རྗེ་ཙོང་ཁ་པའི་སློབ་ཡོན་དབུ་འཛུགས་གནང་བའི་ལོ་རྒྱུས།

རྗེ་ཙོང་ཁ་པའི་སློབ་ཡོན་དབུ་འཛུགས་གནང་བའི་ལོ་རྒྱུས།

༄༅། །ཐུགས་རྗེས་འགྲོ་རྣམས་སྡུག་བསྔལ་ལས་སྐྱོབ་མཛད། །རྗེ་བཙུན་བླ་མ་རྣམས་ལ་གུས་པྱག་འཚལ། །ཞེས་གུས་ཕྱག་སྔོན་དུ་བཏང་ནས་བཀུར་འོས་མཁྱེན་ལྡན་རྒྱ་ཆེའི་མང་ཚོགས་ལ་གུས་འདུད་བཅས་གུས་པའི་བསམ་ཚུལ་ཞུ་དོན། ཕྱི་ལོ་༡༩༧༨ ཀྱི་ལོ་འགོར་གུས་རང་དགའ་ལྡན་ཤར་རྩེ་གྲྭ་ཚང་དུ་ཆོས་སྒོར་ཐོག་མར་ཞུགས་པའི་སྐབས་དེ་དག་ཏུ་བཙན་བྱོལ་བོད་མིའི་དཔལ་འབྱོར་གྱི་གནས་སྟངས་ཧ་ཅང་སྐྱོ་པོ་རེད། འོན་ཀྱང་གུས་རང་ཕྱི་ལོ་བརྒྱད་བཅུའི་ནང་སྦེལ་ཀོབ་ལུགས་བསམ་སོགས་བོད་མིའི་གཞིས་ཆགས་ཁག་འགའ་ཞིག་ཏུ་གྲྭ་ཚང་དང་ཁང་ཚན་གྱི་ཆེད་དུ་ཞལ་འདེབས་འབུལ་སྡུད་ལ་ཕྱིན་མྱོང་། སྐབས་དེ་དག་ཏུ་སྐྱབས་བཅོལ་བོད་མིའི་དཔལ་འབྱོར་གྱི་གནས་སྟངས་སྐྱོ་པོ་ཡིན་ནའང་བོད་མི་རྣམས་ཆོས་དད་ཆེ་ཞིང་། མི་རིགས་ཀྱི་ལ་རྒྱ་དང་རང་གི་རིག་གཞུང་ལ་གཅེས་ཞེན་ཧ་ཅང་ཆེ་བས། རང་རང་སོ་སོའི་འབྱོར་པ་ལ་བརྟེན་ནས་བློས་བཅད་ཀྱི་ཞལ་འདེབས་ཧིན་སྒོར་གཅིག་གམ་གཉིས་ཙམ་ལས་འབུལ་རྒྱུ་མེད་ན་ཡང་། ཞལ་འདེབས་གང་ཕུལ་བ་དེ་དད་གུས་ཆེན་པོའི་སྒོ་ནས་ཕུལ་གནང་གི་འདུག ཕྱི་ལོ་༡༩༧༠ ནས་ ༡༩༨༠ ཡི་མཇུག་གི་བར་ལ་གཞིས་ཆགས་ཁག་དང་ས་ཁུལ་སྣ་ཚོགས་སུ་ཡོད་པའི་བོད་མི་སྐྱབས་བཅོལ་བ་ཚོས། དགོན་པ་གྲ་ཚང་ཁག་ལ་ཞལ་འདེབས་དང་བསྙེན་བཀུར་སོགས་ཕུལ་ནས་གང་ཅིའི་རྒྱབ་སྐྱོར་གནང་སྐབས་སུ་རང་ཉིད་ལ་ཚོར་བ་གང་བྱུང་བ་དེ་དག་དུས་ད་ལྟ་ཡང་མ་བརྗེད་པར་གསལ་པོར་དྲན་བཞིན་ཡོད་ཅིང་། ད་ལྟའི་ཆར་བོད་མི་མང་ཆེ་བའི་དཔལ་འབྱོར་གྱི་གནས་སྟངས་སྐབས་དེ་དག་དང་བསྡུར་ན་ཞེ་དྲག་ཡར་རྒྱས་ཆེན་པོ་ཕྱིན་ཡོད་པ་དགའ་སྤྲོའི་གནས་རེད།

      ལོ་ཤས་སྔོན་ལ་དགའ་ལྡན་ཤར་རྩེ་གྲྭ་ཚང་གི་མཁན་རིན་པོ་ཆེ་དགེ་བཤེས་བྱང་ཆུབ་ཆོས་ལྡན་ལགས་ཀྱིས་གུས་པར་ནང་མོལ་གྱི་ཚུལ་དུ་བཀའ་སློབ་གནང་བ་དང་། དེའི་རྗེས་སུ་སྐུའི་གསུང་སྒྱུར་མཁས་དབང་འབུམ་རམས་པ་ཐུབ་བསྟན་སྦྱིན་པ་ལགས་ནས་ཀྱང་ལམ་སྟོན་གནང་དོན་བཞིན། ཕྱི་ལོ་༢༠༡༩ ལོར་མཉམ་མེད་ཆོས་ཀྱི་རྒྱལ་པོ་འཇམ་མགོན་བླ་མ་ཙོང་ཁ་པ་ཆེན་པོའི་གཤེགས་ལོ་༦༠༠ འཁོར་བའི་དམིགས་བསལ་དྲུག་བརྒྱའི་རྗེས་དྲན་ལས་རིམ་གོ་སྒྲིག་ཐད་གང་ཐུབ་ཞབས་འདེགས་ཞུ་རྒྱུ་ཐག་བཅད་ནས། རྒྱུན་རིང་འདྲིས་པའི་གྲོགས་པོ་ཌོག་ཌར་ཧོན་རུ་ཨིཛ་དང་། ཁོང་གི་གྲོགས་པོ་ཁག་དང་དགེ་ཕྲུག་རྣམས། གཞན་ཡང་ཨ་རི་བ་ཨ་ཅག་ཀེ་ཊི་སི་གྷར་ལགས་བཅས་ལ་ཡང་ལོ་རྒྱུས་ཀྱི་རང་བཞིན་གལ་ཆེན་ལྡན་པའི་ལས་རིམ་དེ་ལ་རོགས་སྐྱོར་ཤུགས་ཆེ་ངེས་པར་གནང་དགོས་པའི་སྐུལ་མ་ནན་པོ་ཡང་ཡང་བྱས་པ་ཡིན།

     དགའ་ལྡན་ཁྲི་ཐོག་ཁང་གི་དྲུང་ཆེ་དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པའི་ལམ་སྟོན་བཀའ་སློབ་འོག་གུས་པས་འགན་འཁུར་གཙོ་བོ་ཞུས་ནས། ཕྱི་ལོ་༢༠༡༩ ལོའི་ཕྱི་ཟླ་དགུ་པའི་ནང་ཨ་རིའི་གྲོང་ཁྱེར་ནིའུ་ཡོག་ཏུ་ཡོད་པའི་བོད་རིགས་སྤྱི་མཐུན་ཚོགས་པའི་སྤྱི་ཁང་ཕུན་ཚོགས་སྡེ་བཞིར། མཉམ་མེད་ཆོས་ཀྱི་རྒྱལ་པོ་འཇམ་མགོན་བླ་མ་ཙོང་ཁ་པ་ཆེན་པོའི་གཤེགས་ལོ་༦༠༠ འཁོར་བའི་དམིགས་བསལ་དྲུག་བརྒྱའི་རྗེས་དྲན་ལས་རིམ་རྒྱ་ཆེ་གོ་སྒྲིག་ཞུས་པར། དམིགས་བསལ་མཛད་སྒོ་དེའི་ཚོགས་མགོན་དུ་འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲིན་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང་། སྐྱབས་རྗེ་མཚུངས་མེད་ཤར་བྱང་གི་ཆོས་རྗེ་རྣམ་གཉིས་ངོ་ཕེབས་གནང་བའི་ཐོག།དགའ་ལྡན་ཁྲི་ཐོག་ཁང་གི་དྲུང་ཆེ་དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པ་གཅིག་ལྕོགས་ཤར་རྩེ་མཁན་ཟུར་བྱང་ཆུབ་ཆོས་ལྡན་རིན་པོ་ཆེ་མཆོག་ཀྱང་ཆེད་ཕེབས་ཀྱིས་མཉམ་ཞུགས་གནང་།

     སེར་སྨད་དབུ་ཟུར་དགེ་བཤེས་བཀྲིས་ལགས་ཀྱིས་དབུ་འཁྲིད་པའི་སྒྲོལ་ཆོག་ཚོགས་པས་སྐབས་དེར་དམིགས་བསལ་རྗེས་དྲན་མཛད་སྒོ་དེའི་སྔ་རྗེས་ཀྱི་གྲ་སྒྲིག་གང་ཅིར་རྒྱབ་སྐྱོར་རོགས་འདེགས་ཤུགས་ཆེ་གནང་བའི་དབང་གིས། བོད་རིགས་སྤྱི་མཐུན་ཚོགས་པའི་སྤྱི་ཁང་ཕུན་ཚོགས་སྡེ་བཞི་དེ་བཞེངས་པ་ནས་བཟུང་ཚོགས་ཁང་དེའི་ནང་མི་མང་འདུ་འཛོམས་ཆེ་ཤོས་ཀྱི་མཛད་སྒོ་སྐབས་དེར་ཚོགས་ཐུབ་པ་བྱུང་བ་སོགས་ཀྱིས། འཛམ་གླིང་ནང་མང་གཙོ་དང་། འགྲོ་བ་མིའི་ཐོབ་ཐང་། མི་རིགས་འདྲ་མཉམ་སོགས་འགྲོ་བ་མིའི་རིགས་ཀྱི་ཕུལ་བྱུང་མངོན་འདོད་བཟང་སྤྱོད་ཀྱི་ལམ་སྲོལ་རིན་ཐང་ཅན་མང་པོའི་བ་དན་གུང་དུ་སྒྲེང་མཛད་སྟོབས་ཆེན་རྒྱལ་ཁབ་ཨ་མེ་རི་ཁའི་ས་ཐོག་ཏུ། འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲིན་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང་། སྐྱབས་རྗེ་མཚུངས་མེད་ཤར་བྱང་གི་ཆོས་རྗེ་རྣམ་གཉིས་བཅས་དགེ་ལྡན་ཁྲི་ཡབ་སྲས་རྣམ་གསུམ་གནས་གཅིག་ཏུ་མཛད་སྒོར་ལྷན་འཛོམས་ཀྱིས། མཉམ་མེད་ཆོས་ཀྱི་རྒྱལ་པོ་རྗེ་ཙོང་ཁ་པ་ཆེན་པོའི་རྗེས་དྲན་སྲུང་བརྩི་དོན་དང་ལྡན་པ་ལེགས་གྲུབ་བྱུང་ནས། ནིའུ་ཡོག་ཁུལ་གྱི་ལྷག་བསམ་དང་ཤ་ཞེན་ལྡན་པའི་བོད་རིགས་མང་པོས་དགའ་ཚོར་ཆེན་པོའི་སྔགས་བརྗོད་གནང་བྱུང་བས། གུས་རང་དགའ་སྤོབས་གོང་ནས་གོང་འཕེལ་གྱི་ཡང་ཡང་རྗེས་སུ་ཡི་རངས་བྱ་བའི་གནས་སུ་གྱུར།

     ཕྱི་ལོ་༢༠༡༩ ལོ་དེར་མཉམ་མེད་ཆོས་ཀྱི་རྒྱལ་པོ་རྗེ་ཙོང་ཁ་པ་ཆེན་པོའི་དྲུག་བརྒྱའི་རྗེས་དྲན་མཛད་སྒོ་གཙོ་བོ་ནི། ལོ་དེའི་ཕྱི་ཟླ་༡༢ ཚེས་༢༡ དགའ་ལྡན་ལྔ་མཆོད་ཆེན་མོའི་ཉིན། སྐུ་མགྲོན་གཙོ་བོ་སྤྱི་ནོར་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་འཛམ་གླིང་ཞི་བདེའི་དེད་དཔོན་ཆེན་པོ་མཆོག་དབུ་བཞུགས་ཐོག འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་གདན་ཟུར་དང་། མཚུངས་མེད་ཤར་བྱང་གི་ཆོས་རྗེ་རྣམ་པ་བཅས་མཉམ་བཞུགས་ཀྱིས། འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་གདན་ས་བྱེས་ཀྱི་དགའ་ལྡན་རྣམ་པར་རྒྱལ་བའི་གླིང་དུ་གོ་སྒྲིག་གནང་བར། འཇམ་མགོན་ཆོས་ཀྱི་རྒྱལ་པོའི་ཐུགས་བསྐྱེད་སྨོན་ལམ་བསམ་གྱིས་མི་ཁྱབ་པའི་མཐུ་སྟོབས་དང་། ༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཐུགས་རྗེའི་བྱིན་རླབས་ཀྱིས། ལོ་རྒྱུས་ཀྱི་རང་བཞིན་ལྡན་པའི་གལ་ཆེའི་མཛད་སྒོ་དེ་སྦྱོར་དངོས་རྗེས་བཅས་ལེགས་གྲུབ་བྱུང་བ་མ་ཟད། མཛད་སྒོའི་ཉིན་དེར་དགའ་ལྡན་བླ་སྤྱིའི་ཡང་ཐོག་ཏུ་༸གོང་ས་ཆེན་པོ་མཆོག་དབུ་བཞུགས་ཐོག་དགའ་ལྡན་ཁྲི་གདན་ཟུར་རྣམ་གཉིས་དང་། མཚུངས་མེད་ཤར་བྱང་གི་ཆོས་རྗེ་རྣམ་གཉིས། དགའ་ལྡན་ཤར་བྱང་གྲ་ཚང་གཉིས་ཀྱི་མཁན་རིན་པོ་ཆེ་རྣམ་གཉིས། སྐྱབས་བཅོལ་བོད་གཞུང་གི་མང་གཙོའི་ཀ་བ་གསུམ་ཀྱི་མཛད་གཙོ་རྣམ་པ། གུས་ཆུང་བདག་དང་། རོགས་སྐྱོར་གནང་མཁན་གྲོགས་པོ་ཇོ་ལགས་ཧོན་རུ་ཨིཛ་དང་། ཨ་ཅག་ཀེ་ཊི་སི་གྷར་ལགས་བཅས་ང་མཚོ་ཉིན་གུང་བཞེས་ལག་ལྷན་དུ་ཞུ་རྒྱུའི་སྐལ་བཟང་ཕུལ་བྱུང་ཐོབ་པ་དང་། ཞལ་ལག་ལྷན་རྒྱས་དེའི་ཐོག་༸གོང་ས་ཆེན་པོ་མཆོག་གིས་དེར་འདུས་བདག་ཅག་ཡོངས་ལ། ད་ལན་ང་ལྷོ་ཕྱོགས་སུ་ཡོང་ཐུབ་པ་དགའ་པོ་བྱུང་བ་མ་ཟད་ཡོང་གོ་ཆོད་སོང་། ཞེས་ཐུགས་ཧ་ཅང་དགྱེས་པའི་བཀའ་སློབ་ཕེབས་པས། གུས་རང་དགའ་དད་གུས་གསུམ་གོང་འཕེལ་ངང་ནས་གུས་པས་དཀའ་ལས་རྒྱབ་པ་གོ་ཆོད་སོང་སྙམ་པ་ཡིད་ལ་ཤར་ནས། རང་གི་མི་ཚེའི་ནང་བརྗེད་ཐབས་མེད་པའི་བྱ་བ་རླབས་ཆེན་ཞིག་ཀྱང་དུས་དེར་གྲུབ་སོང་སྙམ་བཞིན་དུས་རྟག་ཏུ་རྗེས་དྲན་ཞུ་ཡི་ཡོད།

     ཆེས་ཤིན་ཏུ་དཀོན་པའི་མཉམ་མེད་ཆོས་ཀྱི་རྒྱལ་པོ་རྗེ་ཙོང་ཁ་བ་ཆེན་པོའི་དྲུག་བརྒྱའི་རྗེས་དྲན་མཛད་སྒོ་དེ་དང་བསྟུན་ནས་རྗེ་ཙོང་ཁ་པའི་སློབ་ཡོན་ཞིག་འཛུགས་ཐབས་བྱུང་ན། རང་རེ་སྐྱབས་བཅོལ་བོད་མི་ན་གཞོན་མང་པོ་གཞི་རིམ་སློབ་གྲ་ཐོན་ནས་མཐོ་རིམ་སློབ་གྲ་འགྲིམ་བཞིན་ཡོད་ཀྱང་། བོད་ཕྲུག་ན་གཞོན་མང་པོར་མུ་འཐུད་སློབ་སྦྱོང་བྱ་འདུན་ཆེན་པོ་ཡོད་ཀྱང་། སློབ་ཡོན་གྱི་དཀའ་ཚེགས་ཀྱི་དབང་གིས་སློབ་སྦྱོང་རྒྱུན་སྐྱོང་མ་ཐུབ་པ་རྣམས་ལ་ཕན་ཐོགས་འབྱུང་ཆེད་དང་། རང་ཉིད་ཀྱིས་ཀྱང་སྐྱབས་བཅོལ་བོད་མིའི་སྤྱི་ཚོགས་ཀྱི་དྲིན་ལན་དོན་དང་ལྡན་པ་འབྱུང་རྒྱུར་དམིགས་ནས། རོགས་བྱེད་པོ་ལྷག་བསམ་ཅན་ཨ་ཅག་ཀེ་ཊི་སི་གྷར་ལགས་ལ་དམིགས་བསལ་རེ་བཅོལ་གྱིས་ཤེས་རིག་ལས་ཁུངས་ལ་ཨ་སྒོར་ཁྲི་ལྔ་ཕུལ་ནས་ TSONGKHAPA SCHOLARSHIP རྗེ་ཙོང་ཁ་པའི་སློབ་ཡོན་གསར་དུ་བཙུགས། རིམ་གྱིས་ཤེས་རིག་ལྷན་ཁང་གིས་ཀྱང་སློབ་ཡོན་དེ་དག་སློབ་མ་ཚོར་འགྲེམས་འབུལ་འགོ་བཙུགས་པས་གུས་པ་ཧ་ཅང་གི་དགའ་སྤོབས་ཆེན་པོ་བྱུང་།
གུས་པས་དུས་རྟག་ཏུ་རང་ཅག་བོད་མི་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་བླ་ན་མེད་པ་༸གོང་ས་༸སྐྱབས་མགོན་ཆེན་པོ་མཆོག་གིས། གཞན་ཕན་བྱེད་དགོས་པའི་བཀའ་སློབ་ཡང་ཡང་ཕེབས་བཞིན་པ་རྣམས་སྙིང་དབུས་སུ་བཅངས་ཐོག ཨ་རིའི་སྲིད་འཛིན་གྲགས་ཅན་ཇོན་ཨེཕ་ཀེ་ནེ་ཌི་ཡི་བཀའ་སློབ་ཞིག་ཏུ། གཞུང་དང་མི་མང་གིས་ང་ལ་ལྟ་གི་མི་འདུག་རྐྱང་རྐྱང་ལབ་མ་བསྡད་པར། ངས་གཞུང་དང་མི་མང་ལ་ཞབས་འདེགས་ག་རེ་སྒྲུབ་ཐུབ་ཀྱི་འདུག་བསམ་དགོས། ཞེས་གསུང་པ་དེ་མ་བརྗེད་པར་སེམས་ལ་དྲན་ནས་ལག་ལེན་ཡོང་ཐབས་འབད་བརྩོན་ཞུ་བཞིན་ཡོད།

     གོང་ཞུའི་ལས་དོན་གལ་ཆེན་རིན་ཐང་བྲལ་བ་ཀུན་དང་། ལྷག་པར་དུའང་རྗེ་ཙོང་ཁ་པའི་སློབ་ཡོན་གསར་བཙུགས་ཀྱི་ལས་དོན་གལ་ཆེན་འདི་འདྲ་ཞིག་གུས་པས་སྒྲུབ་ཐུབ་པ་དེ་འདི་ཕྱིའི་མགོན་སྐྱབས་ཟླ་མེད་༸རྒྱལ་བ་ཐམས་ཅད་མཁྱེན་པ་ཆེན་པོ་མཆོག་ཐུགས་དགྱེས་པའི་མཆོད་སྤྲིན་དུ་འགྱུར་བ་དང་། མཉམ་མེད་ཆོས་ཀྱི་རྒྱལ་པོ་འཇམ་མགོན་བླ་མ་ཙོང་ཁ་ཆེན་པོ་མཆོག་དང་། བདག་གི་ཆོས་འབྲེལ་དངོས་ཐོབ་ཀྱི་རྩ་བའི་བླ་མ་དམ་པ་རྣམས་ཀྱིས་སྐྱེ་བ་ནས་ཚེ་རབས་ཐམས་ཅད་དུ་གུས་པ་བདག་འབྲལ་མེད་མཉེས་བཞིན་དུ་རྗེས་སུ་འཛིན་པའི་རྒྱུར་གྱུར་ཅིག སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་བསྔོ་སྨོན་ཞུ་བཞིན་དུ་ཨ་རིའི་གྲོང་ཁྱེར་ཆེན་པོ་ནིའུ་ཡོག་ཏུ་བཅའ་སྡོད་དགའ་ལྡན་ཤར་རྩེའི་གྲྭ་ཟུར་གུས་པ་རྡོ་རྗེ་རྒྱལ་མཚན་གྱིས་དགའ་སྤྲོ་དང་གུས་འདུད་དཔག་མེད་བཅས་ཕྱི་ལོ་༢༠༢༡ ཟླ་༡༢ ཚེས་༢༡ ཉིན་ཕུལ།།