ཁ་སང་རྒྱ་གར་ནང་རྣམ་པ་གྱུར་བའི་ཏོག་དབྱིབས་གཉན་རིམས་ཨོ་མི་ཁོ་རོན་འགོས་པའི་ནད་པ་ ༡༧ གསར་དུ་ཐོན་པ་བཅས་ཁྱོན་མི་གྲངས་ ༢༡ བྱུང་ཡོད་པས་འཛམ་གླིང་རྒྱལ་ཁབ་མང་པོའི་འགྲུལ་བ་ཚོར་བཀག་སྡོམ་དང་བརྟག་དཔྱད་ཤུགས་སྣོན་བྱེད་བཞིན་ཡོད་འདུག
རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་ལམ་རྒྱལ་ཁབ་གང་སར་ལྷོ་ཨ་ཧྥེ་རི་ཁ་ནས་ཐོག་མར་འགོས་ཁྱབ་བྱུང་བའི་ཏོག་དབྱིབས་གཉན་རིམས་གསར་པ་ཨོ་མི་ཁོ་རོན་ཟེར་བ་དེ་འཛམ་གླིང་གི་ཡུལ་ལུང་གང་མང་ནང་ཁྱབ་ཀྱི་ཡོད་པ་ལྟར། རྒྱ་གར་གྱི་མངའ་སྡེ་རཱ་ཇི་སི་ཐན་ ( Rajasthan ) ནང་དུ་ནད་པ་གྲངས་ ༩ དང་། མ་ཧཱ་ར་ཤི་ཊི་ར་( Maharashtra) ནང་༨། ལྡི་ལི་དང་གྷུ་ཇུ་རཱ་ཐི་ ( Gujarat) རུ་ནད་པ་གྲངས་ ༡ རེ། དེ་བཞིན་རྒྱ་གར་ལྷོ་ཕྱོགས་ཀར་ན་ཊ་ཀ་ (Karnataka) རུ་ནད་པ་གྲངས་ ༢ བཅས་ཐོན་ཡོད་འདུག་ལ། རྒྱལ་ས་ལྡི་ལིར་ཡོད་པའི་ནད་པ་དེ་ནི་ཨ་ཧྥེ་རི་ཤར་ཕྱོགས་ཀྱི་ཐན་ཛ་ནི་ཡ་( Tanzania ) རྒྱལ་ཁབ་ནས་ཕྱིར་ལོག་པ་ཞིག་ཡིན་འདུག་ལ། ནད་པ་དེས་ཏོག་དབྱིབས་རིམས་ནད་ཀྱི་སྔོན་འགོག་སྨན་ཁབ་གཉིས་ཀ་བརྒྱབ་ཟིན་ཡོད་པ་དང་། ད་ལྟ་སྨན་ཁང་ ( Lok Nayak Jai Prakash Narayan Hospital) དུ་ལོགས་སུ་བཞག་ཏེ་སྨན་བཅོས་བྱེད་མུས་ཡིན་འདུག
དེའི་ཐད་རྒྱལ་ས་ལྡི་ལིར་གནས་ཞུགས་སྨན་པ་སུ་རཱ་ཤི་ཀུ་མར་( Dr Suresh Kumar) ལགས་ཀྱིས། ཨོ་མི་ཁོ་རོན་གྱིས་མནར་བཞིན་པའི་ནད་པ་དེའི་མིད་པར་རྨ་ཐོན་པ་དང་། ཚ་བ་འཕར་བ། ལུས་པོར་ཟུག་གཟེར་རྒྱག་པ་དང་སྐྱོ་བོ་ཆགས་ཡོད་པ་ལས། སྲོག་རླུང་གིས་མི་འདང་བའི་དཀའ་ངལ་མེད་སྐོར་སོགས་འགྲེལ་བརྗོད་བྱས་ཡོད་འདུག
དེ་བཞིན་ཁ་སང་རྒྱ་གར་མངའ་སྡེ་རྒྱ་གར་མངའ་སྡེ་རཱ་ཇི་སི་ཐན་ ( Rajasthan ) དུ་ལྷོ་ཨ་ཧྥེ་རི་ཁ་ནས་ཡོང་བའི་ནང་མི་དགུ་ཅན་གྱི་ཁྱིམ་ཚང་ཞིག་ལ་ཨོ་མི་ཁོ་རོན་གྱི་ནད་རྟགས་ཐོན་ཡོད་པ་དང་། ཁ་སང་ཡང་བསྐྱར་མ་ཧཱ་ར་ཤི་ཊི་ར་( Maharashtra) རུ་ ཨ་ཧྥེ་རི་ཁའི་ནཱ་ཇེའེ་རི་ཡ་( Nigeria ) ནས་གཉེན་འཕྲད་དུ་ཡོང་བའི་བུད་མེད་ཅིག་དང་། ཁོང་མོའི་གཅེན་པོ་སོགས་མི་གྲངས་དྲུག་དང་། ཉེ་ཆར་ཧྥན་ལན་ཊི་( Finland) ནས་ཡོང་བའི་མི་གཅིག་བཅས་ཁྱོན་མི་གྲངས་ ༧ ལ་ཏོག་གསར་གྱི་ནད་རྟགས་ཐོན་ཡོད་འདུག
ཟླ་འདིའི་ཕྱི་ཚེས ༢ ཉིན་རྒྱ་གར་ལྷོ་ཕྱོགས་ཀར་ན་ཊ་ཀ་(Karnataka) མངའ་སྡེའི་ནང་མི་གཉིས་ལ་ཏོག་དབྱིབས་ནད་འབུ་གསར་པ་དེ་འགོས་ཡོད་པ་ཐོག་མར་ཤེས་རྟོགས་བྱུང་ཡོད་ཅིང་། དེ་ནི་རྒྱ་གར་ནང་འགོས་ཁྱབ་བྱུང་བའི་ཏོག་ནད་གསར་པའི་ནད་པ་ཐོག་མ་དེ་ཆགས་འདུག ནད་པ་གཉིས་ནི་ལྷོ་ཨ་ཧྥེ་རི་ཁ་ནས་ཡོང་བའི་རང་ལོ་ ༦༦ ཅན་གྱི་སྐྱེས་པ་ཞིག་དང་། སྦེང་ལོར་གྲོང་ཁྱེར་གྱི་སྒེར་གྱི་སྨན་ཁང་ཞིག་ཏུ་སྨན་པ་བྱེད་བཞིན་པའི་རང་ལོ་༤༦ ཅན་གྱི་སྐྱེས་པ་ཞིག་ཡིན་འདུག ཁོང་གཉིས་ཀར་ཏོག་དབྱིབས་རིམས་ནད་ཀྱི་སྔོན་འགོག་སྨན་ཁབ་བརྒྱབ་ཟིན་ཡོད་ཀྱང་། སྨན་པ་དེ་ལྷོ་ཧྥེ་རི་ཁ་སོགས་སུ་འགྲོ་སྐྱོད་བྱས་མེད་ཀྱང་ནད་རྟགས་ཐོན་ཡོད་པར་བརྟེན། སྦེང་ལོར་གྲོང་ཁྱེར་ཁུལ་དུ་ཏོག་ནད་ཀྱི་ནད་འབུ་གསར་པ་འགོས་ཁྱབ་འགྲོ་ཡི་ཡོད་པའི་ཉེན་བརྡ་བཏང་ཡོད་འདུག
ཉེ་ཆར་ཕྱི་ཟླ་ ༡༡ ཚེས་ ༢༦ ཉིན་འཛམ་གླིང་འཕྲོད་བསྟེན་སྒྲིག་འཛུགས་ངོས་ནས། ལྷོ་ཨ་ཧྥེ་རི་ཁ་ནས་ཐོག་མར་མཆེད་པའི་ཏོག་དབྱིབས་གཉན་སྲིན་གསར་པ་ཨོ་མི་ཁོ་རོན་དེ་ཉིད། འཛམ་གླིང་ཡུལ་གྲུ་གཞན་དུ་འགོས་ཁྱབ་འབྱུང་ཉེན་ལ་བརྟེན་བློ་འཚབ་བྱ་ཡུལ་གྱི་གཉན་སྲིན་ (Variant of Concern) ཞིག་ལ་ངོས་འཛིན་གྱིས་འཛམ་གླིང་ཡོངས་དང་། ལྷག་པར་དུ་ནད་ཡམས་ཁྱབ་གདལ་དུ་འགྲོ་མུས་ཡིན་པའི་རྒྱལ་ཁབ་རྣམས་ཀྱིས་གཉན་རིམས་འགོག་སྡོམ་གྱི་ཐད་ལ་ཤུགས་སྣོན་སྔར་ལྷག་དགོས་པའི་ལམ་སྟོན་གནང་བ་ལྟར། ཟླ་འདིའི་ཕྱི་ཚེས་ ༡ ཉིན་ནས་བཟུང་རྒྱ་གར་གཞུང་གིས་དབྱིན་ཡུལ་དང་ལྷོ་ཨ་ཧྥེ་རི་ཁ། སྦིར་ཛིལ། བྷ་ལ་དེ་ཤི། རྒྱ་ནག སེངྒ་པུར། ཧོང་ཀོང་། ཨི་ཛི་རལ་(Israel)། ཡུ་རོབ་སོགས་ནས་ཡོང་བའི་འགྲུལ་བ་ཚོར་བཀག་སྡོམ་ནན་པོ་བྱེད་བཞིན་ཡོད་འདུག རྒྱལ་ཁབ་དེ་དག་ནས་ཡོང་བའི་འགྲུལ་བ་རྣམས་གནམ་ཐང་དུ་འབྱོར་མ་ཐག་རིམས་ནད་བརྟག་དཔྱད་བྱེད་དགོས་ཤིང་། བརྟག་དཔྱད་ཀྱི་གྲུབ་འབྲས་མ་ཐོན་བར་དུ་གནམ་ཐང་གི་ཕྱི་རོལ་དུ་ཐོན་མི་ཆོག་པ་དང་། ནད་རྟགས་ཐོན་པའི་རིགས་ཟུར་བཀག་ཏུ་བཞག་ནས་བརྟག་དཔྱད་དང་སྨན་བཅོས་བྱེད་ཀྱི་ཡོད་འདུག་ལ། ནད་རྟགས་ཐོན་མེད་པའི་འགྲུལ་བ་རྣམས་ཀྱང་རང་ཁྱིམ་དུ་བདུན་ཕྲག་གཅིག་རིང་ཟུར་བཀག་ཏུ་བསྡད་དགོས་པ་དང་། ཉིན་གྲངས་བརྒྱད་པ་དེར་བསྐྱར་དུ་བརྟག་དཔྱད་བྱེད་དགོས་པའི་བཀའ་རྒྱ་བཏང་ཡོད་འདུག
གསར་འགོད་པ། དཔལ་ལྡན།
