ཆབ་སྲིད་བཙོན་ཟུར་ཚོར་ཁ་པར་ཞིག་སྤྲད་དེ་གསང་ཉན་རྗེས་འདེད་གཏོང་བཞིན་པ།

རྒྱ་ནག་གཞུང་གིས་བོད་ནང་གི་བོད་མི་ཆབ་སྲིད་བཙོན་ཟུར་ཁག་ཅིག་བཙོན་འཇུག་དུས་ཡུན་རྫོགས་ཏེ་ཀློད་གྲོལ་བ་ཡིན་ནའང་མུ་མཐུད་ཁོང་ཚོའི་ཁ་པར་ཞིག་སྤྲོད་ཀྱི་ཡོད་པ་དེ་བརྒྱུད་གསང་བའི་ཉན་ཞིབ་དང་འགྲོ་འདུག་སྤྱོད་གསུམ་ལ་རྗེས་འདེད་གཏོང་གི་ཡོད་འདུག

འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན། རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་པ་རྣམས་ཀློད་གྲོལ་ཐོབ་རྗེས་ཀྱང་ཆབ་སྲིད་དང་ཚོང་ལས། རང་དབང་འཚོ་སྡོད་སོགས་ཀྱི་ཐད་དངོས་ཤུགས་བརྒྱུད་གསུམ་ནས་སྟངས་འཛིན་དང་གནོན་ཤུགས་སྤྲོད་བཞིན་ཡོད་པ་མ་ཟད། འགྲོ་འདུག་སྤྱོད་གསུམ་ལ་རྟོག་ཞིབ་བྱེད་ཆེད་བཙོན་པ་ཁག་ཅིག་ཀློད་གྲོལ་ཐོབ་རྗེས། གཞུང་ཕྱོགས་ནས་མི་རེར་ཤུ་ཀུ་ཁ་པར་ ༤ པ་རེ་སྤྲད་ནས་དུས་རྒྱུན་རང་ལུས་དང་འབྲལ་མེད་དུ་བེད་སྤྱོད་གཏོང་དགོས་པ་དང་། སྲིད་གཞུང་གི་ཆོག་མཆན་མེད་པར་ཁ་པར་གཞན་བེད་སྤྱོད་གཏོང་ཆོག་གི་མེད་འདུག

གནས་ཚུལ་མཁོ་སྤྲོད་པས། ང་རང་ལ་མཚོན་ན་ཁ་པར་དེ་སྤྲད་ནས་ལོ་གཅིག་ལྷག་འགྲོ་བཞིན་ཡོད་ཀྱང་ད་དུང་ཉར་དགོས་ཀྱི་འདུག་ལ། ཁ་པར་དེ་རིགས་ནང་དངུལ་གཞུང་ངོས་ནས་སྤྲོད་བཞིན་ཡོད་ན་ཡང་། ཁ་པར་ནང་གསང་ཉན་གྱི་མཉེན་ཆས་བླུག་ཡོད་སྟབས། གཞན་དང་གང་བྱུང་འབྲེལ་བ་བྱེད་ཐབས་མེད་པས་མཚམས་རེར་གྲོགས་པོ་ཚོའི་ཁ་པར་བརྒྱུད་རང་གི་འབྲེལ་བ་བྱ་དགོས་པ་ཚོར་འབྲེལ་བ་བྱེད་བཞིན་ཡོད་པ་དང་། གཞུང་གི་ཁ་པར་དེ་རིགས་ལག་ཏུ་ཡོད་པ་ནས་གནས་ཚུལ་ཚང་མ་ལེན་འགྲོ་བ་ཞིག་ཡིན་ན་ཡང་། ཁྱིམ་དུ་སྡོད་སྐབས་བར་ཐག་ཅུང་ཙམ་རེ་བཞག་པ་ཡིན་ན་ཁྱིམ་དུ་ཡོད་པ་ཤེས་རྟོགས་བྱུང་བ་ལས། ངས་ག་རེ་བྱེད་བཞིན་པ་སོགས་ལ་དེ་ཙམ་ཉེན་ཁ་མེད་པ་ཞིག་ཡིན་སྐོར་བརྗོད་བྱུང་།

གཞན་ཡང། ལོ་ཤས་སྔོན་གཉེན་འཕྲད་ཀྱི་ཡིག་ཆ་རག་ནས་བོད་ནང་ཕྱིན་པའི་བོད་མི་ཞིག་གིས་འདི་གའི་གསར་འགོད་པར། ཁོང་ཕ་ཡུལ་དུ་བསླེབས་པ་དང་ས་གནས་གཞུང་གིས་སྐད་བཏང་སྟེ། ང་ཚོས་ཁྱེད་རང་ཕ་ཡུལ་དུ་བསྡད་རིང་ཁ་པར་ཞིག་སྤྲོད་དགོས། དེ་མ་གཏོགས་ཁ་པར་གཞན་བེད་སྤྱོད་གཏོང་ཆོག་གི་མ་རེད་ཅེས་བརྗོད་བྱུང་ལ། ཁ་པར་དེའི་སྐོར་ངས་སྔོན་མ་ནས་མང་པོ་གོ་ཐོས་བྱུང་། ཁ་པར་དེ་རྒྱུན་དུ་ཁ་ཕྱེས་ནས་འདུག་དགོས་པ་མ་ཟད། མཚམས་མཚམས་ལ་སྲིད་གཞུང་གི་མི་སྣས་ཁ་པར་ཡོང་སྟེ་ཁྱེད་རང་གང་དུ་ཡོད། ག་བར་ཕྱིན་པ་ཡིན། རོགས་པ་སུ་ཡོད། གཞུང་ནས་རོགས་པ་བྱེད་དགོས་པ་དེ་འདྲ་འདུག་གམ་ཞེས་སྐད་ཆ་ཡང་ཡང་འདྲི་ཡི་འདུག མཚམས་རེར་ཁ་པར་མ་འཕྲོད་པ་དེ་འདྲ་བྱུང་ན་འདྲི་བ་མང་པོ་གཏོང་གི་འདུག་ཅེས་བརྗོད་བྱུང་།

གནད་དོན་དེའི་ཐད་ལ་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ་སྐད་ཆ་དྲིས་པར། རྒྱ་ནག་གཞུང་གིས་བོད་མི་ཆབ་སྲིད་བཙོན་པ་ཁག་ཅིག་ཀློད་གྲོལ་བཏང་རྗེས་ཡུན་རིང་དམ་དྲག་འོག་འཇོག་གི་ཡོད་པ་ལྟར། རྒྱ་ནག་གཞུང་གིས་བོད་ནང་གི་ཆབ་སྲིད་བཙོན་ཟུར་ཚོར་གཞུང་ངོས་ནས་ཁ་པར་སྤྲོད་བཞིན་པའི་ལས་གཞི་དེ་ཕྱི་ལོ་༢༠༡༤ ཙམ་ནས་འགོ་བཙུགས་ཡོད་པ་དང་། ཁ་པར་དེ་རིགས་ལག་ཏུ་ཡོད་པ་ནས་ཁོ་ཚོའི་འགྲོ་འདུག་སྤྱོད་གསུམ་ཅུང་ཙམ་ལ་ཡང་ལྟ་ཞིབ་དང་སྟངས་འཛིན་བྱེད་བཞིན་ཡོད་པ་མ་ཟད། བཙོན་ཁང་ནས་བཙོན་གྲོལ་ཐོབ་པ་ཙམ་ལས་ད་དུང་རྗེས་འདེད་སོགས་ཀྱིས་དཀའ་ངལ་ཤུགས་ཆེར་འཕྲད་བཞིན་ཡོད་སྐོར་བརྗོད་བྱུང་།

རྒྱ་གར་ལྷོ་ཕྱོགས་གསར་འགོད་པ་དོན་གྲུབ་བཀྲ་ཤིས།