བལ་ཡུལ་ནང་གི་བོད་མིའི་སློབ་གྲྭ་དང་བཙུན་དགོན་སོགས་སུ་དགེ་རྒན་གྱི་ཕྱག་ལས་ཡུན་རིང་གནང་མྱོང་བའི་རྒན་ཕུར་བུ་བཀྲ་ཤིས་ལགས་བལ་ཡུལ་མཆོད་འཇོར་ས་གནས་མགོ་འཛིན་དུ་བདམས་ཐོན་བྱུང་ཡོད་པ་ལྟར་ལས་འཁུར་དམ་བཅའ་ཕུལ་འདུག
དེ་རིང་སྔ་དྲོར་བལ་ཡུལ་མཆོད་འཇོར་ས་གནས་མགོ་འཛིན་གསར་པས་ལས་འཁུར་གྱི་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་ཐོག་ས་མགོའི་ལས་ཚབ་རྩིབ་རི་ལོ་པཎ་རིན་པོ་ཆེ་མཆོག་དང་ས་གནས་མགོ་འཛིན་གསར་པ་ཕུར་བུ་བཀྲ་ཤིས་ལགས་གཉིས་བར་རྩིས་སྤྲོད་རྩིས་ལེན་གནང་ཡོད་པ་དང་། བལ་ཡུལ་སྐུ་ཚབ་དོན་གཅོད་ཁང་གི་དྲུང་ཡིག་དང་། རྒྱལ་ས་འཕགས་པ་ཤིང་གི་ས་གནས་མགོ་འཛིན་གཅིག་ལྕོགས་ཀརྨ་རྒྱལ་མཚན་ལགས་ཀྱིས་འོས་བསྡུའི་འགན་འཛིན་གནང་ཡོད་འདུག
ཟླ་འདིའི་ཕྱི་ཚེས ༡༨ ཉིན་བལ་ཡུལ་ཆོས་འཇོར་གྱི་སྐབས་ ༧ པའི་ས་གནས་མགོ་འཛིན་གྱི་དངོས་གཞིའི་འོས་བསྡུའི་ཁྲོད། ས་འཐུས་ཚོགས་གཙོ་ཕུར་བུ་བཀྲིས་ལགས་སུ་འོས་གྲངས་ ༨༠༤ དང་། སྐལ་བཟང་དོན་གྲུབ་ལགས་སུ་འོས་གྲངས་ ༦༥༣ ཐོབ་སྟེ། ས་འཐུས་ཚོགས་གཙོ་ཕུར་བུ་བཀྲིས་ལགས་བལ་ཡུལ་མཆོད་འཇོར་ས་གནས་མགོ་འཛིན་གསར་པར་བདམས་ཐོན་བྱུང་ཡོད་འདུག
ཕུར་བུ་བཀྲ་ཤིས་སམ་ཡོངས་གྲགས་སུ་རྒན་ཕུར་བུ་ནི་ཕ་ཡུལ་སྐྱིད་གྲོང་ཡིན་པ་དང་། སྦིར་སུ་ཇ་ནས་གཞི་རིམ་གྱི་སློབ་སྦྱོང་གནང་རྗེས། བལ་ཡུལ་དུ་སྒེར་གྱི་སློབ་གྲྭ་ཁག་གཉིས་ཙམ་དང༌། ལྷག་པར་ཀོ་པན་བཙུན་དགོན་དུ་བོད་དགེ་ཡུན་རིང་གནང་རྗེས། བལ་ཡུལ་མཆོད་འཇོར་ཁུལ་དུ་མི་མང་གི་རེ་འདོད་བཞིན་མཆོད་རྟེན་རང་བདེན་ཚོགས་ཆུང་གི་དྲུང་ཡིག་ཐེངས་ ༢ རིང་གནང་ཡོད་འདུག དེ་བཞིན་དབུས་གཙང་ཆོལ་ཁའི་དབུས་སའི་རྒྱུན་ལས་སོགས་གནང་མྱོང་ཡོད་འདུག
གཞན་ཡང་། བཅའ་ཁྲིམས་དོན་ཚན་ ༡༡ པ་དང་ ༣༨ ནང་ཁྱད་ཆོས་ལྡན་པའི་ས་གནས་དེ་གའི་ཁུངས་གཏོགས་བོད་མི་སེར་སྐྱ་ཕོ་མོ་ཡོངས་ལ་ས་གནས་མགོ་འཛིན་གྱི་འོས་གཞིར་གཞུག་པ་དང་། འོས་འདེམས་བྱེད་པའི་ཐོབ་ཐང་ཡོད་ཅེས་འཁོད་ཡོད་པ་བཞིན། དྷ་ས་གཙོས། ལ་དྭགས་བསོད་ནམ་གླིང་། སྦིར་གཞིས་ཆགས། བལ་ཡུལ་མཆོད་འཇོར་གཙོས་རྒྱ་བལ་འབྲུག་གསུམ་གྱི་གཞིས་ཆགས་ཁག་ཅིག་གི་ས་གནས་མགོ་འཛིན་རྣམས། ས་གནས་མི་མང་རང་གིས་མང་མོས་ཀྱི་ཐོག་ནས་འོས་འདེམས་སྲོལ་ཡོད་པ་རེད།
གསར་འགོད་པ། དཔལ་ལྡན།
