བོད་ཀྱི་འགྲེམས་སྟོན་ཁང་དངོས་སུ་དབུ་འབྱེད་གནང་།

བོད་ཀྱི་རིག་གཞུང་ཚན་པ་དང་། བོད་ཀྱི་ལོ་རྒྱུས་ཚན་པ། ༧གོང་ས་མཆོག་གི་ཚན་པ། བཙན་འཛུལ་ཚན་པ། འགོག་རྒོལ་ཚན་པ། བྲོས་བྱོལ་ཚན་པ། བཙན་བྱོལ་ཚན་པ། དེང་རབས་བོད་ཀྱི་ཚན་པ། ཁོར་ཡུག་ཚན་པ། བོད་མི་ཞིག་ཡིན་པ་ཞེས་པའི་ཚན་པ་ཆེན་པོ་བཅུ་ལས་གྲུབ་པའི་བོད་ཀྱི་འགྲེམས་སྟོན་ཁང་གསར་པ་དབུ་འབྱེད་གནང་།

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་གངས་ཅན་སྐྱིད་གཤོངས་ཀྱི་བོད་ཐོག་ཁང་ཆེན་མོའི་བོད་ཀྱི་འགྲེམས་སྟོན་ཁང་གསར་རྒྱག་གི་ལས་གཞི་ལེགས་གྲུབ་ཟིན་པ་དབུ་འབྱེད་གནང་བ་དང་འབྲེལ་ཁོང་གིས།  བོད་ཀྱི་འགྲེམས་སྟོན་ཁང་གི་གཞུང་འབྲེལ་དབུ་འབྱེད་དེ་སྲིད་སྐྱོང་ཟུར་པ་བློ་བཟང་སེང་གེ་ལགས་ཀྱིས་གནང་གྲུབ་ཟིན་པ་ཞིག་རེད། རྩ་བའི་ཆ་ནས་ཕྱོགས་སྒྲིག་བྱ་རྒྱུས་མཆོན་པའི་ལས་དོན་མང་ཆེ་བ་ཞིག་ཕྱི་ཟླ་ ༥ ནས་ཟིན་པ་རེད། ད་ལན་འགྲེམས་སྟོན་ཁང་གི་ལས་བྱེད་ངོས་ནས་བཀའ་ཤག་སྐབས་སྔ་མ་དང་ད་ལྟ་གཉིས་ཀ་ལ་ཐུགས་རྗེ་ཆེ་ཞུས་སོང་སྟེ། དྲང་པོ་བཤད་ན་བཀའ་ཤག་སྐབས་ ༡༦ པའི་ངོས་ནས་འདིའི་སྒང་ལ་དམིགས་བསལ་སྣོན་མ་བརྒྱབ་རྒྱུའི་བསམ་བློ་ཞེ་དྲགས་བཏང་མེད། གང་ཡིན་ཟེར་ན། ལས་རིམ་འདི་ ༢༠༡༧ ནས་མགོ་བཙུགས་ནས་ལོ་བཞི་ཙམ་འགྲོ་ཡི་ཡོད་སྟབས། ལས་རིམ་བང་བསྒྲིགས་བཞག་པ་དེར་འགྱུར་བ་བཏང་ན་ཏག་ཏག་ཅིག་འགྲིག་གི་མ་རེད་བསམ་པ་རེད་ལ། འདི་སྒོ་འབྱེད་རྒྱུའི་དུས་ལ་བབས་ཡོད་པ་རེད། ད་ལན་སྒོ་འབྱེད་རྒྱུའི་དུས་ཚོད་བསླེབས་པ་ཙམ་ལས། ལས་དོན་མང་ཆེ་བ་ཞིག་བཀའ་ཤག་སྐབས་སྔ་མའི་ལམ་སྟོན་དང་བཀོད་བྱུས་འོག་ནས་གྲུབ་པ་ཞིག་རེད། ཅེས་གསུངས་སོང་།

སྲིད་སྐྱོང་མཆོག་གིས་གསར་འགོད་པར། སྤྱིར་འགྲེམས་སྟོན་ཁང་གི་ཆེད་དུ་ལས་ཁུངས་ཀྱི་ཐོག་བརྩེགས་གཅིག་བཞག་ཡོད་པ་རེད། དེར་བརྟེན་དངོས་འབྲེལ་བྱས་ན་ཅ་ལག་མང་པོ་འཇོག་ཐུབ་པ་ཞིག་དགོས་པ་རེད། དེ་ནས་ཕོ་བྲང་གི་རྒྱབ་ལོགས་ལ་འགྲེམས་སྟོང་ཁང་གསར་པ་ཞིག་རྒྱག་གི་ཡོད་པ་དང་། དེའི་ནང་༧རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་ཕོ་བྲང་གི་ཡིག་ཚགས། དེ་བཞིན་༧རྒྱལ་བ་རིན་པོ་མཆོག་གིས་ཕྱག་རྟགས་བཞེས་པ་དང་ཁོང་གི་ཕྱག་དེབ་སོགས་ཆ་ཚང་བ་ཞིག་འགྲེམས་སྟོན་བྱ་རྒྱུ་ཡིན་པར་བརྟེན། ད་ལན་གྱི་འགྲེམས་སྟོན་ཁང་གསར་པ་འདིའི་ནང་ལྡབ་སྐྱོར་མི་དགོས་པར་མང་ཆེ་བ་ཆབ་སྲིད་ཀྱི་གནས་སྟངས་སྐོར་རེད། ཅེས་དང་། བཀའ་ཤག་སྐབས་སྔ་མའི་ཐོག་མའི་འཆར་གཞི་གཞིར་བཟུང་འགྲེམས་སྟོན་ཁང་གསར་པ་དེའི་ཆེད་དུ་དངུལ་གྲོན་མང་པོ་བཏང་བ་ལྟར། མ་འོངས་པར་ད་ཡོད་མཐུན་རྐྱེན་ཐོག་ཡང་བསྐྱར་མཐུན་རྐྱེན་གསར་སྐྲུན་གྱིས་ཡར་རྒྱས་གཏོང་ཐབས་གནང་རྒྱུ་ཡིན་སྐོར་དང་། བཞུགས་སྒར་ཕོ་བྲང་གི་གཙུག་ལག་ཁང་ཉེ་འཁྲིས་སུ་ཡོད་པའི་བོད་ཀྱི་འགྲེམས་སྟོན་ཁང་རྙིང་པ་དེ་རྦད་དེ་སྒོ་བརྒྱབ་རྒྱུ་ཡིན་སྐོར་གསུངས་སོང་།

བོད་ཀྱི་འགྲེམས་སྟོན་ཁང་གི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་འགྲེལ་བརྗོད་གནང་བ་ལྟར་ན། ད་ལན་མི་མང་ལ་དངོས་སུ་སྒོ་འབྱེད་བྱས་པའི་བོད་མིའི་སྒྲིག་འཛུགས་ཀྱི་འགྲེམས་སྟོན་ཁང་འདིའི་ནང་བོད་དང་འབྲེལ་བའི་ཅ་དངོས་དང་འདྲ་པར། ཡིག་ཆ། བོད་མི་སྒེར་པ་རྣམས་ཀྱི་ལོ་རྒྱུས་བཅས་ལ་གཞི་བཞག་སྟེ། བོད་ཀྱི་ཉེ་རབས་ལོ་རྒྱུས་དང་བཙན་བྱོལ་ནང་གི་ལོ་རྒྱུས་གསལ་སྟོན་བྱས་ཡོད་པ་དང་། འགྲེམས་སྟོན་ཁང་འདིའི་ནང་སྤྱི་ཡོངས་ནས་བོད་ཀྱི་རིག་གཞུང་ཚན་པ་དང་། བོད་ཀྱི་ལོ་རྒྱུས་ཚན་པ། ༧གོང་ས་མཆོག་གི་ཚན་པ། བཙན་འཛུལ་ཚན་པ། འགོག་རྒོལ་ཚན་པ། བྲོས་བྱོལ་ཚན་པ། བཙན་བྱོལ་ཚན་པ། དེང་རབས་བོད་ཀྱི་ཚན་པ། ཁོར་ཡུག་ཚན་པ། བོད་མི་ཞིག་ཡིན་པ་ཞེས་པའི་ཚན་པ་ཆེན་པོ་བཅུ་ལས་གྲུབ་པ་ཞིག་ཡིན་འདུག

གསར་འགོད་པ། པ་སངས་ཚེ་རིང་།