གོང་ས་མཆོག་གིས་རྒྱ་གར་མངའ་སྡེ་ཨནྡྲའི་ཆུ་ལོག་ཁྲོད་གནོད་འཚེ་ཐེབས་མཁན་རྣམས་ལ་ཐུགས་གསོ་སྩལ།

༧གོང་ས་མཆོག་གིས་རྒྱ་གར་ལྷོ་ཕྱོགས་ཀྱི་ཨནྡྲ་མངའ་སྡེའི་ནང་ཆར་ཞོད་ཀྱི་རྐྱེན་ངན་གོད་ཆག་བྱུང་སྟེ་མི་རྒྱུ་གཉིས་ལ་གནོད་སྐྱོན་ཚབས་ཆེན་ཐེབས་པར་ཐུགས་གསོ་དང་ངལ་སེལ་རོགས་སྐྱོར་གནང་ཡོད་འདུག

ཉེ་ལམ་ནས་རྒྱ་གར་གྱི་ལྷོ་ཕྱོགས་མངའ་སྡེ་ཨནྡྲ་དང་ཁཱར་ན་ཊག་ནང་ཆར་བ་ཤུགས་ཆེན་བབས་པའི་རྐྱེན་གྱིས། ཆུ་ལུག་རྒྱུགས་ཏེ་མི་རྒྱུ་གཉིས་ལ་གྱོང་གུད་ཚབས་ཐེབས་ཡོད་པར་བརྟེན། ཕྱི་ཚེས་ ༢༡ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ཨནྡྲ་པར་དྷེ་ཤི་མངའ་སྡེའི་སྤྱི་ཁྱབ་བློན་ཆེན་ཇཱ་གན་མོ་ཧན་རེ་ཌེ་(Y S Jagan Mohan Reddy) ལགས་ཀྱི་མཚན་ཐོག་ཏུ་མངའ་སྡེའི་མི་མང་ཡོངས་ལ་ཐུགས་གསོའི་གསུང་འཕྲིན་སྩལ་གནང་མཛད་དེ། ཆུ་ལོག་གི་རྐྱེན་ངན་གོད་ཆག་ཁྲོད་རྐྱེན་འདས་སུ་གྱུར་བ་རྣམས་ཀྱི་ནང་མི་སྤུན་མཆེད་དང་། དགའ་ཉེ། དེ་བཞིན་རྐྱེན་ངན་གོད་ཆག་ཐེབས་མཁན་ཡོངས་ལ་ཐུགས་གསོ་དང་ཐུགས་སྨོན་ཞུ་ཡི་ཡོད་སྐོར་གསུངས།

དེ་ཡང་མགོན་པོ་གང་ཉིད་མཆོག་གི་ཐུགས་གསོའི་ནང་།  ཨནྡྲ་པར་དེ་ཤི་མངའ་སྡེ་གཞུང་དང་རྒྱལ་ཡོངས་རྐྱེན་ངན་རོགས་སྐྱོར་ཚན་པ་ཁག་གིས་རང་ནུས་ཡོད་ཚད་ཀྱིས་རྐྱེན་ངན་གོད་ཆགས་ཐེབས་མཁན་རྣམས་ལ་ངལ་སེལ་རོགས་རམ་དང་ཉེན་སྐྱོབ་གང་ཐུབ་ཅི་ཐུབ་གནང་བཞིན་པར་ངོས་ཀྱིས་ཧ་ཅང་རྗེས་སུ་ཡི་རང་ཞུ་གི་ཡོད།  ང་ཚོས་ཨནྡྲ་པར་དེ་ཤིའི་མི་མང་ལ་གདུང་སེམས་མཉམ་སྐྱེ་མཚོན་ཆེད་དུ་ཏཱ་ལའི་བླ་མ་དགེ་རྩ་ཚོགས་པའི་ངོས་ནས་ངལ་སེལ་དང་ཉེན་སྐྱོབ་ཀྱི་ལས་དོན་སླད་ཞལ་འདེབས་ཤིག་འབུལ་རྒྱུ་ཡིན། ཞེས་གསུངས།

ད་དུང་ཐུགས་གསོའི་ནང་། ༧གོང་ས་མཆོག་དེ་སྔ་ཨནྡྲ་པར་དེ་ཤི་མངའ་སྡེའི་ནང་ཐེངས་འགའ་ཆིབས་སྒྱུར་བསྐྱངས་མྱོང་ཡོད་པའི་ཁྲོད། དམིགས་བསལ་ཕྱི་ལོ་ ༢༠༠༦ ལོར་མགོན་པོ་གང་ཉིད་མཆོག་གིས་མངའ་སྡེ་གཞུང་གི་མཐུན་འགྱུར་རོགས་རམ་འོག་རྒྱ་གར་ལྷོ་ཕྱོགས་ཨམ་ར་ཝ་ཏི་ནས་དུས་འཁོར་དབང་ཆེན་སྩལ་གནང་མཛད་པ་དང་སྐབས་དེར་མངའ་སྡེ་གཞུང་གི་བཀའ་དྲིན་ལ་བརྟེན་ནས་གནས་མཇལ་བ་སྟོང་ཕྲག་མང་པོར་དུས་འཁོར་དབང་ཆེན་སྐབས་མཐུན་འགྱུར་དང་ལྷོ་ཕྱོགས་དཔལ་གྱི་རི་སོགས་ལ་གནས་མཇལ་ཐུབ་ཡོད་སྐོར་སོགས་གསུངས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།