གཟེངས་བསྟོད་འཁྲུངས་སྐར་ཀྱི་དུས་བབ་ཅིག་ང་ཚོར་ལྷག་མེད།

བནྡེ་སྐྱབས།

ལོ་ངོ་འགའི་སྔ་གཞུག་འདིར། བཙན་བྱོལ་སྤྱི་ཚོགས་ཆུང་ཆུང་འདིའི་ནང་ཅིག་ལ་བཀའ་དྲིན་རྗེས་དྲན་དང་ཉིག་ལ་གཟེངས་བསྟོད་མཛད་སྒོ མིག་གི་འཁྲུངས་སྐར་སྲུང་བརྩི་ཟེར་པ་སོགས་གཅིག་རྗེས་གཉིས་མཐུད་དུ་འུར་ཟིང་གི་རླབས་རྒྱུན་ཞིག་གང་ས་གང་ན་རྡོལ་ཡོང་གི་འདུག

མནོ་བསམ་རེ་བཏང་ན། མི་སྣ་འདི་ཚོས་བློ་བུར་དུ་སྔ་ན་མེད་པའི་མཛད་རྗེས་རླབས་པོ་ཆེ་རེ་ཉེ་བའི་ལོ་འདི་དག་ནང་བཞག་གནང་སོང་པས་ཡིན་ནམ། ཡང་ན་འདི་དག་ལ་གཟེངས་བསྟོད་དང་འཁྲུངས་སྐར་གོ་སྒྲིག་བྱེད་མཁན་ཚོས་གཞི་ནས་ཁོང་ཚོའི་མཛད་རྗེས་ལ་མྱོང་ཚོར་ཤེས་རྟོགས་ཀྱི་བློ་མིག་ལ་འོད་སྣང་བབས་སོང་པ་རེད། དེ་མིན་ན། འཁྲབ་སྟོན་པ་རིགས་གཅིག་ལ་ཐོབ་པའི་རླུང་རྟ་ཡར་འགྲོ་ཡི་གར་སྟེགས་ལས། མི་སྣ་ཁོང་ཚོ་ཟློས་གར་འཁྲབ་སྟོན་ཁྲོད་དུ་རང་བློས་བཅད་པའི་མི་སྣ་རུ་གང་འདོད་དུ་བཞེངས་སྐྲུན་གྱི་སྣང་བརྙན་དུ་བསྟན་པ་ཙམ་རེད་དམ། གཞན། བྱིས་པ་སྣ་ལུག་ཚོས་བྱིས་པའི་རྩེད་ར་ནས་ཁྱོད་ལ་དེ་ཡོད་ན་ང་ལ་འདི་ཡོད་ཅེས་ཕན་ཚུན་བར་འགྲན་རྩོད་དང་ངོམ་སོ་རྒྱག་རེས་བྱེད་པའི་བྱ་སྤྱོད་དེ་ལྟ་བུ་ཞིག་ཡིན་དོགས་མེད། ད་དུང་རྔ་མོང་མཐོ་ས་ན་རིམ་མ་ཆེ་ཟེར་བ་ལྟར། དེ་དང་དེའི་ཉེ་འབྲེལ་སོགས་ལའང་འཁྲུངས་སྐར་དང་གཟེངས་བསྟོད་འབུལ་སྟངས་འདི་རིགས་ནི་གཞན་མ་ཡིན་ཏེ། བསམ་བློ་དང་སྤྱི་ཚོགས་ཤིག་རུལ་སུངས་སུ་འགྱུར་བཞིན་པའི་མངོན་རྟགས་ཤིག

ལོ་ངོ་འདི་དག་གི་ཡར་སྔོན་དུ་༧རྒྱལ་བའི་འཁྲུངས་སྐར་ལས་གཞན། ཆེ་ཆེ་བརྗིད་བརྗིད་དུ་རློམ་པ་དག་དང་། ཡང་ན་གོ་ཐོབ་ཅན་གྱི་མི་སྣ་ཚོའི་འཁྲུངས་སྐར་ཟེར་བ་ཞིག་དང་། ཁ་སང་དེ་རིང་གི་འུར་འུར་ཟང་ཟིང་གི་རྣམ་ཐར་འདི་རིགས་སྐྱོང་མཁན་མཐོང་སྣང་དུ་དཀོན། ད་དུང་བཀའ་དྲིན་རྗེས་དྲན་དང་མཛད་རྗེས་གཟེངས་རྟགས་ཟེར་བ་སོགས་ཁོར་ཡུག་ཆུང་ཆུང་འདིའི་མཁའ་དབུགས་ཡོངས་སུ་བསྒྲགས་ཤིང་འུར་བཞིན་འདུག ང་ཚོར་མཛད་རྗེས་དང་བཀྲིན་རྗེས་དྲན་གླེང་ས་ཞིག་ལྷག་ཡོད་དམ། མི་ལོ་བདུན་བཅུ་འདས་པའི་དུས་དེ་རིང་། ད་དུང་ཡང་ཕ་ཡུལ་དགྲ་ཏུ་ལྷག་ཡོད། སྤུན་ཟླ་ཁྲི་སྟོང་མང་པོའི་ཚེ་སྲོག་དགྲ་ལག་ཏུ་ཤོར་པའི་ཁྲག་དྲི་ད་དུང་སྐམ་མེད། གཞིས་བྱིས་གཉིས་སུ་གྱར་བའི་ཕུ་ནུ་དུས་ད་དུང་ཡང་ལྷན་འཛོམས་བྱུང་ཐུབ་མེད།

ཉིན་རེ་བཞིན་བཙན་འཛུལ་བའི་འཕར་སྤྱང་རྒོད་པའི་ཕ་ཡུལ་གྱི་མྱ་ངམ་ཐང་དེར་ལྟ་བཞིན། བཙན་འོག་གི་ཕུ་ནུ་མིང་སྲིང་ཚོའི་མནར་གཅོད་ཁྲོད་ཀྱི་སྨྲེ་ངག་ལ་ཉན་བཞིན། དགྲ་རྒོལ་སྤུན་ཟླ་དག་གི་ཚེ་སྲོག་མེ་རུ་བཏུམ་ཞིང་ཟུངས་ཁྲག་གིས་མགོ་ལུས་བརྫིས་པའི་གཡུལ་ས་དེ་མཐོང་པའི་མུར། ང་ཚོས་ས་འདི་ནས་གཟི་བརྗིད་དང་གཟེངས་རྟགས། འཁྲུངས་སྐར་སོགས་རྒྱ་རྒྱ་རྒྱས་རྒྱས་ཀྱི་དུས་སྟོན་དང་བྱ་བཞག་ལེགས་འགྲུབ་ཀྱི་འུར་སྒྲོག་བྱ་རྒྱུ་ཞིག་ལྷག་ཡོད་དམ།

མི་བུ་སུ་ཞིག་གིས་གནའ་རབས་ལོ་རྒྱུས་སུ་གྲགས་པའི་དཔའ་རྒོད་ཧྭ་ནེ་བྷལ་ལྟར་དགྲ་འདུལ་གཉེན་སྐྱོང་དང་། ཉེ་རབས་ཨ་རིའི་རང་བཙན་བསྒྲགས་གཏམ་ལྟ་བུའི་ལོ་རྒྱུས་ཟིན་བྲིས་ཤིག་གི་འོད་སྣང་བོད་ཡུལ་དུ་འདྲེན་ཐུབ་པ་གནོང་དང་། གྷན་ངྷི་ཇི་བཞིན་ས་ལ་བབས་ཏེ་མང་ཚོགས་ཀྱི་སྣེ་ཁྲིད་ཅིང་བཙན་འཛུལ་བ་མཐའ་སྤྲོད་ཐོངས་དང་། ད་གཟོད་བོད་ཀྱི་འདས་མ་ད་གསུམ་དང་་། མི་རབས་ནས་མི་རབས་བར་སྐྱེས་བུ་དེ་དང་དེ་ཡི་མཛད་རྗེས་ལ་དྲན་གསོ་དང་བཀའ་དྲིན་ཞུ་ངེས་པ་མ་ཟད། ཁོང་ཚོའི་བཀའ་དྲིན་དང་མཛད་རྗེས་ནི་ལོ་རྒྱུས་ཀྱི་རྡོ་རིང་ངོས་སུ་དུས་ནམ་ཡང་ཉམས་པ་མེད་པར། ཇི་སྲིད་བོད་མི་རིགས་འདི་གནས་པ་དེ་སྲིད་དུ་གསེར་ཡིག་ཏུ་བཀོད་པའི་མི་བུ་ཁོང་དག་གི་ལོ་རྒྱུས་ལ་དྲན་གསོ་བྱ་ངེས།

ད་དུང་ཚོགས་སྡེ་སྒྲིག་འཛུགས་ཁག་མང་པོ་ཞིག་གིས་ཚོགས་སྒྲིག་གང་དེ་གསར་འཛུགས་བྱུང་ནས་ལོ་མང་སོང་པར། གཟི་བརྗིད་དང་སྤོབས་ཉམས་ཡིན་མདོག་གིས་དུས་དྲན་གང་རྒྱས་ངང་སྲུང་བརྩི་བྱེད་སྟངས་ཤིག་ལུགས་དང་སྲོལ་ལྟ་བུ་ཞིག་ཆགས་ཡོང་བཞིན་འདུག ང་ཚོ་ཕ་ས་ཤོར་བའི་ཡུལ་གྱར་བ་ཞིག་དང་། རྒྱལ་ཁབ་སླར་གསོ་མ་བྱུང་བའི་སྐྱབས་བཅོལ་བ་ཞིག་ཡིན་པས། ཚོགས་སྒྲིག་གང་དེ་བཙུགས་ནས་ལོ་ཅི་ཙམ་མང་དུ་སོང་པ་དེ་ཙམ་གྱིས་ང་ཚོའི་རྒྱལ་ཁབ་སླར་གསོ་ཡི་ཕུགས་འདུན་མངོན་འགྱུར་ལས་རིང་དུ་ཕྱིན་པས། ཐོག་མའི་དམིགས་འདུན་ལེགས་སྒྲུབ་མ་ཐུབ་པའི་འཁྲེང་ཞེན་དང་འགྱོད་སེམས་ཐོག མུ་མཐུད་ཚོགས་སྒྲིག་གང་དེ་མི་ཡུལ་ལུང་པ་འདིར་ལྷག་མི་དགོས་པ་ཞིག་དང་། སྐྱབས་བཅོལ་བ་ང་ཚོའི་ཕུགས་འདུན་མངོན་འགྱུར་ལ་གྲ་སྒྲིག་གསར་པ་དང་ནུས་ཤུགས་འཕར་མ་ཞིག་གི་ལྟ་གོན་ལ་དམ་བཅའ་འཇོག་དགོས་པ་ལས། དགའ་སྤྲོའི་གཟི་བརྗིད་གླེང་ཡུལ་ཞིག་ལྷག་མེད་པ་ཡང་ཞོར་ནས་དྲན་སྐུལ་དུའོ། 

མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།