བསོད་ནམས་སྲི་གཅོད་ལགས་བོད་ཁྱིམ་སློབ་གྲྭའི་སྤྱི་ཁྱབ་འགན་འཛིན་དུ་བསྐོ་གཞག་བྱུང་།

དེ་རིང་དྷ་སྟེང་བོད་ཁྱིམ་དུ་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་གསར་རྙིང་འཕོ་ལེན་གྱི་མཛད་སྒོ་ཞིག་ཚོགས་པ་དང་བསྟུན། བསོད་ནམས་སྲི་གཅོད་ལགས་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་གསར་བར་བསྐོས་པ་ཡོངས་བསྒྲགས་གནང་སོང་།

དེ་རིང་རྡ་སྟེང་བོད་ཁྱིམ་སློབ་གྲྭར་བོད་ཁྱིམ་སྤྱི་ཁྱབ་གཙོ་འཛིན་གསར་རྙིང་འཕོ་ལེན་གྱི་མཛད་སྒོ་འཚོགས་སོང་བ་དང་། མཛད་སྒོའི་ཐོག་དྷ་སྟེང་བོད་ཁྱིམ་གྱི་དགེ་ལས་ཡོངས་ཚང་འཛོམས་སྐབས་བོད་ཁྱིམ་སྤྱི་ཁྱབ་འགན་འཛིན་འཕོ་འགྱུར་བ་རྒན་ཐུབ་བསྟན་རྡོ་རྗེ་ལགས་ཀྱིས། ལོ་ངོ་ ༤༨ རིང་ལ་རྗེ་བཙུན་པདྨ་ལགས་ཀྱི་འོག་ལ་ཞབས་ཕྱི་ཞུ་རྒྱུ་བྱུང་བ་དེ་སྐལ་བ་བཟང་པོ་ཡིན་པ་དང་། ངའི་མི་ཚེའི་ནང་བརྗེད་ཐབས་མེད་པ་ཞིག་རེད་བསམ་གྱི་འདུག དེར་བརྟེན་དེ་རིང་ང་རང་བགྲེས་ཡོལ་ལ་ཐོན་པའི་སྐབས། རྣམ་པ་ཚོས་ཕྱག་རྟགས་གནང་བར་བཀའ་དྲིན་ཆེ་ཞུ་རྒྱུ་ཡིན། འདས་པའི་ལོ་ངོ་ ༦༠ ནང་བོད་ཕྲུག་ཁྱིམ་སྡེ་འདི་གཙོ་བོ་༧གོང་ས་མཆོག་གི་ཐུགས་རྗེ་བཀའ་དྲིན་དང་ཨ་མ་རྗེ་བཙུན་པདྨ་ལགས་ཀྱིས་སྐུ་ཚེ་ཧྲིལ་པོར་སྐུ་ལས་བསྐྱོན་ཡོད་པ་རེད། ང་ཚོའི་བོད་ཕྲུག་ཁྱིམ་སྡེ་འདི་རང་ཁ་རང་གསོ་ཐུབ་རྒྱུའི་འབད་བརྩོན་གནང་དགོས་རེད། འོན་ཀྱང་འདས་པའི་ལོ་ ༥ ལས་ལྷག་ཙམ་ཞིག་མུ་མཐུད་ནས་ཕྱིའི་རོགས་དངུལ་ལ་བསྟུན་དགོས་པ་ཞིག་ཆགས་ཀྱི་རེད། དེར་བརྟེན་དེའི་ཐོག་ལ་ཤུགས་བརྒྱག་དགོས་ཀྱི་འདུག ད་དུང་ང་ཚོ་བོད་མི་རིགས་ཤིག་ཡིན་པ་དང་ཤེས་ཡོན་གྱི་བསྟི་གནས་ཤིག་ཡིན་པར་བརྟེན། སོ་སོའི་སྐད་ཡིག་དེ་གལ་ཆེན་པོ་རེད། ང་ཚོ་བོད་པའི་སྤྱི་ཚོགས་ནང་ཁེ་ལས་པའི་ཐོག་ལ་ཤུགས་རྒྱག་དགོས་ཀྱི་འདུག ང་ཚོ་བོད་མི་རིགས་དེ་དག་གསོན་དང་འཆི་བའི་དུས་ལ་བསླེབས་ཀྱི་ཡོད་པས། སྐད་ཡིག་བརླག་ན་ངོ་བོ་བརླག་གི་ཡོད་པར་བརྟེན། བོད་ཕྲུག་ཁྱིམ་སྡེ་འདི་ཤེས་ཡོན་གྱི་བསྟི་གནས་གཞི་རྒྱ་ཆེ་ཤོས་ཡིན་པའི་ཆ་ནས་སྐད་ཡིག་གི་ཐོག་ལ་ཤུགས་རྒྱག་དགོས་རྒྱུ་གལ་ཆེན་པོར་མཐོང་གི་ཡོད་སྐོར་སོགས་བརྗོད་སོང་།

དེ་ནས་བོད་ཁྱིམ་སྤྱི་ཁྱབ་འགན་འཛིན་གསར་པ་བསོད་ནམས་སྲི་གཅོད་ལགས་ཀྱིས། ང་ཚོ་ཚོགས་པ་གཅིག་དང་བོད་མི་ཡིན་པ། དེ་བཞིན་བོད་ཕྲུག་ཁྱིམ་སྡེའི་ནང་མཉམ་ཟ་མཉམ་འཐུང་བྱེད་མཁན་གྱི་ལས་བྱེད་དང་སློབ་ཕྲུག་གཅིག་གྱུར་ཡིན་པའི་ཆ་ནས། ང་ཚོའི་འཆར་སྣང་གང་ཡིན་པ་དང་བོད་ཕྲུག་ཁྱིམ་སྡེའི་སྒྲུབ་བྱེད་ཀྱི་དགོས་དམིགས་ཡོད་པ་དེ་ང་ཚོས་དུས་ནས་དུས་སུ་སློབ་སྦྱོང་བྱ་དགོས་པ་དང་དྲན་དགོས་པ་ཞིག་དང་། དུས་ནས་དུས་སུ་འདི་གཞི་ལ་བཞག་པའི་ཐོག་ནས་ལས་ཀ་ཚགས་ཚུད་འགྲོ་ཡི་ཡོད་མེད་ཐོག་ལ་ཐུགས་སྣང་གནང་དགོས་པ་རེད། ང་ཚོའི་སྒྲུབ་བྱེད་དམིགས་ཡུལ་མང་པོ་ཡོད་པའི་ནང་ནས། དེང་དུས་ཀྱི་ཤེས་ཡོན་སློབ་སྦྱོང་སྤྲོད་དགོས་པ་དང་རང་མི་རིགས་ཀྱི་སྐད་ཡིག་དང་རིག་གཞུང་། གོམས་སྲོལ་རྒྱུད་འཛིན་བྱ་རྒྱུ་དང་དེ་ལ་སློབ་སྦྱོང་བྱ་དགོས་ཀྱི་ཡོད་པ་དེ་གཙོ་བོ་ཆགས་ཀྱི་ཡོད་པ་རེད། དེ་བཞིན་བོད་ཕྲུག་ཁྱིམ་སྡེ་ནས་འཚར་ལོངས་བྱུང་མཁན་སུ་འདྲ་ཞིག་ཡིན་རུང་ཡིག་ཚད་འབྲི་ཀློག་ཙམ་མིན་པར་རང་རྐྱ་འཕེར་བ་བྱ་དགོས་ཀྱི་ཡོད་པ་རེད། ད་དུང་རང་ཙམ་མིན་པར་སྤྱི་ཚོགས་དང་འཛམ་གླིང་སྤྱི་ལ་ཕན་པའི་ཞབས་འདེགས་ཞུ་ཐུབ་རྒྱུའི་མི་བཟང་པོ་དང་ལྷག་བསམ་ལྡན་པ་ཞིག་ཆགས་དགོས་ཀྱི་ཡོད། ཅེས་དང་ང་ཚོ་མི་ཡིན་པའི་ཆ་ནས་མི་ཕན་ཚུན་ཡིད་ཆེས་དང་དམ་བཅའ་དགོས་ལ། དམིགས་ཡུལ་དང་བློ་སྟོབས་ཡོད་པ་གཞིར་བཟུང་གིས་འགན་འཁྲི་དགོས་པ་དང་ཚང་མས་འགན་འཁུར་བའི་ཐོག་ནས་སྐད་ཡིག་དང་དེང་དུས་ཀྱི་ཤེས་ཡོན་ཐོག་ལ་ཤུགས་བརྒྱག་དགོས་ཀྱི་ཡོད་སྐོར་སོགས་བརྗོད་སོང་།

གསར་དུ་བསྐོ་གཞག་བྱུང་བའི་བོད་ཁྱིམ་སྤྱི་ཁྱབ་འགན་འཛིན་བསོད་ནམས་སྲི་གཅོད་ལགས་ནི་བོད་ཁྱིམ་སློབ་གྲྭའི་སློབ་ཕྲུག་ཟུར་པ་ཞིག་ཡིན་པ་དང་། ཕྱི་ལོ་ ༡༩༨༤ ནས་ ༡༩༩༤ བར་ཁོང་གིས་རྡ་སྟེང་བོད་ཁྱིམ་སློབ་གྲྭའི་རྩིས་རིག་དགེ་རྒན་གྱི་ཕྱག་ལས་གནང་ཡོད་པ་དང་། ཕྱི་ལོ་ ༡༩༩༦ ནས་ ༢༠༡༢ བར་སུ་ཇཱ་བོད་ཁྱིམ་སློབ་གྲྭའི་སློབ་སྤྱིའི་ལས་གནས་གཉེར། ཕྱི་ལོ་ ༢༠༡༣ ནས་ ༢༠༡༤ བར་སུ་ཇཱ་བོད་ཁྱིམ་སློབ་གྲྭའི་ངེས་སྟོན་པའི་ཕྱག་ལས་གནང་། དེ་བཞིན་ཕྱི་ལོ་ ༢༠༡༥ ནས་ཤེས་ཡོན་འགན་འཛིན་གྱི་ཕྱག་ལས་གནང་ཡོད་པ་རེད།