༧གོང་ས་མཆོག་གིས་དེང་སང་སློབ་སྦྱོང་ཤུགས་ཆེན་པོ་དར་བསྡད་ཡོད་པ་དང་མི་རྣམས་ཤེས་ཡོན་ཆེན་པོ་ཆགས་ཀྱི་ཡོད་པར་བརྟེན་མི་སྒེར་པ་གཅིག་གཉིས་དཔེར་ན་༧རྒྱལ་བ་རིན་པོ་ཆེ་ལྟ་བུ་དང་༧པཎ་ཆེན་རིན་པོ་ཆེ་ལྟ་བུ་རྩ་ཆེན་པོར་རྩིས་པ་དེ་དགོས་མཁོ་ཞེ་དྲགས་ཆགས་ཀྱི་མ་རེད་བསམ་གྱི་འདུག་ཅེས་གསུངས་སོང་། 
དེ་རིང་༧གོང་ས་མཆོག་གིས་དྲ་ལམ་བརྒྱུད་འཛམ་གླིང་ཡེ་ཤུའི་སྒོམ་སྒྲུབ་ཚོགས་སྡེ་ (World Community of Christian Meditation) ཞེས་པ་བཙུགས་ནས་ལོ་སུམ་ཅུ་འཁོར་བའི་དུས་དྲན་དང་བསྟུན། ཚོགས་པ་འཛུགས་མཁན་དང་དགེ་རྒན་ཡེ་ཤུའི་གྲྭ་བ་ཧྥ་རྡར་ལོ་རེན་སི་ཧྥརི་མེན་ (Father Laurence Freeman) དང་ལྷན་དུ་གཅིག་འདུས་ཀྱི་ཤེས་པ། སེམས་གཅིག བློ་གཅིག (Unified Consciousness: One Mind and One Heart) ཅེས་ཡེ་ཤུ་པའི་བཞེད་སྲོལ་ཞིག་གི་བརྗོད་གཞིའི་ཐོག་བཀའ་སློབ་སྩལ་བ་དང་བཀའ་འདྲིར་བཀའ་ལན་སྩལ།
ཐོག་མར་ཡེ་ཤུའི་གྲྭ་བ་ཧྥ་རྡར་ལོ་རེན་སི་ཧྥརི་མེན་ (Father Laurence Freeman) ལགས་ཀྱིས། དེ་རིང་ཞོགས་པར་ཁོང་གིས་༧གོང་ས་མཆོག་ནས་ལྗགས་རྩོམ་མཛད་པའི་སེམས་པ་བཟང་པོ་ (The Good Heart)ཞེས་པའི་དཔེ་དེབ་དེ་བཀླགས་ཡོད་པ་དང་། ཁོང་གིས་དཔེ་དེབ་དེ་ཡང་ཡང་ཀློག་གི་ཡོད་སྐོར་དང་། ཕྱི་ལོ་ ༡༩༩༦ ལོར་༧གོང་ས་མཆོག་ཐོག་མར་མཇལ་བ་ནས་བཟུང་ལྗགས་རྩོམ་མཛད་པའི་གསུང་དེབ་རྣམས་ཀློག་གི་ཡོད་སྐོར་བརྗོད་སོང་། དེ་ནས་༧གོང་ས་མཆོག་གིས། སྣོད་ཀྱི་འཇིག་རྟེན་འདིའི་ནང་འཚོ་བསྡད་མཁན་གྱི་དུད་འགྲོ་སེམས་ཅན་སུ་འདྲ་ཞིག་ཡིན་རུང་བདེ་བ་འདོད་མཁན་ཡིན་པ་གཅིག་གྱུར་རེད། སྤྱིར་འགྲོ་བ་མིའི་ལྷན་སྐྱེས་ཀྱི་རང་བཞིན་ལྟ་བུར་ཆ་བཞག་ན། ངོས་རང་གིས་བྱམས་བརྩེའི་རང་བཞིན་ཡིན་པ་ངོས་འཛིན་ཞུ་ཡི་ཡོད། རྒྱུ་མཚན་ནི་ཆུང་དུས་མའི་མངལ་ནས་སྐྱེས་པ་ནས་མའི་བརྩེ་བས་འཚོ་བ་རེད། མའི་བརྩེ་བས་མ་བསྐྱངས་ན་ང་ཚོ་སྲོག་འཚོ་ཐུབ་རྒྱུ་མེད་པའི་གནས་སྟངས་ཆགས་ཀྱི་ཡོད་པར་བརྟེན། ང་ཚོའི་མི་ཚེ་མགོ་འཛུགས་སྟངས་ནི་དེ་ལྟར་རེད། གཞི་རྩའི་ང་རང་ཚོ་འགྲོ་བ་མི་ནི་སྤྱི་ཚོགས་ལ་བརྟེན་པའི་སེམས་ཅན་གཞན་དང་གཅིག་མཚུངས་རེད། སྤྱི་ཚོགས་ལ་བརྟེན་པའི་སེམས་ཅན་གང་ཡིན་རུང་། རང་གི་ཚོགས་པ་འདིའི་ནང་གཏོགས་པའི་སེམས་ཅན་ཕན་ཚུན་རོགས་པ་བྱ་རྒྱུ་ནི་རང་བཞིན་གཤིས་ཀ་ལྟ་བུ་ཆགས་ཀྱི་ཡོད་པ་རེད། སྟབས་མི་ལེགས་པ་ཞིག་ལ། དུས་རབས་འདིའི་ནང་ང་ཚོའི་ཀླད་པ་ཡར་རྒྱས་གཏོང་བ་རྩལ་དུ་བཏོན། ནང་གི་སེམས་པ་བཟང་པོ་གོང་འཕེལ་དུ་གཏོང་རྒྱུའི་ཐོག་ལ་འཐུས་ཤོར་འགྲོ་ཡི་འདུག དེ་ཡང་ང་ཚོའི་དེང་དུས་ཀྱི་ཤེས་ཡོན་གྱི་སྡེ་ཚན་ནང་བྱམས་སྙིང་རྗེ་དང་འབྲེལ་བའི་སློབ་ཚན་དང་དེའི་སྐོར་སློབ་ཀྱི་མེད་པ་རེད། སྤྱིར་བཏང་གཞི་རྩའི་ང་ཚོ་མིའི་ལྷན་སྐྱེས་ཀྱི་རང་བཞིན་ནི་བྱམས་བརྩེའི་རང་བཞིན་ཡིན་ནའང་། ལོ་ངོ་བརྒྱ་ཕྲག་ཁ་ཤས་ཀྱི་ནང་མིའི་ནང་ལོག་ལ་འཁྲུག་རྩོད་ཞེ་དྲགས་ཤུགས་ཆེན་པོ་བྱུང་ཡོད་པར་བརྟེན། དམག་ཆེན་དང་པོ་དང་གཉིས་པ་སོགས་ཀྱི་དཀའ་ངལ་བྱུང་ཡོད་པ་ཚང་མས་མཁྱེན་གསལ་རེད། མི་མང་པོ་ཞིག་དྲག་རྩུབ་ཀྱི་བྱ་སྤྱོད་ལ་ཞེད་དྲགས་པའི་རྣམ་པ་མང་པོ་ཐོན་ཡོང་གི་འདུག ད་དུང་གོ་མཚོན་བཟོ་བའི་དོན་དུ་དཔལ་འབྱོར་ཤུགས་ཆེན་བཏང་བ་རེད། དེར་བརྟེན་ང་ཚོའི་འཛམ་གླིང་འདི་གོ་མཚོན་གྱིས་དབེན་པའམ་གོ་མཚོན་གཏན་ནས་མེད་པའི་འཛམ་གླིང་ཞིག་ཏུ་འགྱུར་བར་ཤུགས་རྒྱག་མཁན་མང་པོ་ཡོད་རེད། ང་ཚོ་བདེ་བ་འདོད་པ་དང་སྡུག་བསྔལ་མི་འདོད་པ་ནི་གཅིག་གྱུར་ཡིན་པ་དང་ཐོབ་ཐང་རེད། དེ་བཞིན་ལྷན་སྐྱེས་ཀྱི་རང་བཞིན་ནི་བྱམས་བརྩེ་རེད། ང་ཚོར་ལྷན་སྐྱེས་ཀྱི་རང་བཞིན་དེ་ལྟར་ཡོད་པའི་སྐབས་སུ་རྟེན་འབྲེལ་གྱི་བསམ་བློ་གཏོང་ན། ངའི་འཛམ་གླིང་དང་ངའི་རྒྱལ་ཁབ། ངའི་གླིང་ཕྲན་ཟེར་བའི་ས་མཚམས་ཕྱེས་ཏེ་དེ་ཁོ་ནའི་དོན་དག་ལ་བསམ་བློ་གཏོང་རྒྱུ་ཡོད་མ་རེད། སྤྱིར་བཏང་རང་བྱུང་ཁོར་ཡུག་གི་འགྲོ་སྟངས་ལ་ཆ་བཞག་ནའང་རང་བྱུང་ཁོར་ཡུག་གི་ངོས་ནས་རྒྱལ་ཁབ་དང་གླིང་ཕྲན་ལྟ་བུའི་ས་མཚམས་མེད་པར་བརྟེན་ང་རང་ཚོས་གོ་ལ་གཅིག་གྱུར་གྱི་འདུ་ཤེས་འཛིན་དགོས་པ་ནི་ཞེ་དྲགས་གལ་ཆེན་པོ་རེད། ཅེས་གསུངས་སོང་།
ཡང་༧གོང་ས་མཆོག་གིས། ངོས་རང་སྒེར་ལ་ཆ་བཞག་ན། ཐོག་མར་རྒྱ་གར་དུ་བཙན་བྱོལ་ལ་འབྱོར་བ་རེད། རྒྱ་གར་ནང་བཙན་བྱོལ་དུ་འབྱོར་ནས་སྟབས་ལེགས་པ་ཞིག་ལ་རྒྱ་གར་གཞུང་གི་སྐུ་མགྲོན་བྱས་ནས་ད་ལྟ་བར་དུ་བསྡད་པ་རེད། སྤྱིར་བཏང་བྱས་ན་གནས་སྟངས་ངོ་མ་དེ་སོ་སོའི་རྒྱལ་ཁབ་མེད་པའི་བཙན་བྱོལ་བ་ཞིག་རེད། ཡིན་ནའང་སྤྱིར་བཏང་སྟབས་མ་ལེགས་པ་རྐྱེན་ངན་གོད་ཆག་གི་གནས་སྟངས་རེད་དེ། ཕྱོགས་གཞན་ནས་དེའི་སྟབས་ཀྱིས་རང་དབང་ལུང་པ་ལ་བསླེབས། རྒྱ་གར་ལྟ་བུར་ཆ་མཚོན་ན། རང་དབང་ཅན་གྱི་རྒྱལ་ཁབ་རེད། ད་དུང་མི་རིགས་འདྲ་མིན་སྣ་ཚོགས་ཡོད་པ་དང་ཆོས་ལུགས་སྣ་ཚོགས་ཡོད་པར་བརྟེན། རྒྱ་གར་ནང་ཆོས་ལུགས་ཀྱི་མཐུན་སྒྲིལ་གྱི་གནས་སྟངས་ཞེ་དྲགས་ཡག་པོ་ཡོད་རེད། དེར་བརྟེན་རྒྱ་གར་ནང་དུ་སྡོད་དུས། ཆོས་ལུགས་འདྲ་མིན་སྣ་ཚོགས་ནས་ཕེབས་པའི་ཕྱོགས་ཁག་དང་གྲོས་མོལ་བྱ་རྒྱུའི་གོ་སྐབས་བྱུང་སོང་། དཔེར་ན། ཡེ་ཤུ་དང་ཧིན་རྡུ། གཅེར་པུ་བ། སིག་གི་ཆོས་ལུགས་ལ་སོགས་པའི་ཆོས་ལུགས་སྣ་ཚོགས་པ་དང་གྲོས་མོལ་བྱ་རྒྱུའི་གོ་སྐབས་བྱུང་བ་རེད། དེང་སང་རྒྱ་གར་མཚོན་པའི་ས་ཕྱོགས་ག་པར་ཡིན་ནའང་། ཆོས་ལུགས་མཐུན་སྒྲིལ་གོང་འཕེལ་དུ་གཏོང་བའི་གོ་སྐབས་ཏན་ཏན་ཡོད་རེད། དེར་བརྟེན། ཧྥ་རྡར་ལོ་རེན་སི་ཧྥརི་མེན་ (Father Laurence Freeman) ཁྱེད་རང་ངོས་རང་གི་ཆོས་གྲོགས་ཡིན་པའི་ཆ་ནས། ང་ཚོ་ཐུན་མོང་གི་ལས་འགན་འདི་འཛམ་གླིང་ནང་ཆོས་ལུགས་ཕན་ཚུན་དབར་མཐུན་སྒྲིལ་གོང་འཕེལ་དུ་གཏོང་རྒྱུ་དེ་ཆགས་ཀྱི་ཡོད་པ་རེད། སྒེར་གྱི་རང་ལུགས་གནས་ཚུལ་ལོགས་ཀ་རེད། ཡིན་ནའང་སྤྱི་ཡོངས་ཀྱི་མཐུན་སྒྲིལ་བསྐྲུན་རྒྱུ་ནི་ང་ཚོའི་ཐུན་མོང་གི་ལས་འགན་རེད། དེར་བརྟེན་དེ་རིང་ཁྱེད་རང་མཇལ་ནས་དགའ་པོ་ཞེ་དྲགས་བྱུང། ཁྱེད་རང་ནི་སྒོམ་སྒྲུབ་བྱེད་མཁན་གྱི་ཡེ་ཤུའི་གྲྭ་པ་ཞིག་ཆགས་བསྡད་ཡོད་དུས། ཚངས་སྤྱོད་ཀྱི་གནས་ལ་བརྟེན་པའི་ཡེ་ཤུའི་རབ་བྱུང་དང་ང་རང་ལ་ཆ་བཞག་ནའང་ནང་པའི་རབ་བྱུང་ཞིག་ཡིན་པའི་ཆ་ནས་ཆོས་གྲོགས་ངོ་མ་ཆགས་པ་དང་དོན་དངོས་པོའི་ཆ་ལ་ཆོས་གྲོགས་ཆགས་ཀྱི་ཡོད་རེད། ཅེས་གསུངས་སོང་།
ཡང་༧གོང་ས་མཆོག་གིས། ངོས་ཀྱིས་རྒྱུན་གཏན་དུ་ཞུ་ཡི་ཡོད། རྒྱ་གར་གྱི་རང་བཙན་རྩོད་ལེན་པ་སེམས་དཔའ་ཆེན་པོ་གྷན་དྷི་ (Mahatma Gandhi) བཞུགས་དུས། ཁོང་གིས་འཚེ་མེད་ཞི་བའི་ལྟ་གྲུབ་དེ་ཁྱབ་སྤེལ་གནང་ཡོད་རེད་ལ། ཁོང་གི་རྗེས་སུ་འབྲངས་པའི་འཚེ་མེད་ཞི་བའི་ལྟ་གྲུབ་ལ་དོ་སྣང་ཡོད་མཁན་མང་པོ་བྱུང་ཡོད་པ་རེད། དེར་བརྟེན་ང་རང་ཚོའི་ངོས་ནས་རྒྱ་གར་གྱི་ལོ་ངོ་སྟོང་ཕྲག་ནས་ཡོད་པའི་བྱམས་སྙིང་རྗེའི་ལྟ་གྲུབ་འདི་འཛམ་གླིང་སྤྱི་ལ་ཁྱབ་ཐུབ་རྒྱུའི་ཐོག་ལ་འབད་བརྩོན་བྱ་རྒྱུ་ནི་ཧ་ཅང་གི་གལ་ཆེན་པོ་རེད། སྤྱིར་ཆོས་ལུགས་ཡོངས་ཀྱི་བྱམས་སྙིང་རྗེའི་སྐོར་ལ་གསུང་གི་ཡོད་པ་རེད། ལྷག་པར་དུ་ཡེ་ཤུའི་ཆོས་ལུགས་ནང་བྱམས་སྙིང་རྗེའི་བསླབ་བྱ་ཤུགས་ཆེན་པོ་གསུང་གི་ཡོད་རེད། དེ་ཡང་ཁྱེད་རང་ཚོ་ཡེ་ཤུ་ལྟ་བུར་ཆ་བཞག་ན། འཇིག་རྟེན་བཀོད་པ་པོ་འདོད་མཁན་ཡིན་པའི་ཆ་ནས་འཇིག་རྟེན་བཀོད་པ་པོ་ཕ་གཅིག་གིས་བཀོད་པའི་སེམས་ཅན་ཡིན་པ་གཅིག་གྱུར་གྱི་འདུ་ཤེས་བཅངས་དགོས་རྒྱུའི་བསམ་བློའི་ཁྱེར་སོ་ཡོད་རེད་ལ། འཇིག་རྟེན་བཀོད་པ་པོ་སྙིང་རྗེ་ཚད་མེད་པའི་བདག་ཉིད་ཅན་ཡིན་པ་ཞིག་ལ་ངོས་འཛིན་ཞུ་ཡི་ཡོད་པར་བརྟེན། སྙིང་རྗེ་ཚད་མེད་པའི་བདག་ཉིད་ཅན་གྱི་འཇིག་རྟེན་བཀོད་པ་པོ་དེ་ཡིས་བཀོད་པའི་འགྲོ་བ་སེམས་ཅན་ཡིན་པ་གཅིག་གྱུར་ཡིན་པའི་ཆ་ནས། ཕན་ཚུན་གཉེན་བཤེས་ཀྱི་འདུ་ཤེས་དང་བྱམས་བརྩེའི་འདུ་ཤེས་བཅངས་དགོས་པའི་རྒྱུ་མཚན་དེ་འདྲ་ལ་བལྟས་ན། འཛམ་གླིང་སྤྱི་ལ་ཁྱབ་ཐུབ་པའི་བྱམས་སྙིང་རྗེ་འདི་རང་བཞིན་གྱིས་ཡོང་ཐུབ་རྒྱུ་ཡོད་པ་རེད། ངོས་རང་ཆ་བཞག་པ་ཡིན་ན། མི་ཚེ་ཡོངས་རྫོགས་ནང་བྱམས་སྙིང་རྗེ་འདི་འཛམ་གླིང་སྤྱི་ལ་གང་ཐུབ་ཐུབ་ཁྱབ་སྤེལ་བྱ་རྒྱུའི་ཐོག་ལ་འདུན་པ་བརྟན་པོ་ཡོད། ང་རང་ཚོ་འཛམ་གླིང་སྤྱི་ལ་ཡོད་པའི་ཆོས་ལུགས་ཆ་ཚང་ལ་བྱམས་སྙིང་རྗེ་གོང་འཕེལ་དུ་གཏོང་རྒྱུའི་ནུས་པ་ཡོད་པ་རེད། བྱམས་སྙིང་རྗེ་ཟེར་བ་ནི་ཆོས་ལུགས་ནས་བྱུང་བའི་བསླབ་བྱ་ཙམ་མིན་པར་དངོས་ཡོད་གནས་ཚུལ་སོ་སོར་ཁ་ཡོད་ལག་ཡོད་ཀྱི་དགོས་མཁོ་ཡོད་མཁན་གྱི་བཟང་པོའི་ཡོན་ཏན་ཆགས་ཀྱི་ཡོད་པ་རེད། ཅེས་གསུངས།
དེ་ནས་བཀའ་འདྲི་བཀའ་ལན་གནང་བའི་སྐབས་སུ། ཧྥ་རྡར་ལོ་རེན་སི་ཧྥརི་མེན་ལགས་ཀྱིས་ང་ཚོའི་སྤྱི་ཚོགས་ནང་དབྱེ་འབྱེད་མང་པོ་ཡོད་པ་ཡིན་དུས། དབྱེ་འབྱེད་ཤུགས་ཆེན་པོ་ཡོད་པའི་སྐབས་སུ་མིའི་བསམ་བློའི་ནང་དུ་བཟང་ཕྱོགས་ཀྱི་འགྱུར་བ་འགྲོ་རྒྱུའི་ཐོག་ལ་༧གོང་ས་མཆོག་ནས་བཀའ་སློབ་ལམ་སྟོན་གནང་རོགས། དེ་བཞིན་ང་རང་ཚོ་འགྲོ་བ་མི་ཡིན་པའི་བསམ་བློ་དང་འཛམ་གླིང་གོ་ལ་གཅིག་གྱུར་གྱི་ཐོག་ལ་དགོངས་པ་བཞེས་སྟངས་སྐོར་བཀའ་འདྲི་ཞུས་པར། ༧གོང་ས་མཆོག་གིས། ང་ཚོ་འགྲོ་བ་མི་ཡིན་པའི་བསམ་བློ་དང་འཛམ་གླིང་གོ་ལ་གཅིག་གྱུར་གྱི་འདུ་ཤེས་ཏན་ཏན་ཡོང་གི་བསམ་གྱི་འདུག འོན་ཀྱང་སློབ་སྦྱོང་གི་སྒོ་ནས་མ་གཏོགས་ཆོས་ལུགས་ཀྱི་མཛད་སྒོ་ཚོགས་པ་ལྟ་བུའི་སྒོ་ནས་མིན་པར། ང་ཚོའི་དེང་དུས་ཀྱི་སློབ་སྦྱོང་ནི་འཛམ་གླིང་སྤྱི་ལ་ཁྱབ་བསྡད་ཡོད་རེད། ད་བར་དུ་དེང་དུས་ཀྱི་སློབ་སྦྱོང་གི་ནང་ཀླད་པ་སྤྱང་པོ་ཡོང་བའི་སླད་དུ་དོ་སྣང་བྱས་ཏེ་སློབ་སྦྱོང་སྤྲད་པ་མ་གཏོགས། ནང་གི་བསམ་པ་བཟང་པོ་ཡོང་རྒྱུ་དང་མི་བཟང་པོ་ཡོང་བའི་སླད་དུ་འབད་བརྩོན་བྱས་ནས་སློབ་སྦྱོང་སྤྲོད་ཀྱི་ཡོད་མ་རེད། དེར་བརྟེན། མི་མང་ཡོངས་ལ་སེམས་པ་བཟང་པོའི་དགོས་མཁོ་གང་ཡིན་པའི་སྐོར་ལ་སློབ་སྦྱོང་མང་ཙམ་སྤྲོད་དགོས་རྒྱུ་དེ་གལ་ཆེན་པོ་མཐོང་གི་འདུག སྤྱིར་བཏང་ནང་གི་སེམས་པ་བཟང་པོ་ཡོད་ན། རང་བཞིན་གྱིས་སེམས་ཀྱི་ཞི་བདེ་ཡོང་བ་དང་འཕྲོད་བསྟེན་ཡག་པོ་ཡོང་གི་ཡོད་པ་རེད། བསམ་བློའི་ནང་དུ་གཞན་ལ་ཕྲག་དོག་དང་འགྲན་སེམས་ཀྱི་གནོད་པའི་བསམ་པ་ཅན་མང་པོ་ཡོད་ན། འཁོན་འཛིན་གྱི་བསམ་པ་དང་འ་ཆད་འུ་ཐུག དེ་བཞིན་ཁོང་ཁྲོའི་བསམ་བློ་སླེབས་པ་འདི་ཡིས་སོ་སོའི་གཟུགས་པོའི་འཕྲོད་བསྟེན་དང་སེམས་ཀྱི་ཞི་བདེ་ལ་གནོད་ཀྱི་ཡོད་རེད། དེས་ན། སེམས་ཀྱི་ཞི་བདེ་ཟེར་བ་དང་ནང་སེམས་ཀྱི་ཞི་བདེ་ནི་གཙོ་བོ་སེམས་ཀྱི་ཞི་བདེ་ལ་ལྟོས་ཀྱི་ཡོད་པ་རེད། སེམས་ཀྱི་ཞི་བདེ་ནི་འགྲོ་བ་སེམས་ཅན་ཡོངས་ལ་དགོས་མཁོ་ཡོད་པ་རེད། དེར་བརྟེན་ཞི་བདེ་སྒྲུབ་པར་ངེས་པར་དུ་བསམ་པ་བཟང་པོ་ལ་ལྟོས་དགོས་པ་ནི་གལ་ཆེན་པོ་མཐོང་གི་འདུག ངོས་ཀྱིས་གོང་དུ་ཞུས་པ་ལྟར། དུས་རབས་སྔ་མའི་ནང་གྷན་དྷི་ཡིས་འཚེ་མེད་ཞི་བའི་སྐོར་ལ་ཤུགས་ཞེ་དྲགས་བསྐྱོན་པ་རེད། ད་ལྟའི་དུས་རབས་འདིའི་ནང་རྒྱ་གར་བ་གཙོ་བོར་གྱུར་བའི་རྒྱ་གར་གྱི་གནའ་རབས་རིག་གཞུང་བྱམས་སྙིང་རྗེ་འདི་འཛམ་གླིང་སྤྱི་ལ་ཁྱབ་པའི་དོན་དུ་ཤུགས་རྒྱག་དགོས་པ་ནི་གལ་ཆེན་པོ་མཐོང་གི་འདུག དེ་ནས་རིམ་པས་འཛམ་གླིང་ས་ཕྱོགས་ག་པར་ཡིན་རུང་ནང་གི་བསམ་པ་བཟང་པོ་ཡོང་རྒྱུ་དང་སྤྱི་ཚོགས་ཁོ་རང་གིས་ཤུགས་བརྒྱབ་ཐུབ་རྒྱུའི་རེ་བ་བྱེད་ཀྱི་ཡོད། དེ་ཡང་ཆོས་ལུགས་ཀྱི་སྒོ་ནས་མིན་པར་སློབ་སྦྱོང་གི་སྒོ་ནས་བྱེད་དགོས་ཀྱི་རེད་བསམ་གྱི་འདུག དེའི་ཆེད་དུ་སློབ་སྦྱོང་གི་ཤེེས་ཡོན་སྡེ་ཚན་གྱི་ནང་བྱམས་སྙིང་རྗེ་དང་འབྲེལ་བའི་སློབ་ཚན་བཅུག་རྒྱུ་དེ་མགོ་ཁྲིད་མཁན་རྒྱ་གར་བྱེད་དགོས་ཀྱི་རེད་དྲན་གྱི་འདུག དེར་བརྟེན་ནང་གི་བསམ་པ་བཟང་པོ་ནི་སོ་སོའི་སེམས་ཀྱི་ཞི་བདེ་དང་སོ་སོའི་གཟུགས་པོའི་འཕྲོད་བསྟེན་གྱི་ཆེད་དུ་བྱེད་དགོས་པའི་དམིགས་ཡུལ་བཞག་ནས་སེམས་པ་བཟང་པོ་བྱེད་པར་བློ་སྐྱེད་ཀྱི་རེད་བསམ་གྱི་འདུག བྱམས་སྙིང་རྗེ་སྤྱི་ལ་ཁྱབ་ཆེད་དང་གོང་འཕེལ་གཏོང་བའི་སླད་དུ་ང་ཚོས་ལས་འགུལ་སྤེལ་དགོས་རྒྱུ་དེ་གལ་ཆེན་པོ་མཐོང་གི་འདུག འདིའི་ཐོག་ལ་ང་ཚོ་ཐུན་མོང་གི་དམིགས་བསལ་ལས་འགན་ཡོད་རེད། དེང་དུས་ཀྱི་ཤེས་ཡོན་ནང་ཆོས་ལུགས་ལ་མ་བརྟེན་པར་རིས་མེད་ཀྱི་ཐབས་ལམ་གྱི་སྒོ་ནས་བྱམས་སྙིང་རྗེ་དང་འབྲེལ་བའི་སློབ་ཚན་བསླབ་དགོས་པ་ནི་གལ་ཆེན་ཡིན་སྐོར་གསུངས་སོང་།
འཛམ་གླིང་ཡེ་ཤུའི་དགོན་སྡེ་ལྷན་ཚོགས་ཀྱི་འཐུས་མི་དང་ཁང་པ་འཛུགས་སྐྲུན་གྱི་ཆེད་ལས་པ་ (Angelene Chan)ཞེས་པ་ཞིག་གིས། མ་འོངས་པ་༧གོང་ས་སྐུ་ཕྲེང་ ༡༥ པ་མཆོག་ལ་༧རྒྱལ་བ་རིན་པོ་ཆེ་མཆོག་གི་ངོས་ནས་གསུང་རྒྱུའི་བསླབ་བྱ་གལ་ཆེ་ཤོས་ག་རེ་ཡིན་སྐོར་བཀའ་འདྲི་ཞུས་པར་༧གོང་ས་མཆོག་གིས། དྲང་པོ་བཤད་ན། འདིའི་སྐོར་ངོས་རང་གི་བསམ་ཚུལ་གང་ཡང་ཞུ་ཡི་མེད་ལ། སྐུ་ཕྲེང་བཅོ་ལྔ་པའི་སྐོར་ལ་ད་ལྟ་བྲེལ་བ་གང་ཡང་མཐོང་གི་མི་འདུག ངོས་རང་ཇི་སྲིད་འཚོ་བའི་བར་དུ་འཛམ་གླིང་སྤྱིའི་བདེ་སྡུག་དང་ཞི་བདེ། ཁོར་ཡུག་ཐོག་ལ་གང་ཐུབ་ཐུབ་ཀྱིས་ལས་ཀ་བྱེད་ཀྱི་ཡོད། དེར་བརྟེན་འབྱུང་འགྱུར་གྱི་སྐུ་ཕྲེང་བཅོ་ལྔ་པའི་སྐོར་ལ་དམིགས་བསལ་དོ་སྣང་བྱེད་ཀྱི་མེད། འདི་ངོས་རང་སྒེར་གྱིས་དམིགས་བསལ་བྱུས་གཏོགས་མཐོང་གི་འདུག ལོ་ངོ་བཅུ་ཕྲག་ཁ་ཤས་ཀྱི་རྗེས་སུ་གནས་ཚུལ་འགྱུར་བ་གང་འཚམ་འགྲོ་ཡི་རེད། སྤྱིར་བཏང་སློབ་སྦྱོང་ཤུགས་ཆེན་པོ་དར་བསྡད་ཡོད་པ་དང་མི་མང་ཚོ་ཤེས་ཡོན་ཆེན་པོ་ཆགས་ཀྱི་ཡོད་པར་བརྟེན། མི་སྒེར་པ་གཅིག་གཉིས་ལ། དཔེར་ན་༧རྒྱལ་བ་རིན་པོ་ཆེ་ལྟ་བུ་དང་༧པཎ་ཆེན་རིན་པོ་ཆེ་ལྟ་བུ་རྩ་ཆེན་པོ་རྩིས་པ་དེ་དགོས་མཁོ་ཞེ་དྲགས་ཆགས་ཀྱི་མ་རེད་བསམ་གྱི་འདུག ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
