བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་བཅུ་བཞི་པ་དེ་ལ་དྭགས་བསོད་ནམས་གླིང་བོད་མིའི་མཉམ་འབྲེལ་གྱི་ཚོགས་ཁང་དུ་ཉིན་གྲངས་ལྔའི་རིང་འཚོག་གི་འདུག
དེ་རིང་སྔ་དྲོའི་ཆུ་ཚོད་ ༩།༣༠ སྟེང་ལ་དྭགས་བསོད་ནམས་གླིང་བོད་མིའི་མཉམ་འབྲེལ་གྱི་ཚོགས་ཁང་དུ། བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་སྐབས་བཅུ་བཞི་པའི་ཚོགས་འདུ་ཉིན་གྲངས་ལྔའི་རིང་ཚོགས་མགོ་བརྩམས་སོང་བ་དང་། ཚོགས་ཐོག་ཏུ་སྐུ་མགྲོན་གཙོ་བོར་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་དབུ་བཞུགས་ཐོག དབུས་བོད་ཀྱི་བུད་མེད་ལྷན་ཚོགས་ཀྱི་སྤྱི་ཁྱབ་འགན་འཛིན་བསྟན་འཛིན་སྒྲོལ་མ་ལགས་ཀྱི་གཙོས་རྒྱ་བལ་གཉིས་དང་ཨ་རི། ཡུ་རོབ་སོགས་ཀྱི་ས་གནས་ ༢༨ ནས་བུད་མེད་ཚོགས་བཅར་བ་ཁྱོན་མི་གྲངས་ ༧༥ དང་། ལ་སྤྱི་དོན་འགྲུབ་བཀྲ་ཤིས་ལགས་ཀྱི་གཙོས་ལ་དྭགས་ཨ་མའི་ཚོགས་པ་དང་ལ་དྭགས་བོད་ཁྱིམ་གྱི་དགེ་རྒན་ཁག་ཅིག་བཅས་ཁྱོན་མི་གྲངས་ ༡༠༠ ལྷག་འཛོམས་འདུག
ཚོགས་ཐོག་ཏུ་བུད་མེད་ལྷན་ཚོགས་ཀྱི་སྤྱི་ཁྱབ་འགན་འཛིན་བསྟན་འཛིན་སྒྲོལ་མ་ལགས་ཀྱིས། སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་མཆོག་སྤྲུལ་རིན་པོ་ཆེ་མཆོག་གི་སྐུ་ཚེ་ཡུན་རིང་བརྟན་ཞིང་མཛད་འཕྲིན་ལྷུན་གྱི་འགྲུབ་ཆེད་༸རྗེ་བཙུན་སྒྲོལ་མའི་སྐུ་རྟེན་ཞིག་འབུལ་ལམ་ཞུས་པ་དང་སྦྲགས། བོད་ཀྱི་བུད་མེད་ལྷན་ཚོགས་དེ་ཕྱི་ལོ་ ༡༩༥༩ ཟླ་ ༣ ཚེས་ ༡༢ ཉིན་དབུ་འཛུགས་གནང་ཞིང་། ཚོགས་གཙོ་ཐོག་མ་ཀུན་བདེ་གླིང་དཔལ་མོ་ཀུན་བཟང་ལགས་ཡིན་པ་སོགས་ཀྱི་ལོ་རྒྱུས་ལུང་འདྲེན་དང་། བཙན་བྱོལ་དུ་བུད་མེད་ལྷན་ཚོགས་སླར་གསོ་བྱས་ཏེ། ད་ལྟའི་ཆར་བོད་ཀྱི་བུད་མེད་ལྷན་ཚོགས་ལ་ས་གནས་ཡན་ལག་ཁྱོན་ ༥༨ དང་ཚོགས་མི་ཁྲི་གཉིས་ཡོད་སྟབས། གཞུང་འབྲེལ་མིན་པའི་ཚོགས་པ་ཆེ་ཤོས་ཤིག་ཡིན་པའི་བརྒྱུད་རིམ་སོགས་ངོ་སྤྲོད་གནང་གྲུབ་མཚམས། བོད་ཀྱི་བུད་མེད་ལྷན་ཚོགས་དེ་༸གོང་ས་མཆོག་གི་ཞབས་འོག་དཔུང་འདེགས་དང་༸མགོན་པོ་གང་ཉིད་མཆོག་གི་བཀའ་དགོངས་དང་དབུ་མའི་ལམ་ལ་ཤར་བསྐྱོད་གནང་མཁན་གྱི་ཚོགས་པ་ཞིག་ཡིན་པ་དང་། བོད་ནང་རང་ལུས་མེར་སྲེག་གནང་མཁན་གྱི་རྒྱལ་གཅེས་དཔའ་བོ་དཔལ་མོ་དག་གི་སླད་དུ་སྔོན་སྨོན་གསོག་སྒྲུབ་དང་གདུང་སེམས་མཉམ་སྐྱེད་ཀྱི་ལས་འགུལ་སྤེལ་གྱི་ཡོད་པ། བོད་ཀྱི་ཁོར་ཡུག་སྲུང་སྐྱོབ་དེ་བོད་པ་ཙམ་དུ་མ་ཟད་པའི་འཛམ་གླིང་སྤྱི་ལ་གལ་ཆེ་བའི་གནད་དོན་ཞིག་ཡིན་སྟབས། དབུས་བོད་ཀྱི་བུད་མེད་ལྷན་ཚོགས་ངོས་ནས། བོད་ཀྱི་ཁོར་ཡུག་སྲུང་སྐྱོབ་དང་འབྲེལ་བའི་རྒྱལ་སྤྱིའི་ཚོགས་འདུ་གང་ཡོད་སྟེང་མཉམ་ཞུགས་དང་ཞུ་གཏུགས་སོགས་ཀྱི་ལས་འགུལ་མང་དག་ཅིག་སྤེལ་ཡོད་པ་མ་ཟད། ལས་བྱེད་ཅིག་ཆེད་དུ་བསྐོས་ཏེ་བོད་ཀྱི་ཁོར་ཡུག་སྲུང་སྐྱོབ་དང་འབྲེལ་བའི་ལས་གཞི་རྒྱ་ཆེར་སྤེལ་ཡོད་སྐོར་དང་། དྲ་རྒྱའི་དུས་རབས་ཡིན་དུས་གློག་ཀླད་སྦྱོང་བརྡར་དང་ཚེམ་བཟོ་འཛིན་གྲྭ ཕྱི་ལོ་ ༢༠༢༡ དང་ ༢༠༢༢ གཉིས་ཀྱི་རིང་བུ་ཕྲུག་ལྔ་ལས་མང་བའི་ཁྱིམ་ཚང་ ༡༡ ལ་མི་འབོར་འཕེལ་རྒྱས་གཏོང་ཐབས་ཀྱི་ལས་གཞིའི་ཁྲོད་ལེགས་སྐྱེས་ཕུལ་ཡོད་སྐོར། ཏོག་དབྱིབས་གཉན་རིམས་སྐབས་བུད་མེད་ལྷན་ཚོགས་ཀྱི་དབུས་ས་གཉིས་ནས་སོ་སོའི་གནས་བབ་ལ་གཞིགས་པའི་སྤྱི་ཚོགས་ཞབས་ཞུའི་ལས་དོན་གང་ཐུབ་ཞུས་པ་དང་བོད་ཀྱི་ཐེབས་རྩ་དང་མཉམ་འབྲེལ་གྱིས་ཕྲུ་གུ་མངལ་ལ་ཡོད་པའི་ཁེར་རྐྱང་གི་ཨ་མ་ ༡༦༠༠ ལྷག་ལ་འཚོ་བཅུད་སོགས་ཀྱི་ཐད་ནས་རྒྱབ་སྐྱོར་རོགས་རམ་ཞུས་ཡོད་པ། ཕྱི་ལོ་ ༢༠༡༩ ལོ་ནས་བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་ཚན་པ་དང་མཉམ་འབྲེལ་གྱིས། བུད་མེད་ལ་བཙན་གཡེམ་དང་བརྙས་བཅོས་ཀྱི་ཁ་པར་གཏོང་མཁན་ ༥༠ ལྷག་ལ་ལམ་སྟོན་དང་སློབ་གསོ་རྒྱག་པ་སོགས་ཀྱི་ཐོག་ན་རོགས་སྐྱོར་བྱས་ཡོད་པ་དང་། ང་ཚོས་ལས་དོན་ག་འདྲ་ཞིག་སྤེལ་བ་ཡིན་ན། བོད་སྤྱིའི་དོན་དུ་ཕྱག་སྤྲེལ་མཉམ་འདེགས་ཀྱིས་སྤེལ་ཐུབ་ཚེ། གྲུབ་འབྲས་ཡག་པོ་ཞིག་སོན་ཐུབ་ཀྱི་འདུག་ཅེས་ཞུ་འདོད་བྱུང་སོང་། ཞེས་སོགས་བརྗོད་སོང་།
མཇུག་ཏུ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་མཆོག་སྤྲུལ་རིན་པོ་ཆེ་མཆོག་གིས། འཛམ་གླིང་ཞི་བདེ་དེ་དཔོན་༸སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་གི་སྐུ་པར་མཐོང་གྲོལ་རིན་པོ་ཆེར་གུས་ཕྱག་སྔོན་དུ་བཏང་བའི་ཐོག་ནས། དེ་རིང་འདིར་བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་བཅུ་བཞི་བའི་ཐོག་ཆིབས་སྒྱུར་བསྐྱངས་པའི་ས་གནས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དབུས་པའི་གཞུང་འབྲེལ་དང་གཞུང་འབྲེལ་མིན་པའི་ཕྱག་ལས་གནང་མཁན་རྣམ་པ་དང་། ལྷག་པར་དུ་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་མཆོག་དབུས་པའི་ས་གནས་ཁག་ ༢༨ ནས་ཕེབས་པའི་ཚོགས་བཅར་བ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད། དེ་རིང་འདིར་ང་ཚོ་བོད་དང་ལོ་རྒྱུས་ཀྱི་ཐོག་ནས་འབྲེལ་བ་གཏིང་ཟབ་ཡོད་པའི་ལ་དྭགས་སུ། དུས་ཀྱི་ཆ་ནས་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཞབས་ཀྱིས་བཅག་སྟེ་ཟབ་ཅིང་རྒྱ་ཆེ་བའི་བཀའ་ཆོས་སྩལ་ནས་བསྐལ་བཟང་གི་དུས་ཚོད་བྱུང་བ་རེད་ལ། དེ་རིང་ལྷག་པར་དུ་སྟོན་པ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་དུས་ཚོད་ཁྱད་པར་ཅན་ཞིག་ལ་རྣམ་པ་ཚོ་འཛོམས་ཐུབ་པ་དེ་རྟགས་དང་རྟེན་འབྲེལ་བཟང་པོ་ཞིག་རེད། བོད་ཀྱི་བུད་མེད་ལྷན་ཚོགས་དེ་བོད་ཀྱི་ཚོགས་པ་མང་པོའི་གྲས་ནས་གལ་འགངས་ཆེ་ཤོས་དང་རྙིང་ཤོས་ཤིག་ཡིན་པ་དངོས་ཡོད་གནས་ཚུལ་རེད། བུད་མེད་ལྷན་ཚོགས་དེ་བོད་མིའི་སྤྱི་ཚོགས་ནང་གི་གལ་འགངས་ཆེ་ཤོས་ཀྱི་ཚོགས་པ་ཞིག་ཡིན་པ་དང་བྱུང་བསྡད་པ་ནི་གཙོ་བོ་༸སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བཞག་པ་ཞིག་དང་། ལྷག་པར་དུ་ཕྱི་ལོ་ ༡༩༥༩ ཟླ་ ༣ ཚེས་ ༡༢ ཉིན་དབུ་ཚུགས་པ་ནས་ཕྱི་ལོ་ ༡༩༨༤ ལོར་བསྐྱར་གསོ་ཐུབ་པ་སོགས་ད་ལྟའི་བར་བུད་མེད་ལྷན་ཚོགས་དང་འབྲེལ་ཞིང་བོད་མིའི་དཔའ་མོ་སྟོང་ཕྲག་མང་པོས་ལུས་ལོངས་སྤྱོད་སྲོག་དང་བཅས་པ་བློས་གཏོང་དང་སྐུ་ལས་བསྐྱོན་ནས་བྱུང་བ་ཞིག་ཆགས་བསྡད་པ་ནི་གཟི་བརྗིད་ཅིག་རེད། དེར་བརྟེན། འདས་པའི་སྐབས་ལ་དེ་འདྲ་ཞིག་བྱུང་བ་ནི་ཁོང་རྣམ་པས་སྐུ་ལས་བསྐྱོན་པའི་འབྲས་བུ་རེད་ལ། ལྷག་པར་དུ་ད་ལྟ་དང་མ་འོངས་པ་དེ་དེ་ལས་གལ་ཆེ་བ་ཆགས་ཡོད་དུས། ད་ལྟ་དང་མ་འོངས་པའི་སྐབས་ཀྱི་བུད་མེད་ལྷན་ཚོགས་ཀྱི་མདུ
ན་ལམ་དེ། ད་ལྟ་འདིར་ཆིབས་སྒྱུར་བསྐྱངས་པའི་རྣམ་པ་ཚོར་རག་ལས་ཡོད་པ་རེད། མ་འོངས་པའི་ཁ་ཕྱོགས་དེ་གལ་ཆེན་པོ་ཆགས་ཡོད་དུས་རྣམ་པ་ཚོར་འགན་འཁྲི་ཞིག་དང་དེའི་ཐོག་ཐུགས་འགན་བཞེས་རྒྱུ་གལ་ཆེན་པོ་ཞེ་དྲགས་རེད། ད་གི་གོང་དུ་ཚོགས་གཙོ་མཆོག་ནས་གསུང་བ་བཞིན། ད་ལྟ་འདིར་ཕེབས་བསྡད་པའི་རྣམ་པ་ཚོས་གཞིས་ལུས་བོད་མི་སྤྱིའི་སྐུ་ཚབ་ཅིག་ཆགས་བསྡད་ཡོད་པ་རེད། དེ་ཡིན་དུས་ང་ཚོས་གཞིས་ལུས་སྤུན་ཟླ་ཚོའི་སྐུ་ཡི་སྐུ་ཚབ། གསུང་གི་གསུང་ཚབ། ཐུགས་ཀྱི་ཐུགས་ཚབ་ཅིག་གནང་ཐུབ་པ་དང་འགན་འཁུར་ཐོག་པའི་ཐོག་ནས་མ་འོངས་པའི་ཆེད་དུ་རིག་པ་བསྒྲིམ་གནང་རྒྱུ་ཧ་ཅང་གལ་ཆེན་པོ་རེད་བསམ་གྱི་ཡོད། ཅེས་གསུངས་སོང་།
བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་བཅུ་བཞི་བའི་སྟེང་གྲོས་གཞི་དོན་ཚན་བརྒྱད་ཡོད་པ་དག་ནི། དབུས་ས་གཉིས་ཀྱི་རྩིས་ཁྲ་སྙན་སྒྲོན་དང་འགན་ལྷན་སྐབས་བཅུ་གསུམ་པའི་གྲོས་ཆོད་ཁག་ལ་བསྐྱར་ཞིབ་ཀྱིས་མཇུག་སྐྱོང་དགོས་རིགས་ཇི་འོས་གནང་རྒྱུ་དང་། ༸གོང་ས་རྒྱལ་བ་རིན་པོ་ཆེ་མཆོག་གི་༸སྐུ་ཕྱྭའི་ཞབས་རིམ་དང་དམིགས་བསལ་བཀའ་བཞིན་མཆོད་པའི་མཉེས་པ་ཞུ་ཐབས། ༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དབུས་པའི་ཆབ་སྲིད་བཙོན་པ་ཡོངས་མགྱོགས་མྱུར་ཀློད་གྲོལ་ཡོང་ཐབས་ཀྱི་ལས་འགུལ་སྤེལ་ཕྱོགས། བུད་མེད་ལྷན་ཚོགས་ཀྱི་དམིགས་ཡུལ་དང་འབྲེལ་བའི་ལས་འགུལ་སྤེལ་ཕྱོགས། བོད་ཀྱི་སྐད་ཡིག་སྲུང་སྐྱོབ་དང་ཤེས་ཡོན་སོགས་གོང་མཐོར་གཏོང་ཐབས། ཛ་དྲག་གནས་སྟངས་འོག་ཏུ་ཡོད་པའི་བོད་ཀྱི་ཁོར་ཡུག་སྲུང་སྐྱོབ་ཀྱི་ལས་འགུལ་སྤེལ་ཕྱོགས། བོད་ཀྱི་བུད་མེད་ལྷན་ཚོགས་ཀྱི་སྒྲིག་འཛུགས་སྔར་ལྷག་ཚགས་ཚུད་སྲ་བརྟན་ཡོང་ཐབས། མི་འབོར་འཕེལ་རྒྱས་གཏོང་ཐབས་ཀྱི་སྐོར་བཅས་རེད་འདུག
