ཤིན་ཅང་གི་དམར་ཤོག་ཚོགས་པའི་མགོ་ཁྲིད་གཞོན་པ་ཟུར་པ་རེན་ཧཱ་ཡིས་ལས་ཀའི་སྟབས་བདེ་སྤྱད་ནས་ཁྲིམས་འགལ་ངང་མི་གཞན་གྱི་རྒྱུ་ནོར་བླངས་བར་བརྟེན་ལོ་བཅུ་བཞི་ཡི་བཙོན་འཇུག་ཁྲིམས་ཐག་བཅད་ཡོད་འདུག
རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༢༥ ཉིན། ཅང་སུའུ་ཞིང་ཆེན་སུའུ་ཀྲོའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས། ཤིན་ཅང་མི་རིགས་རང་སྐྱོང་ལྗོངས་མི་དམངས་སྲིད་གཞུང་གི་མགོ་ཁྲིད་གཞོན་པ་ཟུར་པ་རེན་ཧྭ་ཡིས་རྒྱ་སྒོར་ཁྲི་ ༤༧༡༥ ལྷག་གི་ལྐོག་རྔན་བླངས་བར་བརྟེན། ཁོ་མོར་ལོ་ ༡༤ ཡི་བཙོན་འཇུག་ཁྲིམས་ཆད་དང་རྒྱ་སྒོར་ཁྲི་བཞི་བརྒྱ་ཡི་དངུལ་ཆད་བཅས་བཅད་ཡོད་སྐོར་བསྒྲགས་འདུག་ལ། ཁྲིམས་རར་རེན་ཧཱ་ཡིས་རང་གི་ཉེས་ཆད་དང་ལེན་བྱས་ཡོད་པ་མ་ཟད། གོང་རིམ་ཁྲིམས་ཁང་ལ་ཞུ་གཏུག་མི་བྱེད་པའི་ཁས་ལེན་བྱས་འདུག
རྒྱ་ནག་དམར་ཤོག་ཚོགས་པའི་ལྐོག་ཟ་རུལ་སུངས་སྒྲིག་ཁྲིམས་ཞིབ་དཔྱོད་ལས་ཁུངས་ཀྱིས་ཞིབ་བཤེར་བྱས་ཏེ་ཡོངས་བསྒྲགས་བྱས་པའི་གནས་ཚུལ་ལྟར་ན། རེན་ཧཱ་ཟེར་བའི་དམར་ཤོག་མགོ་ཁྲིད་དེས། ཕྱི་ལོ་ ༢༠༠༧ ནས་ ༢༠༢༠ ལོའི་བར། ཤིན་ཅང་མི་རིགས་རང་སྐྱོང་ལྗོངས་ཀྱི་སློབ་གསོའི་ཏང་ཡོན་མགོ་ཁྲིད་རྒན་གཞོན་གཅིག་ལྕོགས་དང་། ཤིན་ཅང་རང་སྐྱོང་ལྗོངས་ཀྱི་རྒྱལ་ས་ཨོ་རམ་ཆིའི་ (Urumchi) ཏང་ཡོན་རྒྱུན་ལས་དང་དྲིལ་བསྒྲགས་འགན་འཛིན། ཤིན་ཅང་གི་དམར་ཤོག་མགོ་ཁྲིད་གཞོན་པ་སོགས་ཀྱི་ལས་འགན་འཁུར་རིང་། དབང་ཆ་ལོག་སྤྱོད་ཀྱིས་མི་སྒེར་ལ་དངུལ་ཁང་གི་བུན་ལོན་གཏོང་བ་དང་ཨར་ལས་འཛུགས་སྐྲུན་གྱི་འགན་ལེན་པ། ཚོང་དོན་གཉེར་བ་སོགས་ཀྱི་ཐད་རམ་འདེགས་བྱས་ཏེ། མི་གཞན་གྱིས་སྤྲད་པའི་རྒྱུ་ནོར་རྒྱ་སྒོར་ཁྱོན་ཁྲི་ ༤༧༡༥ ལྷག་བླངས་ཡོད་པར་ངོས་འཛིན་བྱས་ཡོད་པ་དང་། སུའུ་ཀྲོའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས་རེན་ཧཱ་ཡིས་བླངས་པའི་རྒྱུ་དངོས་དང་དེ་དག་ལས་སྐྱེད་འཕེལ་བྱུང་བའི་རིགས་ཕྱིར་སློག་ཏུ་བཅུག་ནས་རྒྱལ་ཁབ་ཀྱི་མཛོད་ཁང་ལ་རྩིས་སྤྲད་ཡོད་ལུགས་བསྒྲགས་འདུག
རྒྱ་ནག་གཞུང་ཕྱོགས་ཀྱི་གནས་ཚུལ་ནང་། རེན་ཧྭ་ནི་རྒྱལ་ཁབ་ཀྱི་ལས་དོན་མི་སྣ་ཞིག་ཡིན་པའི་ཆ་ནས། ལས་གནས་ཐོག་གི་སྟབས་བདེར་བརྟེན་ནས་མི་གཞན་ལ་ཁེ་ཕན་དོན་གཉེར་དང་ཁྲིམས་འགལ་ངང་མི་གཞན་གྱི་རྒྱུ་ནོར་བླངས་པས། དེའི་བྱ་སྤྱོད་ཀྱིས་ལྐོག་རྔན་ལེན་པའི་ཉེས་པ་བསགས་པ་ངོས་འཛིན་བྱས་ཡོད། རེན་ཧྭ་ཡིས་ལྐོག་རྔན་ཟ་ལེན་བྱས་པའི་གྲངས་འབོར་ཧ་ཅང་ཆེ་ཞིང་། ཁོང་གིས་གྱོད་གཞི་ཐོན་རྗེས་རང་ཉིད་ཀྱི་ནག་ཉེས་ཇི་བཞིན་ངོས་ལེན་ཞུས་པ་དང་། རང་འགུལ་ངང་གྱོད་གཞི་ཐག་གཅོད་ལས་ཁུངས་ཀྱི་ལག་ཏུ་འབྱོར་མེད་པའི་རྒྱུ་རྔན་ལྐོག་ཟའི་ནག་ཉེས་ཁག་གཅིག་ཡར་སྤྲད་པ་དང་། ནག་ཉེས་ངོས་ལེན་བྱས་པ། བརྐུས་ནོར་ཕྱིར་སློག་པ་བཅས་བྱས་ཡོད་སྟབས། ཁྲིམས་ཀྱིས་གཏན་འབེབས་དང་གནས་ཚུལ་ལ་གཞིགས་ནས་ཁྲིམས་ཆད་ཡང་མོ་བཅད་ཆོག་གི་ཡོད་ཀྱང་། ད་ལྟ་གནས་སྐབས་རིང་ཁྲིམས་ཁང་གིས་ཁྲིམས་དཔྱད་མཚམས་འཇོག་བྱས་ཡོད་སྐོར་སོགས་ཀྱང་བརྗོད་འདུག
རྒྱ་ནག་གི་སྲིད་འཛིན་ཞི་ཅིན་ཕིན་གྱི་སྲིད་དབང་འོག་སྟག་དང་སྦྲང་མ་ཟེར་ནས་དམར་ཤོག་ཚོགས་པའི་གནས་རིམ་མི་འདྲ་བའི་ལས་བྱེད་མང་པོ་ཞིག་ལ་ལྐོག་ཟ་རུལ་སུངས་ཀྱི་ཉེས་འཛུགས་འོག་ཁྲིམས་ཆད་གཅོད་ཀྱིན་ཡོད་པ་ལྟར། ཕྱི་ལོ་ ༡༩༦༤ ལོར་ཧྲན་ཏུའོ་ཞིང་ཆེན་དུ་སྐྱེས་པའི་རེན་ཧཱ་ལ་ཕྱི་ལོ་ ༢༠༢༠ ཟླ་ ༦ ཚེས་ ༡ ཉིན་ནས་བཟུང་རྒྱ་ནག་དབུས་སྒྲིག་ཁྲིམས་ཞིབ་དཔྱོད་ལས་ཁུངས་ཀྱིས་ཞིབ་འཇུག་བྱ་མགོ་བརྩམས་ཤིང་། ཕྱི་ལོ་ ༢༠༢༠ ལོར་རྒྱ་ནག་དབུས་སྒྲིག་ཁྲིམས་ཞིབ་དཔྱོད་ལས་ཁུངས་ཀྱིས་ཞིབ་བཤེར་བྱས་པའི་ཤིན་ཅང་གི་གནས་རིམ་མཐོ་བའི་དམར་ཤོག་མགོ་ཁྲིད་ཐོག་མ་དང་རྒྱ་ནག་རྒྱལ་ཡོངས་ཀྱི་དམར་ཤོག་མགོ་ཁྲིད་ཨང་རིམ་ལྔ་པ། དེ་བཞིན། ཞི་ཅིན་ཕིན་གྱིས་སྲིད་དབང་བཟུང་བ་ནས་ད་བར་ལྐོག་ཟ་རུལ་སུངས་ཀྱི་ཁྲིམས་ཆད་ཕོག་ཅིང་བློན་ཆེན་རིམ་པའི་གོ་གནས་ལྡན་པའི་བུད་མེད་དམར་ཤོག་ལས་བྱེད་ཨང་ལྔ་པ་བཅས་ཆགས་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
