༧སྐྱབས་རྗེ་ཀིརྟི་རིན་པོ་ཆེ་མཆོག་ལ་གྱ་སྟོན་བརྟན་བཞུགས་ཕུལ་བ་དང་བསྟུན་མདོ་སྨད་ཀྱི་གསེར་གྱི་གཟེངས་རྟགས་ཕུལ་སོང་།
དེ་རིང་ཉིན་གུང་ཀིརྟིའི་བྱེས་པ་གྲྭ་ཚང་གི་འདུ་ཁང་དུ། མདོ་སྨད་དབུས་སྤྱི་ཁྱབ་རྒྱུན་ལས་ཁང་གིས་༧སྐྱབས་རྗེ་ཀིརྟི་རིན་པོ་ཆེ་མཆོག་ལ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་གྱ་སྟོན་བརྟན་བཞུགས་ཤིག་འབུལ་ལམ་ཞུས་སོང་བ་དང་། དེ་བཞིན་ཀིརྟི་རིན་པོ་ཆེ་མཆོག་ལ་གསེར་གྱི་གཟེངས་རྟགས་ཕུལ་སོང་། བརྟན་བཞུགས་སྐབས་སྐུ་མགྲོན་གཙོ་བོར་ཇོ་ནང་༧རྒྱལ་ཚབ་རིན་པོ་ཆེ་ངག་དབང་ཆོས་ཀྱི་སྣང་བ་མཆོག་དང་། དམིགས་བསལ་སྐུ་མགྲོན་སྲིད་སྐྱོང་སྤེན་པ་ཚེ་རིང་མཆོག་དང་། བླ་སྤྲུལ་དགེ་འདུན་པ་རྣམ་པ། དེ་བཞིན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་སྤྱི་འཐུས་རྣམ་པ། གཞན། དྷ་རམ་ས་ལའི་ཚོགས་སྐྱིད་ཁག་གི་སྐུ་ཚབ་དང་དྷ་སའི་སེར་སྐྱ་མི་མང་བཅས་འཛོམས་འདུག
མཛད་སྒོ་དབུ་འཛུགས་མ་གནང་གོང་དུ་ཀིརྟི་རིན་པོ་ཆེ་མཆོག་གིས། དེ་རིང་ཁྲི་ལ་བཞུགས་མཁན་དེ་ཁོང་ཡིན་རུང་། བརྟན་བཞུགས་འདི་༧གོང་ས་མཆོག་སྐུ་ཚེ་བརྟན་པ་དང་མཛད་པ་འཕྲིན་ལས་རྒྱས་སླད་དུ་འབུལ་གྱི་ཡོད་པས་དེ་དེ་བཞིན་གྱིས་ཐུགས་སྨོན་གནང་གི་ཡོད་ལ། ཚང་མས་དེ་བཞིན་སྨོན་ལམ་ཞུ་དགོས་སྐོར་གསུངས་སོང་།
བརྟན་བཞུགས་ཕུལ་རྗེས་ཀིརྟི་རིན་པོ་ཆེ་མཆོག་གིས། བརྟན་བཞུགས་ཕུལ་བ་དེ་ཚེ་རིང་པོ་གནས་ཐུབ་པའི་རེ་བ་བརྒྱབ་པ་དང་། ཚེ་རིང་པོ་བསྡད་པ་ཡིན་ན། ཁ་གཏན་ཚིག་གཏན་གྱིས་བསྟན་པ་དང་བོད་སྤྱི་པའི་དོན་དུ་ལས་དོན་བསྒྲུབ་རྒྱུའི་རེ་བ་བརྒྱག་གི་ཡོད་པ་ལྟར། དེ་རིང་བརྟན་བཞུགས་ཕུལ་བ་དེས་ཕན་ཐོགས་ཀྱིན་ཡོད་པ་དང་། ཁོང་ནས་ཀྱང་དེ་བཞིན་གྱིས་ཐུགས་རེ་གནང་གི་ཡོད་སྐོར་དང་། ཁོང་ད་ལྟ་རྒས་ཡོལ་དུ་ཕེབས་ཟིན་ཡང་མུ་མཐུད་ནས་བོད་སྤྱི་པའི་རྩ་དོན་ཆེད་སྐུ་ལས་བསྐྱོན་གནང་རྒྱུ་ཡིན་སྐོར་སོགས་གསུངས་སོང་། དེ་བཞིན་བོད་མི་ཚོས་རྡོག་རྩ་གཅིག་སྒྲིལ་གྱི་ཐོག་ལ་ཤུགས་བསྐྱོན་པ་དང་། བོད་ཀྱི་གཞུང་དེ་བརྟན་པོར་གནས་པའི་དོན་དུ་ཕྱག་ལས་གནང་དགོས་པ། དེ་བཞིན་ཕྱིའི་དགྲ་བོ་ང་ཚོའི་ནང་ལ་འཛུལ་ཡོང་གི་ཡོད་པའི་ཐུགས་ཚོར་བྱུང་བ་བཞིན་ཚང་མས་ཡིད་གཟབ་གནང་རྒྱུ་གལ་ཆེན་པོ་ཡིན་སྐོར་གསུངས་སོང་།
གསར་འགོད་པ། བསྟན་འཛིན་ཕུར་བུ།
Such a wonderful idea!:”མཛད་སྒོ་དབུ་འཛུགས་མ་གནང་གོང་དུ་ཀིརྟི་རིན་པོ་ཆེ་མཆོག་གིས། དེ་རིང་ཁྲི་ལ་བཞུགས་མཁན་དེ་ཁོང་ཡིན་རུང་། བརྟན་བཞུགས་འདི་༧གོང་ས་མཆོག་སྐུ་ཚེ་བརྟན་པ་དང་མཛད་པ་འཕྲིན་ལས་རྒྱས་སླད་དུ་འབུལ་གྱི་ཡོད་པས་དེ་དེ་བཞིན་གྱིས་ཐུགས་སྨོན་གནང་གི་ཡོད་ལ། ཚང་མས་དེ་བཞིན་སྨོན་ལམ་ཞུ་དགོས་སྐོར་གསུངས་སོང་།”
དཔེ་ཡག་པོ་རེད།
དཔེ་ཡག་པོ་རེད།