མདོ་དྲན་པ་ཉེར་བཞག་གི་བཀའ་ཆོས་དབུ་འཛུགས་མཛད།

༧གོང་ས་མཆོག་ནས་ད་ལྟའི་ཏོག་དབྱིབས་གཉན་རིམས་ལྟ་བུའི་དཀའ་ངལ་ཡོང་སྐབས་སངས་རྒྱས་ཀྱི་གསུང་བདེན་པ་བཞི་ཡི་སྐོར་ལ་བསམ་བློ་བཏང་བ་ཡིན་ན་ལམ་སེང་ཁོང་ཁྲོ་བཟའ་བ་དང་སེམས་ཞུམ་པ་སོགས་མི་ཡོང་བར་ཕན་ཐོགས་ཆེན་པོ་ཡོད་སྐོར་གསུངས་སོང་།

དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་ཨིན་ཌོ་ནི་ཤི་ཡ་དང་། མ་ལེ་ཤི་ཡ། འབར་མ། ཤྲི་ལངྒ་། ཐའེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་བ་རྣམས་ལ་ཉིན་གྲངས་གཉིས་རིང་གི་མདོ་དྲན་པ་ཉེར་བཞག་གི་བཀའ་ཆོས་དབུ་འཛུགས་མཛད་སྐབས། ༧གོང་ས་མཆོག་གིས། དགེ་སློང་ཞིག་ལ་མཚོན་ན་མདོ་དྲན་པ་ཉེར་བཞག་ཉམས་སུ་ལེན་ཐབས་ཡག་ཤོས་ནི་སད་པ་ཙམ་དུ་མ་ཟད་གཉིད་པའི་གནས་སྐབས་སུའང་རང་ཉིད་དགེ་སློང་ཡིན་པའི་འདུ་ཤེས་དེ་འཛིན་དགོས་པ་དེ་ཡིན་སྐོར་གསུངས་སོང་།

བཀའ་ཆོས་གནང་སྐབས་༧གོང་ས་མཆོག་གིས། ངས་ཉིན་རེ་བཞིན་དུ་སྟོན་པ་དྲན་དུས་རྗེ་ཙོང་ཁ་པའི་རྟེན་འབྲེལ་བསྟོད་པའི་ནང་གི་ཚིག སྟོན་དེའི་རྗེས་སུ་རབ་ཏུ་བྱུང་གྱུར་ཞིང་། །རྒྱལ་བའི་གསུང་ལ་སྦྱངས་པ་མི་དམན་ཞིང་། །རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག །དྲང་སྲོང་ཆེན་པོ་དེ་ལ་དེ་ལྟར་གུས། །ཞེས་པ་འདོན་གྱི་ཡོད། ཚིག་དེར་ནུས་པ་ཞེ་དྲགས་འདུག ང་ཆུང་དུས་སྐབས་ནས་བཅོམ་ལྡན་འདས་ཀྱི་བཀའ་སྡེ་གནོད་གསུམ་དང་། དེའི་དགོངས་འབྲེལ་རྣམས་ཀྱི་རྩ་བ་བློ་ལ་བཟུང་། འགྲེལ་བ་དེ་ཡང་ཡོངས་འཛིན་རྡོ་རྗེ་འཆང་གིས་བསྐྱོན། དེ་ལྟར་རྒྱལ་བའི་གསུང་ལ་སྦྱངས་པ་མི་དམན་ཞིང་ག་ཚོད་ཐུབ་ཐུབ་ཀྱིས་ཐོས་དོན་སྒྲུབ་ལ་གཞོལ་ནས། ཉིན་རེ་བཞིན་དུ་ཚུལ་ཁྲིམས་ཀྱི་བསླབ་པ་གཞི་ལ་བཞག་ནས་ཏིང་ངེ་འཛིན་གྱི་བསླབ་པར་གང་ལ་གང་འཚམ་ཞིག་བསམ་བློ་གཏོང་གི་ཡོད་པ་རེད། དེ་ནས་ཤུགས་ཆེ་བ་དེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བསམ་བློ་གཏོང་གི་ཡོད་པ་རེད། རྒྱ་ཆེན་སྤྱོད་རྒྱུད་ཀྱི་བྱང་ཆུབ་སེམས་དང་། ཟབ་མོ་ལྟ་རྒྱུད་ཀྱི་སྟོང་ཉིད་ཀྱི་ལྟ་བ། རླབས་ཆེན་སྤྱོད་རྒྱུད་ཀྱི་ཞི་བ་ལྷའི་བདག་གཞན་མཉམ་བརྗེས་ཀྱི་བློ་སྦྱོང་དེ་དག་ལ་ངས་ཉིན་རེ་བཞིན་དུ་བསམ་བློ་གཏོང་བ་དང་སྒོམ་རྒྱག་གི་ཡོད། དེར་བརྟེན། སྟོན་དེའི་རྗེས་སུ་རབ་ཏུ་བྱུང་གྱུར་ཞིང་། །རྒྱལ་བའི་གསུང་ལ་སྦྱངས་པ་མི་དམན་ཞིང་། །རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག །ཞེས་དེ་ལྟར་ངོས་ཀྱིས་འདུ་ཤེས་འཇོག་གི་ཡོད་ལ། ཆོས་གྲོགས་ཚོ་ལའང་ག་ཚོད་ཐུབ་ཐུབ་ཀྱིས་ང་རང་གི་ཉམས་ལེན་དང་འབྲེལ་ནས་ང་རང་གི་སེམས་ནང་འགྱུར་བ་གང་འདྲ་འགྲོ་ཀྱི་ཡོད་མེད་བཀའ་མོལ་ཞུ་རྒྱུ་ལ་ཞེ་དྲགས་དགའ་པོ་ཡོད། སྔོན་ལ་ཁྱེད་རང་ཚོ་པཱ་ལིའི་ཆོས་བརྒྱུད་འཛིན་མཁན་རྣམ་པ་ཚོ་དང་། དེ་ནས་ལེགས་སྦྱར་གྱི་ཆོས་བརྒྱུད་འཛིན་མཁན་བཅས། གང་ལྟར་ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲང་གཅིག་གྱུར་རེད། ལྟ་གྲུབ་འདྲ་མིན་ཡོད་པ་དེ་བཅོམ་ལྡན་འདས་ཁོང་རང་ཞལ་བཞུགས་པའི་ཁ་ཐུག་དེར། དཔེར་ན་བྱེ་བྲག་སྨྲ་བའི་སྡེ་བཅོ་བརྒྱད་ཟེར་བ་ལྟ་བུ་ཡོང་གི་ཡོད་པ་རེད། རིམ་པས་མདོ་སྡེ་པ་དང་། སེམས་ཙམ་པ། དབུ་མ་པ་བཅས་དང་། དེ་རེ་རེ་ལའང་ནང་གསེས་མི་འདྲ་བ་ཡོང་སྡོད་ཀྱི་ཡོད་པ་རེད། དེ་དག་གང་ལྟར་བཅོམ་ལྡན་འདས་ཁོང་རང་ཉིད་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་འདུག དེར་བརྟེན་ང་ཚོ་ལ་བཅོམ་ལྡན་འདས་ཀྱིས་རང་དབང་ཆ་ཚང་སྤྲད་ནས། བཅོམ་ལྡན་འདས་ཁོང་རང་གིས་གསུངས་པའི་བཀའ་དེ་ལ་བཅོམ་ལྡན་འདས་ཀྱི་བཀའ་རེད་ཟེར་ནས་ཡིད་ཆེས་བྱེད་དགོས་ཀྱི་མ་རེད། དེ་ལ་བརྟག་དཔྱད་བྱོས་གསུངས་བ་རེད། དེར་བརྟེན་ང་ཚོས་པཱ་ལི་ཆོས་བརྒྱུད་དང་། ལྷག་པར་དུ་ནཱ་ལེནྜའི་ལེགས་སྦྱར་གྱི་ཆོས་བརྒྱུད་ཀྱི་ནང་ལོགས་ལ་བཅོམ་ལྡན་འདས་ཀྱི་བཀའ་ཉིད་ལ་དཔྱད་པ་བྱེད་རྒྱུ་ཞེ་དྲགས་ཡོང་གི་ཡོད་པ་རེད། དེར་བརྟེན། བཅོམ་ལྡན་འདས་ཀྱི་བཀའ་ལ་ཇི་ཙམ་གྱིས་རིག་པས་དཔྱད་པ་བྱས་ན། ངེས་པ་འདྲེན་རྒྱུ་ཤུགས་ཆེ་རུ་འགྲོ་རྒྱུ་མ་གཏོགས། དཔྱད་པ་བྱས་ནས་གཞུག་དེར་ལན་བརྒྱབ་རྒྱུ་མེད་པར་དད་པ་རྐྱང་རྐྱང་ལ་འགྲོ་རྒྱུ་ཞིག་ཆགས་ཀྱི་ཡོད་པ་མ་རེད། དེར་བརྟེན། བཅོམ་ལྡན་འདས་ཀྱི་ལུང་རྟོགས་ཀྱི་བསྟན་པ་ལ་ཤེས་ནས་དད་པ་ཐོབ་པ་ཞིག་དགོས་ཀྱི་རེད་ལ། བཅོམ་ལྡན་འདས་ཀྱི་རྗེས་འབྲང་བ་ང་རང་ལ་ཆ་བཞག་ནའང་། རྒྱ་ཆེ་བའི་ལམ་རིམ་དང་ཟབ་མོ་ལམ་གྱི་རིམ་པ། བདག་གཞན་མཉམ་བརྗེས་ཀྱི་བློ་སྦྱོང་དེ་ཚོའི་གྲས་ཉམས་ལེན་དང་ཤེས་ནས་དད་པ་ཐོབ་པ་བྱས་ཡོད། ཅེས་གསུངས་སོང་།

ཡང་ཐུགས་བསྐྱེད་དམ་བཅའ་བཞིའི་སྐོར་༧གོང་ས་མཆོག་གིས། ད་ལྟའི་དུས་ཚོད་འདིར་ངའི་ངོས་ནས་སྤྱིར་འཛམ་གླིང་ཞི་བདེ་དང་། ཆོས་བརྒྱུད་འདྲ་མིན་ཚང་མ་མཐུན་པོ་ཡོང་རྒྱུ། ལྟ་གྲུབ་འདྲ་མིན་ཡོད་རེད་དེ། སེམས་པ་བཟང་པོ་བྱ་རྒྱུ་དེ་ཆོས་བརྒྱུད་ཚང་མས་གསུང་གི་ཡོད་པ་རེད། དེ་བཞིན་འཚེ་བ་མི་བྱ་རྒྱུ་དེའང་ཚང་མས་གསུང་གི་འདུག རྒྱ་གར་གྱི་མུ་སྟེགས་པ་ཇེན་དང་། པཱ་ལིའི་ཆོས་བརྒྱུད་འཛིན་མཁན་ཚང་མས་བྱམས་སྙིང་རྗེ་དང་བཟོད་པ་ཉམས་ལེན་བྱ་རྒྱུ། གཞན་ལ་འཚེ་བ་མི་བྱ་རྒྱུ་གསུང་གི་འདུག རྒྱ་གར་ནང་དར་བའི་ཆོས་ལུགས་ཁག་དེ་དག་གིས་འཚེ་བ་མི་བྱ་རྒྱུ་ཞེས་པ་ཞེ་དྲགས་གསུང་གི་འདུག དེར་བརྟེན་རྒྱ་གར་ནང་ལ་ཨ་ཧིམ་ས་(Ahimsa)ཟེར་བའི་འཚེ་བ་མི་བྱ་རྒྱུ་དང་། ཀ་རུ་ན་(Karuna)ཟེར་བའི་བྱམས་བརྩེ་ལྟ་གྲུབ་དེ་ལོ་གསུམ་སྟོང་ལྷག་རིང་སླེབས་ཀྱི་འདུག ལྟ་གྲུབ་དེའི་རྐྱེན་གྱིས་རྒྱ་གར་ནང་ཁ་ཆེ་དང་ཡེ་ཤུ། ཧིན་དྷུ། ཇེན་བཅས་ཆོས་ལུགས་འདྲ་མིན་མཐུན་པོ་བྱས་ནས་ཡོད་པ་དེ་ང་ཚོའི་མིག་དཔེ་ལྟ་ས་ཞིག་རེད། ང་རང་རྒྱ་གར་ལ་བཙན་བྱོལ་བ་བྱས་ནས་ལོ་དེ་ཙམ་འགྲོ་ཡི་ཡོད་རེད་དེ། དངོས་ནས་རྒྱ་གར་ནང་ཆོས་ལུགས་ཀྱི་མཐུན་སྒྲིལ་དེ་རྗེས་སུ་ཡི་རང་དང་སེམས་ཀྱི་རྟིང་ནས་དགའ་ཚོར་སྐྱེ་རྒྱུ་ཞིག་འདུག ཅེས་བཀའ་གནང་སོང་།

བཀའ་འདྲི་བཀའ་ལན་གྱི་ལས་རིམ་སྐབས་དགེ་སློང་ཞིག་གིས་ད་ལྟའི་ཏོག་དབྱིབས་གཉན་རིམས་ལྟ་བུས་ཉིན་རེའི་འཚོ་བའི་ནང་དཀའ་ངལ་འཕྲད་པའི་སྐབས་སུ་མདོ་དྲན་པ་ཉེར་བཞག་ཇི་ལྟར་ཉམས་ལེན་བྱ་དགོས་མིན་བཀའ་འདྲི་ཞུས་པར་མགོན་པོ་མཆོག་གིས། དེ་རིང་ཁ་སང་ང་ཚོར་དཀའ་ངལ་དེ་འདྲ་འཕྲད་པའི་ཁ་ཐུག་དེར། རྒྱུ་དང་རྐྱེན་ག་རེ་ཡིན་མིན་བསམ་བློ་དེ་ཙམ་འཁོར་གྱི་ཡོད་པ་མ་རེད། དཀའ་ངལ་མང་པོ་ཞིག་མིའི་སྤྱི་ཚོགས་ནང་འཕྲད་ཡོང་དུས། མིས་མི་ལ་ཁོང་ཁྲོ་བཟའ་རྒྱུ་དང་ཕྲག་དོག་ལང་རྒྱུ། ང་རྒྱལ་སྐྱེ་རྒྱུ་དེ་འདྲ་ཡོང་གི་ཡོད་པ་རེད། དེར་བརྟེན་དེའི་རིགས་ལ་བདེ་སྡུག་ཟེར་བ་དེ་ལས་ཀྱི་དབང་གིས་ཡོང་གི་ཡོད་པ་དང་། ལས་ཟེར་བ་དེ་སེམས་འདུལ་མ་འདུལ་གྱི་སྟེང་ནས་ཡོང་གི་ཡོད་པའི་ཐད་ལ་བསམ་བློ་མང་ཙམ་འཁོར་བ་ཡིན་ན། དེ་ནས་དཀའ་ངལ་འཕྲད་དུས་ལས་སླ་པོའི་ཐོག་ནས་མི་ལ་མཛུ་གུ་འཛུགས་རྒྱུ་དེ་ཡོང་གི་མ་རེད། དེ་འདྲ་ཡིན་དུས། ང་ཚོས་ད་ལྟའི་དུས་ཚོད་འདིར་སངས་རྒྱས་ཀྱི་ཆོས་ལ། འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་ཀུན་འབྱུང་འཕགས་པའི་བདེན་པའོ། །འདི་ནི་འགོག་པ་འཕགས་པའི་བདེན་པའོ། །འདི་ནི་ལམ་འཕགས་པའི་བདེན་པའོ། །ཞེས་བདེན་བཞི་གསུང་པ་དེ་ལ་བསམ་བློ་བཏང་བ་ཡིན་ན། ང་ཚོར་དཀའ་ངལ་འཕྲད་པའི་སྐབས་ལམ་སེང་སེམས་ནང་ཁོང་ཁྲོ་བཟའ་རྒྱུ་དང་། སེམས་ཞུམ་རྒྱུ་ལྟ་བུ་ཕལ་ཆེར་མི་ཡོང་བ་རེད་འདུག ཅེས་དང་། སངས་རྒྱས་ཀྱིས་གསུངས་པའི་བདེན་བཞིའི་སྐོར་ལ་གོ་བ་ཏོག་ཙམ་བྱུང་ན། རང་བཞིན་གྱིས་དཀའ་ངལ་རིགས་ལ་འཕྲད་སྐབས་ཧོན་འཐོར་འགྲོ་བའི་གནས་སྐབས་ཕལ་ཆེར་མི་བྱུང་བ་ལྟ་བུ་ཡིན་སྐོར་བཀའ་ལན་བསྩལ་གནང་སོང་།

གཞན་ཡང་མགོན་པོ་མཆོག་གིས། མི་གྲོངས་པའི་ཁ་ཐུག་དེར་མདོ་དྲན་པ་ཉེར་བཞག་ལྟ་བུ་བཏོན་ན། འདས་པོའི་རྣམ་ཤེས་ཀྱི་ཐོས་ནས་ཕན་ཐོགས་ཏན་ཏན་ཡོད་པ་མ་ཟད། འདས་གྲོངས་ཕྱིན་པའི་ཤུལ་ལུས་ནང་མི་རྣམས་ལའང་མདོ་ཡི་ཚིག་གོ་བ་ཙམ་གྱིས་སེམས་ནང་ཏོག་ཙམ་ཞི་བདེ་ཡོང་རྒྱུའི་ཕན་ཐོགས་ཆེན་པོ་ཡོད་པའི་སྐོར་དང་། དྲན་པ་ཉེར་བཞག་བཞིའི་རྣམ་གཞག་སྐོར་། དེ་བཞིན་དགེ་སློང་ཞིག་ཡིན་པའི་ཆ་ནས་དུས་རྒྱུན་དྲན་པ་ཉེར་བཞག་གི་ཉམས་ལེན་བྱ་རྒྱུའི་ཐབས་ཤེས་ལེགས་ཤོས་ནི་རང་ཉིད་དགེ་སློང་ཡིན་བསམ་པའི་འདུ་ཤེས་དེ་གཉིད་སད་དུས་ཙམ་དུ་མ་ཟད་གཉིད་དུས་ཀྱི་གནས་སྐབས་སུའང་སླེབས་དགོས་པ་ཡིན་སྐོར་སོགས་བཀའ་སློབ་བསྩལ་གནང་སོང་།

གསར་འགོད་པ། པ་སངས་ཚེ་རིང་།