སྲིད་སྐྱོང་མཆོག་གིས་རྒྱ་གར་ལྷོ་ཕྱོགས་སུ་འཚམས་གཟིགས་གནང་བཞིན་པ།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་འཁུར་བཞེས་ནས་ལོ་ངོ་གཅིག་ཧྲིལ་པོ་འཁོར་བའི་སྐབས་དེ་ཕྱི་ཟླ་ལྔ་པའི་ཚེས་ ༢༨ ཉིན་ནས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནས་དབུ་འཛུགས་གནང་ཡོད་པ་ལྟར། དེ་རིང་ལྷོ་ཕྱོགས་གཞིས་ཆགས་སྦེལ་ཀོབ་ཏུ་ཕེབས་འབྱོར་བྱུང་ཡོད་པ་དང་། སྐབས་དེར་གཞིས་ཁག་གཉིས་ཀྱི་སེར་སྐྱ་མི་མང་གིས་ཕེབས་བསུ་ཟབ་རྒྱས་ཞུས་ཡོད་འདུག ཐོག་མར་སྲིད་སྐྱོང་མཆོག་གིས་སྦེལ་ཀོབ་བོད་མིའི་གཞིས་ཆགས་ཀྱི་གཞུང་སྒོ་གསར་པ་དབུ་འབྱེད་གནང་ཡོད་པ་དང་། དེ་ནས་སྦེལ་ཀོབ་གཞིས་སྤྱི་རྒྱལ་བའི་ཕོ་བྲང་དུ་གནས་མཇལ་གནང་སྟེ་ཕེབས་བསུའི་རྟེན་འབྲེལ་མཛད་སྒོ་སྟབས་བདེ་ཞིག་ཚོགས་སོང་།

སྲིད་སྐྱོང་གིས་སྦེལ་ཀོབ་གཞིས་ཆགས་ནང་ཉིན་གྲངས་ ༤ རིང་འཚམས་གཟིགས་གནང་གི་ཡོད་འདུག་ལ། དེ་རིང་ཉིན་དང་པོར་སྦེལ་ཀོབ་ཀྱི་སློབ་གྲྭ་དང་། དགོན་སྡེ་གྲྭ་ཚང་ཁག་གི་ནང་ཕེབས་བཞིན་ཡོད་པ་དང་། སང་ཉིན་ནས་གཞིས་ཆགས་གྲོང་སྡེ་ཁག་གི་ནང་དུ་འཚམས་གཟིགས་གནང་རྒྱུ་ཡིན་འདུག ཕྱི་ཟླ་ ༦ པའི་ཚེས་༤ ནས་ཕྱི་ཚེས་ ༡༢ བར་དུ་རིམ་བཞིན་ཧོན་སོར་རབ་རྒྱས་གླིང་གཞིས་ཆགས་དང་ཀོ་ལི་གྷལ་དོན་ལྡན་གླིང་། མོན་གྷོ་འདོད་རྒུ་གླིང་བཅས་ལྷོ་ཕྱོགས་གཞིས་ཆགས་ཁག་ལྔའི་ནང་གཟིགས་སྐོར་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༢༨ ཉིན་ནས་ཉིན་གྲངས་གཉིས་རིང་སྦེང་ལོར་དུ་ཡོད་པའི་ནཱི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་དང་། སྨན་རྩིས་ཁང་ཡན་ལག ཏཱ་ལའི་བླ་མ་མཐོ་རིམ་སློབ་གཉེར་ཁང་སོགས་སུ་གཟིགས་སྐོར་གནང་ཡོད་པ་དང་། ཁ་སང་ཕྱི་ཚེས་ ༣༠ ཉིན་ཀར་ན་ཊ་ཀ་མངའ་སྡེ་གཞུང་གི་སྤྱི་ཁྱབ་བློན་ཆེན་བྷོ་མིའེ་( Basavaraj Bommai)མཆོག་དང་སྤྱི་ཁྱབ་དྲུང་ཆེ་རྣམ་གཉིས་མཇལ་འཕྲད་གནང་སྟེ། ཀར་ན་ཊ་ཀ་མངའ་གཞུང་ནས་ལྷོ་ཕྱོགས་བོད་མིའི་གཞིས་ཆགས་ཁག་ལ་མུ་མཐུད་མཐུན་འགྱུར་རོགས་རམ་ཡོང་བའི་རེ་སྐུལ་དང་། ད་བར་དུ་རོགས་རམ་གནང་བ་དེར་བཀའ་དྲིན་རྗེས་དྲན་གྱི་ཆེད་དུ་སྟོན་པའི་སྐུ་བརྙན་ཞིག་ཀྱང་གནང་ཡོད་འདུག

སྲིད་སྐྱོང་མཆོག་ནས་ད་ལན་ལྷོ་ཕྱོགས་ཁུལ་ལ་འཚམས་གཟིགས་གནང་དགོས་དོན་ནི་སྲིད་སྐྱོང་གི་འགན་ཁུར་ཙམ་མིན་པར་བོད་མིའི་སྒྲིག་འཛུགས་ཀྱི་ལྷན་ཁང་བཞི་ཡི་བཀའ་བློན་གྱི་འགན་ཁུར་ཐོག་ནས་མང་ཚོགས་ཀྱི་དངོས་ཡོད་གནས་སྟངས་མཁྱེན་རྟོགས་སླད་དུ་ཕེབས་པ་ཡིན་སྐོར་གསུངས་ཡོད་འདུག་ལ། སྦེལ་ཀོབ་བོད་ཁྱིམ་སློབ་གྲྭར་གཟིགས་སྐོར་གནང་སྟེ་དགེ་སློབ་ཚོར་གསུང་བཤད་གནང་སྐབས། གཞོན་སྐྱེས་རྣམས་ལ་ཐུག་ཕྲད་གནང་རྒྱུ་དེ་ནི་གལ་གནད་ཆེ་ཤོས་སུ་རྩི་བཞིན་ཡོད་པའི་སྐོར་དང་། ༧གོང་ས་མཆོག་གི་མཛད་འཕྲིན། དེ་བཞིན་སྐབས་བཅུ་དྲུག་པའི་བཀའ་ཤག་གི་ལས་དོན་བྱེད་ཕྱོགསདང་བོད་མིའི་རྩ་དོན་འཐབ་རྩོད་སོགས་ཀྱི་སྐོར་ལ་གསུང་བཤད་དང་དྲི་བ་དྲིས་ལན་བཅས་གནང་ཡོད་པ་རེད།

རྒྱ་གར་ལྷོ་ཕྱོགས་ཀྱི་གསར་འགོད་པ།