ཕྱི་ལོ་ ༢༠༢༡ ནས་ ༢༠༢༢ ལོའི་ཐོག་མའི་སྔོན་རྩིས་བཀའ་འཁྲོལ་གཏན་འབེབས་ཧིན་སྒོར་ས་ཡ་ ༢༦༩༨།༡༣ ལས་འདི་ལོར་སྒོར་ས་ཡ་ ༡༦༢།༩༩ དང་བརྒྱ་ཆ་ ༦།༠༤ ཉུང་བ་བྱུང་ཡོད་འདུག
ཁ་སང་ཕྱི་ཚེས་ ༢༡ ཉིན་གྱི་གྲོས་ཚོགས་ཚོགས་དུས་སྟེང་། དཔལ་འབྱོར་བཀའ་བློན་དང་སྲིད་སྐྱོང་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༢ ནས་ ༢༠༢༣ བར་གྱི་སྔོན་རྩིས་གཏམ་བཤད་སྙན་སྒྲོན་གནང་བའི་ནང་། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༢ ནས་ ༢༠༢༣ ལོའི་སྔོན་རྩིས་འཆར་འབུལ་ཧིན་སྒོར་ས་ཡ་ ༢༥༣༥།༡༤ བཀའ་འཁྲོལ་ཞུས་ཡོད་ཅིང་། དེར་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་ངོས་ནས་སྤར་གཅོག་གང་ཡང་བྱས་མེད་པ་རེད་འདུག
དེ་ཡང་སྔོན་རྩིས་གཏམ་བཤད་ལྟར་ན། རྩིས་ལོ་ ༢༠༢༢ ནས་ ༢༠༢༣ ལོའི་སྔོན་རྩིས་བཀའ་འཁྲོལ་ནང་རྒྱུན་གྲོན་དང་དམིགས་བསལ་མ་དངུལ་ཆེད་བྱུང་འཆར་བསྡོམས་ཧིན་སྒོར་ས་ཡ་ ༨༥༡།༦༡ ཡིན་པ་དང་། རྒྱུན་གྲོན་ཆེད་སོང་འཆར་ཧིན་སྒོར་ས་ཡ་ ༤༥༥།༠༧ དང་དམིགས་བསལ་ཆེད་ཧིན་སྒོར་ས་ཡ་ ༣༨༦།༨༡ ཞུས་འདུག་ལ། ཟུར་བཀོལ་རྒྱུན་གྲོན་དང་ཟུར་བཀོལ་ལས་འཆར་ཆེད་བྱུང་འཆར་ཧིན་སྒོར་ས་ཡ་ ༡༧༧༨།༣༠ དང་། སོང་འཆར་བསྡོམས་ཧིན་སྒོར་ས་ཡ་ ༡༦༩༣།༢༦ བཅས་ཁྱོན་བསྡོམས་བོད་མིའི་སྒྲིག་འཛུགས་ཀྱི་ཡོང་རྒྱུའི་རྩིས་ལོ་ ༢༠༢༢ ནས་ ༢༠༢༣ ལོར་བྱུང་འཆར་ཧིན་སྒོར་ས་ཡ་ ༢༦༢༩།༩༡ དང་། སོང་འཆར་སྒོར་ས་ཡ་ ༢༥༣༥།༡༤ དང་། ལྷག་འཆར་སྒོར་ཡ་ས་ ༩༤།༧༧ བཅས་ཀྱི་བཀའ་འཁྲོལ་ཞུས་ཡོད་འདུག
དེ་བཞིན་རྩིས་ལོ་ ༢༠༢༢ ནས་ ༢༠༢༣ ལོའི་སྔོན་རྩིས་འཆར་འབུལ་ཁྲོད་ནས་ལས་ཁུངས་སོ་སོའི་སྔོན་རྩིས་བརྒྱ་ཆ་བསྐོར་བའི་ནང་། ཁྲིམས་བཟོ་ལྷན་ཚོགས་ཆེད་སྔོན་རྩིས་མ་དངུལ་གྱི་བརྒྱ་ཆ་ ༢།༡༤ དང་། ཁྲིམས་ལུགས་དབང་འཛིན་ཆེད་བརྒྱ་ཆ་ ༠།༨༢ བཀའ་དྲུང་ཡིག་ཚང་ཆེད་བརྒྱ་ཆ་ ༥།༡༥ བདེ་སྲུང་ལ་བརྒྱ་ཆ་ ༡།༣༤ ཕྱི་དྲིལ་ལ་བརྒྱ་ཆ་ ༡༤།༢ འོས་བསྡུའི་ཆེད་བརྒྱ་ཆ་ ༠།༢༢ ལས་བྱེད་འདེམས་ལྷན་ལ་བརྒྱ་ཆ་ ༠།༥༡ རྩིས་ཞིབ་ལས་ཁང་ཆེད་ ༡།༠༩ དཔལ་འབྱོར་ལ་ ༦།༨༡ ཆོས་རིག་ལ་ ༣།༡༣ འཕྲོད་བསྟེན་ལ་ ༡༠།༧༤ ཤེས་རིག་ལ་ ༣༣།༨༩ ནང་སྲིད་ལ་ ༡༩།༩༨ བཅས་ཆ་བགོས་བྱས་ཡོད་ཅིང་། བོད་མིའི་སྒྲིག་འཛུགས་ཀྱི་འགྲོ་གྲོན་ཆེ་ཤོས་དེ་ཤེས་རིག་དང་ནང་སྲིད་ཆེད་གཏོང་འཆར་ཡོད་འདུག
འདི་ལོའི་སྔོན་རྩིས་གཏམ་བཤད་ནང་བོད་མིའི་སྒྲིག་འཛུགས་འདི་བཞིན་མ་འོངས་རང་ཁ་རང་གསོ་ཡོང་ཐབས་ཀྱི་ལས་འཆར་ཁག་ཅིག་གསལ་འདོན་བྱས་འདུག་ལ། དེ་ཡང་བོད་མིའི་སྒྲིག་འཛུགས་ཀྱི་འགྲོ་གྲོན་གྱི་བརྒྱ་ཆ་ ༨།༨༡ བོད་མི་རང་གིས་དང་བླངས་དཔྱ་དངུལ་དང་། འབུལ་བབ་གཞན་བརྒྱུད་ནས་ཐོབ་ཀྱི་ཡོད་ཀྱང་། ལྷག་འཕྲོ་བརྒྱ་ཆ་ ༩༡།༡༩ ཕྱིའི་རོགས་དངུལ་ལ་བརྟེན་ནས་བྱུང་གི་ཡོད་སྐོར་འཁོད་པ་ལྟར། འཛིན་སྐྱོང་ངོས་ནས་གཞིས་ཟུར་གྱིས་གཞིས་ཆགས་ལ་རོགས་ཕན་བྱེད་ཐབས་དང་། ཕྱི་རྒྱལ་དུ་ཡོད་པའི་ཆོས་ཚོགས་ཁག་གིས་བོད་མིའི་སྡོད་སྒར་ཁག་གི་རྒས་གསོ་ཁང་ལྟ་བུ་ལ་རོགས་འདེགས་བྱེད་ཐབས། བོད་མི་འཁོས་ཞན་དང་ནད་མནར་རྣམས་ལ་བོད་མི་ཕན་ཚུན་རོགས་རམ་བྱེད་རྒྱུའི་ལས་གཞི་རྒྱ་བསྐྱེད། འཁོས་ཞན་པའི་རྩེ་ཕུད་སློབ་མ་རྣམས་ལ་འབྱོར་ལྡན་བོད་མིས་སློབ་ཡོན་སྤྲོད་པའམ། ཡང་ན་དངུལ་བུན་གཏོང་ཐབས་དང་མང་ཚོགས་ནས་དཔལ་འབྱོར་བསྡུ་རུབ་བྱེད་ཐབས། དེ་བཞིན་བོད་པའི་སློབ་གྲྭ་དང་དགོན་སྡེའི་ནང་ཞུགས་པའི་ཧི་མ་ལ་ཡ་རི་རྒྱུད་ཀྱི་ཡུལ་མི་སློབ་མ་སོགས་ཀྱི་སློབ་ཡོན་འབྲེལ་ཡོད་མངའ་སྡེ་གཞུང་ནས་རག་ཐབས་བྱ་དགོས་པ་བཅས་ཀྱི་ལས་གཞི་སྤེལ་འཆར་ཡོད་འདུག
གཞན་ཡང་དཔལ་འབྱོར་བཀའ་བློན་གྱི་སྔོན་རྩིས་གཏམ་བཤད་ནང་རྩིས་ལོ་ ༢༠༢༠ ནས་ ༢༠༢༡ ལོའི་བྱུང་སོང་གི་གནས་སྟངས་འཁོད་པ་ལྟར་ན། རྩིས་ལོ་དེར་སྤྱི་ལྷན་གྱིས་འཛིན་སྐྱོང་བཀའ་ཤག་ལ་རྒྱུན་གྲོན་དང་དམིགས་བསལ་ཆེད་ཁྱོན་བསྡོམས་བཀའ་འཁྲོལ་བྱུང་སོང་སྒོར་ས་ཡ་ ༡༠༥༧།༧༨ གནང་བ་ལྟར། དངོས་སུ་སྒོར་ས་ཡ་ ༩༦༩།༥༠ བྱུང་འདུག་ཅིང་། དངོས་སོང་ཧིན་སྒོར་ས་ཡ་ ༦༢༥།༦༧ བཅས་དངོས་བྱུང་དང་དངོས་སོང་བར་ལ་ཁྱད་པར་ཧིན་སྒོར་ས་ཡ་ ༣༥༣།༨༣ ཕྱིན་པ་དེ་ནི་འདས་ལོའི་སྔོན་རྩིས་མ་དངུལ་གྱི་འཕར་ཆ་ཡིན་པ་རེད། དེ་བཞིན་ཟུར་བཀོལ་སྔོན་རྩིས་ཡོང་འབབ་བཀའ་འཁྲོལ་ཧིན་སྒོར་ས་ཡ་ ༢༤༠༥།༨ གནང་འདུག་པའི་ཁྲོད་དངོས་བྱུང་ཧིན་སྒོར་ས་ཡ་ ༡༡༥༩།༡ ཡིན་པ་དང་། འགྲོ་གྲོན་བཀའ་འཁྲོལ་ཧིན་སྒོར་ས་ཡ་ ༢༤༣༤།༣༣ ནས་དངོས་སོང་ཧིན་སྒོར་ས་ཡ་ ༡༡༦༤།༦༣ ཕྱིན་འདུག་པར་བརྟེན། དངོས་བྱུང་ལས་དངོས་སུ་འགྲོ་གྲོན་ཧིན་སྒོར་ས་ཡ་ ༥།༥༣ མང་བ་བཏང་ཡོད་འདུག
དེར་མཚུངས་རྩིས་ལོ་ ༢༠༢༡ ནས་ ༢༠༢༢ ལོའི་སྔོན་རྩིས་བཀའ་འཁྲོལ་བྱུང་སོང་གི་གནས་སྟངས་ཐད་ལ། བོད་མིའི་སྒྲིག་འཛུགས་ཀྱི་རྒྱུན་གྲོན་དང་། དམིགས་བསལ། ཟུར་བཀོལ་བཅས་ཀྱི་མ་དངུལ་ཆེད་ཐོག་མའི་སྔོན་རྩིས་བཀའ་འཁྲོལ་དང་བར་བརྒལ་བཀའ་འཁྲོལ་སྐབས་ཁྱོན་བསྡོམས་བྱུང་འཆར་ཧིན་སྒོར་ས་ཡ་ ༣༧༠༩།༡༩ ཡི་བཀའ་འཁྲོལ་ཐོབ་ཡོད་པ་དང་། སོང་འཆར་ས་ཡ་ ༣༡༧༥།༥༤ ཡི་བཀའ་འཁྲོལ་ཐོབ་ཡོད་པ་བཅས། རྩིས་ལོར་འདིར་ཁྱོན་བསྡོམས་ལྷག་འཆར་ཧིན་སྒོར་ས་ཡ་ ༥༣༣།༦༥ ཡིན་ནའང་། ཟུར་བཀོལ་ལྷག་འཆར་ཁོངས་ཀྱི་ལས་གཞི་མང་ཆེ་བ་འཆར་ལོའི་ནང་ལག་བསྟར་བྱ་དགོས་པར་བརྟེན། མ་དངུལ་ལྷག་བསྡད་ངོ་མ་ཇི་ཡིན་གྱི་གནས་ཚུལ་རྣམས་སྔོན་རྩིས་གྲོས་ཚོགས་རྗེས་མའི་ནང་གསལ་འདོན་བྱ་རྒྱུ་ཡིན་སྐོར་འཁོད་འདུག
དཔལ་འབྱོར་བཀའ་བློན་མཆོག་ནས་སྔོན་རྩིས་གཏམ་སྤེལ་གྲུབ་རྗེས། སྤྱི་ལྷན་གྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་སོག་སྟོད་དངོས་གྲུབ་རྡོ་རྗེ་ལགས་ཀྱིས་ཚོགས་ཆུང་གི་སྙན་ཐོ་སྙན་སྒྲོན་ཞུས་པར། ཚོགས་ཆུང་ངོས་ནས་བོད་མིའི་སྒྲིག་འཛུགས་ཀྱི་སྔོན་རྩིས་ལ་ཞིབ་འཇུག་བྱས་ཏེ། རྩིས་ལོ་ ༢༠༢༢ ལོའི་ཕྱོགས་བསྡོམས་འགྲོ་གྲོན་གྱི་དགོས་དངུལ་ཧིན་སྒོར་ས་ཡ་ ༢༥༣༥།༡༣ འཆར་འབུལ་གནང་བ་དེ། རྩིས་ལོ་ ༢༠༢༡ ནས་ ༢༠༢༢ ལོའི་ཐོག་མའི་སྔོན་རྩིས་བཀའ་འཁྲོལ་གཏན་འབེབས་ཧིན་སྒོར་ས་ཡ་ ༢༦༩༨།༡༣ ལས་སྒོར་ས་ཡ་ ༡༦༢།༩༩ དང་བརྒྱ་ཆ་ ༦།༠༤ ཉུང་བ་བྱུང་འདུག་པ་དེའི་རྐྱེན་ཅི་ཡིན་ཞིབ་རྩད་བྱས་འདུག་ཅིང་། དེའི་ཐད་སྔོན་རྩིས་གཏམ་བཤད་ནང་། སྤྱི་ཚོགས་ཡར་རྒྱས་ཐེབས་རྩ་དང་། གངས་ལྗོངས་དཔལ་འབྱོར་ཞབས་ཞུ་ཁང་། ནང་སྲིད་བཅས་ཀྱི་བུན་གཏོང་ལས་གཞིའི་ཆེད་ཧིན་སྒོར་ས་ཡ་ ༣༢༨།༥ དངུལ་འབབ་རྣམས་འགྲོ་གྲོན་མིན་པས་འདི་ལོའི་ཕྱོགས་བསྡོམས་སྔོན་རྩིས་འཆར་འབུལ་ནས་གཅོག་འཐེན་བྱས་ཡོད་པ་དང་། དེ་བཞིན་ས་གནས་འཐུས་ཚོགས་མེད་པའི་ས་གནས་མགོ་འཛིན་ལས་ཁུངས་ ༥ དང་། ལྷོ་སྤྱི་ལས་ཁུངས་ཀྱི་འགྲོ་གྲོན་དགོས་དངུལ་བསྡོམས་ས་ཡ་ ༣༦།༤༤ དང་། འཕྲོད་བསྟེན་ལས་ཁུངས་ཀྱི་ཁྱབ་ཁོངས་མངོན་དགའ་སློབ་གྲྭ་དང་། སྨན་ཁང་ཁག་གསུམ་གྱི་འགྲོ་གྲོན་དགོས་དངུལ་བསྡོམས་སྒོར་ས་ཡ་ ༡༠།༣༢ བཅས་རྣམས་སྔོན་རྩིས་འཆར་འབུལ་ནང་ཚུད་མེད་པར་བརྟེན་ཉུང་དུ་ཆགས་ཡོད་སྐོར་འཁོད་འདུག
གསར་འགོད་པ། དཔལ་ལྡན་དང་པ་སངས་ཚེ་རིང་།
དཔལ་འབྱོར་བཀའ་བློན་མཆོག་ནས་སྔོ
