བཙོན་མགུར་ཁག་ཅིག་གི་བྱུང་རིམ།
– མང་ར་བ་གདུགས་དཀར་འབུམ།
༡ བསྟན་འཛིན་རྒྱ་མཚོ་མི་མངོན་དབྱིངས་ན་བཞུགས།། ཡི་གེ་དྲུག་མའི་སྙིང་བོ་སྙིང་ན་བཞུགས།།
ཐུགས་རྗེ་དམ་ཚིག་མཐུ་ཡིས་བྱིན་རླབས་ཀྱིས།། གདུགས་དཀར་འབུམ་ང་བདེ་བའི་ཁམས་སུ་དྲངས།།
ཞེས་པའི་ཤོ་ལོ་ཀ་འདི་ནི་ཕྱི་ལོ ༡༩༩༥ ལོའི་ཕྱི་ཟླ་ ༩ པའི་ཟླ་སྨད་ཙམ་ལ་བོད་ནང་དུ་རྒྱ་ནག་གིས་ལུས་པ་ཐེངས་གཉིས་པར་བཙོན་འཇུག་བྱས་པའི་སྐབས་སུ། བཙོན་ཁང་དུ་ང་རང་ཁེར་རྐྱང་དུ་བཙོན་འཇུག་བྱས་ཡོད་པའི་སྐབས་ཀྱི་ཉིན་ཞིག་གི་ཐོ་རེངས་ཀྱི་དུས་སུ་གུས་པའི་བཙོན་ཁང་གི་སྒོའི་གོང་ཐད་ནས་༧གོང་ས་མཆོག་གིས་ཕྲུག་གཟན་ཞིག་མནབས་ཏེ་ཞལ་འཛུམ་གྱི་ལེར་གུས་པར་གཟིགས་པའི་རྨི་ལམ་གྱི་སྣང་བ་ཞིག་བྱུང་བར། དགའ་དད་སྤྲོ་གསུམ་ངང་གཉིད་ལས་སད་པ་དང་ཀོ་ལོ་ཀ་འདི་ཡིད་ལ་ཐོལ་བྱུང་དུ་འཁོར་བྱུང་། རང༌ཉིད་བཙོན་འཇུག་བྱས་པ་ནི་བོད་སྦྱི་བའི་དོན་དང་མཐའ་གཅིག་ཏུ་༧རྒྱལ་བ་ཡབ་སྲས་ཀྱི་ཉམས་ལེན་གྱི་རྗེས་སུ་འཇུག་པའི་བྱ་བཞག་ཆེན་པོ་ཞིག་ཡིན་པས། རང་ཉིད་བོད་མི་ཞིག་ཡིན་པའི་ཆ་ནས་བཙོན་འཇུག་བྱས་པར་སེམས་ལ་དཀའ་ངལ་དང་དངངས་སྐྲག་ཅི་ཡང་མ་སྐྱེས་ཤིང་། དེ་ལས་ལྡོག་སྟེ་སྤོབས་པ་དང་གཟི་བརྗིད་ཀྱིས་རང་འཁྲིའི་ལས་འགན་བཟློག་མེད་ཅིག་ཏུ་བརྩིས་པ་ལ་བརྟེན་ནས་བཙོན་ཁང་དུའང་༧སྐྱབས་མགོན་རིན་པོ་ཆེ་མཆོག་གི་གསེར་ཞལ་མཇལ་རྒྱུ་བྱུང་བ་ནི་བླ་མའི་རྣལ་འབྱོར་ལྟ་བུར་ཡང་མཐོང་གི་འདུག དེར་བརྟེན། དུས་རྒྱུན་དུ་ཤོ་ལོ་ཀ་འདི་རང་གི་སྨོན་ལམ་སོགས་ཀྱི་སྐབས་སུའང་ཡིད་ལ་དྲན་པར་བྱས་ཏེ་ྋསྐུ་མདུན་ལ་གསོལ་འདེབས་བྱས་པ་ཡིན་ལ། འདིར་བརྗེད་ཐོའི་ཚུལ་དུ་ཤོ་ལོ་ཀ་འདིའི་བྱུང་རིམ་འདི་བཀོད་པ་ལགས།
༢ བདེན་གྱི་སྙེ་མའི་འབྲས་བུ་ཐུར་དུ་དཔྱངས།། རྫུན་གྱི་སྙེ་མའི་འབྲས་བུ་སྐད་ཅིག་ཡལ།།
བདེན་འབྲས་བཙས་མ་བརྔ་ལ་བྲེལ་བའི་དུས།། བདེན་པའི་བཅུད་ཀྱིས་ང་ཡི་ཡི་ག་དགག།
རྫུན་གྱི་སྙེ་མའི་འབྲས་བུ་ཐུར་དུ་དཔྱངས།། བདེན་པའི་སྙེ་མའི་འབྲས་བུ་སྐད་ཅིག་ཡལ།།
རྫུན་འབྲས་བཙས་མ་བརྔ་ལ་བྲེལ་བའི་དུས།། རྫུན་པའི་བཅུད་ཀྱིས་ང་ཡི་དང་བ་འདྲེན།།
སྤྱི་བཞག་སྲིད་པ་ལས་ཀྱི་ཕང་བ་རུ།། བདེན་རྫུན་ཟས་ཀྱི་ཉིང་བཅུད་རིལ་བུ་འདི།།
དཀར་ནག་ལས་ཀྱིས་ཟ་ལ་རྔམ་པའི་དུས།། བདེན་ཤེད་ཅན་ཉིད་འཚོ་བཅུད་དྭངས་མར་འགྱུར།།
ཞེས་པའི་ཤོ་ལོ་ཀ་གསུམ་པོ་འདི་ནི་གུས་པ་ཐེངས་དང་པོར་བཙོན་འཇུག་གི་སྐབས་སྟེ་ཕྱི་ལོ་ ༡༩༩༤ ལོའི་ཕྱི་ཟླ་ལྔ་པའི་ཟླ་སྟོད་ལ་མདོ་སྨད་ཟི་ལིང་གྲོང་ཁྱེར་དུ་གུས་པར་འདྲི་རྩད་བྱེད་མཁན་གྱི་བདེ་སྲུང་མི་སྣ་ཁག་སྟེ། བོད་རང་སྐྱོང་ལྗོངས་ཀྱི་བདེ་སྲུང་ལས་ཁུངས་ཀྱི་འགན་འཛིན་གཞོན་པ་དང་། བདེ་ཆེན་བོད་རིགས་རང་སྐྱོང་ཁུལ་གྱི་བདེ་སྲུང་ལས་ཁུངས་ཀྱི་འགན་འཛིན། དཀར་མཛེས་བོད་རིགས་རང་སྐྱོང་ཁུལ་གྱི་བདེ་སྲུང་ལས་ཁུངས་ཀྱི་འགན་འཛིན། གཞི་རྩེ་ས་ཁུལ་གྱི་བདེ་སྲུང་ལས་ཁུངས་ཀྱི་འགན་འཛིན། མཚོ་སྔོན་ཞིང་ཆེན་བདེ་སྲུང་ལས་ཁུངས་ཀྱི་འགན་འཛིན་རྒྱ་མི་ཞིག་དང་གྲོ་ཚང་བ་རུས་ལཱི་ཅན་ཞིག་དང་། མཚོ་སྔོན་ཞིང་ཆེན་བདེ་སྲུང་ལས་ཁུངས་དང་རྨ་ལྷོ་བོད་རིགས་རང་སྐྱོང་ཁུལ་བདེ་སྲུང་ལས་ཁུངས་གཉིས་སུ་ལས་ཀ་གཉེར་བཞིན་པའི་བོད་རིགས་ཆོས་དར་ཞེས་པ་ཞིག་དང་། མཚོ་ལྷོ་བོད་རིགས་རང་སྐྱོང་ཁུལ་གྱི་བདེ་སྲུང་ལས་ཁུངས་དང་སྤྱི་བདེ་ལུས་ཁུངས་གཉིས་ཀྱི་འགན་འཛིན་གཅིག་ལྕོགས་བོད་རིགས་ཤིག་དང་། རྒྱ་ནག་དབུས་གཞུང་བདེ་སྲུང་ལྷན་ཁང་གི་ཕྱི་འབྲེལ་ཚན་པའི་འགན་འཛིན་རྒྱ་རིགས་ཤིག་དང་དེའི་ལག་རོགས་ཤིག་དང༌། གཞན་ཡང་ལས་ཁུངས་མ་ངེས་པའི་བདེ་སྲུང་གི་ལས་བྱེད་མི་སྣ་ཞིག་སྟེ་རྒྱ་དབྱིན་གཉིས་ཀར་མཁས་པའི་བུད་མེད་དར་མ་ཞིག་བཅས་བདེ་སྲུང་མི་སྣ་བཅུ་གཅིག་གིས་ཉིན་ལྔའི་རིང་། མཚམས་རེར་གླེང་མོལ་གྱི་ཚུལ་དང༌། མཚམས་རེར་འདྲི་རྟོག མཚམས་རེར་རྩུབ་པོའི་སྒོ་ནས དང་། མཚམས་རེར་འཇམ་པོའི་ངང་ནས་གུས་པ་རྒྱ་གར་དུ་བྲོས་པའི་སྔ་ཕྱིའི་བརྒྱུད་རིམ་དང༌། རྒྱ་གར་དུ་འགྲོ་དགོས་དོན། བོད་དོན་དང་འབྲེལ་བའི་ཚོགས་པ་ཡོད་མེད། རྒྱ་གར་དུ་སླེབས་རྗེས་ལས་ཀ་ཅི་བྱས་དང་། རྒྱ་གར་དུ་བསྡད་པའི་རིང་ལ་མཐོང་ཐོས་མྱོང་གསུམ་ཅི་བྱུང་དང་། བཙན་བྱོལ་བོད་གཞུང་གི་སྐོར་དང༌། དེ་དང་འབྲེལ་བ་ཡོད་མེད། ཕྱིར་བོད་ལ་ཡོང་དགོས་དོན་ཅི་ཡིན་དང་། བཙན་བྱོལ་བོད་གཞུང་གིས་ཆེད་མངགས་ཡིན་མིན་གྱི་ཐད་ལ་ཐབས་ལམ་སྣ་ཚོགས་སྤྱད་དེ་འདྲི་རྩད་བྱས་ཤིང་། ཁྱད་པར་དུ་རྒྱ་ནག་དབུས་གཞུང་ནས་ཡོང་བའི་མི་སྣ་གཉིས་དང་། མཚོ་སྔོན་ཞིང་ཆེན་བདེ་སྲུང་ལས་ཁུངས་ཀྱི་རྒྱ་རིགས་དཔོན་པོ་དེ་དང་། གཞི་རྩེ་ས་ཁུལ་གྱི་བདེ་སྲུང་འགན་འཛིན་བོད་རིགས་ཤིག་བཅས་མི་སྣ་བཞིས་རྣམ་འགྱུར་རྩུབ་མོའི་སྒོ་ནས་གུས་པར་རྒྱ་གར་དུ་མ་བྲོས་པའི་སྔོན་ནས་བོད་དོན་དང་འབྲེལ་བའི་ཚོགས་པ་ཡོད་པ་དང་། རྒྱ་གར་ལ་བོད་དོན་འབྲེལ་མཐུད་ཀྱི་ཆེད་དུ་སོང་བ་ཡིན་པ་དང་། ཕྱིར་བོད་ལ་ཡོང་དོན་ཡང་བཙན་བྱོལ་གཞུང་གིས་ཆེད་མངགས་ཡིན་ཚུལ་དང༌། ལས་འགན་དང་དམིགས་ཡུལ་ངེས་ཅན་ཡོད་པར་ཤེས་མདོག་གིས་ཐག་བཅད་དེ་འདྲི་རྩད་ནན་མོ་བྱས་པ་དང༌། ལས་ཁུངས་མ་ངེས་པའི་བུད་མེད་དར་མ་དེ་ནི་གུས་པའི་དབྱིན་ཇིའི་སྐད་ཡིག་གཉིས་ཀྱི་ཤེས་ཚད་ལ་རྟོག་ཞིབ་བྱེད་མཁན་རེད་འདུག
འདྲི་རྩད་ཀྱི་བརྒྱུད་རིམ་ཁྲོད་དུ་རྒྱལ་སྤྱིའི་གནས་ཚུལ་དང་འབྲེལ་ཏེ་རྒྱ་ནག་གིས་བོད་ཀྱི་རིག་གཞུང་འཛིན་སྐྱོང་བྱས་ཡོད་ཚུལ་དང་། བོད་ལ་བདེ་སྐྱིད་བསྐྲུན་ཡོད་ཚུལ་སོགས་ཀྱི་གླེང་མོལ་དང་འབྲེལ་ནས་གུས་པའི་བསམ་ཚུལ་ཁག་ཅིག་སྟེ། གུས་པས་མཐའ་གཅིག་ཏུ་རྒྱ་ནག་བོད་ལ་སླེབས་རྗེས་བོད་ཀྱི་སྐད་དང་ཡི་གེ རིག་གཞུང་། ཡུལ་སྲོལ་གོམས་གཤིས། ཆོས་ལུགས་དང་རིག་གཞུང་གི་དུས་ཆེན་ཁག་བཅས་རྩ་མེད་བཟོས་ཤིང་། དཔེར་ན། དུས་ཆེན་ཁག་ལྟ་བུར་མཚོན་ན། བོད་རང་གི་ལོ་རྒྱུས་རྒྱུན་རིང་ལྡན་པའི་ཡུལ་དུས་དང་འཚམ་པའི་ལོ་སར་དུས་ཆེན་དང༌། ནང་ཆོས་དང་འབྲེལ་བའི་ཆོ་འཕྲུལ་སྨོན་ལམ་ཆེན་མོ་དང་། བཞི་བའི་བཅོ་ལྔ། དྲུག་པའི་ཆོས་འཁོར། དགུ་བའི་ལྷ་བབས་དུས་ཆེན་དང༌། ལོ་རྒྱུས་རིང་བའི་དྲུག་པའི་དབྱར་སྐྱིད་ལ་སོགས་པ་མེད་པར་བཟོས་ཏེ་ལོ་ངོ་སུམ་བཅུ་བཞི་བཅུ་ལྷག་གི་ལོ་རྒྱུས་ལས་མེད་པའི་དམར་པོའི་ལྟ་གྲུབ་དང་འབྲེལ་ནས་བྱུང་བའི་ལྔ་གཅིག་རྒྱལ་གཅེས་ངལ་རྩོལ་དུས་ཆེན་ཟེར་བ་དང་། དྲུག་གཅིག་བྱིས་པའི་དུས་ཆེན། བདུན་གཅིག་ཏང་གི་དུས་ཆེན། བརྒྱད་གཅིག་དམག་གི་དུས་ཆེན། བཅུ་བའི་ཚེས་གཅིག་རྒྱལ་སྟོན་དུས་ཆེན་ཟེར་བ་བཅས་བོད་མི་ཡོངས་ལ་རྒྱུས་མངའ་སྤུ་ཙམ་ཡང་མེད་པའི་དུས་ཆེན་ལྔ་བོ་འདི་བརྩི་སྲུང་བྱེད་དགོས་བྱུང་བ་ལྟ་བུ་ལ་སོགས་པ་ཁོང་ཚོའི་འདོད་ཚུལ་དང་རྒྱབ་འགལ་དུ་གྱུར་པས། འདྲི་རྩད་ཀྱི་ཉིན་བཞི་བར་རྒྱ་རིགས་དམག་མི་ལོ་གཞོན་བརྒྱད་འཁྲིད་ཡོང་སྟེ་སྡེ་ཚན་གཉིས་སུ་བྱས་ནས། སྔ་དྲོའི་ཆར་འདྲི་རྟོག་བྱས་ཤིང་། ཉིན་རྒྱབ་ནས་བཟུང་རྐང་ལག་ལ་ལྕགས་སྒྲོག་བརྒྱབ་སྟེ་ལུས་སྟེང་དུ་གློག་བཙུགས་ནས་གཅར་བརྡུང་ཚད་མེད་བྱས་པ་དང༌། མཚན་མོར་ལྕགས་སྒམ་ཟུར་གསུམ་ཞིག་ཏུ་བཅུག་པ་དང་། དེར་གློག་བཏང་སྟེ་ཡ་ང་བའི་མནར་གཅོད་མྱང་དུ་བཅུག ཕྱི་ཉིན་གྱི་སྔ་དྲོར་ཡང་འདྲི་རྟོག་བྱས་ཤིང་། བསམ་བློ་འགྱུར་ལྡོག་ཏིལ་འབྲུ་ཙམ་ཡང་བྱུང་མི་འདུག་ཅེས་སྨྲས་ཏེ་ཡང་བསྐྱར་དམག་མི་བཞི་ཡོང་སྟེ་བདག་གི་གཟུགས་པོ་སྒོ་རྒྱབ་ལ་གཏད་དེ་ལུས་སྟེང་དུ་གློག་བཙུགས་ནས་བརྒྱལ་དུ་བཅུག བརྒྱལ་ལས་སངས་རྗེས་དམག་མི་དེ་ཚོས་ང་རང་ཡར་བཀྱགས་ན་ཡང་གཟུགས་པོ་རང་ཚུགས་མ་ཐུབ་པར་རྒྱ་ནག་དབུས་གཞུང་གི་བདེ་སྲུང་དཔོན་པོ་དེའི་མདུན་དུ་འགྱེལ་ཡང་། བདག་གི་མགོ་བོ་ཁོ་ལ་གཏད་དེ། ང་རང་མདེའུ་གཅིག་གིས་ད་ལྟ་རང་སོད་ཅིག་ཅེས་བཤད་པ་ན། རང་སྐྱོང་ལྗོངས་ཀྱི་བོད་རིགས་བདེ་སྲུང་ལས་བྱེད་དེ་རྒྱུགས་ཡོང་སྟེ། བུ། དེ་འདྲ་མ་གནང་། ཡར་བཞེངས་ཤོག ཡར་བཞེངས་ཤོག་ཅེས་སྨྲ་ཞོར་དུ་བདག་གི་དཔུང་མགོ་གཉིས་ནས་བཟུང་སྟེ་ཡར་ལངས་ཏུ་བཅུག་པ་དང་། མཚམས་དེར་རྒྱ་མི་དཔོན་པོ་དེས་ཁོ་ལ་ལྕགས་ཞྭ་སྐོན་ཅིག་ཅེས་བརྗོད་པ་ན། རང་སྐྱོང་ལྗོངས་ཀྱི་བོད་རིགས་བདེ་སྲུང་འགན་འཛིན་དེས་རྒྱ་མི་དེ་ལོགས་ཤིག་ཏུ་འཁྲིད་སོང་ལ། ཅུང་ཙམ་འགོར་རྗེས་ཕྱིར་ཡོང་སྟེ་གཅར་བརྡུང་མཚམས་འཇོག་བྱས་པ་དང༌། ལྕགས་ཞྭ་ཟེར་བ་ཡང་སྐྱོན་མ་སོང་། ཁོང་ནི་ལར་ཞེན་ཅན་ཞིག་རེད།
གོང་གསལ་གྱི་ཤོ་ལོ་ཀ་གསུམ་པོ་འདི་ནི་སྐབས་དེར་ཉིན་ལྔའི་རིང་མནར་གཅོད་དྲག་པོ་མྱངས་པའི་གནས་སྟངས་འོག་ཐོལ་བྱུང་དུ་ཡིད་ལ་འཁོར་བ་ཞིག་ཡིན་ཞིང་། ཤོ་ལོ་ཀ་དང་བོ་ནི། བོད་ཀྱི་བདེན་དོན་འཐབ་རྩོད་བྱས་ན་ང་ཡི་ཡི་ག་དགག་ནས་རང་ཉིད་ལ་འཚོ་ལམ་མེད་པར་འགྱུར་བ་དང༌། ཤོ་ལོ་ཀ་གཉིས་པ་ནི། ངས་བོད་ཀྱི་བདེན་དོན་བསྐྱུར་ནས་རྒྱ་ནག་གི་སྐྱག་རྫུན་གྱི་རྗེས་སུ་འབྲངས་ན་ང་ཡི་དང་བ་འདྲེན་པ་སྟེ། ང་ལ་འཚོ་ལམ་ཡོད་པ་བདག་གིས་མཐོང་བྱུང་མོད། བོད་དོན་གྱི་བདེན་པ་བརྡར་བཞིན་པའི་རྒྱ་བོད་ཀྱི་འཐབ་རྩོད་འདིའི་ཁྲོད་ནས། གུས་པའི་གདམས་ཀ་ནི་མཐའ་གཅིག་ཏུ་བོད་དོན་གྱི་བདེན་པ་མཐའ་སྐྱེལ་རྒྱུ་དེ་ཡིན་ལ། དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་སྤྱིའི་སྟེང་བོད་ཀྱི་བདེན་དོན་ནི་ལྕགས་ཀྱི་རིལ་བུ་ཞིག་ཡིན་ལ། རྒྱ་ནག་གིས་དེ་ཉིད་ཧམ་ཟོས་བྱས་ན་ཡང་ནམ་ཞིག་གི་ཚེ་བདེན་པའི་ལྕགས་རིལ་དེ་ཉིད་གཅིག་བྱས་ན་རྒྱ་ནག་གི་ཁ་ནས་ཡར་སྐྱུགས་ཏེ་བོད་ཀྱི་བདེན་མཐའ་སེལ་དགོས་ལ། དེ་ལྟར་མིན་ཚེ་མར་བཤལ་ཏེ་བོད་ཀྱི་བདེན་མཐའ་སེལ་དགོས་པ་ལས་འོས་མེད་པ་རེད་ཅེས་པའི་བཀའ་སློབ་དང༌། དེ་བཞིན་དུ་ཀུན་གཟིགས་པཎ་ཆེན་རིན་པོ་ཆེ་མཆོག་གིས། ཁྱེད་ཀྱིས་རྒྱ་སྐད་བཤད་ཀྱང་ཆོག རྒྱ་བཟས་ཟས་ཀྱང་ཆོག རྒྱ་ལྭ་གྱོན་ཡང་ཆོག་མོད། འོན་ཀྱང་ཁྱེད་རང་བོད་པ་ཡིན་པས། ཁྱེད་ཀྱི་ཤ་ཁྲག་རུས་གསུམ་ཇི་ལྟར་བྱེད་རྒྱུ་ཡིན་ཞེས་པའི་བོད་མི་མི་རེའི་ངོ་རེར་ཁྱབ་པའི་བཀའ་སློབ་བཅས་ཀྱི་དགོངས་དོན་སྙིང་ལ་བཅིངས་ནས་རྒྱ་ནག་གིས་རང་ཉིད་ལ་མནར་གཅོད་བྱས་ཏེ་སྲོག་ལ་བབས་ཀྱང་རང་ཚུགས་མི་འདོར་ཞེས་ཤོ་ལོ་ཀ་གསུམ་པས་བདེན་ཤེད་ཅན་ཉིད་འཚོ་བཅུད་དྭངས་མར་འགྱུར་ཞེས་རང་གིས་རང་ལ་སྐུལ་ལྕག་དང་འབྲེལ་རང་སྲོག་བློས་བཏང་གིས་བདེན་པ་མཐའ་སྐྱེལ་རྒྱུ་ཡིན་པའི་དམ་བཅས་པའོ།།
༣ གཅིག་གཅིག་གནད་ཀྱི་མདུད་པ་མ་བཀྲོལ་ན།། གཉིས་གཉིས་དོན་གྱི་སྣེ་མོ་མི་ཟིན་པས།།
གསུམ་གསུམ་བདེན་རྫུན་བར་ནས་དབྱེ་བ་ཀུན།། བཞི་བཞི་གྲུ་བཞི་མ་བོ་ཇི་ལྟར་འབྱུང་།།
དེའི་ཕྱིར་སྲིད་འདིའི་དམ་པའི་སྐྱེ་བུ་ཀུན།། འཐུས་ཚང་བློ་ཡི་འཆར་སྒོ་འཚོལ་བ་ལ།།
བཙོན་ཁང་མ་ལགས་བཙུན་པའི་མཁར་ནང་དུ།། འཛུལ་ལ་གཅིག་རྗེས་གཅིག་གིས་མ་སྙེགས་སམ།།
ཞེས་པའི་ཤོ་ལོ་ཀ་འདི་གཉིས་ནི་ཕྱི་ལོ་ ༡༩༩༥ ལོའི་ཕྱི་ཟླ་དགུ་པར་གུས་པ་ཐེངས་གཉིས་པར་འཛིན་བཟུང་བཙོན་འཇུག་སྐབས་ཡིད་ལ་འཁོར་བ་ཞིག་ཡིན་པ་དང་། སྤྱིར་འཇིག་རྟེན་གྱི་ལས་དང་བྱ་བ་གང་ཞིག་ཡིན་ཀྱང་། དེའི་སྔ་ཕྱི་བར་གསུམ་གྱི་རྣམ་འགྱུར་ལ་དཔྱད་པ་དཔྱིས་ཕྱིན་པ་གཏོང་དགོས་ཤིང་། ཁྱད་པར་དུ་བོད་ཀྱི་བདེན་པའི་འཐབ་རྩོད་ནི་བོད་མི་ཞིག་ཡིན་ཕྱིན་བོད་ཀྱི་བདེན་དོན་གྱི་སྔ་ཕྱིར་བར་གསུམ་དང་། ཆོས་སྲིད་རིག་གསུམ་གྱི་འཕྲལ་ཕུགས་ཀྱི་དགོས་དམིགས་རྟོགས་པར་བྱས་ཏེ། དེ་ལ་རྒྱུ་མཚན་ལྟར་སྣང་ཙམ་མ་ཡིན་པར་ཡང་དག་པའི་ངོས་ཟིན་ཐོབ་པའི་སྒོ་ནས་བདེན་མཐའ་སེལ་དགོས་ཀྱི་ཡོད་པ་ནི་ཤོ་ལོ་ཀ་དང་པོ་དང་། བོད་ཀྱི་བདེན་དོན་ཆེད་རང་སྲོག་བློས་བཏང་བ་དང་། བཙོན་འཇུག་གིས་མནར་གཅོད་མྱོང་བ་སོགས་བྱུང་ཟིན་པ་དང་། འབྱུང་བཞིན་པ་དང༌། འབྱུང་འགྱུར་གྱི་སྐྱེ་བུ་དམ་པ་དེ་དག་ཡ་ང་བག་ཚ་ཅི་ཡང་མེད་པར་བཙོན་ཁང་མ་ལགས་བཙུན་པའི་མཁར་ནང་དུ་འཛུལ་བ་ལ་ཟམ་མ་ཆད་པར་གཅིག་རྗེས་གཅིག་གིས་སྙེགས་ཡོད་ན་ང་རང་དེ་དག་གི་རྗེས་སུ་ཅིའི་ཕྱིར་མི་འབྲངས་ཞེས་བདེན་དོན་འཐབ་རྩོད་ལ་སྤྲོ་བ་དང་བཅས་ཏེ་ཞུགས་པ་ནི་ཤོ་ལོ་ཀ་གཉིས་པའི་དོན་ཡིན། བོད་དོན་འཐབ་རྩོད་ནི་བོད་ཀྱི་རྒྱལ་ཁབ་སླར་གསོ་ཙམ་མ་ཡིན་པར། རྒྱལ་སྤྱིའི་སྤྱི་ཚོགས་ལ་སྨན་པའི་བོད་ཀྱི་ཆོས་དང་རིག་གཞུང་དང་འབྲེལ་བའི་ཡུལ་སྲོལ་གོམས་གཤིས་སོགས་ཀྱི་ཆེད་དུ་ཡིན་ན། རྒྱལ་ཁབ་ཙམ་སླར་གསོ་བྱེད་པའི་ཆེད་དང་མི་འདྲ་ཞིང་ཞི་བདེའི་བསྟི་གནས་སུ་བསྒྱུར་དགོས་པའི་སྐོར་གྱི་༧རྒྱལ་བ་པཎ་ཆེན་རྣམ་གཉིས་ཀྱི་བཀའ་སློབ་ཀྱི་དགོངས་དོན་ཉམས་སུ་ལེན་པ་ལ་ལྷག་པར་སྤྲོ་བ་བསྐྱེད་པའོ།།
༤ དགེ་འདུན་ཆོས་འཕེལ་མཱ་ཁེ་སི་དང་འདྲ།། བསྟན་འཛིན་རྒྱ་མཚོ་མ་ཧཱ་གན་ཌིར་མཉམ།།
མཱན་ཌ་ལ་དང་དྲི་མེད་ཀུན་ལྡན་མཚུངས།། ལོ་ངོ་དུ་མར་བཙོན་ནས་བདེན་པ་བརྡར།།
ལུས་ཀྱི་ཆ་དང་བློ་ཡི་འཆར་བགོས་ཐད།། ང་ཚོའི་གནད་ཀྱི་འཁུར་འདེགས་མི་འདྲ་ཡང་།།
བདེན་དོན་བདེན་པ་བརྡར་ལ་གནས་འདི་རུ།། འགྲིམས་པའི་གནས་བབ་གཅིག་ལས་གཅིག་ལྷག་ཡིན།།
སེམས་ཀྱི་རྟ་བོ་ལུས་ཀྱི་ཕུར་ནག་གིས།། མ་ཟིན་ཕྱོགས་མེད་འགྲིམས་པའི་རྨིག་རྗེས་ཏེ།
བོད་དོན་བདེན་པ་བརྡར་བའི་བང་རྒྱུགས་ལ།། མ་ཐོབ་བར་དུ་ཟད་པའི་མཐའ་མ་མཆིས།།
ཞེས་པའི་ཤོ་ལོ་ཀ་གསུམ་པོ་འདི་ནི་ཕྱི་ལོ་ ༡༩༩༤ ལོར་གུས་པ་འཛིན་བཟུང་བཙོན་འཇུག་ཐེངས་དང་བོའི་སྐབས་ཡིད་ལ་འཁོར་བ་ཡིན་ལ། ཤོ་ལོ་ཀ་དང་བོ་ནི་རང་ཉིད་བཙོན་འཇུག་བྱས་པ་འདི་ཡང་སྐྱེ་བུ་དམ་པ་གང་མང་ཞིག་གིས་བདེན་དོན་གྱི་ཆེད་དུ་གནས་དུས་དང་བྱ་བྱེད་སོགས་རྣམ་པ་མི་འདྲ་བའི་སྒོ་ནས་བདེན་དོན་བརྩོན་ལེན་གནང་བཞིན་ཡོད་པ་དང༌། ཤོ་ལོ་ཀ་གཉིས་པས་ངོས་ཟིན་དེ་ནི་རང་ཉིད་གཅིག་པུ་མ་ཡིན་པར་དེ་སྔར་འཇིག་རྟེན་འདིར་བདེན་དོན་རྩོད་མཁན་རྣམས་དང་། ཡང་སྒོས་བོད་ཀྱི་བདེན་དོན་འཐབ་རྩོད་བྱེད་མི་རྣམས་ཀྱི་རང་རང་གི་ཕྲག་ཏུ་བབས་ཡོད་པའི་འཆར་གཞི་ལྟར་གྱི་ལས་བགོས་མི་འདྲ་ཡང་། སྐབས་བབ་ནི་བོད་ཀྱི་བདེན་དོན་ཆེད་བཙོན་འཇུག་བྱས་པའི་སྐྱེ་བུ་ཐམས་ཅད་ཀྱི་སྙིང་སྟོབས་ནི་གཅིག་ལས་གཅིག་ལྷག་པ་ཡིན་པ་དང་། ཤོ་ལོ་ཀ་གསུམ་པས་རྒྱ་ནག་གིས་བོད་མི་རྣམས་བཙོན་འཇུག་དང་མནར་གཅོད། དྲག་ལས་ཅི་འདྲ་ཞིག་སྤྱད་ཀྱང་བོད་ཀྱི་བདེན་དོན་འཐབ་རྩོད་བྱེད་མཁན་གྱི་སྐྱེ་བུ་མཐའ་དག་གི་བཞེད་དོན་འགོག་མི་ནུས་པ་དང་། ནམ་ཞིག་བོད་ལ་བདེན་དོན་མ་ཐོབ་ཀྱི་བར་དུ་བདེན་པའི་ལས་ཀ་འདི་མཚམས་འཇོག་བྱེད་མི་སྲིད་པ་ནི་ཤོག་བུས་མེ་མི་འཐུམ་ཞེས་པའི་༧གོང་ས་རྒྱལ་བ་རིན་པོ་ཆེ་མཆོག་གིས་བསྩལ་བའི་བཀའ་སློབ་ཀྱིས་ངར་བསྐྱེད་པའོ།།
༥ ད་ནི་རྒྱ་ཁྲིམས་བཙན་གྱི་གཉའ་ཤིང་གིས།། སླར་ཡང་དཀར་ནག་ཞིང་ས་རྨོ་བ་ལ།།
རྣོ་ངར་ཐོང་གཤོལ་ལྕགས་ཀྱི་ངར་བླུད་ཀྱང་།། ཞིང་སའི་སར་ལ་གནོད་པ་ཅང་མི་འབྱུང་།།
ཡིན་ཡང་རྒྱལ་ཁམས་རིག་པའི་སྐོར་ལམ་ནས།། རྒྱ་ཆེའི་དོན་ལ་དཔྱོད་པའི་ཁུལ་བྱས་པར།།
རྒྱ་ཁབ་ཙམ་གྱི་དོན་བྱ་མ་འགྲུབ་ཀྱང་།། རྒྱ་ཅན་གྲོགས་ཁྱོད་ཕངས་སེམས་མེད་པར་མཛོད།།
ཞེས་པའི་ཤོ་ལོ་ཀ་འདི་གཉིས་ནི་གུས་པ་ཐེངས་གཉིས་པར་འཛིན་བཟུང་བཙོན་འཇུག་བྱས་ནས་ཅུང་མ་འགོར་བའི་སྐབས་སྟེ། ཕྱི་ལོ་ ༡༩༩༥ ལོའི་ཕྱི་ཟླ་ ༩ བའི་ནང་གུས་པར་ཤིན་ཏུ་ཤ་ཚ་ཞིང་སྙིང་ཉེ་བའི་གཟིངས་ཞུགས་ཀྱི་དམ་པ་ཞིག་ལྟ་བར་ཡོང་བའི་སྐབས་སུ་བྱུང་བའི་སེམས་ཚོར་གྱི་ཁས་ལེན་དམ་བཅའ་ཞིག་ཡིན་ཞིང་། འདི་ནི་རང་ཉིད་བོད་པ་ཞིག་ཡིན་པས་རང་དོན་རང་གཅེས་དང་ྋརྒྱལ་བ་ཡབ་སྲས་རྣམ་གཉིས་ཀྱི་བཞེད་དགོངས་སྲུང་བརྩི། ཁྱད་པར་དུ་༧ཀུན་གཟིགས་པཎ་ཆེན་རིན་པོ་ཆེ་མཆོག་གིས། ལས་ལ་བརྩོན་ཞིང་དཔའ་ངར་ལྡན་པའི་བོད་མི་རིགས་ཀྱི་བུ་རབས་ཚ་རྒྱུད་ལ་གནོད་པའི་ཤུལ་རྗེས་ཕྲ་མོ་ཙམ་ཡང་ངའི་ལོ་རྒྱུས་ནང་ལ་མི་འཇོག་པའི་དམ་བཅའ་བཞག་ཡོད་ཅེས་གསུངས་པའི་བཀའ་སློབ་དགོངས་དོན་སྙིང་བཅིངས་ཀྱིས་ཉམས་སུ་བླངས་པའི་ཁས་ལེན་དམ་བཅའ་ཞིག་ཡིན།
༦ སེམས་ཀྱི་རེ་བཞག་ཞལ་མཇལ་མ་གྲུབ་པར།། དབང་ཅན་དབང་གིས་འཁྱེར་ཞེས་དམོད་རུང་ངམ།།
འདི་ན་བདེན་སྟོབས་བཙན་གྱིས་བརྡར་བ་ལ།། ཕྱི་ནང་བཅད་རྒྱ་མེད་ན་ག་ལ་རུང་།།
ཞེས་པའི་ཤོ་ལོ་ཀ་འདི་ནི་གུས་པ་ཐེངས་གཉིས་པར་འཛིན་བཟུང་བཙོན་འཇུག་བྱས་སྐབས། གུས་པར་སེམས་འཁུར་བྱེད་མཁན་མང་པོ་ཞིག་ཐུག་འཕྲད་བྱེད་མ་ཐུབ་ཅིང་། དེའི་ཁྲོད་ནས་གྲོགས་པོ་དམ་པ་ཞིག་ཐུག་འཕྲད་དུ་ཡོང་བ་ལ་གུས་པར་ཐུག་མ་ཐུབ་པར་བཙོན་སྲུང་བརྒྱུད་ནས་ཡིག་ཆུང་ཞིག་བྲིས་འདུག་པའི་ནང་། དབང་ཅན་གྱི་དབང་གིས་འཁྱེར་བས་ཐེངས་འདིར་ཞལ་མཇལ་མ་གྲུབ་ཀྱང་། སྐབས་རྗེས་མར་ཆོག་མཆན་བླངས་ཏེ་ངེས་པར་དུ་ཞལ་མཇལ་ཞུ་གི་ཡིན་ཞེས་བཀོད་འདུག་པ་དེ་མཐོང་བའི་མོད་ལ། འདི་ན་སྟེ་རྒྱ་ནག་གིས་བྱ་བཞག་གང་ཡིན་ཡང་གནས་ལུགས་ཀྱིས་བརྡར་ཤ་མི་གཅོད་པར་རང་འདོད་བཙན་དབང་ཁོ་ནས་སྒྲུབ་བཞིན་ཡོད་པར་བོད་ཀྱི་བདེན་དོན་ཐད་ཀྱང་ཚུལ་དེ་ལས་མ་འདས་པས་ན། གྲོགས་དམ་པའི་ཡིག་ཆུང་འདིས་བོད་ཀྱི་གནས་སྟངས་ནི་རྒྱ་ནག་གི་བཙན་དབང་འོག་ཏུ་ཆེ་ས་ནས་བོད་ཕྱི་ནང་གི་འབྲེལ་ཐག་བཅད་ཡོད་པ་དང་། ཆུང་ས་ནས་བོད་ནང་ཁུལ་གྱི་བོད་མི་ཕན་ཚུན་བར་གྱི་འབྲེལ་ཐག་ཀྱང་བཅད་དེ། བོད་མིའི་ལུས་སེམས་གཉིས་ལ་འབྲེལ་འདྲིས་དང་། ཞི་བདེ་སོགས་མེད་པའི་རྣམ་པ་གསལ་བོར་མཚོན་འདུག་པའི་གནས་སྟངས་དམར་རྗེན་དེ་ཡིད་ལ་ཤར་མར་འཁོར་དུ་བཅུག་བྱུང་བའི་སྣང་ཚུལ་བཀོད་པ་ཞིག་ཡིན།
༧ བྱིས་པའི་ལབ་རྡོལ་བྱས་པའི་སྐད་དག་ལ།། དོན་ལྡན་གོ་བ་ཅན་གྱི་ཚིག་འབྱུང་ཡང་།།
འདི་ན་བདེན་པར་སྨྲས་པའི་གཏམ་དག་གིས།། སེམས་ཅན་སུན་པར་བཟོས་པ་གྲངས་ལས་འདས།།
ཞེས་པའི་ཤོ་ལོ་ཀ་འདི་ནི་ཕྱི་ལོ་ ༡༩༩༧ ལོར་སྐབས་དེའི་བོད་ནང་གི་གནས་སྟངས་སྤྱི་ལ་དམིགས་ཏེ། རང་ཉིད་ཀྱི་ལྟོ་རྒྱབ་ཁོ་ནའི་ཆེད་དུ་འཚོ་བའི་རྒྱ་མི་དང་། བོད་མི་བྱབ་ཆུང་ཁག་ཅིག་རྒྱ་གཞུང་གི་ལག་ཆར་གྱུར་ཏེ། བབ་ཅོལ་དུ་བོད་མི་སྡུག་ལ་སྦྱོར་བཞིན་པའི་ཡ་ང་བའི་གནས་སྟངས་དང་། རྒྱ་གཞུང་གིས་བོད་འཛུགས་སྐྲུན་ཟེར་བའི་ཧམ་ཟོས་ཀྱི་ཁྲོད་འགྲིག་འགྲིག་ལྟ་བུའི་ལྟར་སྣང་གི་བྱ་བ་དང་སྣང་ཚུལ། སྐད་ཆ་སོགས་འབྱུང་སྲིད་ཀྱང་། འདི་ན་སྟེ་བོད་དང་བོད་ཀྱི་བདེན་དོན་དོན་གཉེར་ཅན་དག་གིས་བོད་དོན་གྱི་བདེན་པའི་གནས་ལུགས་མ་དོར་བར་ཧམ་སེམས་ཅན་གྱི་རྒྱ་ནག་དམར་གཞུང་དང་། དེའི་ལག་ཆར་གྱུར་པའི་རིགས་ཅན་དེ་དག་ལ་གཅིག་ལ་གཅིག་ལན་དང་། མེས་འཚུག་མེར་གཏུགས་ཀྱིས་གདོང་ལེན་རབ་དང་རིམ་པ་བྱས་དང་བྱེད་བཞིན་ཡོད་ན། རང་ཉིད་ཀྱིས་ཀྱང་འདི་ལྟ་བུའི་རང་ཚུགས་འདོར་མི་རུང་བ་ཡིད་ལ་འཁོར་བ་ཞིག་ཡིན།
༨ ཀ་ཁའི་མགོ་རྐང་ཙམ་ཞིག་ཤེས་པ་ཡིས།། ཁ་བཤད་མཁས་པའི་བྱ་བ་མ་ལགས་ཀྱང་།།
ག་ལེར་བསམས་ན་འདི་འདྲར་དཔྱོད་པའི་གནས།། ང་འདྲའི་ལར་ཡང་མི་རུང་མེད་དམ་སྙམ།།
ཞེས་པའི་ཤོ་ལོ་ཀ་འདི་ནི་ཕྱི་ལོ་ ༡༩༩༧ ལོར་གུས་པས་བོད་ཀྱི་ཞིང་ལྗོངས་ལྔའི་དམའ་རིམ་སློབ་འབྲིང་གི་བོད་ཡིག་ཚོད་ལྟའི་སློབ་དེབ་ལ་ཞིབ་དཔྱད་ཀྱི་དཔྱད་རྩོམ་ཞིག་སྤེལ་བ་རྒྱ་གཞུང་གི་བདེ་སྲུང་མི་སྣའི་ལག་ཏུ་སོན་ཞིང་། དཔྱད་རྩོམ་དེ་ཉིད་ཕྱིས་སུ་ཕྱི་ལོ་ ༡༩༩༩ ལོའི་མཚོ་སྔོན་སློབ་གསོ་བོད་ཡིག་དུས་དེབ་འདོན་ཐེངས་དང་བོའི་སྟེང་དུ་བཀོད་འདུག དཔྱད་རྩོམ་དེའི་སྙིང་དོན་ནི་སྐབས་དེར་བེད་སྤྱོད་བྱེད་བཞིན་པའི་ཞིང་ལྗོངས་ལྔའི་དམའ་རིམ་སློབ་འབྲིང་གི་བོད་ཡིག་ཚོད་ལྟའི་སློབ་དེབ་ཁག་ནི་བོད་ཀྱི་སྐད་དང་ཡི་གེ་གཉིས་ཀ་བེད་སྤྱོད་བྱས་ཏེ་མི་རིགས་གཞན་གྱི་རིག་གནས་སྦྱོང་བྱེད་ཀྱི་ལག་ཆ་ལྟ་བུ་ལས། བོད་ཀྱི་རིག་གཞུང་སློབ་དེབ་མིན་པའི་སྐོར་གསལ་བོར་བཀོད་ཡོད་པས། རྒྱ་གཞུང་གི་བདེ་སྲུང་ལས་བྱེད་ཀྱིས་གནད་དོན་དེའི་ཐད་ཆེད་དུ་གུས་པ་ཟུར་དུ་བཀག་ཉར་གྱིས་ཉིན་མང་བོར་མནར་གཅོད་འདྲི་རྟོག་བྱས་པར་འདི་ལྟ་བུའི་སྣང་ཚུལ་ཡིད་ལ་འཁོར་བ་ཞིག་ཡིན།
༩ སེམས་ཀྱི་རྟ་རྒོད་ལུས་ཀྱི་ཕུར་ནག་གིས།།
མ་ཟིན་ཕྱོགས་མེད་རྒྱུ་བའི་ངང་ཚུལ་འདི།།
སྒོ་གསུམ་དྲི་མ་རྫོགས་སྨིན་སྦྱངས་གསུམ་གྱིས།།
མ་གཅུན་རྒྱུ་བའི་ཕྱི་མཐའ་ཟད་མི་ཤེས།།
རྒྱུ་རྐྱེན་སྣང་སྟོང་གྲུབ་པའི་ཉེར་ལེན་དུ་གོ་ན།།
རྒྱུ་འབྲས་གཅིག་ལ་གཅིག་གི་རྟེན་འབྱུང་དུ་འཕྲོད་པ།།
སྣང་སྟོང་སྒྱུ་མའི་རྒྱལ་བོའི་དེ་ཉིད་རང་རྟོགས་བྱེད།།
རྒྱུ་འབྲས་རིག་པ་འདི་ཡང་དཀོན་མཆོག་གི་དཀོན་མཆོག།
ཅེས་པའི་ཤོ་ལོ་ཀ་འདི་གཉིས་ནི་ཐེངས་གཉིས་པར་འཛིན་བཟུང་བཙོན་འཇུག་གི་སྐབས་ཏེ། ཕྱི་ལོ་ ༡༩༩༥ ལོའི་ཟླ་༩ བའི་ཟླ་སྨད་ནས་ཁྲིམས་ཐག་མ་བཅད་པའི་ཡར་སྔོན་གྱི་ཟླ་གསུམ་ལྷག་གི་རིང་ལ་གུས་པ་གཅིག་པུ་ཁང་མིག་གཅིག་ཡིན་པའི་མུན་དོང་གི་བཙོན་ཁང་ཞིག་ཏུ་བཅུག་པར། དུས་ཡུན་དེའི་རིང་དེ་སྔ་རང་ཉིད་ཀྱིས་དམ་པའི་ཆོས་ལ་ཐོས་བསམ་བྱས་པ་དང༌། ཁྱད་པར་དུ་༧གོང་ས་རྒྱལ་བ་རིན་པོ་ཆེ་མཆོག་གིས་ལྟ་བ་རྟེན་འབྱུང་དང་སྤྱོད་པ་འཚེ་བ་མེད་པའི་ནང་ཆོས་ཀྱི་དགོངས་དོན་སྐོར་ལ་བློ་ཁ་ཅུང་ཙམ་སྐོར་བར།
ཇི་སྐད་དུ། ཆོས་རྣམས་སྟོང་བ་འདི་ཤེས་ནས།།
ལས་དང་འབྲས་བུ་བསྟན་པ་གང་།།
ངོ་མཚར་བས་ཀྱང་འདི་ངོ་མཚར།།
རྨད་བྱུང་བས་ཀྱང་འདི་རྨད་བྱུང་།། ཞེས་དང༌།
ཡང་ཇི་སྐད་དུ། ངའི་ལྟ་བ་ནམ་མཁའ་ལས་ཀྱང་མཐོ།། ལས་རྒྱུ་འབྲས་བག་ཕྱེ་ལས་ཀྱང་ཞིབ།། བཅས་པ་ལ་སོགས་པ་རང་གི་བློ་ངོར་གྲུབ་དོན་གྱི་ཚུལ་དུ་ངེས་ཤེས་འདི་ལྟ་བུ་སྐྱེས་བྱུང་བ་དེ་ཡིན། ཕྱོགས་གཞན་ཞིག་ནས་བཙོན་ཁང་ནི་ནང་ཆོས་ཉམས་ལེན་བྱེད་མཁན་གཤའ་མ་ཞིག་ལ་བཙུན་པའི་མཁར་ཏེ་རྐྱེན་ངན་གྲོགས་འཁྱེར་གནང་ཐུབ་མཁན་ཞིག་ཡིན་ཚེ་རྣལ་འབྱོར་ཉམས་ལེན་གྱི་གནས་དེ་ལས་ལྷག་པ་ཞིག་མི་འདུག་སྙམ་པའི་ཚོར་སྣང་ཡང་བྱུང་སོང་།
