རྒྱ་ནག་གཞུང་གིས་རྒྱལ་སྤྱིའི་རྩེད་འགྲན་པ་དག་རྒྱ་ནག་གི་སྒྲིག་ཁྲིམས་དང་འགལ་ཚེ་ཉེས་ཆད་གཅོད་རྒྱུའི་མ་ཟད། ལུས་རྩལ་བ་ཚང་མའི་ཁ་པར་ནང་རྒྱ་ནག་གིས་བཟོས་པའི་མཉེན་ཆས་ཤིག་ཕབ་ལེན་བྱེད་དུ་བཅུག་སྟེ། ཁོ་ཚོའི་འགྲོ་འདུག་སྤྱོད་གསུམ་ལ་ལྟ་རྟོག་ནན་མོ་བྱ་འཆར་ཡོད་པ་རེད།
དེ་རིང་རྒྱལ་སྤྱིའི་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ད་ལྟ་རྒྱལ་སྤྱིའི་རྩེད་འགྲན་པ་མང་པོ་ཞིག་པེ་ཅིན་དུ་འཚོག་འཆར་ཡོད་པའི་དགུན་དུས་ཨོ་ལོམ་ཕིག་རྩེད་འགྲན་སླད་རྒྱ་ནག་ཏུ་འབྱོར་མུས་ཡིན་པ་ལྟར། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། རྒྱ་ནག་གི་ཨོ་ལིམ་ཕིག་རྩེད་འགྲན་སྐབས། རྒྱལ་སྤྱིའི་ལུས་རྩལ་བ་རྣམས་ཀྱིས་འགྲོ་བ་མིའི་ཐོབ་ཐང་གླེང་སློང་བྱེད་པར་ཉེན་ཁ་ཡོད་སྐོར་བརྗོད་པ་དང་བསྟུན། ལུས་རྩལ་བ་དག་གིས་རང་ཉིད་ཀྱི་བདེ་འཇགས་སླད་དུ། རྒྱ་ནག་ནང་ནས་འགྲོ་བ་མིའི་ཐོབ་ཐང་གི་སྐོར་གླེང་སློང་མི་བྱེད་པར་ཕྱིར་བདེ་འཇགས་ངང་རང་རང་གི་རྒྱལ་ཁབ་དུ་འབྱོར་མཚམས། རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་བྱེད་པའི་འབོད་སྐུལ་ཞུས་ཡོད་པ་རེད།
རྒྱལ་སྤྱིའི་ལུས་རྩལ་མཐུན་ཚོགས་ཀྱི་སྤྱི་ཁྱབ་འགན་འཛིན་རོ་བྷི་ཁའོ་ལར་ ( Rob Koehler) ལགས་ཀྱིས། དོན་དངོས་ཐོག་རྒྱ་ནག་ནང་ལུས་རྩལ་བ་རྣམས་ཀྱི་བདེ་འཇགས་བྱེད་པའི་གནས་བབ་མེད་པ་དང་། རྒྱ་ནག་ཁུ་སིམ་སིམ་སྡོད་པ་ནི་ངན་པ་ཁ་མཐུན་བྱེད་ཀྱི་ཡོད་པའི་རྟགས་རེད། དེར་བརྟེན། ང་ཚོར་སེམས་འཚབ་ཡོད་པས། ལུས་རྩལ་བ་རྣམས་ཀྱིས་རྩེད་འགྲན་བྱས་ཏེ་ཕྱིར་རང་རང་གི་ཁྱིམ་དུ་འབྱོར་རྗེས་འགྲོ་བ་མིའི་ཐོབ་ཐང་གི་སྐོར་གླེང་སློང་བྱེད་པའི་ལམ་སྟོན་བྱེད་ཀྱི་ཡོད། ཅེས་བརྗོད་ཡོད་པ་རེད།
གནད་དོན་དེའི་ཐད། ཁ་སང་རྒྱ་ནག་གཞུང་གིས་རྒྱལ་སྤྱིའི་ལུས་རྩལ་བ་རྣམས་ཀྱིས་ཨོ་ལིམ་ཕིག་རྩེད་འགྲན་གྱི་སྙིང་བོ་འམ་ཡང་ན་རྒྱ་ནག་གཞུང་གི་སྒྲིག་ཁྲིམས་དང་འགལ་བ་ཡིན་ན། ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་དེ་སྔ་ནས་རྒྱ་ནག་གཞུང་གིས་ཡུ་གུར་དང་གྲངས་ཉུང་མི་རིགས་ཀྱི་གཞི་རྩའི་ཐོབ་ཐང་སོགས་བཙན་གནོན་བྱེད་མུས་ཡིན་པའི་སྐྱོན་བརྗོད་དང་སྦྲགས། རྒྱལ་སྤྱིའི་ཨོ་ལིམ་ཕིག་རྩེད་འགྲན་གྱི་དབུས་རྒྱུན་ཚོས་རྒྱ་ནག་ནང་འདི་ལོའི་དགུན་ཁའི་ཨོ་རྩལ་འགྲན་ཚོགས་བསྡུ་བསྐོང་བྱེད་པར་ཆོག་མཆན་མི་སྤྲོད་པའི་རེ་སྐུལ་དང་ཞུ་གཏུགས་སོགས་ཀྱི་ལས་འགུལ་རིམ་པ་སྤེལ་ཡོད་པ་རེད།
འགྲོ་བ་མིའི་ཐོབ་ཐང་ལྟ་ཞིབ་ཁང་གི་ཉམས་ཞིབ་པ་ཡ་ཁའེ་( Yaqiu Wang) ལགས་ཀྱིས། རྒྱ་ནག་གི་རྩ་ཁྲིམས་ལ་ཁ་གསལ་མེད་པའི་ཁར། རྒྱ་ནག་གཞུང་གིས་ཁྲིམས་མི་མང་གི་སྨྲ་བརྗོད་རང་དབང་བཀག་སྡོམ་བྱེད་ཐབས་སུ་བེད་སྤྱོད་གཏོང་གི་ཡོད། ཅེས་བརྗོད་ཡོད་པ་དང་། རྒྱ་ནག་གཞུང་གིས་བོད་དང་། ཡུ་གུར། ནང་སོག་སོགས་གྲངས་ཉུང་མི་རིགས་ཀྱི་ཐོབ་ཐང་ལ་སྡུག་རྩུབ་མནར་གཅོད་གཏོང་མུས་ཡིན་པ་ལྟར། ཨ་རི་དང་། ཨོ་གླིང་། ཁེ་ན་ཊ། དབྱིན་ཡུལ། ཉི་ཧོང་། ཌན་མག ཧོ་ལེན་སོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་ཡོད་པའི་སྐྱོན་བརྗོད་ནན་མོ་བྱས་ཏེ། རྒྱལ་ཁབ་དེ་དག་གི་གཞུང་འཛིན་མི་སྣ་རྣམས་ཨོ་ལོམ་ཕིག་ཏུ་མཉམ་ཞུགས་བྱ་རྒྱུ་མིན་པའི་གསལ་བསྒྲགས་བྱས་ཡོད་པ་རེད།
ཡང་རྒྱ་ནག་ཏུ་ཨོ་ལིམ་ཕིག་གི་རྩེད་འགྲན་འཚོག་གྲབས་ཡོད་པའི་སྐབས་འདིར། རྒྱ་ནག་གཞུང་གིས་རྒྱལ་སྤྱིའི་ལུས་རྩལ་བ་རྣམས་ཀྱིས་རྒྱ་གཞུང་ལ་ངོ་རྒོལ་བྱེད་པར་དོགས་ནས། ཨོ་རྩལ་དང་རྒྱ་ནག་གཞུང་གི་ཁྲིམས་སྒྲིག་བཅས་ལ་མ་འདོད་པའི་རྣམ་འགྱུར་བསྟན་ཚེ། ཉེས་ཆད་གཅོད་རྒྱུ་ཡིན་པའི་འཇིགས་སྐུལ་བྱས་ཡོད་པ་མ་ཟད། རྒྱ་ནག་གཞུང་གིས་ལུས་རྩལ་བ་དག་གི་འཕྲོད་བསྟེན་སོགས་ལ་དམིགས་ཁུལ་བྱས་ནས་མཉེན་ཆས་ཤིག་གསར་བཟོ་བྱས་ཏེ། རྒྱལ་སྤྱིའི་ལུས་རྩལ་བ་ཡོངས་ནས་རང་རང་གི་ཁ་པར་ནང་མཉེན་ཆས་དེ་ཕབ་ལེན་དགོས་པའི་གསལ་བསྒྲགས་བྱས་ཡོད་ཀྱང་། ཁེ་ན་ཌའི་ཉམས་ཞིབ་པ་ཚོས་མཉེན་ཆས་དེ་ནི་རྒྱ་ནག་གཞུང་གིས་ལུས་རྩལ་བ་རྣམས་ཀྱི་ཁ་པར་བརྒྱུད་རྒྱ་ནག་ནང་གི་གནས་ཚུལ་ཕྱིར་བསྒྲགས་བྱེད་མིན་ལ་ལྟ་རྟོག་དང་མི་སྒེར་གྱི་འགྲོ་འདུག་སོགས་ལ་ལྟ་ཞིབ་སླད་དུ་ཡིན་སྐོར་བརྗོད་འདུག
ཉེ་ལམ་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་རང་རང་གི་ལུས་རྩལ་བ་རྣམས་ལ་ལམ་སྟོན་བྱས་ཏེ། རྒྱ་ནག་ཏུ་བསྐྱོད་སྐབས་ལུས་རྩལ་བ་མི་སྒེར་གྱི་ཁ་པར་དང་གློག་ཀླད་སོགས་མི་འཁུར་བ་དང་། ཕྱིར་ལོག་སྐབས་རྒྱ་ནག་ཏུ་བེད་སྤྱོད་བྱས་པའི་ཁ་པར་དང་གློག་ཀླད་ཀྱི་གསང་ཚིག་ཡོངས་བརྗེ་དགོས་པ་སོགས་རྒྱའི་གསང་ཉུལ་བའི་རྗེས་འདེད་གཏོང་བར་མཐའ་གཅིག་ཏུ་སྔོན་འགོག་བྱེད་དགོས་པའི་ལམ་སྟོན་གནང་ཡོད་འདུག
གསར་འགོད་པ། དཔལ་ལྡན།
