བོད་ཀྱི་ན་
དེ་རིང་བོད་ཀྱི་སྲིད་ཇུས་ཉམས་ཞི
བོད་མིའི་སྒྲིག་འཛུགས་ཀྱི་ཕྱི་འབྲེལ་དྲུང་ཆེ་ཀརྨ་ཆོས་དབྱི
སྐུ་མགྲོན་གཙོ་བོ་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་པ་མཁན་པོ་འཇུ་བསྟན་སྐྱོང་ལགས་ཀྱིས། འདིར་རྣམ་པ་ཚོས་ཉིན་གཉིས་གསུམ་རིང་ལ་ཞིབ་འཇུག་བྱས་པའི་གྲུབ་དོན་དེ། གཅིག་བྱས་ན་ལོ་མང་པོར་ཞིབ་འཇུག་བྱས་ཡོད་རྒྱུ་རེད། གཅིག་བྱས་ན་ལོ་གཅིག་གཉིས་ལ་ཞིབ་འཇུག་བྱས་ཡིན་རྒྱུ་རེད། མཁས་པ་ཁ་ཤས་ཀྱིས་དུས་ཚོད་ཐུང་ཐུང་ནང་དུ་ཞིབ་འཇུག་གི་གྲུབ་དོན་རྙེད་པ་དེ་འདྲ་ཡོད་རྒྱུ་རེད། བྱས་ཚང་རྣམ་པ་ཚོས་རྣམ་དཔྱོད་ལས་གྲུབ་པའི་རྙེད་དོན་ཞིག་མཁས་པ་རྣམས་མཉམ་དུ་འཛོམས་ནས་ཤེས་རབ་ཀྱི་འགྲེམས་སྟོན་བྱ་རྒྱུའི་དུས་ཚོད་ཁྱད་པར་ཅན་ཞིག་ཡིན་པ་རེད། སྤྱིར་ཞིབ་འཇུག་ནི་ཤེས་རབ་ཀྱིས་དཔྱད་པ་བྱས་ནས་བདེན་དོན་བཙལ་རྒྱུའི་གནད་དོན་ཞིག་ཡིན་པ་རེད། དེར་ཐབས་ལམ་དང་རིག་པའི་རྣམ་གཞག་མི་འདྲ་བ་མང་པོ་ཞིག་ཏན་ཏན་ཡོད་རེད་བསམ་གྱི་ཡོད། ལྷག་པར་དེང་དུས་སམ་ནུབ་ཕྱོགས་པའི་དཔྱད་ཐབས་ཀྱི་རིག་པའམ་ཞིབ་འཇུག་བྱ་རྒྱུའི་ཐབས་ལམ་མང་པོ་ཞིག་བེད་སྤྱོད་གཏོང་གི་ཡོད་རེད་བསམ། དེ་ཧ་ཅང་ཡག་པོ་རེད། ངས་དེ་ཡག་པོ་མ་རེད་ཅེས་ལབ་ཀྱི་མེད། འོན་ཀྱང་། ང་ཚོས་དེའི་ཞོར་དུ་བོད་ཀྱི་ཞིབ་འཇུག་བྱེད་པའི་རིག་པ་ག་རེ་ག་རེ་ཡོད་རེད། ཐབས་ལམ་ག་རེ་ག་རེ་ཡོད་རེད། དེ་ལ་ཕྱིར་མིག་ཅིག་བལྟ་རྒྱུ་ནི་གལ་ཆེན་པོ་རེད་བསམ་གྱི་འདུག གལ་ཏེ་ང་ཚོས་སོ་སོ་ལ་ཕྱིར་མིག་ཅིག་མ་བལྟས་པར། གཞན་པར་བལྟ་རྒྱུ་མང་དྲགས་ནས་སོ་སོའི་རིག་གཞུང་དང་རིན་ཐང་མ་ཚོར་བ་བྱས་ནས་གཉའ་ཆག་རྒྱུ་དང་། སོ་སོར་ཅི་ཡང་མེད་པ། སོ་སོ་བོད་པ་ཡིན་ལབ་རྒྱུར་ངོ་ཚ་དགོས་པའི་ཉེན་ཁ་ཏན་ཏན་ཡོད་རྒྱུ་རེད་བསམ་གྱི་ཡོད། བོད་པ་ཚོས་སོ་སོའི་རིན་ཐང་ཞིག་མཐོང་དགོས་རེད་མ་གཏོགས། ངས་ནམ་ཡང་ཞེན་ཁོག་གཅིག་པུས་མི་རིགས་ཞིག་སྐྱོབ་ཐུབ་ཀྱི་མ་རེད་བསམ་གྱི་འདུག དེའི་ཕྱིར་ཞིབ་འཇུག་བྱེད་མཁན་ཚོས་ཀྱང་ཞིབ་འཇུག་བྱེད་ཆེད་ཀྱི་ཐབས་ལམ་གཅིག་པུའི་སྒང་ལ་བསམ་བློ་བཏང་ཡོང་ན། བོད་ཀྱི་གཞུང་ལུགས་ཆེ་ཕྲ་ཆུང་གསུམ་གྱི་ནང་ལ་ཞིབ་འཇུག་བྱ་རྒྱུའི་ཐབས་ལམ་ག་རེ་བསྟན་ཡོད་པར་བལྟ་རྒྱུ་གལ་ཆེན་པོ་ཡིན་པ་རེད། ཅེས་གསུངས་སོང་།
ཡང་ཁོང་གིས། བོད་ཀྱི་ན་གཞོན་ཞིབ་འཇུག་པ་རྣམས་ཀྱིས་བོད་ཀྱི་ཆོས་རིག་གི་གཞུང་ལུགས་ཆེ་ཁག་ལ་ལྟ་ཀློག་མང་ཙམ་བྱས་ཏེ། མཐོང་རྒྱ་སྐྱེད་དགོས་པ་ལས། བརྗོད་གཞི་ཆུང་ཆུང་ཞིག་ལ་མགོ་འཁོར་ཏེ་གཏན་ནས་སྡོད་མི་རུང་བས། བོད་ཀྱི་གནའ་བོའི་དཔེ་རྙིང་དང་བཀའ་འགྱུར་བསྟན་འགྱུར་སོགས་ལ་སྦྱངས་ནས་བསམ་བློའི་རྒྱ་སྐྱེད་དགོས་པ་དང་། མིག་གིས་རིག་ཚད་དང་རྣ་བས་ཐོས་ཚད་ཐམས་ཅད་བདེན་པ་ཡིན་པའི་ངེས་པ་མེད་པས། བོད་ཀྱི་གནའ་བོའི་གཞུང་ལུགས་སུ་དགག་གཞག་སྤོང་གསུམ་གྱི་རྣམ་གཞག་མང་པོ་ཞིག་བཤད་ཡོད་པ་དེ་དག་དང་། དེང་སང་གི་དཔྱད་ཐབས་རིག་པ་དེ་དག་ཟུང་འབྲེལ་གྱི་ཐོག་ནས། དངོས་ཡོད་གནས་ཚུལ་བདེན་པ་ཡིན་མིན་གྱི་དཔྱད་པ་དང་ཞིབ་བསྡུར་བྱ་རྒྱུ་དེ་གལ་ཆེན་པོ་ཡིན་ལ། དེབ་ཏུ་བཤད་པ་ཐམས་ཅད་བདེན་པ་མིན་པས། ང་ཚོས་ཐོས་པ་ཡི་རྗེས་སུ་བསམ་བློ་ངེས་པར་དུ་བཏང་ནས་ཞིབ་འཇུག་པ་ཚོས་རྟོག་ཞིབ་བྱ་དགོས་པ་དང་། རང་དང་རང་གི་ཤེས་རབ་དབྱེར་མེད་དུ་འགྱུར་སླད། སྒོམ་བརྒྱབ་ནས་རང་གི་ཤེས་ཡོན་རྣམས་དབྱེར་མེད་བྱེད་ཐབས་དང་། ཡང་མཚམས་ལན་རེར་ཞིབ་འཇུག་པ་རྣམས་ཀྱི་དཔྱད་ཞིབ་ཀྱི་གྲུབ་དོན་ལ་ནོར་བ་ཡང་མང་པོ་ཞིག་ཡོང་གི་ཡོད་པས། ནོར་བ་དེར་གུ་ཡངས་གཏོང་ཐབས་མེད་ཀྱང་། ཕན་ཚུན་བར་བརྩི་འཇོག་དང་གུ་ཡངས་ཀྱི་ཐོག་ནས་བགྲོ་གླེང་བྱས་ཚེ། རང་རེའི་ཤེས་རིག་ལ་གཟིགས་རྒྱ་སྐྱེད་པ་དང་། བོད་མི་རིགས་ཀྱི་ཤེས་རིག་གི་ལས་དོན་ལ་ཕན་ཐོགས་ཆེན་པོ་ཡོད་སྐོར་སོགས་གསུངས་སོང་།
དེ་རིང་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་བདེ་ལྡན་ལགས་དང་། རྡོ་རྗེ་དབང་འདུས་ལགས། བསྟན་འཛིན་དགྲ་ལྷ་ལགས། གཙང་ཕྲུག་སྟོབས་ལགས། བསྟན་འཛིན་ཕན་ཐོགས་ལགས། འཇམ་དབྱངས་དོན་གྲུབ་ལགས་སོགས་ཀྱིས་གཏམ་བཤད་བྱེད་ཀྱི་ཡོད་འདུག་ལ། ད་ལན་གྱི་བོད་ཀྱི་ན་གཞོན་ཉམས་ཞི
གསར་འགོད་པ། དཔལ་ལྡན།
