པ་ཀི་སི་ཐན་གྱི་ངར་ལྕགས་སྲས་མོ།

“ངས་འཇིག་རྟེན་འདིར་སེམས་དཔའ་ཆེན་མོ་ཞིག་མ་རྙེད་པས་ངས་རང་ཉིད་སེམས་དཔའ་ཆེན་མོ་ཞིག་ཏུ་འགྱུར་ཐབས་བྱེད་ཀྱིན་ཡོད།” དེ་ནི་འོབས་དོང་དུ་ལྷུང་བའི་མི་མོ་ཞིག་གི་ཁེར་རྐྱང་གི་འབོད་སྒྲ་ཡིན་ལ། དེ་ནི་སྤྱི་ཚོགས་ཀྱི་ཆེས་དམའ་སར་སྙེག་པའི་བུད་མེད་རྣམ་དག་ཅིག་གི་འུ་ཐུག་པའི་ངུ་སྐད་ཡིན།

  དཔལ་ལྡན། དུས་བབ་གསར་འགོད་པ།

འདས་པའི་ལོ་ཤས་ནང་བྲིན་རྒྱུག་ཆེ་བའི་ཡུ་ཊུ་ཕུ་སྤྱི་ཚོགས་དྲ་ལམ་སོགས་སུ་འཁོར་ལྡན་རྐུབ་བཀྱག་ཐོག་བསྡད་པའི་བུད་མེད་གཞོན་ནུ་མ་ཞིག་གི་གཏམ་བཤད་ཅིག་ལ་མི་གྲངས་ས་ཡ་ ༢༠ ལྷག་གིས་ལྟ་ཉན་བྱས་འདུག བུད་མེད་དེ་ནི་ཨེ་ཤི་ཡའི་ལྷོ་ཕྱོགས་རྒྱལ་ཁབ་པ་ཀི་སི་ཐན་ནས་ཡིན་ཞིང་། མིང་ལ་མུ་ན་བྷ་མི་ཛ་རི་ (MUNIBA MAZARI) ཟེར་གྱི་ཡོད་འདུག བུད་མེད་དེས་སྐྱོ་གདུང་དང་ན་ཟུག་གིས་ཁེངས་བའི་ལོ་ཟླ་མང་པོར་ཁ་གཏད་དུ་ལངས་ཏེ། རང་ཉིད་ཀྱིས་བཅོས་མིན་གྱི་བརྩེ་འདང་དང་འཚོལ་སྙེག་གི་ལམ་དུ་ཞུགས་པའི་མི་ཚེ་དེར་ཀུན་གྱི་ཡིད་དབང་ཅིག་ཅར་དུ་འཕྲོག་ཡོད་པ་མ་ཟད། བྲན་གཡོག་གི་ལས་སུ་བཀོལ་བའི་ཡུལ་ལུང་དེ་དང་དེའི་རིགས་འདྲིས་སུ་གྱུར་བའི་རྒྱལ་ཁབ་ཁག་གི་བུད་མེད་ས་ཡ་མང་པོས་མུ་ན་བྷ་མི་ཛ་རི་ལགས་ལ་“པ་ཀི་སི་ཐན་གྱི་ངར་ལྕགས་སྲས་མོ་”ཞེས་ངར་ལྕགས་ཀྱི་གཤིས་སུ་གྲུབ་པའི་བུད་མེད་དེར་བསྟོད་པའི་མཐེ་བོ་སྒྲེང་ནས་ཡིད་སྨོན་འཆོར་བཞིན་འདུག

པ་ཀི་སི་ཐན་གྱི་ངར་ལྕགས་སྲས་མོ་ནི་ཕྱི་ལོ་ ༡༩༨༧ ཟླ ༣ ཚེས་ ༣ ཉིན་ཡུལ་དེའི་གྲོང་ཁྱེར་ར་ཧིམ་ཡར་ཁཱན་ (Rahim yar khan) གྱི་རྙིང་ཞེན་ཆེ་བའི་ཁྱིམ་ཚང་ཞིག་ཏུ་སྐྱེས་ཤིང་། ཁོང་མོས་ Army Of Public school ནས་གཞི་རིམ་གྱི་སློབ་གཉེར་བྱས་ཏེ། ཕྱིས་སུ་སྒྱུ་རྩལ་གྱི་ཐོག་ཏུ་ཉེ་བའི་གཙུག་ལག་རབ་འབྱམས་པའི་མཐོ་རིམ་གྱི་སློབ་གཉེར་བྱེད་མགོ་བཙུགས་ཡོད་ཀྱང་། རང་ལོ་བཅོ་བརྒྱད་སྟེང་ཁོ་མོས་པཱ་ལགས་ཀྱི་ཐུགས་འདོད་བཞིན་གཉེན་སྒྲིག་བྱས་ཏེ། མུ་མཐུད་ནས་སློབ་གཉེར་བྱ་རྒྱུའི་གོ་སྐབས་བྱུང་མེད།

 ཁོང་མོར་ཛུལ་ཧྥི་ཀར་ཨ་ལི་མ་ཛ་རི་ (Zulfiqar Ali Mazari) དང་ས་ཧྥི་ར་ཛི་ཨ་ལི་མ་ཛ་རི་ (Sarfraz Ali Mazari) ཞེས་པའི་གཅེན་པོ་གཉིས་ཡོད་པ་དང་། ཁོང་མོ་ཆུང་དུས་ནས་སྨྲ་ལྕེ་བདེ་ཞིང་སྐྱེས་གཟུགས་ཡིད་དུ་འོང་བ་ཞིག་ཡོད་ཀྱང་།  ཕྱི་ལོ ༢༠༠༨ ཟླ་ ༢ ཚེས་ ༢༧ ཉིན་མི་ཛ་རི་དང་ཁོང་མོའི་ཁྱོ་གས་སྒེར་གྱི་རླངས་འཁོར་བསྐོར་སྟེ་ཁེ་ཊ་ (Quetta ) ནས་ར་ཧིམ་ཡར་ཁཱན་ (Rahim yar Khan ) འགྲོ་བའི་ལམ་བར་དུ། ཁྱོ་ག་གཉིད་དུ་ཡུར་ནས་ཡུལ་དེའི་བྱང་རྒྱུད་མངའ་སྡེ་བྷ་ལོ་ཁེ་སི་ཐན་གྱི་གྲོང་གསེབ་ཅིག་ནས་རླངས་འཁོར་འོབས་དོང་ཞིག་ཏུ་ལྷུང་སྟེ་བརྡབ་སྐྱོན་ཚབས་ཆེན་བྱུང་། བསམ་ཡུལ་ལས་འདས་པ་ཞིག་ལ། ཁོང་མོ་དྲན་པ་བརྒྱལ་ནས་སད་སྐབས་ཁྱོ་གའི་གྲིབ་གཟུགས་ཙམ་ཡང་མཐོང་རྒྱུ་མེད་པར་ཁོང་མོ་གཡུགས་ནས་ཕྱིན་ཚར་ཡོད་པ་རེད།

མི་ཛ་རིའི་ལག་པ་གཡས་པ་དང་།  དཔུང་པ། སྐེ་ཚིགས་བཅས་སུ་ཆག་གྲུམ་ཤོར་ཡོད་པ་མ་ཟད། རྩིབ་རུས་ཆ་ཚང་ཆག་སྟེ་གློ་བ་དང་མཆིན་པར་ཟུག་ནས་འབྱིན་རྔུབ་མི་ཐུབ་པ་དང་གཅིན་ལྒང་ལ་བརྡབ་སྐྱོན་ཤོར་ནས་གཅིན་མི་ཚོགས་པར་གྱུར། ད་དུང་རྒལ་ཚིགས་ལ་བརྡབ་སྐྱོན་དྲག་པོ་བྱུང་ཏེ་ཉིན་མཚན་གྱི་དབྱེ་བ་གང་ཡིན་མ་ཤེས་པར་ཡུན་རིང་སྨན་ཁང་གི་ཉལ་ཁྲིའི་ཐོག་འགྱེལ་ནས་བསྡད་པ་དང་། ཁོང་མོའི་ཕ་མ་གཉིས་དང་སྤུན་མཆེད་སོགས་ཀྱིས་གསོན་རེ་བྲལ་བའི་ཁོང་མོར་གཡས་གཡོན་ནས་སྲུང་སྟེ་བཟོད་དཀའ་བའི་སྡུག་བསྔལ་གྱི་གནས་སུ་གྱར།

ཕྱི་ལོ་༢༠༡༧ ཟླ་ ༡༠ ཚེས་ ༡༨ ཉིན་མི་ཛ་རི་ལགས་ཀྱིས་བྷི་བྷི་སི་གཏམ་བཤད་སྟེགས་བུའི་སྟེང་ནས་སྐྱི་གཡའ་བའི་དུས་སྐབས་དེར་ཕྱིར་དྲན་བྱེད་ཞོར།  ” ངས་ཕུ་བོ་གཉིས་ལ་ང་ཡན་ལག་སྐྱོན་ཅན་དུ་གྱུར་ཡོད་པ་བདེན་མོད། སྨན་ཁང་གི་རྩིགས་ལྡེབས་སྐྱ་བོ་འདི་ལ་བལྟས་ནས་བསྡད་ན་མི་འདོད་པར། ངས་རང་ཉིད་ཀྱི་མི་ཚེ་ལ་ཁ་དོག་འགའ་སྣོན་ན་འདོད། ངས་ཅི་ཞིག་བསྒྲུབ་ན་འདོད། ང་ལ་ཚོན་མདོག་འགའ་ཤས་ཁྱེར་ཡོང་རོགས།  ངས་སྣ་མང་ཚོན་མདོག་གིས་བརྒྱན་པའི་རི་མོ་འབྲི་ན་འདོད།’’ བརྗོད་དེ། ཁོ་མོས་མཛེས་སྡུག་གི་འོད་སྣང་འབར་བའི་མ་འོངས་པའི་རྨི་ལམ་དང་འཚོལ་སྙེག་གི་ཆེད། ཉིན་རེ་བཞིན་འཚོ་བ་གསར་པ་དང་། རྨི་ལམ་གསར་པ་ཞིག་གི་གཤོག་ཟུང་ལ་འཇུས་ནས་དཀའ་སྡུག་གི་ལོ་ཟླ་དེ་དག་བསྐྱལ་ཐབས་བྱས་པས། ཉིན་ལྟར་སྤྱན་ཟུང་དུ་བསྟར་བའི་རྩིག་ལྡེབས་དཀར་པོ་དེ་དག་ལ་སུན་སྣང་སྐྱེས་ཏེ། ཁོང་མོས་གཤིན་རྗེ་དང་ཧ་ཅང་ཁ་ཐག་ཉེ་བའི་སྨན་ཁང་གི་མལ་ཁྲིའི་ཐོག་ཏུ་རི་མོའི་བརྩམས་ཆོས་ཐོག་མ་དེ་བྲིས་ཤིང་། དེ་ནི་སྒྱུ་རྩལ་བ་དག་གི་འཆར་ཡན་གྱི་གསེབ་ནས་བརྡོལ་བའི་ལང་ཚོའི་འོད་སྣང་ཞིག་མིན་ཡང་། དེ་ནི་སྐྱོ་ངལ་གྱི་མུན་དོང་དུ་ལྷུང་བའི་ནད་པ་ཉམས་ཐག་ཅིག་གིས། སྐྱ་མདོག་ཏུ་གྱུར་བའི་རང་ཉིད་ཀྱི་འཚོ་བར་སྣ་མང་ཁ་དོག་གི་མཛེས་སྡུག་སྤུངས་འདོད་པས་ཡིན་ལ། ཁ་དོག་རེ་རེའི་ཁྲོད་དུ་ཕུགས་བསམ་གྱི་རི་མོ་དང་སྐྱ་རལ་དུ་གྱུར་བའི་སྨྲེ་ངག་མང་པོ་ཞིག་བཏུས་ཏེ། ཟླ་གཉིས་དང་ཕྱེད་ཀ་ལྷག་ལ་སྨན་ཁང་གི་གྲུ་ཟུར་ཞིག་ཏུ། སྤྲིན་དཀར་གྱི་འདབ་མ་བསྣབས་པའི་ལྷ་རྗེ་མང་པོ་ཞིག་གི་བརྩེ་སེམས་ཀྱི་ཐུ་འོག་ནས་གསོན་ཐུབ་ཙམ་བྱུང་།

ཟླ་གཉིས་དང་ཉིན་གྲངས་བཅོ་ལྔ་རིང་སྨན་ཁང་དུ་གཤག་བཅོས་དང་འཚེམ་གྲུམ་སོགས་ཟུག་གཟེར་གྱིས་ཁེངས་བའི་སྨན་བཅོས་གྲངས་མེད་བྱས་མཐར་སྨན་ཁང་ནས་རང་ཁྱིམ་དུ་ལོག་པ་དང་། རང་ཁྱིམ་གྱི་ཉལ་ཁྲིའི་ཐོག་ཏུ་མུ་མཐུད་ཉལ་ཏེ་ཉིན་མཚན་སྐྱེལ་དགོས་བྱུང་ཡང་། ཁོང་མོས་སྔར་ལས་སེམས་ཤུགས་སྐྱེད་དེ་རི་མོ་བྲིས་ཤིང་། བྱིས་པ་ཆུང་ཆུང་ལྟར་ལུས་ཀྱི་འགུལ་སྐྱོད་རེ་རེ་ཉིན་ལྟར་སྦྱོང་བརྡར་བྱས་ཏེ་ནམ་ཞིག་ཙོག་པུར་བསྡད་ཐུབ་པའི་ཡིད་ཆེས་བྱས། ཕྱི་ལོ་ ༢༠༡༠ ཟླ་ ༣ ནང་གཞི་ནས་འཁོར་ལྡན་རྐུབ་བཀྱག་ཏུ་སྡོད་ཐུབ་པ་བྱུང་། དེ་ནི་ཁོང་མོའི་ཁྱིམ་མི་དང་མོས་ལོ་ཟླ་མང་པོར་དཀའ་སྤྱད་ཀྱི་སྙིང་རུས་ལས་བྱུང་བའི་འབྲས་བུ་ཞིག་ཡིན་ལ། དེ་ནི་མི་ཛ་རི་ལ་ཐོབ་པའི་མི་ཚེ་གསར་པ་ཞིག་ཀྱང་ཡིན་ངེས། ཡིན་ནའང་། མི་ཛ་རིས་མི་ཚོགས་ཁྲི་ཕྲག་གི་མདུན་ནས་སྐྱོ་སྣང་ཆེ་ཤོས་སུ་བརྗོད་པ་ནི། སྨན་ཁང་དུ་ཡོད་སྐབས་བསྟུད་མར་ཐེངས་གསུམ་ལྷག་ལ་ཁོང་མོའི་སྨན་པ་ཡིས་རྨས་སྐྱོན་གྱི་ཛ་དྲག་གནས་སྟངས་འགྲེལ་བརྗོད་བྱས་པའི་ཁྲོད་ནས། མཐའ་མ་དེ་ནི་མོའི་སྒལ་ཚིགས་ལ་ཆག་སྐྱོན་ཤོར་བ་དང་སྒལ་རྣག་བརྟོལ་བ་ཚབས་ཆེ་བས་རྗེས་ཕྱོགས་མངལ་འཛིན་ནུས་པ་ཉམས་ནས་ཕྲུ་གུ་སྐྱེས་མི་ཐུབ་སྐོར་བརྗོད་སྐབས། ཁོང་མོས་དབུགས་རིང་ཞིག་འཐེན་ནས་ཡུད་ཙམ་རིང་སྨྲ་སྒོ་འགག་སོང་བ་ལྟར་གྱུར་ཞིང་། འཁྲིས་སུ་ལངས་བའི་རང་ཉིད་ཀྱི་ཨ་མ་ལགས་སུ། ང་ཅིའི་ཕྱིར་མ་ཤི་བ་རེད། ང་གསོན་དགོས་དོན་ག་རེ་འདུག་ཅེས་བཤད་པ་ཡིན་ཟེར། ཨ་མ་ལགས་ཀྱིས། གཅེས་ཕྲུག་མ། དཀོན་མཆོག་གི་བྱམས་སྙིང་རྗེ་ཡི་ཡུལ་ནས་ཁྱེད་རང་ནམ་ཡང་འདོར་སྲིད་ཀྱི་མ་རེད་ཅེས་གདེང་ཚོད་ཆེན་པོས་བརྗོད་བྱུང་ཟེར། ཕྱིས་སུ་རིམ་གྱིས་བསམ་བློ་ཞིག་བཏང་ན། དེང་སང་བྱིས་པ་སྐྱེས་པའི་ནུས་པ་མེད་མཁན་ཕ་མ་མང་པོས་བུ་ཚབ་གསོ་སྐྱོང་བྱེད་བཞིན་ཡོད་སྟབས། ཁོང་མོས་ཀྱང་བུ་ཚབ་ཅིག་གསོ་སྐྱོང་བྱས་ན་འགྲིག་གི་སྙམ་པའི་བསམ་བློ་ཞིག་འཁོར་དུས། བྱིས་པ་སྐྱེས་གསོའི་ནུས་པ་མེད་པའི་སྡུག་བསྔལ་དེའང་ཡུད་ཙམ་གྱིས་སེལ་སོང་ཞེས་མོ་རང་གི་གཅེས་སུ་འོས་པའི་བུ་ཚབ་དེར་ཇི་ལྟར་འཕྲད་པའི་སྐོར་འགྲེལ་བརྗོད་བྱས་འདུག

ཁོང་མོས་ཚོགས་སྡེ་དང་དྭ་ཕྲུག་མང་པོ་ཞིག་ཏུ་འབྲེལ་ལམ་འཛུགས་ནས་ཁོང་ཉིད་ཀྱིས་བྱིས་པ་ཞིག་གསོ་སྐྱོང་བྱ་རྒྱུ་སེམས་ཐག་བཅད། ( ཁོང་མོའི་གཏམ་བཤད་ཅིག་ཏུ།  ང་ནི་འཁོར་ལོ་ཅན་གྱི་རྐུབ་སྟེགས་སྟེང་ནས་སྐྱེལ་བཞིན་པའི་མི་ཞིག་ཡིན་པ་དེ་མ་བཤད་ལ། རང་ཉིད་ལ་བྱིས་པ་སྐྱེས་མི་ཐུབ་པའི་བུ་ཚབ་ཞིག་དགོས་པའང་མ་བཤད། ) དེ་ནས་ཏག་ཏག་མི་ལོ་གཉིས་ཀྱི་རྗེས་སུ་ཁོང་མོར་པ་ཀི་སི་ཐན་གྱི་གྲོང་གསེབ་ཆུང་ཆུང་ཞིག་ནས། སྐྱེས་ནས་ཉིན་གྲངས་གཉིས་ལས་མ་སོན་པའི་བྱིས་པ་ཆུང་ཆུང་ཡོད་པ་དེ་གཉོར་སྐྱོང་བྱ་ཐུབ་མིན་གྱི་ཁ་པར་ཞིག་འབྱོར་བས། ཁོང་མོས་བྱིས་པ་ཆུང་ཆུང་ཞིག་གི་ཚེ་སྲོག་ལ་བརྩེ་མདངས་ཀྱི་མིག་ཟུང་བགྲད་ནས་རང་ཁྱིམ་དུ་བསུས་ཤིང་། ན་ཡེལ ( Neal) ཞེས་མིང་བཏགས་ཡོད་ཡོད་པ་དང་།  ད་ལྟ་ཁོང་རང་ལོ་་བཅུ་རུ་སོན་ཡོད་པ་རེད། ཁོང་མོས་བུ་ཆུང་ན་ཡེལ་ནི་ཁོང་མོའི་མི་ཚེའི་ནང་གི་ཆེས་བཀུར་འོས་པའི་དཔའ་རྒོད་ཅིག་དང་། སློབ་དཔོན་ཡག་ཤོས་ཤིག་ཏུ་ངོས་འཛིན་བྱེད་ཀྱི་འདུག ཡང་མི་ཛ་རིའི་ལུས་ཀྱི་ཆག་གྲུམ་དང་རྨ་ཁ་ཐམས་ཅད་ག་ལེར་གསོས་བ་དང་བསྟུན། ཁོང་མོའི་དངངས་སྐྲག་ཆེ་ཤོས་ཀྱི་གནད་དོན་ཞིག་ནི་བཟའ་ཟླར་གྱུར་མྱོང་བའི་སྐྱེས་པ་དེས་ཁོང་མོ་གུ་ཡངས་གཏང་ཨེ་ཡོང་སྙམ་པ་དེ་ཡིན་ཟེར། དེའི་ཐད་ཁོང་མོས་མོ་རང་གཡུག་མཁན་གྱི་མི་དེར་ཡིད་སེམས་ཆགས་ནས་གཏོང་མ་ཕོད་པར་ཁྱོ་གར་ཨུ་ཚུགས་ཀྱིས་རེ་བ་ཡོད་པར་འདོད་ཀྱང་ཐབས་ཤེས་གང་ཡང་མ་རྙེད་སྟབས། བསམ་བློར་ཁ་ལོ་བསྒྱུར་ཏེ་ཁོ་བོར་རང་དབང་སྤྲད་ཡོད་པ་དང་། མོས་རང་གི་ཁྱོ་གས་བུད་མེད་གཞན་ཞིག་ལ་གཉེན་སྒྲིག་བྱེད་དུས་ཀྱང་། ང་ཁྱེད་ཀྱི་དོན་དུ་དགའ་སྤྲོ་སྐྱེས་བཞིན་ཡོད་ལ། ཁྱེད་གཉིས་ལ་བཀྲ་ཤིས་རྟེན་འབྲེལ་གྲངས་མེད་ཞུ་ཞེས་བརྩེ་འཕྲིན་ཐུང་ཐུང་ཞིག་ཀྱང་བསྐུར་མྱོང་བ་ཡིན།

མཐར་རང་དབང་གི་མི་ཚེ་གསར་པ་ཞིག་ཐོབ་ཅིང་འཁོར་ལྡན་རྐུབ་བཀྱག་ཐོག་ནས་རང་ཉིད་ཀྱི་ཕུགས་བསམ་འཚོལ་སྙེག་བྱེད་པའི་སྐལ་བ་ལྡན་པའི་མུ་ན་བྷ་མི་ཛ་རི་ཡིས། རང་ཉིད་ཀྱི་དགའ་ཕྱོགས་དང་བསྟུན་ནས་རི་མོའི་བརྩམས་ཆོས་མང་དུ་བྲིས་ཤིང་། ཕྱི་ལོ ༢༠༡༦ ཟླ ༤ ཚེས་ ༡༩  ནས་ཚེས་ ༢༤ བར་ཉིན་གྲངས་དྲུག་རིང་ལ་པ་ཀི་སི་ཐན་གྱི་རྒྱལ་ས་ལ་ཧོར་( Lahore) དུ་རི་མོའི་འགྲེམས་སྟོན་བྱས་ཡོད་པ་དང་།  དྷུ་བྷེ་རུ་ངས་འཚོ་གནས་བདམས་ཡིན་ ( I choose live ) ཞེས་པའི་རྒྱལ་སྤྱིའི་རང་བཞིན་ལྡན་པའི་རི་མོའི་འགྲེམས་སྟོན་སོགས་བྱས་ཏེ། རྒྱལ་ཁབ་རིམ་པ་དང་རྒྱལ་སྤྱིའི་རང་བཞིན་ལྡན་པའི་རི་མོའི་བརྩམས་ཆོས་མང་དག་ཅིག་འགྲེམས་སྤེལ་བྱས་ཡོད་སྟབས།  ཁོང་མོ་པ་ཀི་སི་ཐན་གྱི་འཁོར་ལྡན་རྐུབ་བཀྱག་སྟེང་གི་སྒྱུ་རྩལ་བ་ཐོག་མ་དེར་གྱུར་བ་མ་ཟད། ཚོང་རྟགས་ཅན་གྱི་དཔེ་གསར་གྱོན་གོས་གཤོམ་སྟོན་གྱི་ལས་སུ་ཞུགས་ཏེ། རྒྱལ་སྤྱིའི་གྱོན་གོས་ཁྲོམ་རར་སྐད་གྲགས་ཅན་དུ་གྱུར་བའི་ཀྲོ་ནི་དང་གྷ་ཡེ ( Toni&Guy) སོགས་ཀྱི་གྱོན་གོས་གཤོམ་སྟོན་པའི་ཚབ་མཚོན་མི་སྣ་བྱས། བཞད་གད་འཁྲབ་སྟོན་མ་དང་པ་ཀེ་སི་ཐན་རྒྱལ་ཡོངས་བརྙན་འཕྲིན་ཁང་གི་མདོ་འཛིན་པ་དང་ཁྱབ་བསྒྲགས་མཁན། གཏམ་རྒྱུད་སྙན་སྒྲོན་པ།  བུད་མེད་དང་བྱིས་པའི་ཐོབ་ཐང་འཐབ་རྩོད་པ་སོགས་ཡིན་པ་རེད། ཕྱི་ལོ་ ༢༠༡༥ ལོར་བྷི་བྷི་སི་གསར་ཁང་གིས་འཛམ་གླིང་གི་སེམས་ཤུགས་སྩོལ་བའི་གཏམ་བཤད་པ་བུད་མེད་བརྒྱ་ཡི་གྲས་སུ་འདེམས་ཐོན་བྱུང་འདུག་ལ། ཕྱི་ལོ ༢༠༡༥ ལོའི་ཟླ ༡༢ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་བུད་མེད་དང་བྱིས་པའི་ཐོབ་ཐང་སྲུང་སྐྱོབ་སྐོར་གྱི་པ་ཀི་སི་ཐན་གྱི་གཞུང་ཚབ་པ་རུ་བསྐོ་བཞག་བྱུང་། དེ་ནི་ཁོང་མོར་མཚོན་ན་རྐྱེན་ངན་གྲོགས་སུ་ཤར་བའི་བསམ་བརྗོད་ལས་འདས་པའི་མི་ཚེའི་མྱོང་བ་ཞིག་ཡིན་ལ། ཁོང་མོས་མི་ཚོགས་ཁྲི་ཕྲག་གི་མདུན་ནས་དགའ་སྤོབས་ཆེན་པོས།  རང་ཉིད་ལ་དགའ་ཤེས་ཤིང་ཡིད་ཆེས་ཡོད་ན། དཀོན་མཆོག་གིས་ཁྱེད་ལ་གོ་སྐབས་གནང་ངེས་རེད་ཅེས་བརྗོད་སྐབས། མི་ཚོགས་ཀྱི་ཐལ་མོའི་བརྡབ་སྒྲས་ཚོགས་ར་ཆེན་པོ་དེ་ཡོངས་སུ་ཁེངས་སོང་ལ། ཐལ་སྒྲ་དེའི་ཁྲོད་དུ་རྙིང་རུས་ཅན་གྱི་མི་མོ་ཞིག་གི་འཛུམ་མདངས་དང་འཚོལ་སྙེག་གི་འོད་སྣང་བཞད་འདུག