ཡུ་རོབ་ཧྥ་རན་སིའི་རྒྱའི་ཟ་ཁང་ཞིག་ཏུ་ལས་ཀ་བྱེད་མཁན་བོད་མི་ཞིག་དམར་གསོད་བཏང་བའི་དོན་རྐྱེན་ཁྲིམས་གཏུག་ཆེད་འཕྲལ་དུ་ཁྲིམས་རྩོད་པ་ཚད་ལྡན་ཞིག་གླ་དང་ཧྥ་རན་སིའི་སྲིད་བློན་སོགས་ཀྱི་མཚན་ཐོག་ཏུ་གནད་དོན་སྙན་ཞུ་འབུལ་འཆར་ཡོད་འདུག
ཉིན་ཤས་གོང་དུ་ཡུ་རོབ་རྒྱལ་ཁབ་ཧྥ་རན་སིའི་ནོར་མན་ཌི་ཞེས་པའི་ས་གནས་ཀྱི་རྒྱའི་ཟ་ཁང་ཞིག་ཏུ་ལས་ཀ་བྱེད་མཁན་བོད་མི་ཞིག་ལ་གྲིས་བརྒྱབ་སྟེ་བསད་པའི་དོན་རྐྱེན་བྱུང་བར་བརྟེན། ཁ་སང་ཕྱི་ཚེས་ ༡༣ ཉིན་ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་དང་། ས་གནས་དོན་གཅོད་འབྲེལ་མཐུད་པ། ཧྥ་རན་སི་བོད་རིགས་ཚོགས་པའི་ཚོགས་གཙོ་ཚོགས་གཞོན། ས་གནས་ཀྱི་ཆོལ་ཁ་གསུམ་གྱི་སྐྱིད་སྡུག་གི་ཚོགས་གཙོ་ཚོགས་གཞོན་རྣམ་པ། དེ་བཞིན་ས་གནས་གཞོན་ནུ་དང་བོད་རང་བཙན་སློབ་ཕྲུག་ཚོགས་པ་བཅས་ཀྱི་འཐུས་མིས་ཛ་དྲག་ཚོགས་འདུ་བསྡུས་ཏེ། ཉེ་སྔོན་བྱུང་བའི་དོན་རྐྱེན་དེའི་སྐོར་གྲོས་བསྡུར་བྱས་ཏེ་ཐག་གཅོད་དོན་ཚན་ ༥ ཕྱིར་བསྒྲགས་བྱས་འདུག
འཕྲལ་དུ་ཁྲིམས་རྩོད་པ་ཚད་ལྡན་ཞིག་གླས་ནས་མི་བསད་པའི་གནད་དོན་ཞུ་གཏུག་བྱ་རྒྱུ་དང་། ཧྥ་རན་སིའི་སྲིད་བློན་དང་ཁྲིམས་དོན་བློན་ཆེན། ནང་སྲིད་ལས་ཁུངས་དང་ཉེན་རྟོག་ལས་ཁུངས་བཅས་སུ་བོད་རིགས་ཚོགས་པའི་མིང་ཐོག་ནས་སྙན་ཞུ་འབུལ་རྒྱུ། དེ་བཞིན་ཟླ་འདིའི་ཕྱི་ཚེས་ ༡༧ ཉིན་ཧྥ་རན་སིར་གནས་སྡོད་བོད་རིགས་རྣམས་ཀྱིས་ཕེ་རི་སི་ལ་བོད་མི་གང་མང་མཉམ་ཞུགས་ཀྱིས་མྱ་ངན་གོམ་བགྲོད་བྱ་རྒྱུ། དེ་བཞིན་ཕྱི་ཚེས་ ༡༨ ཉིན་དོན་རྐྱེན་བྱུང་སའི་ཁུལ་དུ་མྱ་ངན་གོམ་བགྲོད་ཀྱི་ལས་འགུལ་སྤེལ་རྒྱུ་དང་། ཟླ་འདིའི་ཕྱི་ཚེས་ ༢༤ ཉིན་བོད་རིགས་ཚོགས་པ་གོ་སྒྲིག་འོག་གདུང་སེམས་མཉམ་སྐྱེད་དང་མཆོད་འབུལ་སྨོན་ལམ་འཚོག་རྒྱུ་ཡིན་པ་མ་ཟད། རྒྱའི་ཟ་ཁང་ནང་ལས་ཀ་བྱེད་བཞིན་པའི་བོད་མི་ཚང་མས་ཟླ་གཅིག་རིང་ལས་མཚམས་བཞག་ནས་ངོ་རྒོལ་གྱི་རྣམ་འགྱུར་སྟོན་དགོས་པའི་རེ་སྐུལ་བྱས་ཡོད་པ་དང་སྦྲགས། ས་གནས་བོད་མི་རྣམས་ནས་གཟབ་གཟབ་བྱེད་དགོས་པའི་འབོད་སྐུལ་བྱས་འདུག
དེའི་སྐོར་ལ་ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་འདི་གའི་གསར་འགོད་པར། ང་ཚོའི་མི་ཚེའི་ནང་ལ་ལས་ཀ་བྱེད་སའི་ཁུལ་དུ་རྙོག་དྲ་ཆུང་ཆུང་ཡོང་གི་རེད། ཡིན་ནའང་སྲོག་གཅོད་དགོས་པའི་གནས་སྟངས་ཡོང་གི་མ་རེད་བསམ་གྱི་འདུག གནས་ཚུལ་དེའི་སྐོར་གོ་བ་དང་སེམས་གཏན་ནས་སྐྱིད་པོ་བྱུང་མ་སོང་། རྒྱ་ནག་གཞུང་གིས་བོད་ཀྱི་ལུང་པ་འཕྲོག་པ་དང་། བོད་ཀྱི་བཙོན་པ་མང་པོ་བཙོན་ཁང་ནང་དུ་བཅུག་པ་སོགས་གནད་དོན་མང་པོ་བྱུང་གི་ཡོད་པ་རེད། རྒྱ་མིས་བོད་པ་བསད་པའི་གནད་དོན་འདི་ཐོག་མ་དང་མཐའ་མ་ཡིན་པའི་རེ་བ་ཡོད། ཅེས་དང་། ད་ལྟའི་ཆར་གནད་དོན་འདིའི་ཐོག་ལ་ས་གནས་ཉེན་རྟོག་པས་ཞིབ་འཇུག་བྱེད་བཞིན་ཡོད་སྐོར་སོགས་གསུངས་བྱུང་།
དེ་ཡང་ཟླ་འདིའི་ཕྱི་ཚེས་ ༡༡ ཉིན་ཧྥ་རན་སིའི་ (Normandie) ས་གནས་སུ་ཡོད་པའི་ (Saint-Léonard) ཟེར་བའི་ (Fecamp) གྲོང་རྡལ་དང་ཐག་ཉེར་ཡོད་པའི་རྒྱའི་ཟ་ཁང་ཞིག་ནང་ལས་ཀ་བྱེད་མཁན་བོད་མི་ཚུལ་ཁྲིམས་ཞེས་པར་རྒྱ་མིས་རྒྱུ་མཚན་ཅི་ཡིན་ཁ་གསལ་མེད་པར་གྲིས་བརྒྱབ་སྟེ་བསད་ཡོད་པ་དང་། དམར་གསོད་དོན་རྐྱེན་དེ་བྱུང་རྗེས་ཕྱི་ཚེས་ ༡༢ ཉིན་ཧྥ་རན་སིའི་ (Park Dolby) ས་གནས་སུ་བོད་མི་ཁག་ཅིག་གིས་བསྔོ་སྨོན་གསུང་འདོན་བྱས་ཡོད་པ་དང་། དེ་བཞིན་བོད་མི་ཁ་ཤས་ཤིག་ཟ་ཁང་དེའི་ཉེ་འཁྲིས་སུ་ཕྱིན་ཏེ་མར་མེའི་ཁྲོམ་སྐོར་བྱས་ཡོད་འདུག
ད་ལྟའི་ཆར་བོད་མིའི་སྤྱི་ཚོགས་དྲ་ལམ་ཁག་ཏུ་དམར་གསོད་དོན་རྐྱེན་དེའི་སྐོར་ལ་གླེང་སློང་མང་པོ་བྱེད་བཞིན་འདུག ཧྥ་རན་སི་སོགས་ཡུ་རོབ་དང་ཨ་རི་སོགས་སུ་ཡོད་པའི་རྒྱ་མིའི་ཟ་ཁང་དང་ཚོང་ཁང་ནང་ལས་ཀ་བྱེད་མཁན་བོད་མི་མང་པོ་ཡོད་པ་དང་། ད་ལན་གྱི་དམར་གསོད་དོན་རྐྱེན་དེ་བྱུང་རྗེས། ཧྥ་རན་སིའི་ནང་ཡོད་པའི་རྒྱའི་ཟ་ཁང་ནང་དུ་ལས་ཀ་བྱེད་མཁན་བོད་མི་མང་པོ་ཞིག་གིས་གདུང་སེམས་མཉམ་སྐྱེད་མཚོན་སླད་ལས་འགུལ་ནང་མཉམ་ཞུགས་དགོས་པའི་སྐུལ་འདེད་གཏོང་གི་ཡོད་པ་མ་ཟད། ཉིན་ཤས་རིང་དང་ཡང་ན་ཟླ་གཅིག་ལ་ལས་མཚམས་འཇོག་མཁན་དང་། ཡང་རྦད་དེ་ལས་ཀ་ནས་རྩ་དགོངས་ཞུ་མཁན་ཡང་ཡོང་གི་ཡོད་འདུག
ཧྥ་རན་སིར་གནས་སྡོད་བོད་མི་ཞིག་གིས་འདི་གའི་གསར་འགོད་པར། བོད་རིགས་སྐྱེས་པ་དེའི་མིང་ལ་ཚུལ་ཁྲིམས་ཟེར་ཞིང་། བོད་ལི་ཐང་ནས་ཡིན་པ་དང་། ཁོས་རྒྱའི་ཟ་ཁང་དེའི་ནང་ལས་ཀ་བྱས་ནས་ཉིན་གྲངས་འགའ་ལས་འགྲོ་ཡི་མེད་སྐོར་དང་། རྒྱའི་ཟ་ཁང་དེའི་སྦྱིན་བདག་བཟའ་ཟླ་གཉིས་སོགས་ཀྱིས་རུབ་བརྒྱབ་སྟེ་གསོད་རྩིས་རང་བྱས་ནས་གྲིས་མང་པོ་བརྒྱབ་རྗེས་མི་མཐོང་ས་ཞིག་ཏུ་གཡུགས་ཡོད་ཀྱང་། ཕྱིས་སུ་མི་ཞིག་གིས་མཐོང་སྟེ་སྨན་ཁང་དུ་བསྐྱལ་ཡོད་ཀྱང་ཕན་ཐོགས་བྱུང་མེད་སྐོར་བརྗོད་བྱུང་།
གསར་འགོད་པ། བསྟན་འཛིན་ཕུར་བུ།
ཅིའི་ཕྱིར་རྒྱ་མིའི་ཟ་ཁང་དུ་ལས་ཀ་བྱས་རེད།