ལྟ་གྲུབ་དང་ལངས་ཕྱོགས་མི་འདྲ་བ་རྩོད་བསྡད་པ་དེས་བོད་མི་རིགས་ཀྱི་འཕྲལ་ཕུགས་གཉིས་ཀྱི་ལས་དོན་ལ་དོ་ཕོག་འགྲོ་སྲིད་པས། ལངས་ཕྱོགས་མི་འདྲ་བའི་ཚོགས་སྡེ་ཁག་གིས་བོད་ཀྱི་རྩ་དོན་འཐབ་རྩོད་ཀྱི་ཐོག་ཏུ་ནུས་པ་སྤུངས་ཐུབ་པར་འབད་བརྩོན་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།
དེ་རིང་བཞུགས་སྒར་ངྷ་རམ་ས་ལའི་ཉེ་འགྲམ་དུ་ཆགས་པའི་ཨིམ་ཕེ་རིལ་ (Imperial Heights Clarks Inn) གསོལ་མགྲོན་ཁང་དུ། བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག་ཉིན་གཉིས་རིང་༸གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་གལ་གནད་དང་འབྲེལ་བའི་ཚོགས་འདུ་ཞིག་བསྐོངས་འཚོག་གནང་མགོ་བཙུགས་སོང་། ད་ལན་གྱི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། སློབ་དཔོན་བསོད་ནམས་རྒྱལ་མཚན་ལགས་གཙོས་ས་གནས་ཁག་མི་འདྲ་བ་ ༤༢ ནས་ཚོགས་བཅར་བ་མི་གྲངས་ ༡༣༠ ལྷག་མཉམ་ཞུགས་བྱས་ཡོད་འདུག
དབུ་འབྱེད་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ༧རྒྱལ་བ་སྐུ་ཕྲེང་རིམ་བྱོན་གྱིས་བོད་ཀྱི་ལོ་རྒྱུས་ནང་དུ་བཀའ་དྲིན་མཛད་པ་ཅི་ཙམ་བསྐྱངས་ཡོད་པ་བོད་མི་ཚོས་ངེས་པར་དུ་ཤེས་དགོས་པ་ཞིག་རེད། ༧སྐུ་ཕྲེང་རིམ་བྱོན་གྱི་མཛད་རྣམ་དེབ་གཟུགས་སུ་བཀོད་ནས་གཟིགས་ཆོག་ཆོག་ཡོད་པ་རེད། དེང་སྐབས་ཀྱི་དུས་འདིར་བོད་མི་མང་པོས་དོ་སྣང་བྱེད་ཀྱི་མེད་པའི་བཟོ་ལྟ་ཞིག་འདུག ངས་དུས་རྒྱུན་དུ་བོད་ཀྱི་ལོ་རྒྱུས་ལ་བོད་མི་རང་ཉིད་ཀྱིས་ཡིན་གཅིག་མིན་གཅིག་ཡག་པོ་ལྟ་དགོས་ཀྱི་འདུག་ཅེས་འཆད་བཞིན་ཡོད། ད་ལྟའི་མི་རབས་འདིའི་བོད་ཀྱི་ལོ་རྒྱུས་དང་ཡིག་ཆ་ཚང་མ་དེང་རབས་ཀྱི་འཕྲུལ་རིག་བེད་སྤྱོད་བཏང་ནས་ལྟ་ཀློག་བྱེད་དགོས་པ་མ་ཟད། མ་འོངས་བའི་མི་རབས་གསར་བ་ཚོ་བོད་ཀྱི་ལོ་རྒྱུས་སོགས་འཛིན་སྐྱོང་སྤེལ་གསུམ་བྱེད་པར་དོ་སྣང་ཡོད་པར་བཟོ་རྒྱུ་གལ་ཆེན་རེད། ཅེས་གསུངས་སོང།
ཡང་ཁོས་གིས། རྒྱ་ནག་གཞུང་གིས་ག་དུས་ཡིན་ཡང་རྒྱལ་སྤྱིའི་སྟེང་དུ་བོད་ཀྱི་ལོ་རྒྱུས་ལ་འཁྱོག་བཤད་བྱེད་མུས་ཡིན་པ་ལྟར། བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༠༢ ནས་བཟུང་ཨ་རིའི་གྲོས་ཚོགས་སུ་བོད་ཐོག་ཏུ་འཛིན་པའི་སྲིད་ཇུས་ཀྱི་གཏན་འབེབས་དང་། ཕྱི་ལོ་ ༢༠༢༠ ལོར་ཁྲིམས་འཆར་གྱི་ངོ་བོ་སྟེང་དུ་བཞག་པ། ཉེ་ཆར་ཨ་རི་གྲོས་ཚོགས་སུ་བོད་ཀྱི་ལོ་རྒྱུས་གནས་བབ་ལ་མཁས་པའི་ཉན་ཞིབ་ཐེངས་དང་པོ་ཚོགས་ཐུབ་པ་བཅས་ཀྱི་འབད་བརྩོན་བྱེད་ཀྱི་ཡོད་ལ། མ་འོངས་བར་ཨ་རིའི་གྲོས་ཚོགས་སུ་རྒྱ་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་ཀྱི་ཁྲིམས་འཆར་གཏན་འབེབས་བྱ་འཆར་ཡོད་པའི་སྐོར་དང་། བོད་ཀྱི་སྤྱི་ཚོགས་ནང་དུ་རང་བཙན་དང་དབུ་མའི་ལམ་གཉིས་ཀྱི་ལངས་ཕྱོགས་ཀྱིས་ནང་ཁུལ་མ་མཐུན་པའམ་ཉམས་ཆག་གི་རྣམ་པ་ཞིག་ཡོང་བསྡད་ཡོད། ལྟ་གྲུབ་དང་ལངས་ཕྱོགས་མི་འདྲ་བ་ཡོད་པ་དེས་ང་ཚོའི་མ་འོངས་བའི་ཕུགས་རྒྱང་དང་། བོད་ནང་གི་བོད་མིའི་དཀའ་ངལ་ལ་ལྟ་དགོས་རྒྱུ་མ་གཏོགས། གང་ཟག་དང་སྒེར་པ་ཙམ་ཞིག་རྩོད་བསྡད་ཚེ། ང་ཚོ་བོད་སྤྱི་བའི་དཀའ་ངལ་ལ་དོ་ཕོག་འགྲོ་ངེས་ཡོན་པས། ལངས་ཕྱོགས་མི་འདྲ་བའི་ཚོགས་སྡེ་གང་ཡིན་རུང་། བོད་སྤྱི་པའི་རྩ་དོན་འཐབ་རྩོད་ཐོག་ཏུ་ནུས་པ་སྤུངས་ཐུབ་པར་འབད་བརྩོན་བྱ་རྒྱུ་གལ་ཆེན་ཡིན་སྐོར་གསུངས་སོང་།
བཀའ་ཟུར་བློ་བཟང་སྙན་གྲགས་ལགས་ཀྱིས་དྲ་ལམ་བརྒྱུད། བོད་མི་རིགས་ཀྱི་འཕྲལ་ཐུགས་རྒྱང་གསུམ་གང་དུ་བལྟས་ཀྱང་སྒྲིག་འཛུགས་གཉིས་ཀྱི་བྱེད་ཕྱོགས་ལ་བརྟེན་དགོས་ཀྱི་འདུག དེ་ནི་མང་གཙོའི་སྒྲིག་འཛུགས་དང་དགའ་ལྡན་ཕོ་བྲང་གི་སྒྲིག་འཛུགས་རེད། མང་གཙོ་སྒྲིག་འཛུགས་ཀྱིས་བོད་ཀྱི་སྤྱི་ཚོགས་ཡོངས་རྫོགས་མང་གཙོའི་ལམ་ལུགས་ཀྱི་ཐོག་ནས་སྲ་བརྟན་གོང་འཕེལ་གཏང་དགོས་པ་དང་། དགའ་ལྡན་ཕོ་བྲང་གི་སྒྲིག་འཛུགས་ནི་༧གོང་ས་སྐུ་ཕྲེང་རིམ་བྱོན་གྱིས་བསྐྱངས་བའི་བོད་མི་རིགས་ཀྱི་སྒྲིག་འཛུགས་ཤིག་ཡིན་པས། སྒྲིག་འཛུགས་འདི་གཉིས་ཀྱི་གལ་གནད་ནི་ད་ཐེངས་ཀྱི་ཚོགས་འདུ་འདི་གླེང་གཞི་གཙོ་བོ་ཡིན་པས། བོད་མི་རིགས་ཡོངས་ཀྱིས་གལ་ཆེན་དུ་འཛིན་དགོས་པ་ཞིག་ཡིན་སྐོར་གསུངས་སོང་།
དེ་རིང་དགེ་བཤེས་ཐུབ་བསྟན་ཡར་འཕེལ་ལགས་དང་སློབ་དཔོན་ཆེན་མོ་བྱམས་པ་བསམ་གཏན་ལགས་གཉིས་ཀྱིས་༧གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་བྱུང་རིམ་དང་དེའི་འཕེལ་རིམ། བོད་བརྒྱུད་ནང་བསྟན་གྱི་ཤུགས་རྐྱེན་ཇི་བྱུང་གི་སྐོར་ལ་གཏམ་བཤད་གནང་ཡོད་པ་དང་། དེ་བཞིན་ལོ་རྒྱུས་སློབ་དཔོན་བསོད་ནམས་རྒྱལ་མཚན་ལགས་ཀྱིས་ས་བབ་སྲིད་ཇུས་ཐོག་༧གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་གལ་གནད་སྐོར་དང་། བཀའ་ཟུར་བློ་བཟང་སྙན་གྲགས་ལགས་ནས་བོད་མིའི་རང་དབང་འཐབ་རྩོད་ཀྱི་ཐོག་༧གོང་ས་༧སྐྱབས་མགོན་ཆེན་པོ་མཆོག་གི་གལ་གནད་སྐོར། དགེ་བཤེས་ཐུབ་བསྟན་སྦྱིན་པ་ལགས་དང་བློ་བཟང་བསྟན་འཛིན་ནེགེ་ལགས་གཉིས་ཀྱིས་གོང་ས་ཏཱ་ལའི་བླ་མ་མཆོག་གི་སྒྲིག་འཛུགས་ཀྱི་འབྱུང་འགྱུར་གྱི་གནད་དོན་སྐོར་གཏམ་བཤད་གནང་རྒྱུ་ཡིན་འདུག
བྱམས་པ་ཚེ་རིང་།
