རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་ཚན་པའི་ལག་བསྟར་འགན་འཛིན་ཟུར་བ་བོད་རིགས་བུད་མེད་ཚེ་རིང་བྱམས་པ་ལགས་སུ་ཡུལ་དེའི་རིམ་པ་ལྔ་པའི་ཆེ་བསྟོད་གཟེངས་རྟགས་ Ridder in de Orde van Oranje-Nassau ཞེས་པ་ཐོབ།
དེ་རིང་ནེ་ཌར་ལན་ཌིའི་རྒྱལ་ས་ཨམ་སི་ཊ་ཌེམ་དུ། ཧོ་ལན་ཌི་གཞུང་གིས་སྤྱི་ཚོགས་ནང་ཕྱག་ལས་རླབས་ཆེན་བསྒྲུབས་པའི་ངོས་འཛིན་འོག འདས་པའི་ལོ་ངོ་ ༤༠ མ་ཟིན་ཙམ་གྱི་རིང་དགེ་རྒན་དང་ཚོགས་པ་སྒྲིག་འཛུགས་ཁག་གི་མགོ་འཁྲིད་ཀྱི་ལས་འགན། ལྷག་པར་དུ་འདས་པའི་ལོ་ངོ་ ༢༢ ཀྱི་རིང་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་ཚན་པའི་ལག་བསྟར་འགན་འཛིན་གནང་མཁན་བོད་རིགས་བུད་མེད་ཚེ་རིང་བྱམས་པ་ལགས་སུ། ཡུལ་དེའི་རིམ་པ་ལྔ་པའི་ཆེ་བསྟོད་གཟེངས་རྟགས་ Ridder in de Orde van Oranje-Nassau ཞེས་པ་ཕུལ་སོང་ལ། གཟེངས་རྟགས་དེ་ཉིད་བོད་མི་ཞིག་ལ་ཐོབ་པ་ཐོག་མ་ཆགས་ཀྱི་ཡོད་འདུག
རྒྱལ་སྤྱིའི་བོད་དོན་ལས་འགུལ་ཁང་ངོས་ནས་ཚེ་རིང་བྱམས་པ་ལགས་སུ་ལས་ཁྱུར་ཕེབས་སྐྱེལ་མཛད་སྒོ་འཚོགས་པའི་སྟེང་། ཚེ་རིང་བྱམས་པ་ལགས་གནས་སྡོད་བྱ་སའི་གྲོང་ཁྱེར་ཨུ་ཏེ་རེ་ཅི་ (Utrecht) ཡི་སྤྱི་ཁྱབ་པ་ལྕམ་སྐུ་ཤ་རོན་དྷ་ཤི་མ་ (Sharon Dijksma) ལགས་དངོས་སུ་ཕེབས་ཏེ། ཚེ་རིང་བྱམས་པ་ལགས་ལ་སྙན་གྲགས་དང་ཆེ་མཐོང་ལྡན་པའི་སྐྱ་དམག་ (knight) གི་ཆེ་མཐོང་གཟེངས་རྟགས་དེ་ཉིད་ཕུལ་སོང་།
མཛད་སྒོའི་ཐོག་ཚེ་རིང་བྱམས་པ་ལགས་ཀྱིས། དེ་རིང་ངས་འདས་པའི་ལོ་ངོ་ ༦༠ རིང་ཁྱེད་རྣམས་ཀྱིས་བོད་དང་བོད་མི་རྣམས་ངོས་འཛིན་བྱས་པར་ཐུགས་རྗེ་ཆེ་ཞུ་རྒྱུ་དུས་ཚོད་རེད། ང་ཚོ་བོད་མི་རྒན་གཞོན་མེད་པར་བོད་ནང་ཡོད་པའི་བོད་མི་རྣམས་ཀྱི་རང་དབང་ཆེད་དུ་སྐད་འབོད་སོགས་གང་བྱེད་ཐུབ་ནའང་བྱ་དགོས་ལ། ངོས་རང་གིས་བོད་མི་རྣམས་ནི་བོད་དོན་འཐབ་རྩོད་ཆེད་མདུན་མཆོང་བྱེད་མཁན་དང་། བོད་དོན་རྒྱབ་སྐྱོར་བ་རྣམས་ལ་ཡར་སྐུལ་བྱེད་མཁན་ཞིག་ཡིན་པའི་ཡིད་ཆེས་བྱེད་ཀྱི་ཡོད། རྒྱལ་སྤྱིའི་བོད་དོན་ལས་འགུལ་ཁང་གིས་ད་བར་དེ་ལྟར་གནང་ཡོད་པའི་ཡིད་ཆེས་བྱེད་ཀྱི་ཡོད། ཅེས་དང་། ད་བར་རྒྱལ་སྤྱིའི་བོད་དོན་ལས་འགུལ་ཁང་ལ་དོན་དམ་པའི་རྒྱབ་སྐྱོར་གནང་མཁན་ནི་ནེ་ཌར་ལན་ཌིའི་མི་མང་རྣམ་པ་ཡིན་པ་དང་། ཁྱེད་རྣམ་པས་ད་བར་ང་ཚོའི་སྟེང་ནམ་ཡང་སྙིང་སྟོབས་མ་ཞུམ་པར་གནས་ཡོད་ལ། ཁྱེད་ཚོ་ནི་ང་ཚོའི་ཚོགས་པ་འདིའི་རྒྱབ་རུས་ལྟ་བུ་ཞིག་ཆགས་ཡོད། ཅེས་དང་། གནས་སྟངས་ཇི་འདྲ་ཞིག་ལ་གྱར་མིན་ལ་མ་ལྟོས་པར། ངོས་ཀྱིས་བོད་ནང་འགྱུར་བ་ཞིག་འགྲོ་དགོས་པའི་ཡིད་ཆེས་བྱེད་ཀྱི་ཡོད། ང་ཚོས་ལས་འགུལ་དང་ཚོགས་འདུ་ཇི་ཙམ་བསྡུས་ནའང་བོད་ནང་འགྱུར་བ་འགྲོ་དགོས་ཀྱི་ཡོད་པ་རེད། ང་ཚོ་ཎི་ཐར་ལན་ཌིའི་ནང་ནད་ཡམས་ཀྱི་རྐྱེན་པས་སྒོ་རྒྱ་བསྡམས་ཉིན་ཤས་སྡོད་ཚུགས་ཀྱི་མེད་ནའང་། བོད་ནང་གི་བོད་མི་ཚོ་རང་གི་རྒྱལ་ཁབ་ནང་རྒྱ་ནག་དམར་ཤོག་ཚོགས་པའི་བཙན་གནོན་འོག་ཉིན་མཚན་མེད་པར་སྒོ་རྒྱ་བསྡམས་ནས་གནས་ཡོད། དེར་བརྟེན་ད་ལྟ་ཇི་འདྲ་བྱས་ནའང་མཐའ་དོན་དེ་བོད་ནང་འགྱུར་བ་ཞིག་ངེས་པར་དུ་འགྲོ་དགོས་པ་རེད། ཅེས་དང་། དེ་རིང་འདི་ངས་གྱེས་ཁ་ཞུ་ཡི་མེད་ལ། མ་འོངས་པར་བོད་མི་ཞིག་ཡིན་པའི་ཆ་ནས་བོད་དོན་འཐབ་རྩོད་ཀྱི་ཆེད་དུ་མུ་མཐུད་དཀའ་ལས་བརྒྱབ་ངེས་ཡིན་སྐོར་དང་། བོད་དོན་རྒྱབ་སྐྱོར་བ་རྣམ་པས་བོད་དང་བོད་དོན་ལ་མུ་མཐུད་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་གནང་སོང་།
རྒྱལ་སྤྱིའི་བོད་དོན་ལས་འགུལ་ཁང་ངོས་ནས་ཚེ་རིང་བྱམས་པ་ལགས་ལས་འཁྱུར་ཞུས་པའི་ཚབ་ཏུ། བོད་མི་མང་སྤྱི་འཐུས་ཟུར་པ་བཀྲས་མཐོང་དབང་པོ་ལགས་ཚན་པ་དེའི་ལག་བསྟར་འགན་འཛིན་གསར་པར་བསྐོ་གཞག་གནང་ཟིན་ཡོད་པ་དང་། བཀྲས་མཐོང་དབང་པོ་ལགས་ཀྱིས་ད་ལན་གྱི་ནེ་ཌར་ལན་ཌིའི་སྤྱི་ཁྱབ་མས་བྱམས་པ་ཚེ་རིང་ལགས་སུ་ཆེ་བསྟོད་གཟེངས་རྟགས་ཕུལ་བ་དེར། བྱམས་པ་ཚེ་རིང་ལགས་ཀྱིས་བོད་མི་མང་ལ་ལོ་མང་རིང་ཞབས་འདེགས་ཞུས་པ་དང་། དྲང་བདེན་དང་འགྲོ་བ་མིའི་ཐོབ་ཐང་རྩོད་ལེན་བྱེད་སྐབས་འཚེ་མེད་ཞི་བའི་ཐབས་ལམ་བསྟེན་པ་ལ་ཁོང་ཚོས་བསམ་ཡུལ་ལས་འདས་པའི་གཞུང་ཕྱོགས་ཀྱི་ངོས་འཛིན་འདི་བྱས་པ་ལ་ང་ཚོ་དགའ་སྤྲོ་ཚད་མེད་སྐྱེས་བྱུང་། ཅེས་དང་། ཚེ་རིང་བྱམས་པ་ལགས་ཀྱི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ལ་སྤྲོ་སེམས་དང་བློས་གཏོང་ཆེ་བའི་སྙིང་སྟོབས་ནི། རྩ་བའི་འཇིག་རྟེན་རིན་ཐང་ལྟ་ཚུལ་འདི་དག་ལ་སྲུང་སྐྱོབ་བྱེད་མཁན་གྱི་བུད་མེད་དང་སྐྱེས་པ་ཚང་མའི་བློ་སྒོ་འབྱེད་པའི་མིག་དཔེ་ཞིག་ཆགས་ཡོད། ཅེས་བརྗོད་འདུག
ཚེ་རིང་བྱམས་པ་ལགས་ནི་ཕྱི་ལོ་ ༡༩༥༥ ལོར་བོད་ཀྱི་རྫོང་དཀར་ཁུལ་དུ་སྐྱེས་ཤིང་། ཕྱི་ལོ་ ༡༩༨༤ ལོར་ཧོ་ལན་ཌིའི་ནང་གནས་སྤོས་ཀྱིས་ཨམ་སི་ཊ་ཌེམ་གྱི་ཤར་ཕྱོགས་གཙུག་ཞིབ་འཇུག་ལྟེ་གནས་ཁང་དུ་བོད་སྐད་ཡིག་དགེ་རྒན་གྱི་ཕྱག་ལས་གནང་། ཁོང་མོ་ཕྱི་ལོ་ ༡༩༨༦ ལོར་ཧོ་ལན་ཌི་བོད་རིགས་སྤྱི་མཐུན་ཚོགས་པ་གསར་འཛུགས་གནང་མཁན་གྲས་སུ་ཡོད་ལ། ལོ་ ༨ རིང་སྤྱི་མཐུན་ཚོགས་པའི་ཚོགས་གཙོའི་ལས་འཁུར་ཞུས། དེའི་རྗེས་ཕྱི་ལོ་ ༡༩༨༩ ལོར་ཁོང་མོ་དང་འབྲེལ་ཡོད་སྐོར་ཞིག་གིས་མཉམ་འབྲེལ་ཐོག་ནས་ཧོ་ལན་ཌིའི་བོད་དོན་རྒྱབ་སྐྱོར་ཚོགས་པ་བཙུགས་ཏེ་ཚོགས་པའི་ཚོགས་གཙོའི་འགན་བཞེས། དེ་བཞིན་ཁོང་མོ་ཕྱི་ལོ་ ༡༩༩༡ ལོར་རྒྱལ་ཁབ་མེད་པའི་འཐུས་ཚབ་དང་མི་མང་ཚོགས་པ་(Unrepresented Nations and Peoples Organization) ཞེས་པ་ཐོག་མར་གསར་འཛུགས་གནང་མཁན་གྲས་སུ་ཡོད་ཅིང་། ལོ་ ༦ རིང་ཚོགས་པ་དེའི་དྲུང་ཆེ་གཞོན་པའི་ལས་འཁུར་ཞུས་ཡོད་པ་རེད། ཕྱི་ལོ་ ༡༩༩༩ ལོ་ནས་བཟུང་ད་བར་ལོ་ངོ་ ༢༢ རིང་རྒྱལ་སྤྱིའི་བོད་དོན་ལས་འགུལ་ཁང་གི་ལག་བསྟར་འགན་འཛིན་གྱི་ཐུགས་འགན་བཞེས་ཡོད་པ་རེད་འདུག
སྤྱིར་ནེ་ཌར་ལན་ཌིའམ་ཡང་ན་མིང་གཞན་དུ་ཧོ་ལན་ཌི་རུ་འབོད་པའི་ཡུ་རོབ་ཀྱི་རྒྱལ་ཁབ་འདི་ཉིད་ཀྱིས་རིམ་པ་དྲུག་ཅན་གྱི་ Orange-Nassau ཞེས་པའི་ཆེ་བསྟོད་གཟེངས་རྟགས་དེ་ནི་ཐོག་མར་ཧོ་ལན་ཌིའི་བཙུན་མོ་ཨེ་མའི་དུས་སྐབས་སྟེ་ཕྱི་ལོ་ ༡༩༨༢ ཟླ་ ༤ ཚེས་ ༤ ཉིན་དབུ་བརྙེས་པ་ཞིག་ཡིན་པ་དང་། སྤྱི་ཚོགས་ཀྱི་བདེ་རྩ་ལ་ཕན་པའི་བྱ་བ་སྒྲུབ་མཁན་གྱི་གང་ཟག་ཅིག་གམ། ཡང་ན་སྐྱེ་བོ་གཞན་ལ་ཕན་བདེའི་བྱ་བ་སྒྲུབ་རྒྱུར་སྐུལ་སློང་བྱས་པ་དང་། དེ་བཞིན་སྤྱི་ཚོགས་ལ་དམིགས་བསལ་རིན་ཐང་ལྡན་པའི་བྱ་འགུལ་སྤེལ་བའི་ངོས་འཛིན་འོག་གནང་གི་ཡོད་ཅིང་། སྐབས་རེར་གཟེངས་རྟགས་ཧོ་ལན་ཌིའི་ནང་བཅའ་སྡོད་རྒྱལ་ཁབ་གཞན་གྱི་གཞུང་ཚབ་ཀྱིས་མཚོན་པའི་ཕྱིའི་མགོ་འཁྲིད་རྣམས་ལའང་གནང་སྲོལ་ཡོད་པ་ཞིག་ཡིན་འདུག
གསར་འགོད་པ། པ་སངས་ཚེ་རིང་།
