འདི་ལོར་བོད་པའི་སློབ་ཕྲུག་བུ་མོ་ ༤ ལ་རྒྱལ་སྤྱིའི་མཉམ་འབྲེལ་མཐོ་སློབ་ཀྱི་སློབ་ཡོན་ཐོབ་ཡོད་པ་དང་ཕྱི་ལོ་ ༡༩༩༩ ནས་ད་བར་སློབ་ཡོན་འདི་ཐོབ་མཁན་བོད་ཕྲུག་ ༤༥ བྱུང་ཡོད་འདུག
ཤེས་རིག་ལས་ཁུངས་ཀྱིས་གནས་ཚུལ་སྤེལ་བ་ལྟར་ན། བོད་ཁྱིམ་སེ་ལ་ཀུའི་སློབ་མ་བསྟན་འཛིན་ཆོས་ཉིད་དང་། དྷ་ཤོད་བོད་ཁྱིམ་གྱི་སློབ་མ་བསྟན་འཛིན་བཟང་མོ། མ་སུ་རི་བོད་ཁྱིམ་གྱི་སློབ་མ་ཨོ་རྒྱན་བདེ་སྐྱིད། ནོར་གླིང་ཉེ་འཁྲིས་སུ་ཡོད་པའི་ཡེ་ཤུའི་སློབ་གྲྭ་(Sacred Heart)ཡི་སློབ་མ་བསྟན་འཛིན་དབང་མོ་བཅས་སློབ་ཕྲུག་བུ་མོ་ ༤ ལ་འདི་ལོའི་རྒྱལ་སྤྱིའི་མཉམ་འབྲེལ་མཐོ་སློབ་ (UWC) ཀྱི་འཛིན་རིམ་བཅུ་པ་དང་བཅུ་གཅིག་གི་སློབ་ཡོན་ཐོབ་ཡོད་འདུག
དེའི་ཐད་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སློབ་ཡོན་ཚན་པའི་འགན་འཛིན་བསོད་ནམས་བཟང་མོ་ལགས་ཀྱིས་འདི་ག་དུས་བབ་གསར་འགོད་པར་འགྲེལ་བརྗོད་གནང་བ་ལྟར་ན། འདས་ལོའི་ཕྱི་ཟླ་ ༩ པའི་ནང་ཤེས་རིག་ལས་ཁུངས་ནས་རྒྱ་གར་ནང་རྟེན་གཞི་བྱས་པའི་རྒྱལ་སྤྱིའི་མཉམ་འབྲེལ་མཐོ་སློབ་ཀྱི་ལྷན་ཚོགས་དང་མཉམ་འབྲེལ་ཐོག རྒྱ་གར་ནང་གི་བོད་རིགས་སློབ་ཕྲུག་འདེམས་སྒྲུག་བྱ་རྒྱུའི་གསལ་བསྒྲགས་སྤེལ་བ་བཞིན། ཐོག་མར་ཆ་རྐྱེན་ངེས་ཅན་ལྡན་པའི་སློབ་མ་ ༡༢༥ གྱི་སྙན་ཞུ་འབྱོར་ཡོད་པའི་ཁྲོད་ནས་སློབ་མ་ ༡༥ ལ་དྲ་ཐོག་ནས་ངག་རྒྱུགས་བླངས་ནས་སློབ་མ་ ༧ འདེམས་ཐོན་བྱུང་། དེ་ནས་སློབ་མ་ ༧ ལ་ཡང་བསྐྱར་ངག་རྒྱུགས་བླངས་ཏེ་དེ་ལས་རྩེ་ཕུད་སློབ་མ་ ༤ འདེམས་སྒྲུག་བྱུང་ཡོད་འདུག
རྒྱལ་སྤྱིའི་མཉམ་འབྲེལ་མཐོ་སློབ་ (UWC) ནི་ཇར་མན་ནིའི་སློབ་གསོ་བ་གྲགས་ཅན་ (Kurt Hahn)ལགས་ཀྱིས་ཕྱི་ལོ་ ༡༩༦༢ ལོར་གསར་འཛུགས་གནང་ཞིང་། ད་ལྟའི་ཆར་གླིང་ཕྲན་བཞི་ཡི་ནང་དུ་སློབ་གྲྭ་ཆེ་འབྲིང་ཆུང་གསུམ་ ༡༨ ལྷག་ཡོད་པ་དང་། རྒྱ་གར་གྱི་རྒྱལ་སྤྱིའི་མཉམ་འབྲེལ་མཐོ་སློབ་ཀྱི་ཡན་ལག་ཚོགས་པ་ནི་མཱ་ཧ་ར་ཤི་ཊི་རའི་པཱོ་ནེ་( Pune) གྲོང་ཁྱེར་དུ་ཆགས་ཡོད་ཅིང་། ལོ་ལྟར་དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་རྒྱ་གར་གྱི་ཡན་ལག་ཚོགས་པ་དེར་འབྲེལ་བ་ཞུས་ཏེ། བོད་པའི་སློབ་ཕྲུག་ཚོར་སློབ་ཡོན་ཐོབ་ཐབས་གནང་གི་ཡོད་པ་ལྟར། ད་བར་ཁྱོན་བོད་པའི་སློབ་ཕྲུག་ ༤༥ ལ་ཚོགས་པ་དེའི་སློབ་ཡོན་ཐོབ་ཡོད་འདུག
གསར་འགོད་པ། བསྟན་འཛིན་ཕུར་བུ།
