༧གོང་ས་རྒྱལ་བ་རིན་པོ་ཆེ་མཆོག་གིས་ཝེ་ཏི་ནམ་གྱི་ནང་པའི་བླ་ཆེན་ཐིག་ན་ཊི་ཧན་མཆོག་དགོངས་པ་རྫོགས་པར་ཁོང་གི་རྗེས་འབྲང་བ་ཡོངས་ལ་ཐུགས་གསོའི་གསུང་འཕྲིན་སྩལ།
ཁ་སང་མཚན་གུང་ཝི་ཏི་ནམ་གྱི་ནང་པའི་བླ་ཆེན་ཐིག་ན་ཊི་ཧན་མཆོག་དགོངས་པ་རྫོགས་པར་བརྟེན། ༧གོང་ས་རྒྱལ་བ་རིན་པོ་ཆེ་མཆོག་གིས་བླ་ཆེན་དམ་པ་ཁོང་གི་རྗེས་འབྲང་བ་ཡོངས་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་། ངོས་ཀྱི་བཀུར་འོས་པའི་ཆོས་གྲོགས་དང་གྲོགས་པོ་དམ་པ་ཐིག་ན་ཧན་མཆོག་དགོངས་པ་རྫོགས་པའི་གནས་ཚུལ་ཐོས་པར་ཡིད་སེམས་སྐྱོ་བས་ཁེངས་བྱུང་། ངོས་ནས་འཛམ་གླིང་དང་ཝི་ཏི་ནམ་ནང་གནས་པའི་དམ་པ་ཁོང་གི་རྗེས་འབྲང་བ་ཡོངས་ལ་སེམས་གསོ་ཞུ་ཡི་ཡོད། ཅེས་གསུངས་འདུག
ཡང་གསུང་འཕྲིན་ནང་། སློབ་དཔོན་དམ་པ་ཁོང་གིས་ཝེ་ཏི་ནམ་གྱི་དམག་འཁྲུག་ལ་ཞི་བའི་སྒོ་ནས་ངོ་རྒོལ་གནང་སྟེ། མར་ཊིན་ལུ་ཌིར་ཀིང (Martin Luther King Jr) མཆོག་ལ་རྒྱབ་སྐྱོར་གནང་བ་དང་། དམ་པ་ཁོང་གིས་མི་གཞན་ལ་ནང་སེམས་ཀྱི་ཞི་བདེ་བསྐྲུན་པར་དྲན་པ་ཉེར་བཞག་དང་བྱམས་བརྩེ་ཡིས་ཇི་ལྟར་ཞབས་འདེགས་སྒྲུབ་ཐུབ་ཀྱི་ཡོད་པའི་སྐོར་བརྒྱུད་སྤེལ་གནང་བ་མ་ཟད། མི་སྒེར་སོ་སོ་ནས་ཇི་ལྟར་ནང་སེམས་ཀྱི་ཞི་བདེ་བསྐྲུན་ཐབས་སྐོར་ལམ་སྟོན་གནང་སྟེ། འཛམ་གླིང་ནང་དོན་དམ་གྱི་ཞི་བདེ་ཡོང་བར་ཞབས་འདེགས་ཞུས་ཡོད།
དམ་པ་ཁོང་སྐུ་འཚོ་བཞུགས་རིང་མི་ཚེ་དོན་དང་ལྡན་པ་བསྐྱལ་ཡོད་པས། ང་ཚོས་དམ་པ་ཁོང་ལ་རྗེས་སུ་ཡི་རང་ཞུ་རྒྱུ་ཡག་ཤོས་ནི་འཛམ་གླིང་ཞི་བདེ་གོང་སྤེལ་གྱི་ཁོང་གི་མཛད་པ་མཇུག་སྐྱོང་གནང་རྒྱུ་དེ་ཡིན་པ་ངོས་རང་ལ་བློ་དོགས་མེད། ཅེས་གསུངས་འདུག
ཝི་ཏི་ནམ་གྱི་ནང་པའི་གནས་བརྟན་ཆེན་མོ་ཐིག་ན་ཊི་ཧན་Thich Nhat Hanh མཆོག་ནི། ཕྱི་ལོ ༡༩༢༦ ཟླ་ ༡༠ ཚེས་ ༡༡ ཉིན་ཝི་ཏི་ནམ་གྱི་གྲོང་ཁྱེར་(Hue)ནང་འཁྲུངས་ཤིང་། དམ་པ་ཁོང་ནི་འཛམ་གླིང་ནང་ཡོངས་གྲགས་ངོས་འཛིན་ལྡན་པའི་ནང་པའི་ཆོས་ཕྱོགས་ཀྱི་དབུ་ཁྲིད་ཅིག་དང་། འཛམ་གླིང་ནང་ཞི་བདེ་གོང་སྤེལ་གནང་མཁན་གྱི་ལས་འགུལ་བ་ཞིག་ཀྱང་ཡིན་པ་རེད། ཕྱི་ལོ་ ༡༩༦༠ ནང་དམ་པ་ཁོང་གིས་ཝི་ཏི་ནམ་གྱི་དམག་འཁྲུག་ལ་ཞི་བའི་སྒོ་ནས་ངོ་རྒོལ་གནང་བའི་རྐྱེན་གྱིས། ལོ་མང་རིང་ཧྥ་རན་སིའི་ནང་བཙན་བྱོལ་དུ་བཞུགས་དགོས་བྱུང་། མི་རིགས་ནག་པོའི་སྤྱི་དམངས་ཐོབ་ཐང་རྩོད་ལེན་པ་སྐུ་ཞབས་ Martin Luther King མཆོག་གིས་ཁོང་ནོ་སྦེལ་ཞི་བདེའི་གཟེངས་རྟགས་ཀྱི་འོས་མིར་མཚན་འདོན་གནང་མྱོང་། ཁོང་གིས་འཛམ་གླིང་ཡོངས་ལ་དགོན་སྡེ་ཁག་(Plum village tradition) ཞེས་པའི་འོག་སྒོམ་སྒྲུབ་ཚོགས་པ་འདྲ་མིན་ཆེད་བཙུགས་གནང་ཞིང་ད་བར་ཕྱག་དེབ་༡༠༠ ལྷག་བརྩམས་གནང་ཡོད་འདུག
གསར་འགོད་པ། དཔལ་ལྡན། བསྟན་འཛིན་ཕུར་བུ།
