རྒྱ་ནག་གཞུང་ནས་༧པཎ་ཆེན་རིན་པོ་ཆེ་མཆོག་གིས་མི་སེར་དཀྱུས་མའི་འཚོ་བ་རོལ་བཞིན་ཡོད་ཅེས་བསྐྱར་དུ་བསྒྲགས་འདུག

༧ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་སྐུའི་འཁྲུངས་སྐར་དང་བསྟུན་བོད་མིའི་སྒྲིག་འཛུགས་ཀྱིས་གཙོས་ཨ་རིའི་གཞུང་དང་རྒྱལ་སྤྱིའི་ཚོགས་སྡེ་ཁག་ནས་རིན་པོ་ཆེ་མཆོག་འཕྲལ་དུ་ཀློད་གྲོལ་དགོས་པའི་འབོད་སྐུལ་གནང་བཞིན་ཡོད་པ་དེར་རྒྱ་ནག་གཞུང་གིས་ལན་འདེབས་འགྲེལ་ལོག་བརྒྱབ་འདུག

ཁ་སང་ཕྱི་ཚེས་ ༢༦ ཉིན་རྒྱ་ནག་གཞུང་གིས་གསར་འགོད་གསལ་བསྒྲགས་ཤིག་གི་སྟེང་། གསར་འགོད་པའི་དྲི་བར་ལན་འདེབས་བྱེད་སྐབས། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་ (Wang Wenbin) ཟེར་བ་དེས། ཨ་རིའི་ཕྱོགས་ཀྱིས་ཆོས་དད་རང་དབང་གི་མིང་ཐོག་ནས་བོད་དང་འབྲེལ་བའི་རྒྱ་ནག་གི་ནང་སྲིད་ལ་ཐེ་བྱུས་བྱེད་བཞིན་པར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། རྒྱ་ནག་གཞུང་གིས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ལམ་ལུགས་ལ་བརྩི་བཀུར་དང་སྲུང་སྐྱོབ་ཀྱིས་མཚོན་པའི་ཆོས་དད་རང་དབང་གི་སྲིད་ཇུས་ལག་བསྟར་བྱེད་མུས་ཡིན་ཞིང་། དུས་རབས་མང་པོའི་རིང་ནས་༧ཏཱ་ལའི་བླ་མ་དང་༧པཎ་ཆེན་ཨེར་ཏི་ནི་གཙོས་པའི་སྤྲུལ་སྐུ་གཞན་རྣམས་ཀྱི་ཡང་སྲིད་ཐད་ཀྱི་བརྒྱུད་རིམ་དང་ཐབས་ལམ་ཡོངས་སུ་རྫོགས་པ་གཏན་འབེབ་བྱས་ཡོད། དེར་ཆོས་ལུགས་ཀྱི་ཆོ་ག་དང་སྲོལ་རྒྱུན། དེ་བཞིན་རྒྱ་ནག་གི་ཁྲིམས་སྒྲིག་ཁག་ཀྱང་སྐབས་བསྟུན་ལག་བསྟར་བྱ་དགོས་པ་ཡིན། ཞེས་བརྗོད་འདུག་ལ། ༧གོང་ས་མཆོག་གིས་ཆོས་ལུགས་ཀྱི་ཆོ་ག་དང་སྲོལ་རྒྱུན་གྱི་ལམ་ལུགས་རྣམས་རྩིས་མེད་ཀྱིས་རྒྱ་ནག་ཁ་བྲལ་གྱི་ཆབ་སྲིད་ཁེ་ཕན་སྒྲུབ་ཆེད་ཕྲུ་གུ་ཞིག་༧པཎ་ཆེན་རིན་པོ་ཆེའི་ཡང་སྲིད་དུ་ངོས་འཛིན་གནང་ཡོད་ཚུལ་དང་། དེ་ནི་ཁྲིམས་འགལ་ཞིག་དང་ངོས་འཛིན་བྱེད་ཐབས་མེད་པ་ཞིག་ཡིན་སྐོར་ལན་འདེབས་འཁྱོག་བརྗོད་བྱས་ཡོད་འདུག

ཟླ་འདིའི་ཕྱི་ཚེས་ ༢༥ ཉིན་༧ཀུན་གཟིགས་པཎ་ཆེན་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་སྐུའི་འཁྲུངས་སྐར་དང་བསྟུན་ཨ་རིའི་ཕྱི་སྲིད་ལྷན་ཁང་གིས་ཡིག་ཐོག་ནས་ཡོངས་ཁྱབ་བསྒྲགས་གཏམ་ཞིག་སྤེལ་ཡོད་པའི་ནང་། རྒྱ་ནག་གཞུང་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་དགུང་ལོ་ ༦ ལ་སོན་པའི་པཎ་ཆེན་སྐུ་ཕྲེང་བཅུ་གཅིག་པ་བཙན་ཁྲིད་བྱས་ཏེ་ད་བར་གར་སོང་ཆ་མེད་ཡིན་པ་མ་ཟད། རྒྱ་ནག་གཞུང་གིས་མུ་མཐུད་༧གོང་ས་མཆོག་གིས་ངོས་འཛིན་གནང་པའི་པཎ་ཆེན་རིན་པོ་ཆེ་མཆོག་དང་བོད་མི་དབར་ལ་མཇལ་འཕྲད་བྱ་རུ་འཇུག་གི་མེད་པར། ཁོ་ཚོས་བསྐོ་གཞག་བྱས་པའི་པཎ་ཆེན་དེ་ཉིད་ཁྱབ་བསྒྲགས་བྱེད་བཞིན་པ་རེད། ཅེས་དང་། ང་ཚོས་རྒྱ་ནག་གཞུང་ལ་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ད་ལྟ་གང་དུ་ཡོད་མེད་དང་སྐུའི་འཕྲོད་བསྟེན་ཇི་ཡིན་གྱི་གནས་ཚུལ་རྣམས་ཕྱིར་བསྒྲགས་བྱ་དགོས་པ་མ་ཟད། རྒྱ་ནག་གཞུང་གིས་རྒྱལ་སྤྱིའི་ཐོག་བཞག་པའི་ཁས་ལེན་དམ་བཅའ་གཞིར་བཟུང་། ཁོང་ལ་འགྲོ་བ་མིའི་ཐོབ་ཐང་དང་གཞི་རྩའི་རང་དབང་རྣམས་ལོངས་སུ་སྤྱོད་འཇུག་དགོས་པའི་སྐུལ་འདེབས་ཞུ་ཡི་ཡོད། ཨ་རིའི་གཞུང་ངོས་ནས་བོད་མིའི་ཆོས་དད་རང་དབང་དང་། ཐུན་མོང་མ་ཡིན་པའི་ཆོས་རིག་དང་སྐད་ཡིག་གི་ངོ་བོ། དེ་བཞིན་བོད་མིར་རང་ཆས་སུ་ཡོད་པའི་༧གོང་ས་མཆོག་དང་༧པཎ་ཆེན་རིན་པོ་ཆེ་མཆོག་ལྟ་བུའི་དབུ་འཁྲིད་རྣམས། སྲིད་གཞུང་གི་ཐེ་གཏོག་མེད་པར་རང་གི་དད་པ་གཞིར་བཟུར་འདེམས་སྒྲུག་དང་ཤེས་ཡོན་སྤྲོད་རྒྱུ་བཅར་པར་རྒྱབ་སྐྱོར་བྱེད་ཀྱི་ཡོད། ཅེས་འཁོད་ཡོད་འདུག

རྒྱ་ནག་གཞུང་གིས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་སྐོར་ལ་ལན་འདེབས་བྱེད་སྐབས། རྒྱུན་དུ་༧པཎ་ཆེན་ཡང་སྤྲུལ་ཡིན་ཟེར་བའི་ཕྲུ་གུ་དེ་ད་ལྟའི་ཆར་རྒྱུན་གཏན་གྱི་འཚོ་བ་རོལ་བཞིན་པའི་རྒྱ་ནག་གི་མི་སེར་དཀྱུས་མ་ཡིན་ཚུལ་དང་། ཁོང་དང་ཁོང་གི་ནང་མི་རྣམས་ཀྱིས་ཁོ་ཚོའི་འཚོ་བ་ལ་གཞན་གྱིས་སུན་པོ་བཟོ་འཇུག་འདོད་མེད་ཚུལ་རྒྱལ་སྤྱིའི་ཐོག་ཐེངས་འགར་བསྒྲགས་མྱོང་ཡོད་པ་དང་། ད་ལན་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་སྐུའི་འཁྲུངས་སྐར་དང་བསྟུན་རྒྱལ་སྤྱིའི་ཐོག་ནས་ཁོང་གང་དུ་ཡོད་མེད་སོགས་ཀྱི་གནད་དོན་གླེང་སློང་ཤུགས་ཆེན་བྱེད་བཞིན་ཡོད་པར་བརྟེན། རྒྱ་གཞུང་གི་མགྲིན་ཚབ་པ་དེས་ལན་འདེབས་བསྐྱར་ཟློས་བྱས་ཡོད་འདུག འདས་པའི་ལོ་ངོ་ ༢༧ རིང་བོད་གཞུང་མང་གཉིས་ཀྱིས་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག་ལ་༧པཎ་ཆེན་རིན་པོ་ཆེ་མཆོག་དང་ཁོང་གི་སྐུ་འཁོར་རྣམས་ཀློད་གྲོལ་ཡོང་ཐབས་ཆེད་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་རིམ་པར་བྱས་ཡོད་ཀྱང་། རྒྱ་ནག་གཞུང་ངོས་ནས་ཁོང་མཐོ་སློབ་ནས་བསླབ་པ་མཐར་སོན་ཡོད་ལུགས་དང་མི་སེར་དཀྱུས་མ་ཞིག་གི་འཚོ་བ་རོལ་བཞིན་ཡོད་ཚུལ་བརྗོད་པ་ཙམ་ལས་གནས་ཚུལ་ཁུངས་ལྡན་དང་གསལ་ཁ་ཅན་གང་ཡང་བརྗོད་མེད་པ་རེད།

དེ་ཡང་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་བཙན་འཁྲིད་བྱས་རྗེས། ལོ་དེའི་ཟླ་ ༥ ཚེས་ ༢༨ ཉིན་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐོབ་ཐང་གི་ཚོགས་ཆུང་ (Committee on the Rights of the Child) ངོས་ནས་རྒྱ་ནག་གཞུང་ལ་ཁོང་གང་དུ་ཡོད་མེད་སྐོར་འདྲི་རྩད་བྱས་ཡོད་ཅིང་། སྐབས་དེར་རྒྱ་ནག་གཞུང་གིས་ཁོང་ཁ་བྲལ་རིང་ལུགས་པས་བཙན་འཁྲིད་བྱ་རྒྱུའི་ཉེན་ཁ་ཡོད་པ་དང་། ཁོང་གི་བདེ་འཇགས་ལ་ཉེན་ཁ་ཡོད་སྟབས་རྒྱ་ནག་གཞུང་གིས་སྲུང་སྐྱོབ་བྱེད་མུས་ཡིན་སྐོར་གྱི་འགྲེལ་བརྗོད་བྱས།

ཕྱི་ལོ་ ༢༠༠༧ ཟླ་ ༥ པའི་ནང་པཱ་ཀི་སི་ཐན་ནས་ཡིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཆོས་དད་རང་དབང་ཐད་ཀྱི་དམིགས་བསལ་སྙན་སྒྲོན་པ་ལྕམ་ཨ་སི་མ་ཇ་ཧན་གྷིར་ (Asma Jahangir) ལགས་ཀྱིས་རྒྱ་ནག་གཞུང་ལ་རང་དབང་ཅན་གྱི་ཆེད་མཁས་མི་སྣ་ཞིག་ལ་༧པཎ་ཆེན་རིན་པོ་ཆེ་མཆོག་མཇལ་འཕྲད་ཞུ་རྒྱུའི་ཆོག་མཆན་སྤྲོད་དགོས་པའི་སྐུལ་འདེབས་གནང་ཡོད་ནའང་། ལོ་དེའི་ཟླ་ ༧ ཚེས་ ༡༧ ཉིན་རྒྱ་ནག་གཞུང་གིས་བརྡ་ལན་གྱི་ཚུལ་དུ། དགེ་འདུན་ཆོས་ཀྱི་ཉི་མའི་འཕྲོད་བསྟེན་ཧ་ཅང་ལེགས་པོ་ཡོད་པ་མ་ཟད། རྒྱུན་གཏན་གྱི་འཚོ་བ་སྐྱིད་པོ་རོལ་བཞིན་ཡོད་པ། ཤེས་ཡོན་ཆ་ཚང་ཐོབ་ཀྱི་ཡོད་སྐོར་དང་། ད་ལྟའི་ཆར་མཐོ་འབྲིང་སློབ་གྲྭ་འགྲིམ་བཞིན་ཡོད་པ་དང་། སྐུ་གཟུགས་ཀྱི་རིང་ཚད་ ༡༦༥ (cm) ཡོད་པ། སློབ་སྦྱོང་གི་ཐོག་ལ་སྦྱང་བརྩོན་ཆེན་པོ་ཡོད་པ་མ་ཟད་གྲུབ་འབྲས་ཀྱང་ཧ་ཅང་ལེགས་པོ་ལོན་གྱི་ཡོད་ཚུལ། རྒྱ་ནག་གི་སྲོལ་རྒྱུན་རིག་གཞུང་ལ་མཉེས་པོ་ཡོད་པ་མ་ཟད། ཉེ་བའི་ཆར་ཡིག་གཟུགས་འབྲི་རྩལ་ལ་ཞུགས་ཡོད་པ་དང་། ཁོང་གི་ཕ་མ་གཉིས་ཀ་གཞུང་གི་ལས་བྱེད་ཡིན་ཞིང་། ཁོང་གི་མིང་སྲིང་རྣམས་ལས་ཀ་བྱེད་བཞིན་པའམ་མཐོ་སློབ་འགྲིམ་བཞིན་ཡོད་སྐོར་འགྲེལ་བརྗོད་བྱས་ཡོད་པ་མ་ཟད། ཁོང་དང་ནང་མི་སྐུ་འཁོར་རྣམས་བཙན་འཁྲིད་བྱས་པ་རེད་ཟེར་བ་དེར་གཞི་རྩ་གང་ཡང་མེད་སྐོར་བསྒྲགས་ཡོད་པ་རེད།

དེ་བཞིན་ཕྱི་ལོ་ ༢༠༡༥ ལོར་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་གིས་སློབ་སྦྱོང་བྱེད་མུས་ཡིན་པ་མ་ཟད། རྒྱུན་གཏན་གྱི་འཚོ་བ་རོལ་བཞིན་ཡོད་པ་དང་། མི་གཞན་གྱིས་ཁོང་སྒེར་གྱི་འཚོ་བར་ཐེ་བྱུས་བྱ་རྒྱུར་འདོད་པ་གནང་གི་མེད་སྐོར་འགྲེལ་བརྗོད་བྱས་ཡོད་པ་རེད། ཕྱི་ལོ་ ༢༠༡༨ ལོའི་ཟླ་ ༤ པའི་ཚེས་ ༢༥ ཉིན་་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་དྷ་སའི་འདབས་ཀྱི་གྷ་གྷལ་གནམ་ཐང་དུ་གསར་འགོད་པའི་དྲི་བར་བཀའ་ལན་གནང་སྐབས། ཁུངས་ལྡན་གྱི་གནས་ཚུལ་ལྟར་ན་༧པཎ་ཆེན་རིན་པོ་ཆེ་མཆོག་ད་ལྟ་སྐུ་འཚོ་བཞུགས་ཡིན་པ་དང་། རྒྱུན་ལྡན་གྱི་ཤེས་ཡོན་ཐོབ་བཞིན་ཡོད་སྐོར་གསུངས་ཡོད་པ་རེད།

གསར་འགོད་པ། པ་སངས་ཚེ་རིང་།