་ལྷོད་མེད་བྱུ་རྒྱུ་ཡིན་བཀོད་ཡོད་འདུག
དེ་ཡང་གྲོས་འཆར་འདོན་མཁན་སྤྱི་འཐུས་ཨོ་ཀྲོང་རིན་ཆེན་རྒྱལ་མཚན་ལགས་ཀྱིས་གྲོས་ཚོགས་ར་བའི་སྟེང་གཞུང་འབྲེལ་བཀའ་དྲིན་རྗེས་དྲན་གྱི་གྲོས་འཆར་སྒྲོག་སྦྱང་གནང་བའི་ནང་། བར་ལམ་ལས་ཀྱི་སྣེ་མོ་བ་རྣམས་མ་རིག་རྨོངས་པའི་དབང་གིས་གནད་དོན་རེ་ཟུང་ཐད་བསམ་ཚུལ་མི་མཐུན་པ་དང་འཁྲུན་ཐག་གཅོད་དཀའ་བའི་གནས་ཚུལ་ཁག་གཅིག་སྔ་རྗེས་སུ་བྱུང་ཡོད་པ་དང་། སྐབས་འདིའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་སོགས་སྤྱི་འཐུས་ལྷན་ཚོགས་ཀྱི་ལས་དོན་རྒྱུན་སྐྱོང་མ་ཐུབ་པར་ཟླ་བཞི་ལ་ཉེ་བ་གནས་ཏེ་བོད་མིའི་སྒྲིག་འཛུགས་ཀྱི་གནས་བབ་ཀྱང་སེམས་འཚབ་ཀྱི་རང་བཞིན་དུ་འགྱུར་ཉེན་བྱུང་བར་བརྟེན། མགོན་པོ་གང་ཉིད་ལ་མཛད་དཀའ་ཞུ་ཕོད་དཀའ་ཡང་ཐབས་ལམ་གཞན་མ་མཆིས་པས་བླང་དོར་བཀའ་སློབ་གང་གནང་ལ་ཡིད་གཉིས་ཐེ་ཚོམ་གང་ཡང་མེད་པར་ཤར་བསྐྱོད་ཞུ་རྒྱུའི་དམ་བཅའ་དང་བཅས། བཙན་བྱོལ་བོད་མིིའི་བཅའ་ཁྲིམས་ཀྱི་དོན་ཚན་དང་པོའི་ནང་གསེས་ ༢ པའི་དགོངས་དོན་ལྟར་ཇི་དགེའི་བླང་དོར་བཀའ་སློབ་རིན་པོ་ཆེ་སྩོལ་བའི་སྐྱབས་འཇུག་སྐབས་བཅུ་བདུན་པའི་སྤྱི་འཐུས་ཀྱི་མིང་ཁུར་བ་་༤༥ ཐུན་མོང་ནས། ཕྱི་ལོ་ ༢༠༢༡ ཟླ་ ༩ ཚེས་ ༢༩ ཉིན་སྙན་གསན་གསོལ་འདེབས་ཕུལ་བར། ཕྱི་ལོ་ ༢༠༢༡ ཟླ་ ༡༠ ཚེས་ ༦ ཉིན་ཐུགས་རྗེའི་བཀའ་ཡིག་ཟབ་མོ་བཀའ་དྲིན་ཆེད་ཕེབས་ལ་སྤྱི་འཐུས་རྣམ་པས་ཀྱང་བཀའ་སློབ་ལམ་སྟོན་ཇི་སྩལ་བཞིན་ཤར་བསྐྱོད་གནང་ནས་ད་ཆ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་སྐོང་ཚོགས་ཐུབ་པ་འདི་ཡང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་པར་སོང་བོད་མི་མང་སྤྱི་འཐུས་ལྷན་ཚོགས་ནས་བཀའ་དྲིན་རྗེས་དྲན་གྱི་གྲོས་ཆོད་ཅིག་འཇོག་དགོས་པར་གལ་འགངས་ཆེ་བར་མཐོང་། ཞེས་བརྗོད་ཡོད་འདུག
སྤྱི་འཐུས་རྣམ་པས་བཀའ་དྲིན་རྗེས་དྲན་གྱི་གྲོས་འཆར་ཐོག་བགྲོ་གླེང་ཞུས་སྐབས། སྤྱི་འཐུས་རེ་ཟུང་གིས་ད་ལན་གྱི་དཀའ་རྙོག་དང་འབྲེལ་ནས་༧གོང་ས་རྒྱལ་བ་རིན་པོ་ཆེ་མཆོག་ཐུགས་ཕམ་བྱུང་བར་ཡིག་ཐོག་ཙམ་གྱི་ཐོག་ནས་མཐོལ་བཤགས་ཞུ་རྒྱུའི་ཚབ་ཏུ་ཡིག་བརྒྱ་གསོག་པའམ། ཡང་ན་བོད་མི་ཉམ་ཐག་རྣམས་ལ་ལོ་གཅིག་གི་འཚོ་སྣོན་འབུལ་རྒྱུས་མཚོན་པའི་ཐབས་ལམ་བརྒྱུད་མཐོལ་བཤགས་གང་ཆེར་ཞུ་དགོས་སྐོར་དང་། ཡང་སྤྱི་འཐུས་ཤིག་གིས་ད་ལན་སྤྱི་འཐུས་རྣམ་པས་༧གོང་ས་རྒྱལ་བ་རིན་པོ་ཆེ་མཆོག་ཙམ་དུ་མ་ཟད་རྒྱ་ཆེའི་མི་མང་རྣམས་ལའང་བཟོད་གསོལ་ཞུ་དགོས་སྐོར་གྱི་དགོངས་ཚུལ་བཏོན་གནང་སོང་།
གསར་འགོད་པ། པ་སངས་ཚེ་རིང་།
