རྒྱ་གར་གྱི་སྲིད་འཛིན་གཞོན་པ་གསར་འདེམས་བྱུང་བར་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་ནུབ་བྷེང་གྷལ་གྱི་སྲིད་སྐྱོང་ཟུར་པ་སྐུ་ཞབས་ཇག་དྷིབ་ཌན་ཀར་( Jagdeep Dhankhar )མཆོག་རྒྱ་གར་གྱི་སྲིད་འཛིན་གཞོན་པར་བདམས་ཐོན་བྱུང་བར་འཚམས་འདྲི་མཛད་འདུག

ཟླ་འདིའི་ཕྱི་ཚེས  ༦ ཉིན་ནུབ་བྷེང་གྷལ་གྱི་སྲིད་སྐྱོང་ཟུར་པ་སྐུ་ཞབས་ཇག་དྷིབ་ཌན་ཀར་ ( Jagdeep Dhankhar ) མཆོག་རྒྱ་གར་གྱི་སྲིད་འཛིན་གཞོན་པ་སྐབས་ ༡༤ པར་བདམས་ཐོན་བྱུང་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་མཆོག་ནས་འཚམས་འདྲིའི་གསུང་འཕྲིན་སྩལ་ཏེ། ཇག་དྷིབ་ཌན་ཀར་མཆོག་གི་དུས་ཡུན་རིང་པོའི་ཉམས་མྱོང་བརྒྱུད་མ་འོངས་པར་ཁོང་གིས་རྒྱ་གར་གཞུང་དམངས་གཉིས་སུ་གྲུབ་འབྲས་ལྡན་པའི་སྲི་ཞུ་བསྒྲུབ་ཐུབ་པའི་ཡིད་ཆེས་ཡོད་སྐོར་གསུངས་འདུག

དེ་ཡང་༧རྒྱལ་བ་རིན་པོ་མཆོག་གིས། རྒྱ་གར་གྱིས་ཚན་རིག་དང་འཕྲུལ་རིག་སོགས་ཀྱི་ཐོག་ལ་གོམ་པ་ཆེན་པོ་སྤོས་ཡོད།  ངོས་རང་གི་མི་ཚེའི་དུས་ཡུན་མང་ཆེ་བ་ཞིག་རྒྱ་གར་དུ་བསྐྱལ་ཡོད་སྟབས། ངོས་རང་རྒྱ་གར་གྱི་སྤྱི་ཚོགས་ཀྱི་ཁོངས་སུ་གཏོགས་མཁན་ཞིག་ཡིན་པར་ངོས་འཛིན་བྱེད་ཀྱི་ཡོད། ངོས་ནས་ཁྱེད་ཀྱིས་རྒྱ་གར་རང་བཙན་ཐོབ་པའི་ཉིན་མོ་ཐེངས་ ༧༥ པ་དང་བསྟུན་ལས་ཁུར་བྱ་རྒྱུ་ཡིན་པར་རྟེན་འབྲེལ་ཞུ། རྒྱ་གར་ནི་འགྲོ་བ་མིའི་རིགས་ཀྱི་ཐོབ་ཐང་གོང་མཐོར་གཏོང་བར་ཕན་འབྲས་ཆེན་པོ་ཡོད་པའི་འཚེ་བ་མེད་པ་( Ahimsa) དང་བྱམས་སྙིང་རྗེ་( karuna) གཉིས་ཀྱི་ཁྱིམ་གཞིས་ལྟ་བུ་ཞིག་ཡིན་པ་རེད། བདག་ཉིད་ཆེན་པོ་གྷན་དྷི་མཆོག་གིས་འཚེ་མེད་ཞི་བདེའི་ལྟ་གྲུབ་གོ་ལ་ཡོངས་སུ་དར་ཁྱབ་མཛད།  མར་ཊིན་ལུ་ཐར་ཀིང་( Martin Luther King) ནས་ནེལ་སན་མན་ཌེ་ལཱ་( Nelson Mandela ) བར་འཚེ་བ་མེད་པ་ལག་ལེན་དུ་གཞོལ་ནས། སྤྱི་ཚོགས་ཀྱི་དབྱེ་འབྱེད་དང་དཀའ་རྙོག་དེ་དག་སེལ་ཐབས་ཡུན་རིང་གནང་སྟབས། ངོས་རང་གིས་རྒྱ་གར་གྱི་གཅེན་གཅུང་ཕོ་མོ་ཡོངས་གཙོ་བོར་གྱུར་བའི་འཛམ་གླིང་ཡོངས་སུ་བྱམས་བརྩེའི་ནུས་སྟོབས་སྐོར་ལ་གོ་རྟོགས་སྤེལ་རྒྱུའི་དམ་བཅའ་བཞག་ཡོད།  ཅེས་གསུངས་འདུག

ཡང་མགོན་པོ་མཆོག་གིས། ངོས་རང་གནའ་བོའི་རྒྱ་གར་ནི་སེམས་དང་སྲོག དེ་བཞིན་སྲོལ་རྒྱུན་གྱི་ཐབས་ལམ་སྤྱད་དེ། འདི་ཕྱི་གཉིས་ལ་ཕན་པའི་སྒོམ་དང་ཡོ་ག་བཅས་མིའི་རིགས་ཀྱི་ལུས་སེམས་སྦྱོང་བརྡར་བྱེད་པའི་ཤེས་རིག་གི་འབྱུང་ཁུངས་ཤིག་ཡིན་པར་སྤོབས་སེམས་སྐྱེ་ཡི་ཡོད་ལ། དེང་གི་ཆར་རྒྱལ་སྤྱིའི་ཚོགས་སྡེ་ཁག་གིས་རྒྱ་གར་གྱི་ཞི་བདེ་དང་འགྲོ་བ་མིའི་རིགས་ཀྱི་ཐོབ་ཐང་གོང་མཐོར་གཏོང་བར་ཞབས་འདེགས་སྒྲུབ་ཀྱིན་ཡོད་པར་ཤེས་རྟོགས་འབྱུང་གི་ཡོད་པ་དང་། སྐུ་ཉིད་ཀྱིས་དུས་ཡུན་རིང་པོར་སྤྱི་ཚོགས་ཞབས་ཞུ་བསྒྲུབ་པའི་ཉམས་མྱོང་ལ་གཞིགས་ནས། ངོས་རང་ནས་ཁྱེད་ཀྱི་རྒྱ་གར་གཞུང་དམངས་གཉིས་སུ་གྲུབ་འབྲས་ལྡན་པའི་ངང་ནས་སྲི་ཞུ་བསྒྲུབ་རྒྱུའི་ཡིད་ཆེས་ཡོད། ཅེས་གསུངས་འདུག

གཞན་ཡང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འཚམས་འདྲི་གནང་བའི་ནང་། རྒྱ་གར་གཞུང་མང་གཉིས་ནས་ད་བར་བོད་ཀྱི་འཚེ་མེད་ཞི་བའི་འཐབ་རྩོད་དང་། བོད་མིར་རྒྱབ་སྐྱོར་ཤུགས་ཆེ་གནང་བར་བཀྲིན་ཆེ། རྒྱ་གར་ནི་བོད་མིའི་ཁྱིམ་གཞིས་གཉིས་པར་གྱུར་ཡོད་སྟབས། ང་ཚོས་རྒྱ་གར་གཞུང་མང་གཉིས་ཀྱིས་བོད་མི་རྣམས་ལ་རྒྱབ་སྐྱོར་གནང་བར་བཀྲིན་ཆེ་ཞུ། ཁྱེད་ཀྱིས་རྒྱ་གར་མི་མང་གི་མངོན་འདོད་བཞིན་ལས་དོན་སྒྲུབ་ཐུབ་པ་དང་། མ་འོངས་པའི་བྱ་གཞག་ལམ་ལྷོངས་ཡོང་བའི་སྨོན་འདུན་ཞུ། ཁྱེད་ཀྱི་ཤེས་ཡོན་དང་ཉམས་མྱོང་དེ་དག་རྒྱ་གར་གཞུང་ལ་ཕན་ཐོགས་ཆེན་པོ་ཡོད་པའི་ཡིད་ཆེས་བྱེད་ཀྱི་ཡོད། ཅེས་གསུངས་འདུག

དགུང་ལོ་ ༧༡ ཡིན་པའི་སྐུ་ཞབས་ཇག་དྷིབ་ཌན་ཀར་( Jagdeep Dhankhar ) མཆོག་ནི་བྷི་ཇི་པི་སྲིད་དོན་ཚོགས་པའི་ཚོགས་མི་ཞིག་ཡིན་ཞིང་། ཕྱི་ལོ་ ༡༩༨༩ ནས་ ༡༩༩༡ བར་གྲོས་ཚོགས་འོག་མའི་ར་ཇི་སི་ཐན་མངའ་སྡེའི་འཐུས་མི་དང་མངའ་སྡེའི་ཁྲིམས་བཟོ་ལྷན་ཚོགས་ཀྱི་འཐུས་མི་གནང་མྱོང་ཡོད་པ་དང་། དེ་བཞིན་ཕྱི་ལོ་ ༢༠༡༩ ནས་ ༢༠༢༢ བར་དུ་ནུབ་བྷང་གྷལ་གྱི་སྲིད་སྐྱོང་གི་ཐུགས་འགན་སོགས་བཞེས་ཡོད་འདུག 

གསར་འགོད་པ། དཔལ་ལྡན།