རྒྱ་ནག་གཞུང་གིས་སྤྱི་སྐད་ཟེར་ནས་བོད་ཀྱི་བྱིས་གཉོར་ཁང་ནས་སློབ་གྲྭ་ཁག་གི་བསླབ་གཞི་ཚང་མར་རྒྱ་ཡིག་སྤྱོད་ཀྱི་ཡོད་པའི་གནས་སྟངས་འོག བོད་ཀྱི་སྐད་ཡིག་རིག་གཞུང་དང་བཅས་པ་རྩ་གཏོར་གྱི་སྲིད་ཇུས་ཤིག་ལག་བསྟར་བྱེད་བཞིན་ཡོད་སྐོར་གྱི་དམིགས་བསལ་སྙན་ཐོ་ཞིག་འདོན་སྤེལ་གནང་སོང་།
དེ་རིང་སྔ་དྲོའི་ཆུ་ཚོད་ ༡༠ སྟེང་བོད་མིའི་སྒྲིག་འཛུགས་ཀྱི་འགྲེམས་སྟོན་ཁང་གསར་བའི་ནང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་ཨེ་ཤ་ཡའི་གཟི་བརྗིད་སྣེ་ཁྲིད་ཚོགས་པ་གཉིས་མཉམ་འབྲེལ་གྱིས་བསྒྲུབས་པའི་༼ང་ཚོའི་རུང་རྐང་འཇིབས་སོང་། ཞི་ཅིན་ཕིང་གི་དབང་འོག་གི་བོད་ཀྱི་སྐད་ཡིག་དང་ཤེས་ཡོན་གྱི་ཐོབ་ཐང་༽ཞེས་པའི་ཆེད་དོན་སྙན་ཐོ་ཞིག་འགྲེམས་སྤེལ་གནང་བའི་གསར་འགོད་གསལ་བསྒྲགས་བསྐོངས་སོང་བ་དང་། གསར་འགོད་གསལ་བསྒྲགས་སྟེང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་དང་ཉམས་ཞིབ་པ་ཉི་འོད་ལགས། དྲ་ལམ་བརྒྱུད་ཨེ་ཤ་ཡའི་གཟི་བརྗིད་སྣེ་འཁྲིད་ཚོགས་པའི་འགན་འཛིན་ (Eunsik Kang) ལགས་བཅས་ཀྱིས་གཏམ་བཤད་བསྡུས་པ་རེ་གནང་སོང་བ་མ་ཟད། སྙན་ཐོ་དང་འབྲེལ་བའི་སྐར་མ་ལྔ་ཅན་གྱི་བརྙན་ཐོ་ཞིག་ཀྱང་གཟིགས་འབུལ་ཞུས་སོང་།
སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། བོད་ཀྱི་འགྲོ་བ་མིའི་ཐོབ་ཐང་གི་དམིགས་བསལ་སྙན་ཐོ་དེ་ནི་འདས་ལོའི་ཕྱི་ཟླ་ ༧ ནས་མགོ་འཛུགས་བྱས་པ་ཞིག་ཡིན་པ་དང་། སྙན་ཐོ་དེ་འདོན་སྤེལ་གནང་བར་དུས་ཡུན་རིང་པོ་འགོར་རྐྱེན་ནི། མི་མང་པོར་འབྲེལ་བ་གནང་དགོས་པ་དང་། ཞིབ་འཇུག་ཚད་ལྡན་དགོས་པ་སོགས་ཀྱི་རྒྱུ་མཚན་ལ་བརྟེན་ནས་ཡིན་སྐོར་དང་། ཕྱི་ལོ་ ༢༠༡༦ ལོ་ནས་རྒྱ་ནག་གིས་བོད་ཐོག་འཛིན་པའི་སྲིད་ཇུས་སྔར་ལྷག་གིས་དམ་དུ་ཕྱིན་ཏེ། ད་ཆ་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་སྲིད་ཇུས་དག་ཐད་ཀར་བོད་ཀྱི་རིག་གཞུང་དང་ངོ་བོ་སོགས་བོད་མི་རིགས་རྩ་གཏོར་གཏོང་ཐབས་ཀྱི་སྲིད་ཇུས་ཤིག་ཆགས་ཡོད་སྐོར་སོགས་བརྗོད་སོང་བ་དང་། ཨེ་ཤ་ཡའི་གཟི་བརྗིད་སྣེ་འཁྲིད་ཚོགས་པའི་འགན་འཛིན་(Eunsik Kang)ལགས་ཀྱིས། རང་ཉིད་ཀྱི་ཚོགས་པ་དེ་ནི་འཛམ་གླིང་སྤྱི་དང་དམིགས་བསལ་ཨེ་ཤ་ཡའི་ཁུལ་གྱི་དམག་འཁྲུག་དང་འགྲོ་བ་མིའི་ཐོབ་ཐང་གི་རང་དབང་སོགས་ལ་རྡོག་རོལ་ཐེབས་པའི་མི་རྣམས་དང་ལྷན་དུ་ལས་ཀ་བྱེད་ཀྱིན་ཡོད་པ་ངོ་སྤྲོད་དང་སྦྲགས། ང་ཚོའི་ལས་ཀ་གཙོ་བོ་ནི་འབར་མ་དང་བྷང་ལ་ཌི་ཤི། པ་ལི་སི་ཐན། དམིགས་བསལ་དྷ་རམ་ས་ལ་སོགས་སུ་ཡོད་པའི་གནོད་འཚེ་ཐེབས་པའི་མི་རྣམས་ཀྱི་གནས་སྟངས་རྒྱལ་སྤྱིའི་སྟེང་བསྐྱལ་ཏེ་དྲིལ་བསྒྲགས་བྱེད་ཀྱིན་ཡོད། འདས་པའི་ལོ་ངོ་བདུན་ཙམ་རིང་ངའི་ལས་འགན་གཙོ་བོ་ནི། དྷ་རམ་ས་ལའི་མི་མང་པོ་ཞིག་ལ་གནོད་འཚེ་ཐེབས་པའི་མི་ཚེའི་ལོ་རྒྱུས་སྐོར་ཉན་ཞིབ་བྱས་པ་ཡིན་ལ། ཁོ་ཚོས་ཐེ་ཚོམ་མེད་པར་རང་ཉིད་ལ་བསམ་བློ་དང་འགྲོ་བ་མིའི་ཐོབ་ཐང་སོགས་ཀྱི་རང་དབང་མེད་པར་དྲག་གནོན་ཐེབས་པའི་ལོ་རྒྱུས་ང་ལ་བཤད་བྱུང་ཞེས་དང་། བོད་མི་རྣམས་ལ་རིགས་རྒྱུད་རྩ་གཏོར་དང་བསམ་བློ་དང་སློབ་གསོའི་རང་དབང་མེད་པ་སོགས་ཀྱི་སྐོར་ཤེས་རྟོགས་ཐུབ་ཡོད་སྐོར་སོགས་བརྗོད་སོང་།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཉི་འོད་ལགས་ཀྱིས་སྙན་ཐོ་དེའི་ནང་དོན་རག་བསྡུས་ཤིག་ངོ་སྤྲོད་གནང་སྐབས། སྙན་ཐོའི་ཁ་བྱང་དུ་ང་ཚོའི་རུང་རྐང་འཇིབས་སོང་ཞེས་པ་ནི་བོད་ནང་གི་དགེ་རྒན་ཞིག་གིས་གསུངས་པ་ཞིག་ཡིན་པ་ལས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བྲིས་པ་ཞིག་མིན་པའི་གསལ་བཤད་དང་འབྲེལ། ཀྲུང་ཧཱ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟེར་ནས། རྒྱ་ནག་གི་དབང་བསྒྱུར་འོག་ཡོད་པའི་གྲངས་ཉུང་མི་རིགས་ཚང་ལ་རྒྱ་རིགས་པའི་འདུ་ཤེས་བསྐྲུན་ཐབས་སུ། སྲིད་ཇུས་འདྲ་མིན་སྣ་ཚོགས་ལག་བསྟར་བྱེད་བཞིན་པའི་ཁྲོད། སྙན་ཐོའི་ནང་བོད་ནང་རིག་གཞུང་བཙན་བསྒྱུར་དང་མི་རིགས་རྒྱ་བསྒྱུར་གྱི་སྲིད་ཇུས་ལག་བསྟར་བྱེད་བཞིན་ཡོད་པ་གསལ་འདོན་བྱས་ཡོད་སྐོར་དང་། མི་རིགས་ཤིག་གི་ཆག་འཇིག་ནི་སྐད་ཡིག་གི་སྲོག་རྩར་ཐུག་ཡོད་པ་ཤེས་བཞིན་དུ་རྒྱ་ནག་གཞུང་གིས་སྤྱི་སྐད་ཟེར་ནས་བོད་ནང་གི་ཐ་ན་བྱིས་གཉོར་ཁང་དང་སྔོན་འགྲོའི་སློབ་གྲྭ་སོགས་སུ་རྒྱའི་སྐད་ཡིག་སྤྱོད་དགོས་པའི་སློབ་གསོའི་སྲིད་ཇུས་ལག་བསྟར་བྱེད་བཞིན་ཡོད་པ་དང་བོད་ཀྱི་དགོན་སྡེ་ཁག་ཏུ་བོད་བརྒྱུད་ནང་བསྟན་ཀྱང་རྒྱ་ཡིག་ནང་སློབ་ཁྲིད་བྱ་དགོས་པ། དེ་བཞིན་གྲོང་གསེབ་ཏུ་རྒྱའི་སྐད་ཡིག་སློབ་ཁྲིད་ཀྱི་སྲིད་ཇུས་ལག་བསྟར་བྱེད་བཞིན་པ་སོགས་ནི། དོན་དངོས་ཐོག་བོད་ཀྱི་རིག་གཞུང་དང་སྐད་ཡིག་སོགས་རྩ་གཏོར་བྱེད་བཞིན་ཡོད་སྐོར་སོགས་བརྗོད་སོང་།
ཤོག་ངོས་ ༣༥ ལྡན་པའི་དམིགས་བསལ་སྙན་ཐོ་དེར་ནང་ཚན་བརྗོད་གཞི་ཆེ་བ་བཞི་ཙམ་ཡོད་པ་དག་ནི། བོད་ནང་གི་སློབ་གསོ་དང་སྐད་ཡིག་གི་ཐོབ་ཐང་། རྒྱ་ནག་གཞུང་གི་སློབ་གསོ་དང་སྐད་ཡིག་གི་སྲིད་ཇུས། སྐད་ཡིག་དང་སློབ་གསོ་ནི་འགྲོ་བ་མིའི་ཐོབ་ཐང་ཡིན། སེང་འབྲུག་སྟག་རྩེ་སྒོ་བརྒྱབ་པ་བཅས་ཡིན་པ་དང་། ཁོང་ཅག་གི་གསར་འགོད་གསལ་བསྒྲགས་ནང་། རྒྱ་ནག་གཞུང་གིས་བོད་ཀྱི་སྐད་ཡིག་དང་རིག་གཞུང་སློབ་གཉེར་བྱ་སའི་ཁོར་ཡུག་ཉག་ཅིག་ཏུ་གྱུར་བའི་བོད་ཀྱི་སྒེར་བཙུགས་སློབ་གྲྭ་རྣམས་སྒོ་བརྒྱག་བཞིན་པ་མ་ཟད། སྔོན་གྱི་ལྗོངས་ཞིང་ལྔས་གཏན་འབེབས་བྱས་པའི་སློབས་དེབ་རྦམས་ཕྱིར་བསྡུ་བྱས་ཏེ། དེའི་ཚབ་ཏུ་རྒྱ་ནག་དབུས་གཞུང་ནས་རྒྱ་ཡིག་ཐོག་གཏན་འབེབས་བྱས་པའི་དམར་ཤོག་ཚོགས་པ་དང་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས། ཞི་ཅིན་ཕཱིང་དགོངས་པ་ཟེར་བ་སོགས་ནང་དོན་དུ་བྱས་པའི་རྒྱལ་ཡོངས་གཅིག་གྱུར་གྱི་སློབ་དེབ་འགྲེམས་བཞིན་ཡོད་པ་དེས་བོད་ཀྱི་སྐད་ཡིག་དང་རིག་གཞུང་ལ་དོ་ཚབས་ཆེན་འཕོག་ངེས་པའི་སེམས་འཚབ་ཆེས་ཆེར་བྱ་འོས་སུ་གྱུར་ཡོད།
ཤེས་ཡོན་གྱི་ཐོབ་ཐང་ནི་འགྲོ་བ་མིའི་གཞི་རྩའི་ཐོབ་ཐང་མེད་ཐབས་མེད་པ་ཞིག་ཡིན་པ་མ་ཟད། དེ་ཉིད་ནི་ཐོབ་ཐང་གཞན་དག་ཚང་མའི་འབྱུང་རྩ་ཡང་ཡིན་པས། རྒྱལ་སྤྱིའི་ཆིངས་ཀག་མང་པོའི་ནང་དེ་ཉིད་གཙིགས་ཆེན་དུ་བཟུང་ཡོད། འོན་ཀྱང་རྒྱ་ནག་གཞུང་གིས་རིག་གཞུང་བཙན་བསྒྱུར་བྱེད་པའི་སྦྱོར་བ་དེས། ཀྲུང་ཧཱ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་རྒྱུ་ཡིན་ཞེས་རྒྱའི་དབང་འོག་གི་མི་རིགས་ཐམས་ཅད་ཧཱན་རིགས་ཀྱི་ངོ་བོར་འདུ་ཐབས་ཀྱི་སྲིད་ཇུས་ཤིག་དབུས་གཞུང་ནས་འགན་བླངས་ཏེ་རྒྱལ་ཡོངས་སུ་རྒྱ་ཁྱབ་ཏུ་ལག་བསྟར་བྱེད་བཞིན་ཡོད་པར་བརྟེན། དེ་ནི་སྔར་ཡོད་རྩ་ཁྲིམས་དང་གྲངས་ཉུང་མི་རིགས་ཀྱི་བཅའ་ཁྲིམས་སོགས་ཁྲིམས་དང་སྲིད་ཇུས་གང་གིས་ཀྱང་འགོག་མི་ཐུབ་པར་གྱུར་འདུག
མཇུག་ཏུ། ད་ལྟའི་བོད་ནང་གི་སྐད་ཡིག་དང་རིག་གཞུང་ཉེན་ཚབས་ལས་སྐྱོབ་ཕྱིར་དུ། རྒྱལ་སྤྱིའི་སྤྱི་ཚོགས་ཀྱི་ངོས་ནས་མཉམ་འབྲེལ་རྒྱལ་ཚོགས་ཀྱི་སྐད་ཡིག་དང་ཤེས་ཡོན་གྱི་ཐོབ་ཐང་སྐོར་གྱི་ཆེད་མཁས་མི་སྣ་ངེས་པར་དུ་བོད་དུ་རྟོག་ཞིབ་ཆེད་མངགས་གཏོང་ཡོང་ཐབས་སུ་འབད་འབུངས་རྒྱ་ཆེར་བྱེད་དགོས་པ་དང་རྒྱ་ནག་གཞུང་གི་ངོས་ནས་བོད་དང་རྒྱ་ནག་གི་ས་ཁུལ་དུ་མཉམ་འབྲེལ་རྒྱལ་ཚོགས་ཀྱི་རང་དབང་ལྡན་པའི་ཆེས་མཁས་པ་རྣམས་དུས་ངེས་ལ་རྟོག་ཞིབ་ཆེད་ཡོང་ཆོག་པའི་ཆོག་མཆན་སྤྲོད་དགོས་པའི་འབོད་སྐུལ་ནན་པོ་ཞུ་རྒྱུ་ཡིན་ཞེས་བརྗོད་འདུག
གསར་འགོད་པ། སྐལ་བཟང་སྦྱིན་པ།
