ཧོང་ཀོང་གི་རང་དབང་ལྷ་མོའི་སྐུ་བརྙན་མེད་པ་བཟོས། 

ཧོང་ཀོང་གི་གཙུག་ལག་སློབ་གཉེར་ཁང་གཉིས་ཀྱི་ནང་ཡོད་པའི་གནམ་བདེ་སྒོ་མོ་ཆེའི་དྲུག་བཞིའི་དོན་རྐྱེན་ལ་རྗེས་དྲན་གྱི་རང་དབང་ལྷ་མོའི་སྐུ་བརྙན་སོགས་ལ་བསྙད་འདོགས་སྣ་ཚོགས་བྱས་ཏེ་མེད་པ་བཟོས་ཡོད་འདུག

དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གི་བཙན་གནོན་འོག་ཧོང་ཀོང་གི་རང་དབང་དང་དམངས་གཙོའི་སྒྲོམ་གཞི་རྨང་ནས་མེད་པ་བཞིན་ཡོད་པ་ལྟར། ཧོང་ཀོང་གི་རྒྱ་ནག་མཐོ་སློབ་ (The Chinese University of Hong Kong)ཏུ་དྲུག་བཞིའི་དམར་གསོད་དོན་རྐྱེན་ལ་རྗེས་དྲན་གྱི་རང་དབང་ལྷ་མོའི་སྐུ་བརྙན་ཞིག་བཞེངས་ཡོད་པ་དེ་བཀའ་འཁྲོལ་མེད་པའི་སྐུ་བརྙན་ཞེས་བརྗོད་དེ་འཐོར་ཡོད་པ་དང་། ད་དུང་ལིང་ནན་གཙུག་ལག་སློབ་ཆེན་(Lingnan University) ནང་ཡོད་པའི་རང་དབང་ལྷ་མོའི་སྐུ་བརྙན་ཞིག་ཀྱང་མེད་པ་བཟོས་ཡོད་འདུག

ཧོང་ཀོང་གཙུག་ལག་སློབ་ཆེན་དུ་རྒྱ་ནག་གིས་ཕྱི་ལོ་ ༡༩༨༩ ལོར་ཡུལ་མི་ ༡༠༠ ལྷག་དང་དམངས་གཙོ་དོན་གཉེར་བ་ ༡༠༠༠ ཙམ་དམར་གསོད་བཏང་བའི་ཕུང་པོའི་མཚོན་དོན་དུ་བཟོས་པའི་སྐུ་བརྙན་ཞིག་ཡིན་འདུག་ཀྱང་། སློབ་གཉེར་ཁང་དེས་ངོ་ཚ་བའི་ཀ་བ་ (Pillar of Shame) ཞེས་བརྗོད་དེ། ཟླ་འདིའི་ཕྱི་ཚེས་ ༢༢ ཉིན་གྱི་མཚན་མོར་སློབ་གཉེར་ཁང་དུ་འགྲོ་འོང་བཀག་སྟེ། སྐུ་བརྙན་དེ་མཐོ་སློབ་ཀྱི་དཔེ་མཛོད་ཁང་དུ་འཇོག་རྒྱུ་ཡིན་སྐོར་བརྗོད་དེ་འཁུར་ཕྱིན་ཡོད་སྟབས། སྐུ་བརྙན་དེ་བཟོ་མཁན་ཇེན་སི་གྷལ་ས་ཁིའོ་ཊི་(Jens Galschiøt)ཡིས།  རང་དབང་ལྷ་མོའི་སྐུ་བརྙན་དེ་མེད་པར་བཟོས་པ་ཧང་སངས་བྱུང་། ངས་ཁོ་ཚོར་ཕྱིར་སྤྲོད་རོགས་ལབ་ཀྱི་ཡིན། གལ་ཏེ་ཁོ་ཚོས་མ་སྤྲད་པ་ཡིན་ན་ཁྲིམས་གཏུག་བྱ་རྒྱུ་ཡིན། ཁོ་ཚོས་ཧོང་ཀོང་གི་སྒྱུ་རྩལ་བའི་ཅ་དངོས་གཏོར་བཤིག་བཏང་ཡོད་པས་ཁྲིམས་ལ་གཏུག་རྒྱུ་ཡིན་ཞེས་བརྗོད་འདུགཧོང་ཀོང་གཞུང་གིས་ཕྱི་ལོ་ ༢༠༢༠ དང་འདི་ལོ་གཉིས་ཀར་ཏོག་དབྱིབས་གཉན་རིམས་ལ་ཁག་དཀྲིས་ཏེ། འདས་པའི་ལོ་ངོ་ ༣༠ ལྷག་གི་རིང་ཧོང་ཀོང་གི་ཝིག་ཊོ་རི་ཡ་སྤྱི་གླིང་དུ་རྒྱུན་ཆད་མེད་པར་འཚོག་བཞིན་པའི་གནམ་བདེ་སྒོ་མོ་ཆེའི་དྲུག་བཞི་དམར་གསོད་དོན་རྐྱེན་རྗེས་དྲན་གྱི་ཚོགས་འདུ་དེ་ཉིད་འཚོག་མི་ཆོག་པའི་བཀའ་ཁྱབ་བཏང་ཡོད་ནའང་། ཕྱི་ལོ་ ༢༠༢༠ ལོར་མི་མང་སྟོང་ཕྲག་བརྒལ་བ་འདུ་འཛོམས་བྱས་ཡོད་སྟབས། ཧོང་ཀོང་གི་ཉེན་རྟོག་པས་དམངས་གཙོ་དོན་གཉེར་བའི་སྣེ་ཁྲིད་པ་རྣམས་ཀྱིས་ཤེས་བཞིན་དུ་ཆོག་མཆན་མེད་པའི་འདུ་འཛོམས་ནང་མི་མང་ཞུགས་རྒྱུར་སྐུལ་མ་བྱས་པ་དང་། རང་ཉིད་དངོས་སུ་ཞུགས་པའི་ཉེས་མིང་འོག་འདས་ལོའི་ཕྱི་ཟླ་ ༡༠ པའི་ནང་ཧོང་ཀོང་གི་དམངས་གཙོ་དོན་གཉེར་བ་དང་ལས་འགུལ་བ་ ༩ འཛིན་བཟུང་བྱས་ཏེ་ཟླ་བ་ ༦ ནས་ ༡༠ བར་གྱི་བཙོན་འཇུག་ཁྲིམས་ཐག་བཅད་པ་དང་། ཕྱི་ཟླ་ ༡༡ ནང་དམངས་གཙོ་དོན་གཉེར་བ་སྐུ་ཞབས་ཇི་མི་ལའེ་ (Jimmy Lai) ལགས་ལ་ཟླ་བ་ ༡༤ བཙོན་འཇུག་ཁྲིམས་ཐག་བཅད་ཡོད་པ་རེད།

ཧོང་ཀོང་གི་མནའ་འབྲེལ་ཚོགས་པ་ (Hong Kong Alliance in Support of Patriotic Democratic Movements of China) ཞེས་པ་དེ་ནི་ཕྱི་ལོ་ ༡༩༨༩ ལོར་གསར་འཛུགས་བྱས་པ་ཞིག་ཡིན་ཞིང་། འདས་པའི་ལོ་ངོ་ ༣༠ ལྷག་གིི་རིང་དམངས་གཙོ་དོན་གཉེར་བའི་ཚོགས་པ་དེས་ཧོང་ཀོང་གྲོང་ཁྱེར་ནང་ཕྱི་ལོ་ ༡༩༨༩ ལོའི་དམར་གསོད་དོན་རྐྱེན་དང་འབྲེལ་བའི་ལས་འགུལ་འདྲ་མིན་གོ་སྒྲིག་ཞུ་མུས་ཡིན་ནའང་། འདས་ལོར་རྒྱ་ནག་དམར་ཤོག་ཚོགས་པས་མི་མང་འཐུས་མིའི་ཚོགས་ཆེན་ཟེར་བའི་སྟེང་ཧོང་ཀོང་གི་རྒྱལ་ཁབ་བདེ་འཇགས་ཁྲིམས་ཡིག་ཟེར་བ་གཏན་འབེབ་ལག་བསྟར་བྱས་པ་ནས་བཟུང་། ཚོགས་པ་དེ་ཉིད་ཚུད་པའི་ཧོང་ཀོང་གི་དམངས་གཙོ་དོན་གཉེར་བའི་ཚོགས་པ་དང་གསར་འགྱུར་བརྒྱུད་ལམ། མི་སྒེར་བཅས་ཚང་མར་གཞུང་གི་བཀག་སྡོམ་དང་དམ་དྲག་ཤུགས་ཆེན་བྱས་དང་བྱེད་བཞིན་ཡོད་པ་རེད། ད་བར་སྤྱི་དམངས་འགྲོ་བ་མིའི་ཐོབ་ཐང་ཚོགས་པ་ (The Civil Human Rights Front) ཡིས་མཚོན་པའི་ཧོང་ཀོང་གི་དམངས་གཙོ་དོན་གཉེར་བའི་ཚོགས་པ་མི་ཉུང་བ་ཞིག་གཏན་དུ་སྒོ་བརྒྱབ་ཟིན་པ་ལྟར། ཉེ་བའི་ཆར་ཧོང་ཀོང་མནའ་འབྲེལ་ཚོགས་པར་ཡང་ཧོང་ཀོང་གི་སྲིད་གཞུང་དང་རྒྱ་ནག་གི་ཕྱོགས་གཏོགས་ཤོག་ཁག་གིས་གནོན་ཤུགས་ཆེན་པོ་སྤྲད་དེ་སྒོ་བརྒྱག་གི་ཡོད་པའི་གནས་ཚུལ་ཐོན་ཡོད་པ་རེད།

གསར་འགོད་པ། བསྟན་འཛིན་ཕུར་བུ།