དེ་རིང་ཞོགས་པར་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལའི་སྐོར་ལམ་སྒོ་ཆེན་ནས་བོད་མི་སྐྱེས་པ་ཞིག་པོ་ཏ་ལའི་ནང་འཛུལ་དུ་མ་བཅུག་པར་འཛིན་བཟུང་བྱས་ཡོད་འདུག
བོད་ནས་འདི་གར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཞོགས་པར་ཕོ་བྲང་པོ་ཏ་ལའི་སྐོར་ལམ་སྒོ་ཆེན་ནས་བོད་མི་ཞིག་གིས་ལས་སྣེ་བ་སོགས་ལ་རྩོད་པ་བརྒྱབ་རྗེས། ལྷ་ས་གྲོང་ཁྱེར་ཉེན་རྟོག་པས་བཙན་འཁྲིད་བྱས་ཡོད་པ་མ་ཟད། སྐབས་དེར་སྒོ་ཆེན་དུ་ཡོད་པའི་བོད་མི་མང་པོ་ཞིག་ལའང་སྔོག་བཤེར་དམ་དྲག་བྱས་ཡོད་འདུག
བོད་མི་དེས་ང་ས་ཐག་རིང་པོ་ནས་ཡོང་བ་ཡིན། པོ་ཏ་ལའི་ནང་མཇལ་དུ་འགྲོ་གི་ཡིན། ཞེས་སྐད་ཆེན་པོས་བརྗོད་ཡོད་པ་དང་། བོད་མི་དེ་ནི་བོད་ཁམས་ཕྱོགས་ནས་ཡོང་བ་ཞིག་ཡིན་ཞིང་། མིང་ལ་ཚེ་ནོར་དང་ད་ལྟ་རང་ལོ་ ༤༠ ཡས་མས་ཤིག་ཡིན་འདུག ཁོང་ལྷ་སར་བསླེབས་ནས་བདུན་ཕྲག་གཅིག་ཙམ་འགྲོ་བཞིན་ཡོད་ཀྱང་ཡུལ་སྐོར་བ་སོགས་མང་དྲགས་ནས་ད་ལྟའང་པོ་ཏ་ལའི་ནང་མཇལ་དུ་འགྲོ་ཐུབ་མེད་སྟབས། རང་ཉིད་ཀྱི་རེ་འདོད་འགྲུབ་མ་ཐུབ་པའི་བློ་ཕམ་ཆེན་པོ་བྱེད་ཀྱི་ཡོད་སྐོར་ཁོང་གི་འབྲེལ་ཡོད་ཅིག་གིས་བརྗོད་ཀྱི་འདུག
