ད་ལྟའི་ཆར་ཨ་སམ་ཆར་ཤུགས་དྲག་པོ་བབས་རྐྱེན་འོག་ཆུ་ལོག་གི་དཀའ་ངལ་ཤུགས་ཆེན་འཕྲད་བཞིན་པར་བརྟེན། དེ་རིང་༧གོང་ས་མཆོག་གིས་ཨ་སམ་མི་མང་ལ་གདུང་སེམས་མཉམ་སྐྱེད་ཀྱི་ཐུགས་སྨོན་དང་ཞལ་འདེབས་བཅས་གནང་འདུག
དེ་རིང་ཕྱི་ཚེས་ ༢༡ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས། ཨ་སམ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་སཱར་མ་ (Dr. Himanta B. Sarma)ལགས་ཀྱི་མཚན་ཐོག་ཏུ་ཕྱག་ཡིག་ཅིག་སྩལ་ཏེ། མགོན་པོ་གང་ཉིད་མཆོག་གིས། ད་ལྟའི་ཆར་ཨ་སམ་ནང་ཆར་ཤུགས་དྲག་པོ་བབས་པ་ལ་བརྟེན་ནས། ཆུ་ལོག་རྒྱུགས་ཏེ་མི་མང་ས་ཡ་མང་པོའི་འཚོ་བར་གནོད་སྐྱོན་ཕོག་པ་དང་འདས་གྲོངས་སུ་ཕྱིན་པ་རྣམས་ལ་ཐུགས་སྨོན་དང་ཐུགས་ཁྲལ་གནང་གི་ཡོད་སྐོར་གསུངས་འདུག
དེ་འབྲེལ་བཀའ་ཡིག་ནང་། ཨ་སམ་དང་རྒྱ་གར་གྱི་ས་ཁུལ་གཞན་གྱི་ནང་ཆར་དུས་ཀྱིས་ལོ་ནས་ལོ་བསྟུན་གནོད་སྐྱོན་ཚབས་ཆེན་གཏོང་གི་ཡོད་པ་ནི་ཆེས་སྟབས་མི་ལེགས་པ་ཞིག་རེད། ཁྱེད་ཀྱི་མངའ་སྡེའི་མི་མང་ཆུ་ལོག་ཁྲོད་དཀའ་སྡུག་མྱངས་དགོས་བྱུང་བར་ངོས་ལ་སེམས་ངལ་བྱུང་། ངོས་ནས་ཁྱེད་དང་ཆུ་ལོག་ཁྲོད་འདས་གྲོངས་སུ་ཕྱིན་པ་དང་གནོད་སྐྱོན་ཕོག་པའི་མི་མང་ཡོངས་ལ་གདུང་སེམས་མཉམ་སྐྱེད་ཞུ་ཡི་ཡོད།
ངོས་ནས་ཆུ་ལོག་ཁྲོད་གནོད་སྐྱོན་ཕོག་མཁན་རྣམས་ལ་འབྲེལ་ཡོད་མང་པོས་གང་ཐུབ་ཅི་ཐུབ་ཀྱིས་རོགས་རམ་དང་ངལ་སེལ་རྒྱབ་སྐྱོར་གནང་བཞིན་པར་ཡི་རངས་སྔགས་བརྗོད་ཞུ་རྒྱུ་མ་ཟད། ཨ་སམ་མི་མང་ལ་གདུང་སེམས་མཉམ་སྐྱེད་མཚོན་སླད་དང་དཀའ་ངལ་སེལ་ཐབས་ཀྱི་ལས་དོན་དག་གི་སླད་དུ། ངོས་ནས་དགའ་ལྡན་ཕོ་བྲང་ཐེབས་རྩ་བརྒྱུད་ཞལ་འདེབས་ཤིག་རྒྱག་གི་ཡོད། ཅེས་གསུངས་འདུག
ད་ལྟའི་ཆར་རྒྱ་གར་ནང་ཆར་དུས་ཡིན་པ་ལྟར། རྒྱ་གར་གྱི་བྱང་ཤར་མངའ་སྡེ་ཨ་སམ་གཙོ་བྱས་པའི་མཱ་གྷ་ལ་ཡ་དང་ཨ་རུ་ན་ཅལ་སོགས་སུ་ཆར་ཤུགས་དྲག་པོ་བབས་རྐྱེན་འོག ཆུ་ལོག་གི་དཀའ་ངལ་འཕྲད་དེ། དེ་རིང་ཕྱི་ཚེས་ ༢༡ ཉིན་བར་གྱི་གནས་ཚུལ་ལྟར་ན། མངའ་སྡེ་དེ་དག་ནང་གི་མི་ ༡༣༡ འདས་གྲོངས་སུ་ཕྱིན་ཡོད་པ་དང་། ཨ་སམ་གྱི་མི་མང་ས་ཡ་ ༤།༧ ལྷག་གི་འཚོ་བར་གནོད་སྐྱོན་ཐེབས་ཡོད་པ་མ་ཟད། ས་གནས་གནམ་གཤིས་བརྟག་དཔྱད་ཁང་གིས། ཨ་སམ་ནང་སྔར་ལྷག་གིས་ཆར་ཤུགས་ཆུ་ལོག་བརྒྱུག་རྒྱུ་ཡིན་པའི་སྔོན་བརྡའང་བཏང་འདུག་ལ། ད་སྔ་བར་ཆུ་ལོག་གི་གནོད་སྐྱོན་ཕོག་པའི་མི་མང་རྣམས་ལ་འཕྲལ་སེལ་སྡོད་སྒར་བཙུགས་པ་དང་། བཟའ་བཅའ་སོགས་འབྲེལ་ཡོད་མངའ་གཞུང་དང་དང་བླངས་ཚོགས་སྡེ་ཁག་གིས་རོགས་སྐྱོར་བྱེད་མུས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
