དེ་རིང་༸གོང་ས་མཆོག་གིས་ལ་དྭགས་ཟངས་དཀར་གྲུ་འཛིན་ཕོ་བྲང་ནས་ཧི་མ་ལ་ཡའི་རི་བརྒྱུད་ཀྱི་མི་མང་གིས་སློབ་གཉེར་ཡག་པོ་བྱས་ཏེ་བསྟན་པ་འཛིན་སྐྱོང་སྤེལ་གསུམ་གྱི་འགན་ཡོད་པ་མ་ཟད། མ་འོངས་པར་བོད་ཙམ་དུ་མ་ཟད་རྒྱ་ནག་ནང་ལོགས་སུའང་ཁྱབ་སྤེལ་གཏོང་བའི་འགན་དམིགས་བསལ་ཡོད་སྐོར་གསུངས།
དེ་རིང་སྔ་དྲོའི་ཆུ་ཚོད་ ༡༠།༣༠ ཙམ་གྱི་སྟེང་༸གོང་ས་རྒྱལ་བ་རིན་པོ་ཆེ་མཆོག་ཐད་འཕུར་གནམ་གྲུ་བརྒྱུད་ལ་དྭགས་ལིང་ཤེད་སྐུ་འབུམ་འོད་འབར་དགོན་ནས་ཟངས་དཀར་གྲུ་འཛིན་ཕོ་བྲང་དུ་ཞབས་སོ་བདེ་བར་འཁོད་གནང་གྲུབ་མཚམས། ཟངས་དཀར་ནང་ཚོགས་དང་དགོན་ཚོགས་གཉིས་ནས་༸མགོན་པོ་གང་ཉིད་མཆོག་ལ་་ལཎྜལ་རྟེན་གསུམ་འདེགས་འབུལ་ཞུས་སོང་། སྐབས་དེར་༸མགོན་པོ་གང་ཉིད་མཆོག་གིས་ཕོ་བྲང་རྙིང་བའི་གསུང་ཆོས་རྭ་བའི་ནང་དུ་བཀའ་སློབ་སྩལ་སྐབས། དེ་རིང་ཟངས་དཀར་ལ་ཡང་བསྐྱར་བསླེབས་པར་དགའ་བོ་ཞེ་དྲགས་བྱུང་། དང་པོ་ངོས་ལ་ཨ་མ་ཞིག་གིས་བུ་ཞིག་དཔང་ལ་འཁྱེར་བསྡད་པ་ཞིག་ཐུག་བྱུང་བ་དང་བུ་དེས་ངོས་ལ་དགའ་པོ་ཞེ་དྲགས་བྱེད་ཀྱི་འདུག རྗེས་ནས་ངོས་ནས་ཨ་མ་དེར་བུ་དྷ་རམ་ས་ལ་མར་གཏང་ན་ཡག་པོ་རེད་ལབ་པ་ཡིན། ཞེས་བཞད་མོ་བཞད། མར་དྷ་སའི་གྲྭ་ཚང་གི་སྒྲིག་ཁོངས་སུ་བཞག་སྟེ། ད་ལྟ་རྐང་གཙོ་བོ་གྲྭ་ཚང་གི་མཁན་རིན་པོ་ཆེས་ལྟ་ཡི་ཡོད་པ་རེད། ཅེས་གསུངས་པ་དང་དགེ་འདུན་པ་ཆུང་ཆུང་དེར་གཟིགས་ནས། ད་ལྟ་འདིར་རང་གི་ཨ་མ་འདུག་གམ། ཨ་མ་འདིར་ཡོད་དམ། གང་ལྟར་ངོས་ཨ་མ་ལགས་སུ་གཅིག་ཐུག་དགོས་ཡོད། སྔོན་མ་ངོས་ལ་དང་པོ་འདིར་ཐུག་པ་རེད། ཅེས་གསུངས།
དེ་ནས་བྱུང་ན་འདིའི་གཡས་གཡོན་གྱི་དགོན་ཁག་ལ་མཆོད་མཇལ་ཞུ་དགོས་ཀྱི་ཡོད་ཀྱང་། གང་ལྟར་ཆོས་དཀོན་མཆོག་ངོ་མ་དེ་སེམས་ནང་ཡོད། ངོས་ལ་འགོག་ལམ་གྱིས་བསྡུས་པའི་ཆོས་དཀོན་མཆོག་གང་ལ་གང་འཚམ་གྱི་ཉམས་མྱོང་ཡོད་པས། ཆོས་དཀོན་མཆོག་ངོ་མ་དེ་རེད། དེ་ནས་དགོན་པ་ཚོར་གཅིག་མཇལ་ཐུབ་ན་ཡག་པོ་རེད་དེ། ཕྱོགས་གཅིག་ནས་དུས་ཚོད་མེད་པ་དང་གཉིས་ནས་ཡར་རྡོག་བཀྱག་ལ་སོགས་འཛེག་པར་པུས་མོར་ཅུང་ཙམ་དཀའ་ངལ་འདུག དེར་བརྟེན་དགོན་པ་ཚོར་མཆོད་མཇལ་དང་གནས་སྐོར་འགྲོ་རྒྱུ་ཕལ་ཆེ་ཁག་པོ་རེད། ངོས་རང་འདིར་བསྡད་དེ་རྒྱ་ཆེ་མི་མང་ལ་ཕལ་ཆེ་ཉིན་གྲངས་གསུམ་རིང་བཀའ་ཆོས་བྱ་རྒྱུ་བྱས། ངོས་རང་འདིར་ལྷོད་ལྷོད་སྡོད་རྒྱུ་ཡིན། ཤེས་སོང་སམ། ཞེས་གསུངས།
ཡང་༸ཁོང་ཉིད་མཆོག་གིས། ང་ཚོ་བོད་ལ་ཆ་བཞག་ན། དངོས་གནས་དྲང་གནས་ཐོས་བསམ་སྒོམ་གསུམ་གྱི་ཐོག་ནས་དཔལ་ན་ལཎ་ཊའི་ཆོས་བརྒྱུད་འཛིན་སྐྱོང་བྱས་བསྡད་ཡོད་པ་རེད། ད་དེ་བར་སྐབས་ཆབ་སྲིད་ཀྱི་གནས་སྟངས་རྐྱེན་གྱིས། གཙོ་བོ་རྒྱ་ནག་གིས་དེའི་སྟེང་དུ་དམ་དྲག་ཞེ་དྲགས་བྱེད་ཀྱི་ཡོད་རེད་དེ། བོད་རྒྱ་ཆེ་མི་མང་གི་ཆོས་དད་དང་སྙིང་སྟོབས་འགྱུར་བ་མེད་པ་བྱས་ནས་བསྡད་པ་རེད། དེ་རིང་ཁ་སང་རྒྱ་ནག་ནང་ལོགས་སུའང་ནང་ཆོས་ལ་དོ་སྣང་བྱེད་མཁན་ཤུགས་ཆེ་རུ་འགྲོ་ཡི་ཡོད་པའི་ཚོད་འདུག ང་ཚོ་བོད་གངས་ཅན་ལྗོངས་ཀྱི་གངས་ཅན་པ་ཚོས་བོད་ཀྱི་ཆོས་དང་རིག་གཞུང་གི་རྩ་བ་བརྟན་པོ་ཞེ་དྲགས་བཟུང་ནས་བསྡད་ཡོད། ད་བོད་ལ་ཆབ་སྲིད་ཀྱི་གནས་སྟངས་ཐོག་ནས་དཀའ་ངལ་མང་པོ་འཕྲད་བསྡད་ཡོད་དུས། ཁྱེད་རང་ཚོ་ཧི་མ་ལ་ཡའི་རི་རྒྱུད་དུ་ཡོད་པ་ཚོས་སེམས་ཤུགས་སྐྱེས་ནས་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་དེ་ཁྱེད་རང་ཚོའི་ལས་འགན་རེད། ཤེས་སོང་ངམ། ཁྱེད་ཚོ་ཧི་མ་ལ་ཡའི་རི་བརྒྱུད་པར་དང་པོ་ཤེས་ཡོན་བོད་ནས་ཚུར་དར་བ་རེད། བར་སྐབས་བོད་ལ་དཀའ་ངལ་འཕྲད་ཡོད་དུས། ཁྱེད་རང་ཚོས་དངོས་གནས་དྲང་གནས་ཀྱིས་སློབ་སྦྱོང་ཡག་པོ་བྱས་ཏེ། མ་འོངས་པར་བོད་གངས་ཅན་གྱི་ལྗོངས་ཙམ་མ་ཟད། ཀྲུང་ཧྥ་མི་དམངས་སྤྱི་མཐུན་རྒྱལ་ཁབ་ནང་དུའང་ཤིན་ཅང་ལྟ་བུ་ཡིན་ན་ཁ་ཆེ་ཆོས་ལུགས་ཡིན་སྟབས་གནས་ཚུལ་ཁ་ཁ་རེད། གཞན་དེ་མིན་གྱི་རྒྱ་རིགས་ཚོར་ནང་པ་སངས་རྒྱས་པའི་ཆོས་ཁྱབ་སྤེལ་འགྲོ་དང་འགྲོ་བཞིན་པ་རེད། ངོས་ནས་ལབ་ཐུབ་ཀྱི་རེད། ཚན་རིག་དང་མཐུན་པའི་ནང་པ་སངས་རྒྱས་པའི་ལྟ་གྲུབ་ཟབ་མོ་ཡོད་པ་དེ་དག་མ་འོངས་པར་ང་ཚོས་བོད་རྒྱ་ཆེ་མི་མང་ལ་ཕར་སླར་གསོ་བྱ་རྒྱུ་དང་རྒྱ་ནག་ནང་ལོགས་སུའང་ཁྱབ་སྤེལ་འགྲོ་མུས་ཡིན་པ་རེད། ཧི་མ་ལ་ཡའི་རི་རྒྱུད་པ་ཁྱེད་ཚོར་དམིགས་བསལ་གྱི་ལས་འགན་ཞིག་ཡོད་སྟབས། ཚང་མས་ཧུར་ཐག་བྱས་ཤོག ཅེས་གསུངས།
མཛད་འཆར་ལྟར་ན། ༸གོང་ས་མཆོག་ཟངས་དཀར་གྱི་དཔལ་ལྡུམ་གྲུ་འཛིན་ཕོ་བྲང་དུ་ཉིན་གསུམ་རིང་བཀའ་ཆོས་སྩལ་རྒྱུ་དང་ཕྱི་ཚེས་ ༡༤ ཉིན་གྱི་སྔ་དྲོའི་ཆུ་ཚོད་ ༧།༣༠ སྟེང་ཐད་འཕུར་གནམ་གྲུ་བརྒྱུད་རྒྱལ་ས་གླེ་རུ་ཆིབས་བསྒྱུར་བསྐྱང་གཏན་ཁེལ་ཡོད་འདུག
གསར་འགོད་པ་སྐལ་བཟང་སྦྱིན་པས་ལ་དྭགས་ཟངས་དཀར་གྲུ་འཛིན་ཕོ་བྲང་གི་ཉེ་འགྲམ་ནས་སྤེལ།
