རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ལྕམ་མི་ཤལ་བྷ་ཆི་ལེ་ཊི་ལགས་ཡུ་གུར་ནང་ཕེབས་འཆར་ཡོད་པའི་གནས་ཚུལ་ཐོན་ཡོད་ཀྱང་རྒྱ་ནག་གཞུང་གི་མགྲིན་ཚབ་པས་དེ་ནི་གྲོགས་འདྲིས་ཀྱི་རྣམ་པའི་ཐོག་ནས་ཕེབས་རྒྱུ་ལས་རྟོག་ཞིབ་ཀྱི་ཆེད་དུ་མིན་སྐོར་འགྲེལ་བརྗོད་བྱས་འདུག
7th United Nations High Commissioner for Human Rights
ཁ་སང་ཕྱི་ཚེས་ ༢༧ ཉིན་རྒྱ་ནག་ལྷོ་བརྒྱུད་ཞོགས་པའི་ཆ་འཕྲིན་ནང་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ལྕམ་མི་ཤལ་བྷ་ཆི་ལེ་ཊི་ (Michelle Bachelet) ལགས་འདི་ལོའི་ཕྱི་ཟླ་ ༢ ཚེས་ ༤ ནས་ ༢༠ བར་པེ་ཅིན་དུ་འཚོག་རྒྱུ་ཡིན་པའི་དགུན་དུས་ཨོ་ལིམ་པིག་རྩེད་འགྲན་མཇུག་བསྒྲིལ་རྗེས། ཡུ་གུར་ས་ཡ་ ༡ ལྷག་འཛིན་བཟུང་བཀག་སྐྱིལ་བྱས་ཡོད་པའི་ཤིན་ཅང་ས་ཁུལ་དུ་ཕེབས་རྒྱུའི་ཆོག་མཆན་སྤྲད་འདུག་ཀྱང་། སྐོར་སྐྱོད་དེ་ཉིད་གྲོགས་འདྲིས་ཀྱི་རྣམ་པའི་ཐོག་ནས་མ་གཏོགས་ཞིབ་འཇུག་གི་རྣམ་པར་འགྲེལ་བརྗོད་བྱ་མི་ཆོག་སྐོར་གྱི་ཆ་རྐྱེན་བཞག་ཡོད་འདུག
གནས་ཚུལ་དེར་རྒྱུས་མངའ་ཡོད་པའི་འབྲེལ་ཡོད་མི་སྣ་ཞིག་གིས་རྒྱ་ནག་ལྷོ་བརྒྱུད་ཞོགས་པའི་ཆ་འཕྲིན་ལ། ཉེ་ཆར་རྒྱ་ནག་གཞུང་དང་ལྕམ་བྷ་ཆི་ལེ་ཊི། རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨེན་ཊོ་ནིའོ་གུ་ཊེ་རེ་སི་ (Antonio Guterres) བཅས་གསུམ་བར་གྲོས་མོལ་བྱུང་སྟེ། རྒྱ་ནག་གཞུང་ངོས་ནས་ཨོ་ལིམ་པིག་མཇུལ་བསྒྲིལ་རྗེས་ཀྱི་ལོ་ཕྱེད་དང་པོའི་ནང་ལྕམ་བྷ་ཆི་ལེ་ཊི་ལགས་ཤིན་ཅང་དུ་སྣེ་ལེན་ཞུ་རྒྱུ་དང་ལེན་བྱས་ཡོད་འདུག འོན་ཀྱང་རྒྱ་ནག་གཞུང་གིས་གཞི་རྩའི་ཆ་རྐྱེན་དུ། མང་པོས་རེ་སྒུག་བྱེད་བཞིན་པའི་རྒྱལ་ཚོགས་ཀྱིས་འདོན་འཆར་ཡོད་པའི་ཤིན་ཅང་ནང་གི་གནས་སྟངས་སྐོར་གྱི་སྙན་ཐོ་དེ་ཉིད་ཨོ་ལིམ་པིག་མཇུལ་མ་བསྒྲིལ་བར་དུ་ཕྱིར་བཤོལ་དགོས་སྐོར་བཤད་ཡོད་འདུག ཅེས་བརྗོད་ཡོད་འདུག རྒྱལ་སྤྱིའི་འགྲོ་བ་མིའི་ཚོགས་སྡེ་ཁག་གིས་མཉམ་འབྲེལ་རྒྱལ་ཚོགས་ངོས་ནས་ཤིན་ཅང་གི་སྙན་ཐོ་དེ་ཉིད་གང་མགྱོགས་འགྲེམ་སྤེལ་དགོས་པའི་སྐུལ་འདེད་མང་པོ་བཏང་ཡོད་ནའང་། ད་བར་འགོར་འགྱངས་སོང་སྟེ་འདོན་ཐུབ་མེད་པ་རེད།
རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་པ་ (Chinese Human Rights Defenders) ཞེས་པའི་གཞུང་འབྲེལ་མ་ཡིན་པའི་ཚོགས་པ་ཞིག་གིས། ལྕམ་བྷ་ཆི་ལེ་ཊི་ཡི་སྐོར་སྐྱོད་དེ་ནི་རྒྱ་ནག་གཞུང་གིས་རྒྱལ་ཚོགས་ཀྱི་ཤིན་ཅང་སྐོར་གྱི་སྙན་ཐོ་དེ་འགོག་ཐབས་ཀྱི་ཇུས་ངན་ཞིག་ཡིན་སྐོར་དང་། རྒྱལ་ཚོགས་ངོས་ནས་གང་མགྱོགས་སྙན་ཐོ་དེ་འདོན་དགོས་པའི་རེ་སྐུལ་ཞུས་ཡོད་འདུག དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཁང་ (Human Rights Watch) གི་རྒྱ་ནག་ཚན་པའི་འགན་འཛིན་སོ་ཧྥི་རི་ཆར་ཌི་སོན་ (Sophie Richardson) ལགས་ཀྱིས། མི་སུ་འདྲ་ཞིག་ཡིན་རུང་། ལྷག་པར་དུ་འཛམ་གླིང་གི་འགྲོ་བ་མིའི་ཐོབ་ཐང་གི་སྣེ་ཁྲིད་སྐུ་ཚབ་རྣམ་པ། རྒྱ་ནག་གཞུང་གིས་ཡུ་གུར་གཙོས་པའི་ཊར་ཀིའི་མི་སྡེ་གཞན་རྣམས་ལ་འགྲོ་བ་མིའི་ཐོབ་ཐང་ལས་བརྒལ་བའི་དྲག་གནོན་བྱེད་བཞིན་པའི་དངོས་ཡོད་གནས་སྟངས་ལ་གཡོལ་ཐབས་ཀྱི་ངན་ཇུས་དེར་ནམ་ཡང་མགོ་འཁོར་རྒྱུ་མེད། ཅེས་བརྗོད་ཡོད་འདུག
Uyghurs have staged protests in London urging the government to accuse China of genocide. PA Media
དེ་བཞིན་ཨ་རིའི་ཝ་ཤིང་ཊོན་ཆ་འཕྲིན་གྱི་དེ་འབྲེལ་གནས་ཚུལ་ནང་། ཁ་སང་རྒྱལ་ཚོགས་ཀྱི་གསར་འགོད་གསལ་བསྒྲགས་སྟེང་ལྕམ་བྷ་ཆི་ལེ་ཊི་ཡི་མགྲིན་ཚབ་པ་རུ་པེཊ་ཀོལ་ཝིལ་ (Ruppert Colville) གྱིས། རྒྱ་ནག་དང་རྒྱལ་ཚོགས་དབར་སྐོར་སྐྱོད་དེའི་ཐད་གྲོས་མོལ་བྱེད་མུས་ཡིན་ཡང་། ད་ལྟའི་སྐོར་སྐྱོད་ཀྱི་ཞིབ་ཕྲའི་སྐོར་ནས་ད་དུང་ཡང་གྲོས་བསྡུར་སོགས་གང་ཡང་བྱས་མེད་སྐོར་འགྲེལ་བརྗོད་བྱས་འདུག དེ་བཞིན་ཁ་སང་རྒྱུན་ལྡན་གསར་འགོད་གསལ་བསྒྲགས་སྟེང་གསར་འགོད་པའི་དྲི་བར་ལན་འདེབས་སྐབས། རྒྱ་ནག་གི་ཕྱི་འབྲེལ་མགྲིན་ཚབ་པ་ཀྲའོ་ལི་ཅན་(Zhao Lijian) ཟེར་བ་དེས་ཀྱང་། རྒྱ་ནག་ངོས་ནས་ལྕམ་བྷ་ཆི་ལེ་ཊི་ལ་སྔོན་མ་ནས་མགྲོན་ཤོག་བཏང་ཡོད་སྐོར་དང་། གཟིགས་སྐོར་དེ་ཕན་ཚུན་དབར་བརྗེ་ལེན་དང་མཉམ་ལས་ཡོང་བའི་ཆེད་དུ་ཡིན་པ་ལས་རྟོག་ཞིབ་ཆེད་དུ་མིན་སྐོར་འགྲེལ་བརྗོད་བྱས་ཡོད་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག དེ་བཞིན་ཨ་རིས་སྣེ་ཁྲིད་པའི་འཛམ་གླིང་དམངས་གཙོའི་རྒྱལ་ཁབ་མི་ཉུང་བས། རྒྱ་ནག་གཞུང་གིས་ཤིན་ཅང་དུ་འབོད་པའི་ཤར་ཊུར་ཀི་སི་ཐན་ནང་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་ས་ཡ་ ༡ ལས་མང་བ་འཛིན་བཟུང་བཙན་འཁྲིད་ཀྱིས་བཀག་སྐྱིལ་ཁང་དུ་བཅུག་ཡོད་པར་ངོས་འཛིན་བྱས་ཡོད་ཅིང་། ཐོག་མའི་ཆར་རྒྱ་ནག་གཞུང་གིས་གནས་ཚུལ་དེ་བདེན་པ་མིན་པ་ཤུགས་ཆེར་བསྒྲགས་ཡོད་ནའང་། རིམ་པས་ཡུ་གུར་བྲོས་བྱོལ་བ་རྣམས་ཀྱི་དངོས་མྱོང་ལོ་རྒྱུས་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་སོགས་ཀྱིས་ཞིབ་འཇུག་སྙན་ཐོ་ཕོན་ཆེན་ཐོན་པའི་རྐྱེན་གྱིས། རྒྱ་ནག་གཞུང་གིས་ཤིན་ཅང་ཁུལ་དུ་ཆོས་ལུགས་ཀྱི་ཐལ་ཆ་རིང་ལུགས་ལ་འགོག་རྒོལ་བྱེད་ཀྱི་ཡོད་པ་དང་། བཀག་སྐྱིལ་ཁང་དེ་དག་ནི་ལག་རྩལ་སློབ་སའི་སྦྱོང་བརྡར་ཁང་ཡིན་སྐོར་རྫུན་སྒྲོག་བྱས་ཡོད་པ་རེད། འོན་ཀྱང་འདས་པའི་ལོ་ཤས་ནང་རྒྱལ་སྤྱིའི་བརྒྱུད་ལམ་དང་ཞིབ་འཇུག་ཁང་སོགས་ཀྱིས། རྒྱ་ནག་གཞུང་གིས་ཤིན་ཅང་ཁུལ་དུ་མི་རིགས་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད་སྐོར་གྱི་སྙན་ཐོ་བཏོན་ཡོད་པ་རེད།
འགྲོ་བ་མིའི་ཐོབ་ཐང་ལྷན་ཚོགས་ངོས་ནས་ཕྱི་ལོ་ ༢༠༡༨ ཟླ་ ༩ པ་ནས་རྒྱ་ནག་དང་གྲོལ་མོལ་བྱས་ཏེ་ཤིན་ཅང་ཁུལ་དུ་བསྐྱོད་ཐུབ་རྒྱུའི་འབད་བརྩོན་བྱས་ཡོད་ཅིང་། འདས་ལོའི་ཕྱི་ཟླ་ ༦ པའི་ནང་ལྕམ་བྷ་ཆི་ལེ་ཊི་ཡིས་ཡོངས་ཁྱབ་ཐོག་ནས་རང་ཉིད་ཤིན་ཅང་དུ་བསྐྱོད་རྒྱུའི་འདུན་པ་ཡོད་པའི་གཏམ་བཤད་ཅིག་སྤེལ་ཡོད་པ་རེད། དེ་ཡང་འདས་ལོའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུའི་སྟེང་ཁོང་མོས། ངས་མུ་མཐུད་རྒྱ་ནག་གཞུང་གི་མགོ་འཁྲིད་རྣམས་དང་ལྷན་དུ་རྒྱ་ནག་དང་། ལྷག་པར་དུ་ཤིན་ཅང་ཡུ་གུར་རང་སྐྱོང་ཁུལ་དུ་བསྐྱོད་རྒྱུར་གྲོས་མོལ་བྱེད་ཀྱི་ཡོད། ངའི་རེ་བ་ལ་ད་ལྟ་འགྲོ་བ་མིའི་ཐོབ་ཐང་རྡོག་རོལ་གྱི་གནས་ཚུལ་ཚབས་ཆེ་ཐོན་བཞིན་པར་བརྟེན། འདི་ལོར་གྲོས་མོལ་ལམ་ལྷོངས་ཡོང་རྒྱུའི་རེ་བ་ཞུ་ཡི་ཡོད། ཅེས་བརྗོད་ཡོད་པ་རེད།
གསར་འགོད་པ། པ་སངས་ཚེ་རིང་།
