དེ་སྔོན་དབུས་གཞོན་ནུའི་ཁྱབ་ཁོངས་ནས་ཕྱིར་ཐོན་སོང་བའི་དབུ་མའི་ལམ་བོད་ཀྱི་གཞོན་ནུ་ཚོགས་པ་ཞེས་པས་གཞིས་ཁག་བཞི་ཡི་མིང་ཐོག་ནས་ཁོང་ཚོའི་ལངས་ཕྱོགས་དབུ་མའི་ལམ་ལ་འགྱུར་བ་མེད་པའི་ཐོག་ནས་སྤྱི་ཚོགས་ཞབས་ཞུ་དང་བོད་དོན་ཞུ་གཏུག་སོགས་ཀྱི་ལས་འགུལ་སྔར་རྒྱུན་བཞིན་སྤེལ་རྒྱུ་ཡིན་སྐོར་བརྗོད་སོང་།
ཁ་སང་སྔ་དྲོར་རྒྱ་གར་ལྷོ་ཕྱོགས་སྦེལ་ཀོབ་ཡ་དཀར་ཚོགས་ཁང་དུ། ཕྱི་ལོ་ ༢༠༡༣ ལོར་དབུས་གཞོན་ལྷན་གྱི་ཁྱབ་ཁོངས་ནས་ལོགས་སུ་ཐོན་པའི་གཞོན་ནུའི་ས་གནས་སྦེལ་ཀོབ་དང་། ཧོན་སུར། ཀོ་ལི་གྷལ་བཅས་ཀྱི་ཚོགས་གཙོ་དང་རྒྱུན་ལས་བཅས་མི་གྲངས་ ༢༠་ཙམ་ནས་ཚོགས་འདུ་འཚོགས་ཏེ་གྲོས་བསྡུར་བྱས་རྗེས། སྦེལ་ཀོབ་དང་ཧོན་སུར། ཀོ་ལི་གྷལ། སྤོན་ཌོ་བཅས་ས་གནས་ཁག་བཞི་ཡི་མིང་ཐོག་ནས་གསར་འགོད་ལྷན་ཚོགས་ཤིག་བསྐོངས་ཏེ། ཟླ་འདིའི་ཕྱི་ཚེས་ ༡༧ ཉིན་དབུས་བོད་ཀྱི་གཞོན་ནུ་ལྷན་ཚོགས་ནས་དེ་སྔོན་དབུས་གཞོན་ལྷན་གྱི་ཁྱབ་ཁོངས་ནས་ལོགས་སུ་ཐོན་པའི་ས་གནས་ཁག་ ༨ ལས་ཀོ་ལི་གྷལ་ཕུད་གཞན་ཚང་མར་གྲོས་མོལ་བྱས་པ་བརྒྱུད་ཕྱིར་དབུས་ཁོངས་སུ་འཛུལ་ཡོད་སྐོར་བརྗོད་ཡོད་ནའང་། ཕྱི་ལོ་ ༢༠༡༣ ལོར་ཆབ་སྲིད་ཀྱི་ལྟ་གྲུབ་མ་མཐུན་པའི་ཐོག་ནས་ཕྱིར་ཐོན་སྐབས་ཀྱི་རྩ་འཛིན་སྒྲིག་གཞི་གཞིར་བཟུང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་དབུ་མའི་ལམ་ལ་མ་བསྒྱུར་བར་དུ་དབུ་མའི་ལམ་བོད་ཀྱི་གཞོན་ནུ་ཚོགས་པའི་མིང་ཐོག་ནས་མུ་མཐུད་ལས་དོན་སྒྲུབ་ནས་འགྲོ་རྒྱུ་ཡིན་སྐོར་བརྗོད་སོང་།
དབུ་མའི་ལམ་བོད་ཀྱི་གཞོན་ནུ་ཚོགས་པ་ཡི་སྤྱི་ཁྱབ་ཚོགས་གཙོ་སྦེལ་ཀོབ་གཞོན་ནུ་ཚོགས་པའི་ཚོགས་གཙོ་བྱ་ཉལ་ཚེ་རིང་ལྷ་སྐྱབས་ལགས་ཀྱིས། དེ་སྔོན་ཕྱི་ལོ་༢༠༡༣ ལོར་ས་གནས་གཞོན་ནུའི་ཚོགས་པ་ཁག་བརྒྱད་ཀྱི་ངོས་ནས་ས་གནས་མང་ཚོགས་ཀྱི་མང་མོས་རྒྱབ་སྐྱོར་འོག་དབུ་མའི་ལམ་གྱི་ལངས་ཕྱོགས་སུ་བསྐྱོད་དགོས་པའི་རྒྱབ་ལྗོངས་ལོ་རྒྱུས་དང་། དེའི་རྗེས་དབུས་དང་ས་གནས་དབར་འབྲེལ་ལམ་ཇི་ལྟར་བྱུང་བ་སོགས་ཀྱི་གནད་དོན་འགྲེལ་བརྗོད་དང་སྦྲགས། འདི་ལོའི་ཕྱི་ཟླ་གསུམ་པའི་ཚེས་ ༢༣ ཉིན་དབུས་ཀྱི་ཚོགས་གཙོ་དང་རྒྱུན་ལས་ས་གནས་ལ་འབྱོར་ནས་མང་ཚོགས་བསྡུ་སྐོང་བྱས་ཏེ། གཞོན་ལྷན་གྱི་ཁྱབ་ཁོངས་སུ་གཏོགས་པའི་ས་གནས་གཞོན་ནུ་དགོས་མིན་གྱི་བསམ་ཚུལ་བསྡུ་སྐབས་ཚོགས་བཅར་བ་མི་གཅིག་མ་གཏོགས་གཞན་རྣམས་ཀྱིས་རྒྱབ་སྐྱོར་བྱས་ཏེ། རྒྱུན་ལས་གསར་འདེམས་དང་འབྲེལ་ས་གནས་གཞོན་ནུ་སླར་གསོ་བྱས་པ་ཡིན་ཟེར་གྱི་ཡོད་ཀྱང་། ཉུང་མཐར་མི་གྲངས་ ༣༠༠༠ ཡས་མས་ཡོད་ལབ་ཀྱི་ཡོད་པའི་སྦེལ་ཀོབ་གཞིས་ཆགས་ནས་མི་ ༤༡ ལས་འཛོམས་མེད་སྟབས། དེས་ཚད་མཐོའི་མང་ཚོགས་ཀྱི་རྒྱབ་སྐྱོར་མཚོན་ཐུབ་ཀྱི་མེད་སྐོར་སོགས་བརྗོད་སོང་།
ཡང་གསར་འགོད་གསལ་བསྒྲགས་སྐབས་ཕྱི་ཚེས་ ༢༣ ཉིན་སྤོན་ཌོ་ས་གནས་གཞོན་ནུས་དབུས་ཁོངས་སུ་འཛུལ་བའི་གསལ་བསྒྲགས་དེ་བདེན་པ་མིན་སྐོར་གྱི་མི་ ༡༨ ་ཀྱིས་མིང་རྟགས་བརྒྱབ་པའི་ཡི་གེ་ཞིག་བཏང་ཡོད་པ་སྒྲོགས་སྦྱང་བྱས་སོང་ལ། ཧོན་སུར་རབ་རྒྱས་གླིང་གི་གཞོན་ནུའི་ཚོགས་གཙོ་རྟ་མགྲིན་ནས་དེ་སྔོན་དབུས་རྒྱུན་ཧོན་སུར་ས་གནས་སུ་འབྱོར་ཏེ་ཚོགས་ཆེན་བསྡུ་རྒྱུ་ཡིན་པ་བསྒྲགས་ཡོད་ཀྱང་། ཧོར་སུར་གྲོང་སྡེ་ ནས་མི་གྲངས་ ༢༧ ལས་འཛོམས་མེད་སྐོར་དང་། ཁོ་ཚོའི་ལངས་ཕྱོགས་ལའང་འགྱུར་བ་ཕྱིན་མེད་སྐོར་བརྗོད་སོང་།
གནད་དོན་འདིའི་ཐད་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་སུ་སྐད་ཆ་དྲིས་པར་ཁོང་གིས། སྤྱིའི་ཆ་ནས་བཙན་བྱོལ་སྒྲིག་འཛུགས་དང་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་དམངས་གཙོའི་སྤྱི་ཚོགས་ཤིག་ཡིན་དུས། ང་ཚོ་དབུས་སྤྱི་ཁྱབ་རྒྱུན་ལས་ཁང་གི་ངོས་ནས་ལྷོ་ཕྱོགས་གཞིས་ཆགས་ཁག་ཏུ་ཡོད་པའི་ས་གནས་གསུམ་གྱི་ཚོགས་པ་ནས་གསར་འགོད་གསལ་བསྒྲགས་གནང་བ་དེར་ཞུ་རྒྱུ་གང་ཡང་མེད། འོན་ཀྱང་། ཉེ་ཆར་བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ཟླ་ ༦ ཚེས་ ༡༧ ཉིན་བསྐྱངས་པའི་གསར་འགོད་གསལ་བསྒྲགས་དེ་དངོས་བདེན་མ་རེད་ཅེས་བརྗོད་པ་ནི་རྩ་བ་ནས་བདེན་པ་མ་རེད་ཞུ་རྒྱུ་ཡིན། ཞེས་དང་། སྦེལ་ཀོབ་དང་ཧོན་སུར་གཉིས་སུ་དབུས་གཞོན་ནུ་ལྷན་ཚོགས་ཀྱི་ཁྱབ་ཁོངས་ས་གནས་གཞོན་ནུ་ལྷན་ཚོགས་བསྐྱར་གསོ་ཐུབ་སྟེ་རྒྱུན་ལས་གསར་འདེམས་བྱས་ཡོད་པ་དང་། དེ་བཞིན་དབུས་རྒྱུན་ཌལ་ཧོར་དང་སྤོན་ཌོ་ས་གནས་སུ་ཕྱིན་སྐབས་ཚོགས་མི་ ༡༨ ནས་དབུས་ལ་མོས་མཐུན་ཡོད་ཅེས་རྒྱབ་སྐྱོར་ཐོབ་ཡོད་ཀྱང་། ས་གནས་ཀྱི་མི་རེ་ཟུང་གིས་ཚོགས་གཙོ་སོགས་ཀྱི་མིང་འཁུར་ནས་དཀྲུག་ཐབས་བྱེད་བཞིན་ཡོད་སྟབས། ཁ་སང་ཡང་མོས་མཐུན་མེད་པའི་ཡི་གེ་ཞིག་འབྱོར་བ་དེར་བློ་ཕམ་ཡོད་ལ། དབུས་རྒྱུན་སླར་ཡང་ས་གནས་སུ་བཅར་རྒྱུ་ཡིན་སྐོར་བརྗོད་བྱུང་།
གཞོན་ལྷན་ཚོགས་གཙོ་མགོན་པོ་དོན་འགྲུབ་ལགས་ཀྱིས་འགྲེལ་བརྗོད་གནང་བ་ལྟར་ན། སྦེལ་ཀོབ་དང་ཧོར་སུན་གཉིས་སུ་ས་གཞོན་གྱི་རྒྱུན་ལས་གསར་དུ་བདམས་ཡོད་པ་དང་། ཌལ་ཧོར་དང་སྤོན་ཌོ་གཉིས་སུ་ལས་ཐོག་རྣམས་རང་སོར་འཇོག་པའི་ཐག་གཅོད་བྱས་ཡོད་འདུག འོན་ཀྱང་། དབུ་མའི་ལམ་གཞོན་ནུའི་ཚོགས་གཙོ་ཚེ་རིང་ལྷ་སྐྱབས་ལགས་ཀྱིས། ཆབ་སྲིད་ལྟ་གྲུབ་མ་མཐུན་པ་ཙམ་མ་གཏོགས་ས་རྒྱུན་ལས་ཁུངས་རང་འཇགས་ཐོག་མུ་མཐུད་སྔར་གྱི་ལས་དོན་སྤྱི་ཚོགས་ཞབས་ཞུ་དང་། བོད་དོན་ཞུ་གཏུག་སོགས་རྒྱུན་མཐུད་ནས་འགྲོ་ཡི་ཡོད་སྐོར་བརྗོད་བྱུང་།
ཕྱི་ལོ་ ༢༠༡༣ ལོར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༥ པའི་ཐོག བོད་ཀྱི་གཞོན་ནུའི་ལངས་ཕྱོགས་རང་བཙན་ལ་འགྱུར་བ་གཏོང་དགོས་པའི་བསམ་ཚུལ་མི་མཐུན་པ་བྱུང་བར་བརྟེན། ཚོགས་ཆེན་ཐོག་སྦེལ་ཀོབ་དང་། ཧོན་སུར། ཀོ་ལི་གྷལ། མོན་གྷོ། སྦེང་ལོར། ཌལ་ཧོར། ལ་དྭགས། སྤོན་ཊོ་བཅས་ས་གནས་ཁག་བརྒྱད་ཚོགས་ཁོངས་ནས་ཐོན་ཕྱིན་ཡོད་པ་མ་ཟད། དབུས་ཀྱི་ལངས་ཕྱོགས་དབུ་མའི་ལམ་ལ་མ་བསྒྱུར་བར་དུ་དབུས་ཁོངས་སུ་ཕྱིར་ལོག་བྱ་རྒྱུ་མིན་པའི་གྲོས་ཆོད་བཞག་ཡོད་འདུག ཕྱིས་སུ་དབུས་རྒྱུན་ས་གནས་སུ་བསྐྱོད་དེ་འགྲིག་འཇགས་ཡོང་ཐབས་གནང་ཡོད་ཀྱང་དོན་འབྲས་མ་སོན་པར་བརྟེན། ཕྱི་ལོ་ ༢༠༡༤ ལོའི་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༥ པའི་སྟེང་། ས་གནས་ཁག་བརྒྱད་ཀྱི་རྒྱུན་ལས་རྣམས་བོད་ཀྱི་གཞོན་ནུའི་ཚོགས་མིར་ངོས་ལེན་མེད་པའི་གྲོས་ཆོད་བཞག་ཡོད་འདུག ཕྱི་ལོ་ ༢༠༡༥ དང་ ༢༠༡༦ ལ་དབུས་ནས་བསྐྱར་དུ་འབྲེལ་བ་བྱས་ཏེ་གྲོས་མོལ་བྱས་ཡོད་ཀྱང་ཕྱོགས་གཉིས་ཀྱི་ལངས་ཕྱོགས་ཐད་འགྱུར་བ་ཐེབས་མ་ཐུབ་པར་ལྷག་ཡོད་འདུག
འབྲེལ་ཡོད་གནས་ཚུལ། གཞོན་ལྷན་ས་གནས་ཁག་བདུན་དབུས་ཀྱི་ཁྱབ་ཁོངས་སུ་ཕྱིར་ལོག་འདུག
