འདས་པའི་ལོ་ཤས་ནང་རྒྱ་གར་དང་རྒྱ་ནག་དབར་ལ་ས་མཚམས་དང་འབྲེལ་བའི་རྩོད་རྙོག་བསྟུད་མར་བྱུང་ཡོད་ནའང་རྒྱལ་ཁབ་གཉིས་ཀྱི་ཚོང་འབྲེལ་དེ་སྔར་བས་གཞི་རྒྱ་ཆེ་རུ་ཕྱིན་ཏེ་ལོ་རྒྱུས་ནང་ཐེངས་དང་པོར་རྒྱ་གར་གྱིས་རྒྱ་ནག་ནས་ཨ་སྒོར་ཐེར་འབུམ་ ༡༠༠ མ་ཟིན་ཙམ་གྱི་ཚོང་ཟོག་ནང་འདྲེན་དང་ཕྱོགས་གཉིས་ཀྱི་ཚོང་འབྲེལ་རིན་འབབ་ཨ་སྒོར་འཐེར་འབུམ་ ༡༢༥ ལྷག་ཟིན་ཡོད་འདུག
རྒྱ་ནག་གི་སྒོ་ཁྲལ་དོ་དམ་ལས་ཁུངས་ (General Administration of Customs of the PRC) ཀྱི་གྲངས་ཐོ་ལྟར་ན། རྒྱ་ནག་གིས་ཕྱི་ལོ་ ༢༠༢༡ ལོར་རྒྱ་གར་ལ་རིན་འབབ་ཨ་སྒོར་ཐེར་འབུམ་ ༩༧།༥༢ ཙམ་གྱི་ཚོང་ཟོག་ཕྱིན་འདྲེན་བྱས་ཡོད་ཅིང་། ཚོང་ཟོག་ཁྲོད་ནས་ཀྱང་ཁ་པར་་དང་གསོག་འཇོག་བྱ་སའི་འཕྲུལ་ཆས། འབྲེལ་མཐུད་མ་ལག་སོགས་ཀྱིས་མཚོན་པའི་འཕྲུལ་རིག་ཕྱིར་འདྲེན་བྱེད་ཤུགས་ཆེ་རུ་ཕྱིན་ཡོད་པ་དང་། དེ་བཞིན་རྒྱ་གར་གྱི་ཚོང་དོན་དང་བཟོ་གྲྭ་ལྷན་ཁང་གི་ཁྱབ་ཁོངས་ཕྱིའི་ཚོང་འབྲེལ་རྟོག་ཞིབ་ལས་ཁུངས་ (FTPA) ཀྱི་གྲངས་ཐོ་ལྟར་ན། ཕྱི་ལོ་ ༢༠༢༡ ལོའི་ཐོག་མའི་ཟླ་བ་ ༨ ནང་། རྒྱ་ནག་ནས་གཙོ་བོ་རྡོ་སྣུམ་རྗེན་པ་དང་། མུ་ཏིག རྡོ་རྩ་ཆེན། སོ་ལ། སོ་ཕག་བཅས་ནང་འདྲེན་བྱེད་ཤུགས་ཆེ་རུ་ཕྱིན་ཏེ། དངོས་ཟོག་དེ་དག་གཅིག་པུས་ཨ་སྒོར་ཐེར་འབུམ་ ༦༠ ཟིན་ཡོད་འདུག སྤྱི་ཡོངས་ནས་རྒྱ་གར་གྱིས་འདས་ལོའི་ཕྱི་ཟླ་ ༡ པོ་ནས་ ༡༡ དབར་རྒྱ་ནག་ནས་ཅ་དངོས་མི་འདྲ་བ་ ༨༤༥༥ ནང་འདྲེན་བྱས་པའི་ཁྲོད་ནས། ཅ་དངོས་ ༤༥༩༡ ལྷག་ནང་འདྲེན་བྱེད་ཤུགས་མང་དུ་ཕྱིན་ཡོད་སྐོར་འཁོད་འདུག
རྒྱ་གར་དབུས་གཞུང་གི་ཇེ་ཨེན་ཡུ་གཙུག་ལག་སློབ་གྲྭ་ཆེན་མོའི་ (JNU) སློབ་དཔོན་བྷི་སི་ཝ་ཊི་དྷར་གྱིས་བརྗོད་དོན་ལྟར་ན། རྒྱ་དཀར་ནག་དབར་གྱི་འབྲེལ་ལམ་དེ་ཨ་རི་དང་རྒྱ་ནག་དབར་གྱི་འབྲེལ་ལམ་དང་གཅིག་མཚུངས་ཆགས་ཡོད། ཨ་རི་དང་རྒྱ་ནག་དབར་གྱི་ཆབ་སྲིད་འབྲེལ་ལམ་དེ་ཛ་དྲག་ཏུ་གྱུར་ཡོད་ནའང་། ཨ་རིས་འཛམ་གླིང་གི་བཟོ་གྲྭ་ལྟ་བུ་ཡིན་པའི་རྒྱ་ནག་ལ་ཚོང་འབྲེལ་གྱི་ཐོག་ནས་མུ་མཐུད་བརྟེན་བསྡད་ཡོད། དེར་མཚུངས་རྒྱ་གར་གཞུང་གི་ཐབས་བྱུས་མང་པོ་འཐེན་ཡོད་ནའང་། རྒྱ་གར་གྱི་དཔལ་འབྱོར་དེ་སྔར་བཞིན་རྒྱ་ནག་ལ་བརྟེན་ནས་བསྡད་ཡོད་ཅིང་། རིམས་ནད་ཡལ་བའི་རྗེས་སུ་རྒྱ་ནག་ལ་དེ་བས་བརྟེན་རྒྱུ་མང་དུ་འགྲོ་ངེས་ཡིན་སྐོར་བརྗོད་ཡོད་འདུག དེ་བཞིན་རྒྱ་ནག་གི་གཞུང་འབྲེལ་གོ་ལའི་དུས་བབ་སྟེང་དུའང་། ཕྱི་ལོ་ ༢༠༢༡ ལོར་རྒྱ་དཀར་ནག་གི་ཚོང་འབྲེལ་རིན་འབབ་དེ་ཨ་སྒོར་ཐེར་འབུམ་ ༡༢༥ ཟིན་པ་དེས། རྒྱ་གར་གཞུང་གིས་རྒྱ་ནག་གི་ཁྲོམ་ར་ལ་བརྟེན་རྒྱུ་མཚམས་འཇོག་བྱེད་ཐུབ་ཀྱི་མེད་པ་གསལ་སྟོན་བྱས་ཡོད་སྐོར་འཁོད་ཡོད་འདུག
དཔལ་འབྱོར་དབྱེ་ཞིབ་པས་རྒྱ་གར་གྱིས་རྒྱ་ནག་ནས་དངོས་ཟོག་ནང་འདྲེན་ཇེ་མང་ཏུ་གཏོང་བའི་རྒྱུ་མཚན་གཙོ་བོ་ནི། རྒྱ་གར་གྱི་ཁྲོམ་རའི་ནང་རྒྱ་ནག་གི་འཕྲུལ་ཆས་ཀྱིས་མཚོན་པའི་ཚོང་ཟོག་ལ་དོ་སྣང་དང་ཉོ་མཁན་ཇེ་མང་དུ་ཕྱིན་ཡོད་པ་དང་། ཕྱོགས་གཉིས་ནས་རྒྱ་གར་གྱི་བཟོ་སྐྲུན་ཚན་པ་ཡར་རྒྱས་འགྲོ་བཞིན་པའི་རྐྱེན་གྱིས་ཡིན་པར་འགྲེལ་བརྗོད་བྱས་ཡོད་འདུག དེ་ཡང་འདས་པའི་ལོ་ཤས་ནང་རྒྱ་གར་གྱི་འཛམ་གླིང་གི་ཁྲོམ་རའི་ནང་དངོས་ཟོག་ཕྱིར་འདྲེན་བྱེད་རྒྱུ་མང་དུ་བཏང་ཡོད་པའི་རྐྱེན་གྱིས། རྒྱ་གར་ནང་བཟོ་སྐྲུན་ཚན་པ་རྒྱ་བསྐྱེད་ཕྱིན་ཏེ་རྒྱ་ནག་ནས་ཐོན་སྐྱེད་མཁོ་སྒྲུབ་བྱེད་རྒྱུ་མང་དུ་ཕྱིན་ཡོད་པ་རེད་འདུག
རྒྱ་ནག་ནི་རྒྱ་གར་གྱི་ཚོང་ཟོག་མང་ཤོས་ནང་འདྲེན་བྱ་སའི་རྒྱལ་ཁབ་དེ་ཡིན་པ་ལྟར། ཨ་རིའི་རྗེས་སུ་ཕྱིར་འདྲེན་བྱ་སའི་རྒྱལ་ཁབ་ཨང་གཉིས་པ་དེའང་ཡིན་པ་རེད། རྒྱ་གར་གྱིས་ཕྱི་ལོ་ ༢༠༡༩ ལོར་རྒྱ་ནག་ལ་ཚོང་ཟོག་ཨ་སྒོར་ཐེར་འབུམ་ ༡༧།༡ དང་། ཕྱི་ལོ་ ༢༠༢༠ ལོར་ཨ་སྒོར་ཐེར་འབུམ་ ༡༩ ཕྱིན་འདྲེན་བྱས་ཡོད་ཅིང་། འདས་ལོར་ཨ་སྒོར་ཁྱོན་ཐེར་འབུམ་ ༢༤ ཕྱིར་འདྲེན་བྱེད་ཐུབ་ཡོད་འདུག ཕྱི་ལོ་ ༢༠༡༩ བར་ལོ་གསུམ་བསྟུད་མར་རྒྱ་གར་དང་རྒྱ་ནག་དབར་གྱི་ཚོང་འབྲེལ་བར་ཐག་ཇེ་རིང་དུ་ཕྱིན་ཡོད་ནའང་། འདས་པའི་ལོ་གཉིས་ནང་བསྐྱར་དུ་འབྲེལ་ལམ་ཤུགས་ཆེ་རུ་ཕྱིན་པའི་རྐྱེན་གྱིས་སྔར་བཞིན་རྒྱ་ནག་གི་ཁྲོམ་རར་བརྟེན་ཤུགས་ཆེ་རུ་ཕྱིན་ཡོད་པ་རེད།
གསར་འགོད་པ། པ་སངས་ཚེ་རིང་།
