གནས་ཆེན་རྩྭ་མཆོག་གྲོང་དུ་རྒྱལ་སྤྱིའི་གནམ་ཐང་ཞིག་དབུ་འབྱེད་གནང་།

རྒྱ་གར་གྱི་སྲིད་བློན་མུ་དྷི་མཆོག་གིས་གནས་ཆེན་རྩྭ་མཆོག་གྲོང་དུ་རྒྱལ་སྤྱིའི་གནམ་ཐང་ཞིག་དབུ་འབྱེད་གནང་སྟེ་འཛམ་གླིང་གི་ནང་པ་ཚོར་གནས་མཇལ་སྟབས་བདེ་ཡོང་ཆེད་ནང་པའི་གནས་ཆེན་རྣམས་ཡར་རྒྱས་གཏོང་རྒྱུ་ནི་རྒྱ་གར་དབུས་སའི་གཞུང་གི་ལས་དོན་གལ་ཆེན་ཞིག་ཡིན་སྐོར་གསུངས་འདུག

PM Narendra Modi to attend Abhidhamma Day programme at U.P.

དེ་རིང་རྒྱ་གར་གྱི་བྱང་ཕྱོགས་མངའ་སྡེ་ཨུ་ཏར་པར་དྷི་ཤིའི་ནང་ཆགས་པའི་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ས་རྩྭ་མཆོག་གྲོང་ (Kushinagar) དུ། འབར་མའི་ལྷ་བབ་དུས་ཆེན་གྱི་མཛད་སྒོ་འཚོགས་པའི་ཐོག་རྒྱ་གར་གྱི་སྲིད་བློན་མུ་དྷི་མཆོག་ཕེབས་ཏེ། རྒྱལ་སྤྱིའི་གནམ་ཐང་ཞིག་དབུ་འབྱེད་གནང་བ་དང་འབྲེལ། སངས་རྒྱས་ཀྱི་སྐུ་བརྙན་ལ་ན་བཟའ་གསོལ་ཏེ་མཆོད་འབུལ་སྨོན་ལམ་གནང་ཡོད་འདུག་ལ། དེ་རིང་གནམ་ཐང་དབུ་འབྱེད་ཀྱི་མཛད་སྒོའི་ཐོག་སིང་གྷ་ལ་ (Sri Lanka) དང་ཐའེ་ལན་ཌི་ (Thailand)། འབར་མ་ (Myanmar)། ལྷོ་ཀོ་རི་ཡ་ (South Korea)། བལ་ཡུལ། འབྲུག ཀེམ་བྷོ་ཌི་ཡ་ (Cambodia) སོགས་ནས་ཡིན་པའི་ནང་པའི་གྲྭ་པ་སྙན་གྲགས་ཅན་དང་། དེ་བཞིན་ནང་པའི་རྗེས་འབྲང་མང་བའི་རྒྱལ་ཁབ་ཀྱི་གཞུང་ཚབ་རྣམས་ཀྱང་ལྷན་འཛོམས་གནང་ཡོད་འདུག

དེ་ཡང་གནམ་ཐང་དབུ་འབྱེད་ཀྱི་མཛད་སྒོའི་སྟེང་སྲིད་བློན་མུ་དྷི་མཆོག་གིས། རྒྱ་གར་གྱི་ངོས་ནས་སྟོན་པ་བཅོམ་ལྡན་འདས་དང་འབྲེལ་བའི་གནས་ཆེན་རྣམས་ཡར་རྒྱས་གོང་འཕེལ་ཡོང་ཐབས་དང་། ནང་བསྟན་རྗེས་འབྲང་བ་རྣམས་ཀྱི་འགྲིམ་འགུལ་སྟབས་བདེ་ཡོང་ཆེད་གནམ་ཐང་ལས་གཞི་འདིར་དོ་སྣང་དམིགས་བསལ་བྱས་ཡོད། རྩྭ་མཆོག་གྲོང་ཡར་རྒྱས་གོང་འཕེལ་གཏོང་རྒྱུ་དེ་ད་ལྟའི་དབུས་སའི་གཞུང་གི་ལས་དོན་གལ་ཆེན་ཞིག་ཡིན། ཞེས་དང་། རྒྱ་གར་ནི་སངས་རྒྱས་ཆོས་ལུགས་ཀྱི་འབྱུང་གནས་དང་ལྟེ་གནས་ཤིག་ཡིན་ལ། རྩྭ་མཆོག་གྲོང་གི་རྒྱལ་སྤྱིའི་གནམ་ཐང་འདི་ནི་འཛམ་གླིང་ཁྱོན་དུ་གནས་པའི་ནང་བསྟན་རྗེས་འབྲང་བ་རྣམས་ལ་ལེགས་སྐྱེས་སུ་ཕུལ་བ་ཞིག་ཡིན། ཞེས་གསུངས་འདུག་ལ། དེ་རིང་དབུ་འབྱེད་བྱས་པའི་གནམ་ཐང་འདིས་ཆོས་ཕྱོགས་ཙམ་དུ་མ་ཟད་མངའ་སྡེའི་དཔལ་འབྱོར་ལའང་ཐུགས་ཕན་ཆེན་པོ་གསོ་ངེས་ཡིན་པ་དང་། ལྷག་པར་དུ་མངའ་སྡེའི་ཡུལ་སྐོར་སྤྲོ་འཆམ་ཚན་པར་ཁེ་ཕན་ཆེན་པོ་ཐོབ་ངེས་ཡིན་སྐོར་སོགས་གསུངས་ཡོད་འདུག

ས་ཁྱོན་ཨེ་ཀར་ ༥༩༠ ལྷག་ཡོད་པའི་རྒྱལ་སྤྱིའི་གནམ་ཐང་གསར་པ་དེ་འདི་ལོའི་ཕྱི་ཟླ་ ༡༡ ཚེས་ ༢༦ ནས་སྤྱི་དམངས་འགྲིམ་འགྲུལ་གནམ་གྲུ་དངོས་སུ་འཕུར་གཏོང་བྱ་རྒྱུ་ཡིན་འདུག་ལ། གནམ་ཐང་དེ་བརྒྱུད་ནས་ལྷོ་ཨེ་ཤ་ཡའི་རྒྱལ་ཁབ་སིང་གྷ་ལ་ (Sri Lanka) དང་ཉི་ཧོང་། ཐའེ་ཝན། ལྷོ་ཀོ་རི་ཡ། རྒྱ་ནག ཐའེ་ལན་ཌི། ཝེ་ཐི་ནམ་ (Vietnam)། སིང་གྷ་པུར་(Singapore) གྱིས་མཚོན་པའི་ནང་བསྟན་དར་འཕེལ་ཆེ་བའི་རྒྱལ་ཁབ་ཁག་ལ་ཐད་ཀར་མཁའ་ལམ་འགྲིམ་འགྲུལ་བྱེད་ཐུབ་ཀྱི་ཡོད་པ་རེད་འདུག

PM Narendra Modi opens international airport at UP’s Kushinagar

སྔོན་རྩིས་མ་དངུལ་ལྟར་ན། རྒྱ་གར་གྱི་གནམ་ཐང་ལྷན་ཚོགས་ (Airport Authority of India) དང་ཨུ་ཏར་པར་དྷེ་ཤི་གཞུང་གཉིས་ཀྱིས་མཉམ་འབྲེལ་ཐོག་ནས་འཛུགས་སྐྲུན་བྱས་པའི་རྒྱལ་སྤྱིའི་གནམ་ཐང་དེར་ཁྱོན་འགྲོ་གྲོན་ཧིན་སྒོར་བྱེ་བ་ ༢༦༠ ཙམ་སོང་འདུག་ལ། གནམ་ཐང་དེའི་ཞུགས་སྒོར་སྨི་གྲུ་བཞི་མ་ ༣༦༠༠ ལྷག་གི་རྒྱ་ཁྱོན་ཡོད་པ་དང་། གནམ་ཐང་དེས་རྒྱ་གར་གྱི་ཐོན་འབྲས་རིགས་སྐྱེལ་འདྲེན་བྱེད་པར་ཕན་ཐོགས་ཆེན་པོ་ཡོད་ཅིང་། རྒྱ་གར་ནང་སྤྲོ་འཆམ་པ་བརྒྱ་ཆ་ ༢༠ ལྷག་འགྲིམ་འགྲུལ་བྱ་ཐུབ་པའི་ཚོད་དཔག་བྱེད་ཀྱི་འདུག་ལ། མངའ་སྡེ་གཞུང་ངོས་ནས་གནམ་ཐང་དེ་ཉིད་རྒྱ་གར་གྱི་ནང་པའི་སྤྲོ་འཆམ་ས་ཚིགས་སུ་ངོས་འཛིན་བྱ་འཆར་ཡོད་འདུག

དེ་རིང་དབུ་འབྱེད་བྱས་པའི་རྒྱལ་སྤྱིའི་གནམ་ཐང་འདི་ནི་འདས་པའི་ལོ་ ༧ ནང་ཨུ་ཏ་པར་དྷི་ཤི་ནང་འཛུགས་སྐྲུན་བྱས་པའི་གནམ་ཐང་དགུ་པ་དེ་ཡིན་ཞིང་། དེའི་ཐོག་འབྱུང་འགྱུར་མངའ་སྡེ་དེའི་ནང་བསྐྱར་དུ་གནམ་ཐང་མི་འདྲ་བ་ ༡༡ འཛུགས་སྐྲུན་བྱ་འཆར་ཡོད་ཅིང་། ད་ལྟ་འཛུགས་སྐྲུན་བྱེད་མུས་ཡིན་པའི་ཇེ་ཝར་གནམ་ཐང་ (Jewar Airport) ནི་རྒྱ་གར་རྒྱལ་ཡོངས་ཀྱི་གནམ་ཐང་ཆེ་ཤོས་དེར་འགྱུར་རྒྱུ་ཡིན་འདུག

གསར་འགོད་པ། པ་སངས་ཚེ་རིང་། བསྟན་འཛིན་ཕུར་བུ། དཔལ་ལྡན།