ངོས་ཀྱི་མི་ཚེ་འདིའི་ནང་འཛམ་གླིང་མི་མང་སྤྱིའི་བསམ་བློ་གཏོང་སྟངས་ལ་འགྱུར་བ་ཆེན་པོ་ཕྱིན་པ་ཞིག་མཐོང་གི་འདུག་ཅེས་གསུངས།

༧གོང་ས་མཆོག་ནས་ང་ཚོའི་མི་ཚེའི་ནང་གནས་སྟངས་རིགས་འགའ་ཤས་ཤིག་ལ་གདོང་ལེན་མི་ཐུབ་པ་དང་འགྱུར་བའང་གཏོང་ཐུབ་ཀྱི་མེད་དུས་དངོས་ཡོད་གནས་ཚུལ་དང་མཐུན་པའི་ཐོག་ནས་དྭང་ལེན་བྱེད་དགོས་རྒྱུ་དེ་གལ་ཆེན་པོ་ཡིན་སྐོར་བཀའ་སློབ་སྩལ།

དེ་རིང་༧གོང་ས་མཆོག་གིས་འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་མགོ་ཁྲིད་ཁག་ཅིག་དང་ལྷན་དུ་ནང་བསམ་བློའི་སློབ་སྦྱོང་དང་ཀླད་པའི་ཡར་རྒྱས་ཞེས་པའི་བརྗོད་གཞིའི་ཐོག་དྲ་ལམ་བརྒྱུད་ཉིན་གཉིས་པའི་བཀའ་སློབ་ལམ་སྟོན་དང་དྲི་བར་བཀའ་ལན་སྩལ་སྐབས། ཐོག་མར་༧གོང་ས་རྒྱལ་བ་རིན་པོ་ཆེ་མཆོག་གིས། སྤྱིར་བཏང་ཚང་མས་ཧ་གོ་ཡི་ཡོད་པ་རེད། འདས་པའི་ལོ་རབས་བརྒྱ་ཕྲག་ཁ་ཤས་ཀྱི་གོང་ལ་འཁྲུག་རྩོད་བྱུང་བའི་སྐབས་གསོད་རེས་གཏོང་རྒྱུ་དེ་འཆར་ཅན་ཆགས་ཀྱི་ཡོད་པ་རེད། དཔེར་ན་ངོས་རང་གི་མི་ཚེའི་ནང་དུ་ཆ་བཞག་ནའང་། དམག་ཆེན་དང་པོ་དང་དམག་ཆེན་གཉིས་པ་བྱུང་བའི་སྐབས། མི་ཕལ་མོ་ཞིག་གིས་རྒྱལ་ཁབ་ཀྱི་རྩ་དོན་གྱི་དོན་དུ་གཞན་གྱི་སྲོག་གཅོད་པ་དེ་ཧ་ལམ་རུང་བ་ལྟ་བུ་རྩི་མཁན་རྐྱང་རྐྱང་ཆགས་བསྡད་ཡོད་རེད། དེར་བརྟེན་དེའི་ཐོག་ལ་དཔུང་དང་དཔལ་འབྱོར། ནུས་ཤུགས་རྣམས་གོ་མཚོན་བཟོ་བའི་དོན་དུ་བེད་སྤྱོད་ཞེ་དྲགས་བཏང་བ་རེད། དེ་འདྲའི་བསམ་བློ་གཏོང་སྟངས་ཀྱི་རིམ་པ་དེར་འགྱུར་བ་འགྲོ་ཡི་འདུག  ང་རང་ཚོའི་འཛམ་བུ་གླིང་སྤྱི་ཡོངས་ཀྱི་ཞི་བདེའི་དོན་དུ་དགོངས་པ་བཞེས་མཁན་རྒྱ་ཆེ་རུ་ཕྱིན་འདུག  ལྷག་པར་དུ་དེང་སང་རྒྱལ་ཁབ་བྱེ་བྲག་པ་སོ་སོ་སྒེར་གྱི་ཁེ་ཕན་དེ་རྒྱལ་སྤྱིའི་དཔལ་འབྱོར་དང་འབྲེལ་བ་ཡོད་པ་དེ་འདྲའི་བསམ་ཤེས་ཡོང་གི་ཡོད་རེད། འདས་པའི་དུས་རབས་སྔ་མའི་སྐབས་སོ་སོའི་རྒྱལ་ཁབ་ཀྱི་ཁེ་ཕན་གཙོ་འདོན་བྱས་པར་བརྟེན། དེ་བསྒྲུབ་པའི་དོན་དུ་དྲག་རྩུབ་ཀྱི་བྱ་སྤྱོད་སྤེལ་རྒྱུ་དེ་འདྲ་བྱུང་ཡོད་རེད། དེང་སང་དཔལ་འབྱོར་དང་ཆོས་གང་འདྲ་ཞིག་ཡིན་རུང་ཕན་ཚུན་ལྟོས་དགོས་ཀྱི་ཡོད་པར་བརྟེན། རང་བཞིན་དེ་ལ་བརྟེན་ནས་འཁྲུག་རྩོད་དང་དམག་རྒྱག་་པ་སོགས་ཀྱིས་ཕན་ཐོགས་ཡོད་མ་རེད། བྱས་ཙང་མི་མཐུན་པའི་ཆ་ཡོད་ན། མི་མཐུན་པའི་ཆ་སེལ་བའི་དོན་དུ་ཕན་ཚུན་གྲོས་མོལ་བྱས་ནས་སྐད་ཆ་བཤད་དེ་སེལ་དགོས་པ་ཞིག་རེད། ངོས་རང་གི་མི་ཚེ་འདིའི་ནང་འཛམ་གླིང་གི་མི་མང་སྤྱིའི་བསམ་བློ་གཏོང་སྟངས་ཀྱི་ཕྱོགས་ལ་འགྱུར་བ་ཆེན་པོ་ཕྱིན་པ་ཞིག་མཐོང་གི་འདུག ཅེས་གསུངས་སོང་།

ཡང་༧གོང་ས་མཆོག་གིས། ང་ཚོས་མི་རབས་རྗེས་མར་དམིགས་བསལ་གྱིས་དོ་སྣང་བྱས་ནས་སློབ་སྦྱོང་ཚད་ལྡན་སྤྲོད་དགོས་རྒྱུ་གལ་ཆེན་པོ་རེད། འཛམ་གླིང་ལ་འགྱུར་བ་འགྲོ་ཡི་ཡོད་རེད། འགྱུར་བ་དེ་དང་བསྟུན་པའི་ཁ་ཡོད་ལག་ཡོད་ཀྱི་དངོས་ཡོད་གནས་ཚུལ་དང་མཐུན་པའི་ཐབས་ཤེས་གཅིག་ནི་རྒྱལ་སྤྱིའི་རང་བཞིན་ཅན་གྱི་བསམ་བློ་སྤེལ་རྒྱུ་དེ་ཞེ་དྲགས་གལ་ཆེན་པོ་ཆགས་བསྡད་ཡོད་པ་རེད། སོ་སོའི་རྒྱལ་ཁབ་དང་སོ་སོའི་ས་གནས་གཙོ་བོ་ཐེར་འདོན་བྱ་རྒྱུ་དེ་དངོས་ཡོད་གནས་ཚུལ་དང་མི་མཐུན་པ་ཆགས་ཀྱི་ཡོད་པ་རེད། དེར་བརྟེན་མི་རབས་གསར་པ་ཚོས་སློབ་སྦྱོང་གི་སྒོ་ནས་འདས་པའི་དམག་གི་གནས་ཚུལ་དང་ལོ་རྒྱུས་རིགས། དེ་བཞིན་གོ་མཚོན་བཟོ་བ་སོགས་པ་དེ་འདྲའི་སློབ་སྦྱོང་ཞེ་དྲགས་བྱེད་མི་དགོས་པར། དེ་ལས་ལྡོག་སྟེ་འཛམ་གླིང་ཞི་བདེ་ཚད་དང་ལྡན་པ་ཡོང་བའི་དོན་དུ་གང་བྱེད་དགོས་ཡོད་མེད་དེ་འདྲའི་སྐོར་སློབ་སྦྱོང་སྤེལ་རྒྱུ་ཞེ་དྲགས་གལ་ཆེན་པོ་རེད། རྒྱལ་ཁབ་གང་ཡིན་རུང་སོ་སོའི་ཁེ་ཕན་རྐྱང་རྐྱང་བསྒྲུབ་པའི་དོན་དུ་ཐབས་ཤེས་གང་བཏང་རུང་འགྲིག་གི་རེད་བསམ་པའི་བསམ་བློ་འདི་རྗེས་ལུས་ཐེབས་པའི་བསམ་བློ་ཆགས་བསྡད་ཀྱི་ཡོད་པ་རེད། དེར་བརྟེན་མི་རབས་གསར་པ་ཚོས་འཛམ་གླིང་སྤྱིའི་བདེ་རྩ་དང་འགྲོ་བ་མི་སྤྱིའི་བདེ་སྡུག་སྐོར་ལ་བསམ་བློ་གཏོང་དགོས་རྒྱུ་གལ་ཆེན་པོ་ཆགས་ཀྱི་ཡོད་པ་རེད། ཅེས་གསུངས་སོང་།

དེ་ནས་དྲི་བ་དྲིས་ལན་གྱི་ལས་རིམ་ནང་སློབ་ཕྲུག་ཁག་ཅིག་གིས། ང་ཚོའི་བཅོས་སུ་མེད་པའི་གནད་དོན་ཁག་གམ་འགྱུར་བ་གཏང་རྒྱུ་མེད་པའི་གནས་ཚུལ་ཁག་ལ་ང་ཚོས་དྭང་དུ་ལེན་པའི་ཐབས་ཤེས་གང་འདྲ་ཡོད་སྐོར་དྲིས་པར་༧གོང་ས་མཆོག་གིས། ང་ཚོ་མིའི་བསམ་བློ་འདི་ལ་རྒྱ་ཆེ་ས་ནས་བསམ་བློ་གཏོང་ཐུབ་པའི་ནུས་པ་ཡོད་རེད། ང་ཚོའི་མི་ཚེ་འདིའི་ནང་གནས་སྟངས་རིགས་འགའ་ཤས་ཤིག་གདོང་ལེན་མི་ཐུབ་པ་དང་འགྱུར་བའང་གཏང་རྒྱུ་མེད་པ་དེ་འདྲ་ཡོད་དུས། འདི་དངོས་ཡོད་གནས་ཚུལ་དང་མཐུན་པའི་ཐོག་ནས་དྭང་ལེན་བྱེད་དགོས་རྒྱུ་གལ་ཆེན་པོ་རེད། དཔེར་ན། རྒྱ་གར་གྱི་མཁས་པ་རྒྱལ་སྲས་ཞི་བ་ལྷས་གསུངས་ཡོད་པ་རེད།  གལ་ཏེ་བཅོས་སུ་ཡོད་ན་ནི། དེ་ལ་མི་དགར་ཅི་ཞིག་ཡོད། གལ་ཏེ་བཅོས་སུ་མེད་ན་ནི། དེ་ལ་མི་དགར་བྱེད་ཅི་ཕན། ཞེས་གསུངས་ཡོད་རེད། དེར་བརྟེན་ང་ཚོས་འགྱུར་བ་གཏང་རྒྱུ་མེད་པ་ཡིན་ན། དེ་ལ་སེམས་ཁྲལ་བྱས་ནས་ཕན་ཐོགས་ག་རེ་འདུག་ཟེར་བ་འདི་བཀའ་གནང་བ་ལྟར་ཉམས་ལེན་བྱེད་ན་འགྲིག་གི་ཡོད་པ་རེད། ཅེས་བཀའ་ལན་གནང་སོང་།

ཡང་སློབ་ཕྲུག་ (Isabel) ཞེས་པ་ཞིག་གིས། ཆོས་ལུགས་ཀྱི་དབུ་ཁྲིད་ཞིག་གིས་སོ་སོའི་ཆོས་ལུགས་ཀྱི་ར་བ་ལས་བརྒལ་ནས་འཛམ་གླིང་སྤྱི་ལ་ཁྱབ་པའི་འདྲ་མཉམ་དང་བྱམས་བརྩེ་ལ་སོགས་པ་སྤེལ་རྒྱུའི་དགོངས་པ་གང་འདྲ་ཤར་ཡོང་གི་ཡོད་སྐོར་བཀའ་འདྲི་ཞུས་པར་༧གོང་ས་མཆོག་གིས། ང་རང་ཚོར་ལམ་ལུགས་སྲོལ་མི་འདྲ་བ་དང་ལྟ་གྲུབ་མི་འདྲ་བ་འདི་ཚོས་ཕན་ཐོགས་ཡོང་གི་ཡོད་པ་རེད། དཔེར་ན་ཁ་ལག་ལྟ་བུར་ཆ་བཞག་པ་ཡིན་ན། ཞོགས་པ་དང་ཉིན་གུང་། དགོང་མོའི་ཁ་ལག་ཆ་ཚང་གཅིག་ཟ་བ་ཡིན་ན་ཁ་ལག་ལ་ཞེན་པ་ལོག་པ་ཆགས་ཀྱི་འདུག  དེར་བརྟེན་བསམ་བློའི་ནང་དུ་བསམ་བློ་གཅིག་རང་གཅིག་བསྐྱར་བཟློས་བྱས་པ་ཡིན་ན། ཀླད་པ་དཀའ་ལས་ཁག་པ་དེ་འདྲ་ཡོང་སྲིད་ཀྱི་རེད། བྱས་ཙང་བསམ་བློ་གཏོང་སྟངས་མ་འདྲ་བ་གཅིག་བྱུང་བ་ཡིན་ན། དཔེར་ན་ཆོས་ལུགས་མ་འདྲ་བ་དང་ལྟ་གྲུབ་མ་འདྲ་བ་ཡོད་དུས། དེ་འདྲའི་བསམ་ཚུལ་ལ་སློབ་སྦྱོང་བྱས་ནས་ཞིབ་བསྡུར་བྱས་པ་ཡིན་ན་ཕན་ཐོགས་ཡོང་གི་རེད། དེ་འདྲའི་བསམ་བློ་མང་པོ་གཏང་བ་ཡིན་ན་ང་ཚོའི་ཀླད་པ་འདི་ལ་དངོས་གནས་ནུས་པ་ཡོད་པ། བེད་སྤྱོད་ཆེན་པོ་ཡོད་པ། དམིགས་བསལ་གྱི་ཁྱད་ཆོས་ཡོད་མཁན་གྱིས་མིའི་ཀླད་པ་རྗེན་པ་ར་འཕྲོད་ཀྱི་རེད། དེ་འདྲའི་རྣམ་དཔྱོད་ཅན་གྱི་ཀླད་པ་དེས་གནས་ཚུལ་བྱེ་བྲག་པ་གཅིག་ལ་རྐྱང་རྐྱང་བསམ་བློ་བཏང་བ་ཡིན་ན། ཀླད་པའི་རྣམ་དཔྱོད་འདི་འཕྲོ་བརླག་གཏོང་བ་ལྟ་བུ་རེད། ནང་པའི་ཆོས་ལུགས་ལ་ཆ་བཞག་ན། ང་ཚོའི་གྲུབ་མཐའི་ནང་ཆོས་ལུགས་མ་འདྲ་བ་ཚོས་ལྟ་གྲུབ་རིགས་ཆ་ཚང་ལ་སློབ་སྦྱོང་བྱེད་ཀྱི་ཡོད་པ་རེད། སྤྱིར་བཏང་ཆོས་ལུགས་མ་འདྲ་བ་མང་པོ་ཡོད་རེད། ཆོས་ལུགས་མི་འདྲ་བའི་ལྟ་གྲུབ་མི་འདྲ་བ་མང་པོ་ཡོད་ནའང་བསླབ་བྱ་གཅིག་གྱུར་རེད། དེར་བརྟེན་བསླབ་བྱ་འདི་ཆོས་ལུགས་ཀྱི་སྙིང་པོ་ལྟ་བུ་ཆགས་བསྡད་ཡོད་པ་དང་ཉམས་སུ་ལེན་རྒྱུ་དངོས་འདི་ཆགས་ཡོད་པར་བརྟེན། བྱམས་སྙིང་རྗེ་འདི་བསླབ་བྱའི་སྙིང་པོ་ཆགས་ཀྱི་ཡོད་པ་རེད། བྱམས་སྙིང་རྗེའི་བསླབ་བྱ་སྤེལ་བར་རྒྱབ་རྟེན་གྱི་ལྟ་གྲུབ་མི་འདྲ་བ་ཡོད་ན། འདི་ཡོང་ཆོག་གི་རེད་བསམ་གྱི་འདུག  ཅེས་བཀའ་སློབ་སྩལ་ནས་ཉིན་གྲངས་གཉིས་རིང་གི་བཀའ་སློབ་ལེགས་པར་གྲུབ་སོང་།

གསར་འགོད་པ། བསྟན་འཛིན་ཕུར་བུ།