ཁ་སང་ཨ་རིའི་གྲོས་ཚོགས་འོག་མའི་ནང་ཞི་བའི་ལམ་ནས་བོད་རྒྱའི་དཀའ་རྙོག་སེལ་བར་ཨ་རིས་མུ་མཐུད་དུ་རྒྱབ་སྐྱོར་གནང་རྒྱུ་ཡིན་པའི་ཁྲིམས་འཆར་བཏོན་ཡོད་འདུག
ཁ་སང་ཕྱི་ཚེས་ ༡༣ ཉིན་རྒྱལ་སྤྱིའི་བོད་དོན་ལས་འགུལ་ཁང་ནས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གསར་པ་བཏོན་ཡོད་པ་དང་། བོད་དོན་རྒྱབ་སྐྱོར་གནང་མཁན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝེན་ (Jim McGovern)ལགས་དང་།ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཞོན་གྲོས་ཚོགས་འཐུས་མི་སྐུ་ཞབས་མེ་ཁལ་མེ་ཁོལ་ (Michael McCaul)ལགས་གཉིས་ཀྱིས་གྲོས་ཚོགས་ནང་།ད་ལྟའང་བོད་རྒྱའི་དཀའ་རྙོག་སེལ་མེད་པ་དང་།རྒྱལ་སྤྱིའི་ཁྲིམས་ཀྱི་ཐོག་ནས་བོད་ཀྱི་ཁྲིམས་མཐུན་གྱི་གནས་བབ་ད་དུང་ཐག་གཅོད་གནང་མེད་པར་ངོས་འཛིན་པའི་ཐོག་ནས།རྒྱལ་སྤྱིའི་ཁྲིམས་གཞིར་བཟུང་བོད་མི་རྣམས་ལ་བོད་ཀྱི་བདག་དབང་དང་རང་ཐག་རང་གཅོད་ཀྱི་ཐོབ་ཐང་ཡོད་པ་དང་།ད་ལྟའི་ཆར་རྒྱ་ནག་གཞུང་གིས་བོད་ཀྱི་བདག་དབང་འཕྲོག་བཞིན་ཡོད་པ་དང་།བོད་དེ་རྒྱ་ནག་གི་ཁོངས་གཏོགས་ཡིན་སྐོར་དང་བོད་ནང་ཡོད་པའི་བོད་མི་རྣམས་ལ་རྡུང་རྡེག་དང་འགྲོ་བ་མིའི་ཐོབ་ཐང་འཕྲོག་པ་སོགས་གསལ་པོར་བསྟན་ནས།བོད་རྒྱའི་དཀའ་རྙོག་སེལ་བར་བོད་མི་དམངས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་བརྟེན།ཞི་བའི་ལམ་ནས་བོད་རྒྱའི་དཀའ་རྙོག་སེལ་བར་ཨ་རིས་མུ་མཐུད་དུ་རྒྱབ་སྐྱོར་གནང་རྒྱུ་ཡིན་པའི་ཁྲིམས་འཆར་བཏོན་ཡོད་འདུག
གནས་ཚུལ་དེ་དང་འབྲེལ་དེ་རིང་སྔ་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཊེ་ཊིར་སྤྱི་ཚོགས་དྲ་ལམ་སྟེང་།བོད་མིའི་སྒྲིག་འཛུགས་ངོས་ནས་ཨ་རིའི་གྲོས་ཚོགས་ནང་ཁྲིམས་འཆར་དེ་བཏོན་མཁན་རྣམ་པ་ཚོར་ཐུགས་རྗེ་ཆེ་ཞུ་བཞིན་ཡོད་ལ།ཁྲིམས་འཆར་དེ་བརྒྱུད་བོད་རྒྱའི་བཀའ་རྙོག་སེལ་ཐབས་སུ་སྐུལ་འདེད་གཏོང་ཆེད།ཁྲིམས་འཆར་དེ་ཨ་རིའི་གཞུང་འབྲེལ་སྲིད་བྱུས་ཤིག་ཆགས་ཏེ།བོད་ཀྱི་ཁྲིམས་མཐུན་གོ་གནས་སྔར་བཞིན་རྒྱལ་སྤྱིའི་བཅའ་ཁྲིམས་ཀྱི་གཏན་འབེབས་གཞིར་བཟུང་ནས།རྒྱ་ནག་གཞུང་གིས་བོད་དེ་ཁྲིམས་འགལ་ངང་ལོ་རྒྱུས་ཐོག་ནས་རྒྱ་ནག་གི་མངའ་ཁུངས་ཡིན་པའི་རྫུན་བསྒྲགས་དེ་ཐེར་འདོན་བྱས་ཡོད་སྐོར་བཀོད་འདུག
ཡང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས།ཨ་རིའི་གཞུང་ནས་བོད་དོན་ལ་རྒྱབ་སྐྱོར་ཆེན་པོ་ཡོད་པ་ལྟར།བོད་རྒྱའི་དཀའ་རྙོག་སེལ་ཐབས་ཆེད་ཨ་རིའི་གཞུང་གི་ངོས་ནས་གོམ་པ་མདུན་སྤོས་དང་ནུས་པ་ཤུགས་ཆེ་རུ་གཏོང་བའི་ཁྲིམས་འཆར་བཏོན་གནང་ཡོད་པ་རེད། ཁྲིམས་འཆར་དེའི་ནང་གནད་དོན་གལ་ཆེ་ཤོས་གཉིས་ནི། བོད་རྒྱའི་དཀའ་རྙོག་གི་གནད་དོན་ད་ལྟའང་སེལ་མེད་པ་དང་།རྒྱལ་སྤྱིའི་ཁྲིམས་ཀྱི་འོག་ནས་ཡིན་རུང་བོད་ཀྱི་ཁྲིམས་མཐུན་གྱི་གནས་བབ་དེ་ད་ལྟ་ཐག་གཅོད་བྱས་མེད་པར་ངོས་འཛིན་པའི་ཐོག་ནས་ཁྲིམས་འཆར་བཏོང་ཡོད་པ་རེད།དེ་བཞིན་བོད་མི་ཚོའི་བདག་དབང་དང་རང་ཐག་རང་གཅོད་ཀྱི་ཐོབ་ཐང་དེརྒྱལ་སྤྱིའི་ཁྲིམས་ཀྱི་འོག་ནས་བོད་མི་རང་ལ་ཡོད་པ་དང་།ད་ལྟའི་ཆར་རྒྱ་ནག་སྲིད་གཞུང་གིས་བོད་མི་ཚོའི་ཐོབ་ཐང་འཕྲོག་བཞིན་ཡོད་པ་གསལ་པོ་སྟོན་གྱི་ཡོད་རེད།ད་ལྟའི་ཁྲིམས་འཆར་གྱི་རྒྱབ་ལྗོངས་ནི་རྒྱ་ནག་གིས་བོད་ཀྱི་རྒྱལ་ཁབ་ལ་བདག་དབང་བཙན་བཟུང་བྱས་ཏེ་བདག་དབང་བསྐྲུན་རྒྱུའི་ཐབས་ཤེས་གཏོང་གི་ཡོད་རེད་དེ།རྒྱ་ནག་ལ་བདག་དབང་མེད་པ་གསལ་པོ་སྟོན་པ་དང་ལོ་རྒྱུས་ཀྱི་ཐོག་ནས་བོད་ཀྱི་བདག་དབང་རྒྱ་ནག་མིན་པ་གསལ་པོ་ཤེས་པའི་བརྡ་ལན་སྤྲད་ཐུབ་ཀྱི་ཡོད་པ་རེད། ཅེས་བརྗོད་སོང་།
སྐུ་ཚབ་དོན་གཅོད་ལགས་ནས་མུ་མཐུད།ད་ལྟ་ཁྲིམས་ཆར་འདིའི་བརྒྱུད་ནས་ད་ལྟའི་བོད་དོན་ཐོག་ལ་དམིགས་བསལ་འབྲེལ་མཐུད་པས་བོད་རྒྱའི་དཀའ་རྙོག་སེལ་བར་གྲོས་མོལ་གྱི་ལམ་ནས་ཞུ་དགོས་པའི་འགན་ཡོད་པ་དང་།རྒྱ་ནག་གི་བོད་ཀྱི་ཐོག་ལ་ལོ་རྒྱུས་དང་བོད་མིའི་སྤྱི་ཚོགས།དེ་བཞིན་བོད་མིའི་འཐབ་རྩོད་དང་༧གོང་ས་མཆོག་གི་སྒྲིག་འཛུགས།སྐུ་དབང་གི་ཐད་ལ་ལོག་ཤེས་དང་ཐེ་ཇུས་བྱེད་ཀྱི་ཡོད་པ་རྣམས་ལ་གདོང་ལེན་བྱེད་དགོས་པ་དེ་ཁྲིམས་འཆར་འདིའི་བརྒྱུད་ནས་ཤུགས་ཆེ་རུ་འགྲོ་ཡི་རེད།ཁྲིམས་འཆར་བཏོན་ཚར་རྗེས་ད་ལྟའི་གྲོས་ཚོགས་ཀྱི་ལས་རིམ་དང་འགྲོ་སྟངས་འགྲོ་ལུགས་ཀྱི་སྒོ་ནས་ལྷ་རབས་བྱུང་ན་གྲོ་ས་ཚོགས་འོག་མའི་ནང་ནས་སྤྱི་མོས་ཀྱིས་གཏན་ལ་ཕབ་ཡོད་ན།གྲོས་ཚོགས་གོང་མའི་ནང་བསླེབས་ཏེ་རྒྱབ་སྐྱོར་ཐོབ་ན་སྲིད་འཛིན་གྱི་སྒྲོག་རྩེའི་སྟེང་དུ་བསླེབས་ནས།སྲིད་འཛིན་གྱིས་མཚན་རྟགས་བསྐྱོན་ན་དངོས་སུ་ཁྲིམས་འཆར་ཆགས་ཀྱི་ཡོད་རེད།ད་ལྟའི་ཁྲིམས་འཆར་དེ་གང་མགྱོགས་གཏན་འབེབ་ཡོང་རྒྱུའི་རེ་བ་ཡོད་སྐོར་དང་།གཙོ་བོ་མི་དམངས་རྣམས་ཀྱིས་ཁྲིམས་འཆར་དེ་ལ་ཐུགས་སྣང་དང་རྒྱབ་སྐྱོར་གནང་དགོས་པའི་འབོད་སྐུལ་ཞུས་སོང་།
གསར་འགོད་པ། བསྟན་འཛིན་ཕུར་བུ།
