ལོ་ངོ་ ༢ ཀྱི་རྗེས་སུ་གཞི་ནས་རྒྱ་ནག་གཞུང་གིས་ཕྱི་རྒྱལ་གྱི་སློབ་ཕྲུག་ཚོར་མཐོང་མཆན་སྤྲོད་ཀྱི་ཡོད་འདུག

དེ་རིང་ཕྱི་ཚེས་ ༢༤ ཉིན་ནས་བཟུང་རྒྱ་ནག་གཞུང་གིས་རྒྱ་གར་དང་ཨུ་རུ་སུ། པ་ཀི་སི་ཐན་སོགས་ཚུད་པའི་ཕྱིའི་རྒྱལ་ཁབ་ཁག་ནས་ཡོང་བའི་སློབ་ཕྲུག་གསར་རྙིང་དང་ཚོང་པ་སོགས་ལ་མཐོང་མཆན་སྤྲོད་ཀྱི་ཡོད་ལུགས་ཡོངས་བསྒྲགས་བྱས་འདུག

ཕྱི་ལོ་ ༢༠༡༩ ལོའི་ལོ་མཇུག་ཏུ་རྒྱ་ནག་ཝུའུ་ཧན་ནས་ཏོག་དབྱིབས་གཉན་རིམས་འཛམ་གླིང་ཡུལ་ལུང་གང་སར་མཆེད་པ་ནས་བཟུང་སྟེ། འདས་པའི་ལོ་གཉིས་ལྷག་རིང་ཕྱི་ནང་གི་འགྲོ་འོང་བཀག་སྡོམ་ཚོད་འཛིན་ཤུགས་ཆེན་བྱས་ཡོད་པ་དང་། ད་ལྟའི་ཆར་གཉན་རིམས་མུ་མཐུད་ཁྱབ་གདལ་དུ་འགྲོ་མུས་ཡིན་མིན་ལ་མ་ལྟོས་པར་ཉེ་བའི་ཟླ་གཅིག་གཉིས་ནང་འཛམ་གླིང་རྒྱལ་ཁབ་མང་ཆེ་བས་ཕྱི་ཕྱོགས་སུ་སྒོ་ཕྱེ་ཡི་ཡོད་པ་ལྟར། དེ་རིང་ཕྱི་ཚེས་ ༢༤ ནས་བཟུང་རྒྱ་ནག་གཞུང་གིས་རྒྱ་གར་དང་། པ་ཀི་སི་ཐན། ཨུ་རུ་སུ། སེངྒ་ལ། མ་ལེ་ཤི་ཡ། ཉི་ཧོང་སོགས་ནས་ཡིན་པའི་མཐོ་རིམ་སློབ་མ་རྙིང་པ་དང་གསར་ཞུགས་སློབ་མ། དེ་བཞིན་ཚོང་པ་དང་རྒྱ་ནག་ནང་ཆེད་ལས་རང་བཞིན་གྱི་ལས་དོན་གཉེར་མུས་ཡིན་པའི་ལས་བྱེད་ཚོའི་ནང་མི་སོགས་ལ་མཐོང་མཆན་སྤྲོད་ཀྱི་ཡོད་ལུགས་བསྒྲགས་འདུག

རྒྱ་ནག་ཕྱི་སྲིད་ལས་ཁུངས་ཀྱི་ཨེ་ཤ་ཡའི་ལས་དོན་ཁང་ (Department of Asian Affairs) གི་སློབ་སྟོན་པ་ཇི་རོང་ (嵇蓉) ཟེར་བ་དེས་སྒེར་གྱི་ཊུ་ཝི་ཊར་དུ། སྙིང་ཉེ་བའི་སློབ་གྲོགས་ཚོ། ང་ཚོར་ཁྱེད་ཅག་གི་རེ་འདུན་དང་མཐོ་སློབ་ཁག་གི་ཡིག་ཆ་འབྱོར་བྱུང་། ང་ཚོས་ཁྱེད་ཅག་གི་སེམས་ཁྲལ་བྱེད་མུས་ཡིན་པ་རྟོགས་ཀྱིན་ཡོད་ཀྱང་། ད་ལྟ་རྒྱ་ནག་གི་མཐོ་སློབ་ཁག་གིས་ཁྱེད་ཅག་ཕྱིར་མཐོ་སློབ་ཏུ་ཕེབས་པར་དགའ་བསུ་ཞུ་ཡི་ཡོད། ཅེས་སོགས་བརྗོད་འདུག་ལ། ད་ལན་མཐོ་རིམ་སློབ་གཉེར་བ་རྙིང་པ་དང་། གསར་ཞུགས་སློབ་མ་ཚང་མར་མཐོང་མཆན་སྤྲོད་ཀྱི་ཡོད་ཀྱང་། སློབ་མ་གསར་པ་རྣམས་ཀྱིས་རྒྱ་ནག་གི་མཐོ་སློབ་ཁག་གི་སློབ་འཇུག་ལག་ཁྱེར་དང་། སློབ་མ་རྙིང་པ་ཚོས་མཐོ་སློབ་ཏུ་ལོག་ཆོག་པའི་ལག་ཁྱེར་སོགས་བསྟན་དགོས་ཀྱི་ཡོད་འདུག

ཟླ་འདིའི་ཕྱི་ཚེས་ ༢༢ ཉིན་རྒྱ་གར་རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་ཁག་གིས་རྒྱ་ནག་གི་མཐོ་སློབ་ཁག་ཏུ་སློབ་གཉེར་བྱེད་མཁན་གྱི་སློབ་མ་གསར་རྙིང་དང་། ཚོང་པ། དེ་བཞིན་རྒྱ་ནག་ཏུ་ཆེད་ལས་གཉེར་མཁན་གྱི་ནང་མི་སོགས་ལ་མཐོང་མཆན་སྤྲད་རྒྱུ་ཡིན་སྐོར་བསྒྲགས་འདུག་ལ། ཧིན་རྡུ་དུས་བབ་ཀྱི་གནས་ཚུལ་ལྟར་ན། རྒྱ་ནག་གི་མཐོ་སློབ་ཁག་ཏུ་རྒྱ་གར་གྱི་སློབ་མ་ཁྱོན་ ༢༣༠༠༠ ལྷག་ཡོད་པ་དང་། ཁོང་ཚོ་མང་ཆེ་བ་རྒྱ་སྨན་སྦྱོང་མཁན་ཡིན་འདུག ཕྱི་ལོ་ ༢༠༡༩ ལོ་མཇུག་ཏུ་རྒྱ་ནག་ནང་ཏོག་དབྱིབས་གཉན་རིམས་འགོས་ཁྱབ་ཕྱིན་རྗེས། རྒྱ་གར་གྱི་སློབ་མ་ ༢༣༠༠༠ ལྷག་དེ་ཕྱིར་ལོག་བྱས་ཏེ། དྲ་ལམ་སློབ་འཁྲིད་ནང་མཉམ་ཞུགས་བྱས་ཡོད་འདུག འདས་པའི་ཟླ་ཤས་གོང་རྒྱ་ནག་ཏུ་སློབ་སྦྱོང་བྱེད་མུས་ཡིན་པའི་རྒྱ་གར་གྱི་སློབ་མ་གྲངས་ ༡༠༠༠ ལྷག་གིས་རྒྱ་ནག་གི་མཐོ་སློབ་ཁག་ཏུ་དངོས་སུ་ཞུགས་འདོད་ཡོད་པའི་སྙན་ཞུ་སྤྲད་ཡོད་འདུག

ལོ་གཉིས་དང་ཟླ་ ༧ ཡས་མས་ཀྱི་རྗེས་སུ་གཞི་ནས་འཛམ་གླིང་རྒྱལ་ཁབ་ཁག་ནས་གཅིག་རྗེས་གཉིས་མཐུད་ཀྱིས་ཕྱི་ཕྱོགས་སུ་སྒོ་འབྱེད་ཀྱི་ཡོད་ཀྱང་། ད་ལྟའང་ཧོང་ཀོང་དང་སེང་གྷ་པུར། ཐའེ་ལེན་ཌི། འབྲུག ཁེ་ན་ཌ་སོགས་རྒྱལ་ཁབ་ཁག་ཅིག་ནས་མུ་མཐུད་ཕྱི་མིར་བཀག་སྡོམ་བྱེད་ཀྱི་འདུག་ལ།  དེ་བཞིན་བོད་ཀྱི་ཁྱིམ་མཚེས་རྒྱལ་ཁབ་འབྲུག་ལྟ་བུར་མཚོན་ནའང་འདི་ལོའི་ཕྱི་ཟླ་ ༩ ཚེས་ ༢༣ ཉིན་གཞི་ནས་ཕྱི་ཕྱོགས་སུ་སྒོ་འབྱེད་འཆར་ཡོད་འདུག

གསར་འགོད་པ། དཔལ་ལྡན།