བོད་ཧིན་ས་མཚམས་སུ་ཨ་རི་དང་རྒྱ་གར་གཉིས་ཀྱིས་མཉམ་འབྲེལ་དམག་སྦྱོང་བྱ་རྒྱུ་རེད།

འདི་ལོའི་ཕྱི་ཟླ་ ༡༠ པའི་ནང་རྒྱ་གར་དང་ཨ་རི་གཉིས་ཀྱིས་རྒྱ་གར་གྱི་མངའ་སྡེ་ཨུ་ཏ་ར་ཁཱན་ (Uttarakhand) གྱི་བོད་ཧིན་མཐའ་མཚམས་ཤིག་ཏུ་ཚད་མཐོའི་དམག་སྦྱོང་བྱ་རྒྱུ་ཡིན་འདུག

The Indo-US joint training exercise concluded at Elmendorf Richardson joint base in Alaska.

ཁ་སང་ཕྱི་ཚེས་ ༤ ཉིན་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། འདི་ལོའི་ཕྱི་ཟླ་ ༡༠ ཚེས་ ༡༤ ཙམ་ནས་ ༣༡ བར་ཨ་རི་དང་རྒྱ་གར་གཉིས་ཀྱིས་རྒྱ་གར་བྱང་ཕྱོགས་ཨུ་ཏ་ར་ཁཱན་གྱི་ཅ་མོ་ལི་རྫོང་ (Chamoli District) གི་ཨའོ་ལི་ (Auli) ཞེས་པའི་རི་ཁུལ་བོད་ཧིན་ས་མཚམས་སུ། རྒྱ་གར་གྱིས་ས་མཐོའི་འཐབ་ཇུས་ངོ་སྤྲོད་དང་ཨ་རིས་དམག་འཁྲུག་སྐབས་འཕྲུལ་རིག་བཀོལ་སྤྱོད་བྱེད་ཐབས་བཅས་ཕྱོགས་གཉིས་ནས་བདུན་ཕྲག་གཉིས་ཡས་མས་རིང་ཉམས་མྱོང་བརྗེ་ལེན་གྱི་དམག་སྦྱོང་བྱ་རྒྱུ་ཡིན་འདུག

ཨ་རི་དང་རྒྱ་གར་གཉིས་ཀྱི་འཆར་ཅན་དམག་སྦྱོང་དེ་ནི་རྒྱལ་ཁབ་གཉིས་ཀྱི་དམག་དོན་འབྲེལ་ལམ་སྲ་བརྟན་དུ་གཏོང་ཆེད་དང་། ལྷག་པར་དུ་རྒྱ་གར་ཞི་བདེ་རྒྱ་མཚོའི་ཁུལ་གྱི་གནས་སྟངས་ལ་འགྱུར་བ་ཆེན་པོ་འགྲོ་བཞིན་ཡོད་པ་དང་། དེ་བཞིན་ཕྱི་ལོ་ ༢༠༢༠ ནས་རྒྱ་དཀར་ནག་གཉིས་ཀྱི་མཐའ་མཚམས་ཀྱི་དཀའ་རྙོག་ཆེ་རུ་ཕྱིན་ཏེ། རྒྱ་ནག་གཞུང་གིས་བོད་ཕྱོགས་ནས་རྒྱ་སྐྱེད་ཀྱི་སྲིད་ཇུས་ལག་བསྟར་བྱེད་མུས་ཡིན་པ་དེར་ཁ་གཏད་གཅོག་པ་སོགས་ཀྱི་ཆེད་དུ་ཡིན་འདུག

ཐེངས་འདིའི་དམག་སྦྱོང་བྱ་འཆར་ཡོད་པ་ནི་ཐེངས་དང་པོ་མ་རེད། ཕྱི་ལོ་ ༢༠༠༢ ནས་རྒྱལ་ཁབ་གཉིས་ཀྱི་དམག་དོན་འབྲེལ་ལམ་ཡར་རྒྱས་དང་། འཐབ་ཇུས་མཉམ་སྤྱོད་སླད་དམག་སྦྱོང་བྱས་ཡོད་ཅིང་། འདས་ལོའི་ཕྱི་ཟླ་ ༡༠ ཚེས་ ༡༥ ནས་ ༣༠ བར་ཨ་རི་དང་རྒྱ་གར་གཉིས་ཀྱིས་ཨ་རིའི་མངའ་སྡེ་ཨ་ལ་སི་ཀ་ (Alaska) ནང་ཡོད་པའི་དམག་སྒར་དང་། འདས་ལོའི་ཕྱི་ཟླ་ ༢ ཚེས་ ༨ ནས་ ༢༡ བར་རྒྱ་གར་གྱི་རཱ་ཇི་སི་ཐན་ (Rajasthan) ནང་གི་མེ་མདའ་སྦྱོང་བརྡར་བྱ་སའི་ཁུལ་དུ་དམག་སྦྱོང་བྱས་ཡོད་འདུག དེ་བཞིན་འདས་ལོའི་ཕྱི་ཟླ་ ༣ པའི་ནང་དྷ་རམ་ས་ལའི་བྷག་ལོ་ (Bakloh) ཞེས་པའི་རི་ཁུལ་དང་། ཕྱི་ལོ་ ༢༠༡༩ ཟླ ༡༠ ཚེས་ ༡༣ ནས་ ༢༨ བར་ཨ་རིའི་སི་ཊལ་ (Seattle) ནང་དུ་ཡོད་པའི་དམག་སྒར་དུ་དམག་སྦྱོང་བྱས་ཡོད་པ་རེད།

རྒྱ་ནག་གིས་མཚོ་དམག་སྟོབས་ཤུགས་ཇེ་ཆེར་བཏང་དང་གཏོང་བཞིན་ཡོད་པའི་རྐྱེན་གྱིས། ཨེ་ཤ་ཡའི་བདེ་འཇགས་ལ་ཉེན་ཁ་བཟོ་ཡི་ཡོད་པར་བརྟེན། འདས་ལོའི་ཕྱི་ཟླ་ ༡ པའི་ནང་རྒྱ་མཚོའི་མཐའ་མཚམས་སྲུང་སྐྱོབ་སླད་མཚོ་དམག་སྦྱོང་བརྡར་བྱས། ད་དུང་འདས་ལོའི་ཕྱི་ཟླ་ ༨ པའི་ནང་ནུབ་ཞི་བདེ་རྒྱ་མཚོའི་ཁུལ་དང་། ཕྱི་ལོ་ ༢༠༢༠ ཟླ་ ༡༡ པའི་ནང་རྒྱ་གར་དང་ཉི་ཧོང་། ཨོ་གླིང་། ཨ་རི་བཅས་ཀྱིས་རྒྱ་གར་གྱི་མཚོ་རྒྱུད་བྷ་ཡེ་ཨོ་ཧྥི་བྷན་གྷལ་ (Bay of Bengal) ཁུལ་དུ་མཚོ་དམག་སྦྱོང་བརྡར་བྱས། གཞན་ཡང་། ཕྱི་ལོ་ ༢༠༡༧ ཟླ་ ༧ ཚེས་ ༡༠ ཉིན་ནས་བདུན་ཕྲག་གཅིག་གི་རིང་རྒྱ་གར་དང་ཨ་རི། ཉི་ཧོང་གསུམ་གྱིས་རྒྱ་གར་རྒྱ་མཚོའི་ཁུལ་དུ་མཚོ་དམག་གི་སྦྱོང་བརྡར་བྱས་ཡོད་པ་རེད།

གསར་འགོད་པ། བསྟན་འཛིན་ཕུར་བུ།