སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་དྲ་ཐོག་འཛིན་སྐྱོང་གི་ལས་གཞི་གློག་འཕྲུལ་ཡིག་ཚགས་ཞེས་པ་དབུ་འབྱེད་གནང་བ་དང་བསྟུན། ཕྱི་ལོ་ ༡༩༥༩ ནས་ ༢༠༢༢ བར་གྱི་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ཡིག་ཚགས་ཡོངས་དྲ་ལམ་དུ་ཉར་ནས་བོད་མིའི་སྒྲིག་འཛུགས་ཕྱོགས་ཡོངས་ནས་དྲ་ཐོག་འཛིན་སྐྱོང་གི་གཞུང་ཞིག་ཏུ་བསྒྱུར་རྒྱུ་ཡིན་པ་རེད།
དེ་རིང་སྔ་དྲོའི་ཆུ་ཚོད་ ༩ ། ༡༥ སྟེང་གངས་སྐྱིད་སྲིད་སྐྱོང་ཚོགས་ཁང་དུ་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ལས་དོན་དང་འབྲེལ་བའི་ཡིག་ཚགས་ཡོངས་གློག་འཕྲུལ་ཡིག་ཚགས་ (e-filing) ལམ་ལུགས་ཅན་དུ་བསྒྱུར་རྒྱུའི་ལས་གཞི་དབུ་འཛུགས་ཞུས་པ་དངོས་སུ་དབུ་འབྱེད་གནང་སོང་བ་དང་། མཛད་སྒོའི་སྟེང་སྲིད་སྐྱོང་སྤེན་པ་ཚེ་རིང་མཆོག་གཙོ་བྱས་པའི་བཀའ་བློན་རྣམ་པ་དང་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་བཅས་འཛོམས་འདུག
སྐབས་དེར་བོད་མིའི་སྒྲིག་འཛུགས་ཀྱི་གློག་ཀླད་སྡེ་ཚན་གྱི་འགན་འཛིན་ལེགས་བཤད་ལགས་ཀྱིས། ད་སྔ་བར་དབུས་ས་གཉིས་བར་དྲ་ལམ་བརྒྱུད་ཡིག་འབྲེལ་གནང་གི་ཡོད་པ་ལས། དབུས་ལྷན་ཁང་ཁག་གི་བར་ཡིག་འབྲེལ་གནང་གི་མེད་སྟབས། སྲིད་སྐྱོང་མཆོག་ནས་ལམ་སྟོན་གནང་བ་ལྟར། དྲ་ཐོག་འཛིན་སྐྱོང་(E-government)གི་ཆ་ཤས་ཀྱི་ཐོག་ནས་དབུས་ལྷན་ཁང་ཁག་གི་བར་ཤོག་གི་བེད་སྤྱོད་ཉུང་ཙམ་བཏང་ནས་དྲ་ལམ་ཅན་དང་དྲ་མཛོད་ཅན་དུ་བསྒྱུར་དགོས་པའི་བཀའ་ཕེབས་པ་གཞིར་བཟུང་། ཕྱི་དྲིལ་གློག་ཀླད་སྡེ་ཚན་གྱིས་འགན་ཁུར་ཡོད་སྐོར་བརྗོད་པ་དང་འབྲེལ། སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་གློག་འཕྲུལ་ཡིག་ཚགས་ཀྱི་ལས་གཞི་དངོས་སུ་དབུ་འབྱེད་གནང་སོང་།
སྐབས་དེར་སྲིད་སྐྱོང་མཆོག་གིས། དེ་རིང་ང་ཚོ་དེང་དུས་དང་མཐུན་པའི་གོམ་པ་ཞིག་རྒྱག་གི་ཡོད། དེ་རིང་ནས་བཟུང་བོད་མིའི་སྒྲིག་འཛུགས་ཀྱིས་དྷ་རམ་ས་ལ་ནང་ཁུལ་གྱི་ཡི་གེ་ཚང་མ་དྲ་ཐོག་ནས་གཏང་རྒྱུ་དང་། སྔོན་མ་འཆར་གཞི་ཡོད་པ་གཞིར་བཟུང་དྲ་ཐོག་འཛིན་སྐྱོང་གི་ལས་གཞི་འདི་རྒྱ་ཆེན་པོ་ཞེ་དྲགས་རེད། དེའི་ནང་ལོགས་ནས་ཆ་ཤས་གཅིག་ནི་ང་ཚོ་ཕན་ཚུན་ཡིག་འབྲེལ་བྱེད་བཞིན་པ་ཚང་མ་དྲ་ཐོག་ཏུ་ཉར་རྒྱུ་དང་། གཅིག་ནི་ཕྱི་ལོ་ ༡༩༥༩ ནས་ ༢༠༢༢ བར་གྱི་ཡིག་ཚགས་དང་དེ་སྔ་བཀའ་ཤག་སྐབས་བཅུ་གསུམ་པས་ལྷན་ཁང་ཁག་ནས་བསྡུ་རུབ་ཀྱིས། ད་ལྟ་ཆོས་རིག་ལས་ཁུངས་ཀྱི་ལོ་རྒྱུས་ཚན་པའི་འགན་འཁུར་འོག་དབྱེ་གསེས་ཀྱི་ལས་རིམ་འགྲོ་བཞིན་པ་དེ་རེད། དེའི་ཐོག་འབྲེལ་ཡོད་རྣམ་པ་ཚོས་སྐུ་ལས་བསྐྱོན་ཡོད། འོན་ཀྱང་། ད་དུང་ཡང་ཚད་དང་ལྡན་པ་ཞིག་ཡོང་ཁག་པོ་ཆགས་འདུག་སྟབས། ལས་གཞི་དེ་མར་སྣེ་ལེན་ཁང་དུ་སྤར་ནས་སྣེ་ལེན་ཁང་གི་ས་ཆའི་ཆ་ཤས་ཤིག་བེད་སྤྱོད་བཏང་ནས་ཕྱི་ལོ་ ༡༩༥༩ ནས་ ༢༠༢༢ བར་གྱི་ཡིག་ཚགས་ཁག་པར་ལེན་དང་འདྲ་བཤུས་བརྒྱག་རྒྱུ་ཡིན་པ་མ་ཟད། དེ་དག་དབྱེ་གསེས་ཀྱིས་མ་འོངས་པར་ཡིག་ཆ་རིགས་འཚོལ་དགོས་བྱུང་ཚེ་སྟབས་བདེ་ངང་འཚོལ་ཐུབ་ཐབས་བཟོ་རྒྱུ་ཡིན། ཞེས་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས་གསུངས་པ་ལྟར་ན། བོད་མིའི་སྒྲིག་འཛུགས་ཀྱི་དྲ་ཐོག་འཛིན་སྐྱོང་དང་འབྲེལ་བའི་གློག་འཕྲུལ་ཡིག་ཚགས་དང་ཡིག་འབྲེལ། ཕྱི་ལོ་ ༡༩༥༩ ནས་ ༢༠༢༢ བར་གྱི་བོད་མིའི་སྒྲིག་འཛུགས་ཀྱི་ལྷན་ཁང་གི་ཡིག་ཚགས་རྣམས་དྲ་མཛོད་དུ་ཉར་ཚགས་བྱ་རྒྱུའི་ལས་གཞི་དེ་མ་མཐར་ལོ་ ༣ ནས་ ༥ བར་གྱི་ལས་གཞི་ཡིན་པ་དང་། ད་སྔ་བར་གྱི་བོད་མིའི་སྒྲིག་འཛུགས་ཀྱི་དབུས་ལྷན་ཁང་ཁག་ཡོངས་ཀྱི་ཡིག་ཆ་རྣམས་པར་ལེན་པ་དང་འདྲ་བཤུས་རྒྱག་པ། དེ་བཞིན་དབྱེ་གསེས་སོགས་བྱས་ཏེ། མ་འོངས་པར་སྟབས་བདེ་ངང་འཚོལ་ཐུབ་ཐབས་སུ་དྲ་མཛོད་དུ་ཉར་རྗེས། ས་གནས་ཁག་གི་ལས་ཁུངས་དང་ལྷན་ཁང་གལ་ཆེན་དག་གི་ཡིག་ཚགས་རིགས་དྲ་ལམ་དུ་ཉར་རྒྱུ་ཡིན་པ་རེད་ལ། མི་རིང་བར་ས་གནས་མགོ་འཛིན་ལས་ཁུངས་དང་དོན་གཅོད་ཁང་ཁག་ནས་ཀྱང་དྲ་ཐོག་ཡིག་འབྲེལ་དང་གློག་འཕྲུལ་ཡིག་ཚགས་ཀྱི་ལས་གཞི་དེའི་ནང་ཆ་ཤས་བླངས་ཏེ། བོད་མིའི་སྒྲིག་འཛུགས་ཕྱོགས་ཡོངས་ནས་དྲ་ཐོག་འཛིན་སྐྱོང་ཅན་དུ་བསྒྱུར་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
