ཧི་མ་ཅལ་མངའ་སྡེའི་གཞི་རིམ་བར་མ་དང་འོག་མའི་སློབ་ཁག་དངོས་སུ་འཚོག་ཆོག་པའི་བཀའ་ཁྱབ་གནང་བ་ལྟར་ཟླ་འདིའི་ཕྱི་ཚེས་ ༡༥ ནས་བཟུང་སཾ་བྷོ་ཊའི་ཁྱབ་ཁོངས་མེས་དབོན་གཙུག་ལག་དཔེ་སྟོན་སློབ་གྲྭའི་འཛིན་རིམ་དང་པོ་ནས་འཛིན་གྲྭ་དངོས་སུ་མགོ་འཛུགས་གནང་རྒྱུ་ཡིན་པའི་གསལ་བསྒྲགས་གནང་འདུག
རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་རྐྱེན་གྱིས་འདས་ལོའི་ཕྱི་ཟླ་ ༣ ཚེས་ ༡༦ ཡས་མས་ནས་རྒྱ་གར་རྒྱལ་ཡོངས་ཀྱི་སློབ་གྲྭ་ཆེ་འབྲིང་ཆུང་གསུམ་སྒོ་བརྒྱབ་སྟེ་ལོ་གཅིག་དང་ཟླ་ ༨ ཙམ་འགྲོ་བཞིན་ཡོད་པ་དང་། ད་ལྟ་མངའ་སྡེ་ཁག་ནང་ཏོག་དབྱིབས་གཉན་རིམས་འགོས་ཁྱབ་ཀྱི་གནས་སྟངས་ཇེ་ལེགས་སུ་འགྲོ་བཞིན་ཡོད་པ་དང་བསྟུན། ཁ་སང་ཕྱི་ཚེས་ ༨ ཉིན་ཧི་མ་ཅལ་མངའ་སྡེའི་བློན་ཆེན་ལྷན་ཚོགས་ཐོག་ཐག་གཅོད་བྱུང་བ་ལྟར། སློབ་གྲྭ་ཁག་གིས་ཏོག་དབྱིབས་རིམས་ནད་ཀྱི་སྔོན་འགོག་དང་བདེ་འཇགས་ཀྱི་འགན་ཁུར་འཐུས་ཚང་གནང་བའི་ཐོག་ནས་སང་ཉིན་ཕྱི་ཚེས་ ༡༠ ཉིན་ནས་འཛིན་རིམ་ ༣ ནས་ ༧ བར་གྱི་གཞི་རིམ་བར་མའི་སློབ་ཁག་དང་། ཟླ་འདིའི་ཚེས་ ༡༥ ནས་འཛིན་གྲྭ་དང་པོ་དང་ ༢ བར་གྱི་སློབ་ཁག་བསྐྱར་དུ་སྒོ་ཕྱེས་ཏེ་དངོས་སུ་འཛིན་གྲྭ་འཚོག་ཆོག་པའི་བཀོད་ཁྱབ་གནང་ཡོད་པ་རེད།
འདི་གའི་གསར་འགོད་པས་སཾ་བྷོ་ཊའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་སུ་མངའ་ཁོངས་སློབ་གྲྭ་ཁག་ག་དུས་མགོ་འཛུགས་གནང་འཆར་ཡོད་མེད་དྲིས་པར་ཁོང་གིས། ཧི་མ་ཅལ་མངའ་སྡེ་གཞུང་ནས་བཀོད་ཁྱབ་གནང་བ་ཇི་བཞིན་ལག་བསྟར་གནང་གི་ཡོད་གསུངས་བྱུང་ལ། དེ་རིང་མེས་དབོན་གཙུག་ལག་དཔེ་སྟོན་སློབ་གྲྭའི་ཡིག་ཚང་ནས་བརྡ་ཁྱབ་བཏང་བའི་ནང་། མངའ་སྡེ་གཞུང་ནས་བཀོད་ཁྱབ་གནང་བ་བཞིན་འཛིན་རིམ་དང་པོ་ནས་ཟླ་འདིའི་ཕྱི་ཚེས་ ༡༥ ནས་འཚོག་གཏན་འཁེལ་ཡོད་པ་དང་། འཛིན་རིམ་བཞི་པ་ཡན་གྱི་ཉལ་ཁང་སློབ་ཕྲུག་ཕ་མའི་སར་ཡོད་པ་རྣམས་ཕྱི་ཚེས་ ༡༤ རེས་གཟའ་ཉི་མའི་ཕྱི་དྲོ་ཆུ་ཚོད་ ༥ པའི་གོང་ལ་ཉལ་ཁང་དུ་འབྱོར་ཟིན་པ་དགོས་པ་དང་། དཔེ་སྟོན་ཉིན་སློབ་ཀྱི་སློབ་ཕྲུག་རྣམས་ལ་ཏོག་དབྱིབས་བརྟག་འབྲས་(RT-PCR)མེད་ཀྱང་ཆོག་ནའང་། འཛིན་རིམ་བཞི་པ་ཡན་གྱི་སློབ་ཕྲུག་ཚང་མས་དོ་བདག་ལ་ཏོག་དབྱིབས་ནད་རྟགས་མེད་པའི་བརྟག་འབྲས་(RT-PCR)ངེས་པར་དུ་འཕྲིན་ཐུང་ཙམ་མིན་པར་མཉམ་འཁྱེར་དགོས་སྐོར་གསལ་བསྒྲགས་གནང་འདུག
དེ་བཞིན་གངས་སྐྱིད་དཔེ་སྟོན་ཉིན་སློབ་ཀྱི་བརྡ་ཁྱབ་ནང་། ཧི་མ་ཅལ་མངའ་སྡེ་གཞུང་གིས་སྔོན་འགྲོའི་སློབ་ཕྲུག་གི་འཛིན་གྲྭ་འཚོག་ཕྱོགས་ཀྱི་ཐད་ལ་བཀའ་ཁྱབ་དང་གསལ་བསྒྲགས་གང་ཡང་བྱས་མེད་ཀྱང་། ཕ་མ་རྣམས་ཀྱི་རེ་སྐུལ་བཞིན་ཚེས་ ༡༥ ནས་སྔོན་འགྲོའི་སློབ་ཕྲུག་ཚོར་བདུན་ ༡ ལ་ཚོགས་ཐེངས་གཅིག་རེ་འཚོག་རྒྱུ་ཡིན་པ་དང་། རིམ་པས་ཏོག་དབྱིབས་རིམས་ནད་ཀྱི་གནས་སྟངས་ཇེ་ལེགས་སུ་ཕྱིན་ཚེ། ཚོགས་ཐེངས་ཇེ་མང་དུ་གཏང་འཆར་ཡོད་ཀྱང་། འཆམ་ནད་ཕོག་པའི་བྱིས་པ་དང་ཕ་མས་གཏོང་འདོད་མེད་པ་རྣམས་ཡོང་མི་དགོས་ཀྱང་དགོངས་ཤོག་ཅིག་གཏང་དགོས་པ་དང་། སློབ་ཕྲུག་རྣམས་ཕ་མས་སློབ་གྲྭར་བསྐྱལ་དགོས་པ་ལས། སློབ་གྲྭ་གཞུང་གིས་སྤྱི་སྤྱོད་རླངས་འཁོར་གཏོང་རྒྱུ་མིན་སྐོར་གསལ་བརྡ་གནང་འདུག
སྤྱིར་བཏང་སཾ་བྷོ་ཊའི་ཁྱབ་ཁོངས་སློབ་གྲྭ་ཁག་གི་སྐོར་ལ་ཚེ་རིང་དོན་གྲུབ་ལགས་ཀྱིས། རྒྱ་གར་ས་གནས་གང་སར་སམ་བྷོ་ཊའི་སློབ་གྲྭ་མང་པོ་ཞིག་ཡོད་སྟབས། སམ་བྷོ་ཊའི་སྤྱི་ཁྱབ་ཡིག་ཚང་ནས་སློབ་གྲྭ་འཚོག་ཕྱོགས་ཀྱི་ཐད་ལ་དམིགས་བསལ་གྱི་བཀོད་ཁྱབ་གང་ཡང་བཏང་མེད་པར། མངའ་སྡེ་དང་རྫོང་ཁག་སོ་སོས་ཏོག་དབྱིབས་རིམས་ནད་ཀྱི་གནས་སྟངས་ལ་གཞིགས་ཏེ། སློབ་གྲྭ་འཚོག་ཕྱོགས་ཀྱི་ལམ་སྟོན་གནང་བ་གཙིགས་འདོན་བྱེད་ཀྱི་ཡོད་པ་ལྟར། ད་ལྟའི་ཆར་སམ་བྷོ་ཊའི་སློབ་གྲྭ་ཁག་གིས་སོ་སོའི་མངའ་སྡེ་དང་རྫོང་ཁག་གི་བཀའ་ཁྱབ་དང་ལམ་སྟོན་བཞིན་ལག་བསྟར་བྱེེད་མུས་ཡིན་སྟབས། ས་གནས་སོ་སོའི་ཏོག་དབྱིབས་སྔོན་འགོག་གི་ལམ་སྟོན་བཞིན་ཤར་སྐྱོད་བྱ་རྒྱུ་ཡིན་པ་དང་། ད་བར་སམ་བྷོ་ཊའི་སློབ་གྲྭ་ཁག་གི་སློབ་མ་བརྒྱ་ཆ་ ༩༠ ལྷག་གིས་དྲྭ་ལམ་བརྒྱུད་འཛིན་གྲྭ་འཐུས་ཚང་འཚོག་ཐུབ་ཀྱི་ཡོད་ཀྱང་། རྒྱ་གར་བྱང་ཤར་ཁུལ་དུ་ཆགས་པའི་བསྟན་འཛིན་སྒང་ཁུལ་དུ་དྲ་ལམ་ཡག་པོ་མེད་པའི་རྐྱེན་གྱིས་དཀའ་ངལ་ཅུང་ཙམ་བྱུང་སྐོར་དང་། ཧི་མ་ཅལ་མངའ་སྡེ་གཞུང་གིས་བཀོད་ཁྱབ་གཞིར་བཟུང་ནས་རྡ་སའི་ཁུལ་གྱི་དཔེ་སྟོན་སློབ་གྲྭ་སོགས་དངོས་སུ་འཛིན་གྲྭ་འཚོག་འཆར་ཡོད་སྐོར་སོགས་གསུངས་བྱུང་།
ཡང་འདི་གའི་གསར་འགོད་པས་བོད་ཁྱིམ་སློབ་གྲྭའི་དབུ་འཛིན་ཚུལ་ཁྲིམས་རྡོ་རྗེ་ལགས་སུ་བོད་ཁྱིམ་སློབ་གྲྭའི་འཛིན་གྲྭ་ཁག་མགོ་འཛུགས་ག་དུས་གནང་གི་ཡོད་མེད་སོགས་དྲིས་པར་ཁོང་གིས། ཧི་མ་ཅལ་མངའ་སྡེ་གཞུང་ནས་བཀའ་ཁྱབ་གནང་བ་བཞིན་བོད་ཁྱིམ་སློབ་གྲྭའི་འགན་འཛིན་ལྷན་འཛོགས་ཀྱིས་འཚོགས་འདུ་བསྡུ་འཆར་ཡོད་པ་དང་། འཛིན་རིམ་ ༡༠ དང་ ༡༢ ཀྱི་སློབ་མ་རྣམས་དངོས་སུ་སློབ་ཞུགས་བྱས་ཏེ་སློབ་ཚན་འཚོག་མུས་ཡིན་པ་དང་། འཛིན་གྲྭ་གཞན་རྣམས་ཁྱིམ་ཚང་རེ་རེར་བགོས་ཏེ། ཁྱིམ་ཚང་ནང་གནས་སྡོད་ཀྱིས་འཛིན་གྲྭ་འཚོག་མུས་ཡིན་སྟབས། བོད་ཁྱིམ་སློབ་གྲྭའི་སློབ་མ་རྣམས་ཀྱི་སློབ་ཚན་འཚོག་ཡུལ་བརྗེ་དགོས་པ་ཙམ་ལས་འཛིན་གྲྭ་འཚོག་མུས་ཡིན། ཡིན་ནའང་། སློབ་མ་འབོར་ཆེན་སློབ་གྲྭ་རུ་འཛོམས་མ་དགོས་པ་དང་ནད་རླབས་བསྐྱར་དུ་ཡོང་ཉེན་ལ་སྔོན་འགོག་ཆེད་འཛིན་རིམ་ ༡༡ གི་སློབ་མ་རྣམས་དངོས་སུ་སློབ་གྲྭར་བཅར་མ་དགོས་པ་བྱས་ཏེ་མུ་མཐུད་རང་ཁྱིམ་ནས་དྲ་ལམ་བརྒྱུད་འཛིན་གྲྭ་འཚོག་མུས་ཡིན་ལ། དཀའ་ངལ་གང་ཡང་མེད་སྐོར་བརྗོད་བྱུང་།
འདི་ལོའི་ཕྱི་ཟླ་ ༩ ཙམ་ནས་ཧི་མ་ཅལ་མངའ་སྡེའི་ཁུལ་གྱི་འཛིན་རིམ་ ༩ ནས་ ༡༢ བར་གྱི་སློབ་ཁག་གིས་འཛིན་གྲྭ་དངོས་སུ་འཚོགས་ཡོད་ཀྱང་། བདུན་ཕྲག་གཅིག་གི་རྗེས་སུ་ཏོག་དབྱིབས་རིམས་ནད་ཁྱབ་གདལ་ཇེ་ཆེར་ཕྱིན་པའི་རྐྱེན་གྱིས། ་ཟླ་དེའི་ཕྱི་ཚེས་ ༢༥ བར་དུ་ཕྱིར་འགྱང་གནང་ཡོད་པ་དང་། དེ་བཞིན་ཕྱི་ཟླ་ ༡༠ ཚེས་ ༡༡ ནས་འཛིན་རིམ་བརྒྱད་པ་ཁག་དངོས་སུ་འཚོགས་ཡོད་འདུག
ཧི་མ་ཅལ་མངའ་སྡེ་གཞུང་དང་ཤེས་ཡོན་ལྷན་ཚོགས་ནས་སློབ་ཁག་བསྐྱར་དུ་མགོ་འཛུགས་དང་འབྲེལ་བའི་ལམ་སྟོན་ནང་། དགེ་སློབ་ཚང་མས་ཏོག་དབྱིབས་རིམས་ནད་ལ་སྔོན་འགོག་དང་ཉེན་སྲུང་ཚད་ལྡན་བྱེད་དགོས་པ་དང་། སློབ་མ་རྣམས་དངོས་སུ་འཛིན་གྲྭར་ཞུགས་པར་ཕ་མ་སོགས་ཀྱི་ཆོག་མཆན་དགོས་པ་ལས། དེ་མིན་རང་དགར་འཛིན་གྲྭར་ཞུགས་མི་ཆོག་པའི་ཁར། ཕ་མ་སོགས་ཀྱིས་ཆོག་མཆན་ཐོབ་ནས་དངོས་སུ་འཛོན་གྲྭར་ཞུགས་མཁན་རྣམས་ལ་འབྱོར་ཐོ་སོགས་ལེན་དགོས་སྐོར་དང་། སྔོན་འགྲོའི་སློབ་མ་རྣམས་མུ་མཐུད་དྲ་ལམ་ནས་འཛིན་གྲྭ་འཚོག་ཆོག་སྐོར་གསུངས་ཡོད་འདུག
གསར་འགོད་པ། དཔལ་ལྡན།
